ပြိုင်ဘက်အသစ်နှင့် ယှဉ်ပြိုင်မှုပြင်းထန်လာမည့် ပြည်တွင်းလက်လီလက်ကားဈေးကွက်

ထင်သာမြင်သာအကျိုးရှိမှုတစ်ခုက ပြည်တွင်းစားသုံးသူများအတွက် ကုန်ပစ္စည်းနှင့် ဝန်ဆောင်မှုများကို ပိုမိုရွေးချယ်ခွင့်ရလာနိုင်ခြင်းဖြစ်သည်။

နှစ်စဉ်တိုးတက်လာသော ပြည်တွင်းလက်လီလက်ကားဈေးကွက်အတွက် နောက်ထပ်ပြိုင်ဘက်အသစ်များ ဈေးကွက်အတွင်းဝင်လာရန် အစိုးရကဖိတ်ခေါ်လိုက်သည်။

စီးပွားရေးနှင့် ကူးသန်းရောင်းဝယ် ရေးဝန်ကြီးဌာနက ယခုလ ၉ ရက်နေ့တွင် နိုင်ငံခြားလုပ်ငန်းများကို လက်လီလက်ကားဈေးကွက်တွင် ရာနှုန်းပြည့်နှင့် ဖက်စပ်လုပ်ကိုင်ခွင့်ပြုကြောင်း အမိန့် ညွှန်ကြားချက် ထုတ်ပြန်ခဲ့သည်။

ယင်းညွှန်ကြားချက်က ခေတ်သစ်ပုံစံကို ပြောင်းလဲနေဆဲဖြစ်သော ပြည်တွင်းလက်လီလက်ကားဈေးကွက်ကို ရိုက်ခတ်မှုများရှိလာသည်။

ထင်သာမြင်သာ အကျိုးရှိမှုတစ်ခုက ပြည်တွင်းစားသုံးသူများအတွက် ကုန်ပစ္စည်းနှင့် ဝန်ဆောင်မှုများကို ပိုမိုရွေးချယ်ခွင့်ရလာနိုင်ခြင်းဖြစ်သည်။

“ထုတ်ပြန်ချက်နဲ့ပတ်သက်လို့ ပြောရရင်တော့ စားသုံးသူတွေအတွက် ကောင်းပါတယ်။ ကုန်စည်၊ ဝန်ဆောင်မှုအပိုင်းမှာ အရည်အသွေးကောင်းတာကို ရွေးချယ်ခွင့်၊ ဈေးနှုန်းပိုင်းမှာလည်း ပိုပြီးအဆင်ပြေလာမှာပေါ့” ဟု ပြည် ထောင်စုသမ္မတမြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် ဥက္ကဋ္ဌ ဦးဇော်မင်းဝင်းက မှတ်ချက်ပေးသည်။

သို့သော် တစ်ဖက်တွင် နိုင်ငံခြားလက်လီလက်ကားလုပ်ငန်းများဝင်ရောက်လာပါက ပြည်တွင်းရှိတိုင်းရင်းသားပိုင်လုပ်ငန်းအများစုမှာ အပြင်းအထန်ယှဉ်ပြိုင်ရမည့် အနေအထားရှိသည်။

“ခုလို နိုင်ငံတကာလုပ်ငန်းတွေ ဝင်ရောက်လာမှာဖြစ်တဲ့အတွက် ယှဉ်ပြိုင်မှုတွေ ပိုများလာပြီးစားသုံးသူတွေအတွက် ပိုကောင်းတဲ့ကုန်စည်၊ ဝန်ဆောင်မှုတွေကို ပိုမိုရွေးချယ်ခွင့်ရလာနိုင်မှာပါ။ နိုင်ငံတကာစံချိန်စံညွှန်းလိုအပ်ချက်တွေအရ ပြည်တွင်းထုတ်ကုန်များရဲ့ ကုန်စည် အရည်အသွေးတွေ တိုးတက်လာမယ်လို့လည်းထင်ပါတယ်” ဟု စီးတီးမတ်ဟိုးလ်ဒင်းလီမိတက်၏ အုပ်ချုပ်မှုဒါရိုက်တာ ဒေါ်ဝင်းဝင်းတင့်ကဆိုသည်။

ထို့အပြင် မြန်မာ့ထွက်ကုန်များကို သင့်လျော်သည့်ရာခိုင်နှုန်းအချိုးအစားသတ်မှတ်ချက်ဖြင့် ရောင်းချစေခြင်းနှင့် လက်ရှိဈေးကွက်တွင်ရှိနေသော လုပ်ငန်းများအတွက် မျှတသောယှဉ်ပြိုင်မှုဖြစ်စေရန် စိစစ်ပေးရန်လိုကြောင်း မြန်မာနိုင်ငံလက်လီလုပ်ငန်းရှင်များအသင်း ဥက္ကဋ္ဌလည်းဖြစ်သူ ဒေါ်ဝင်းဝင်းတင့်က မှတ်ချက်ပေးသည်။

စားသုံးသူအခွင့်အရေးပိုရရှိရေးနှင့် ယှဉ်ပြိုင်မှု တိုးတက်ရေးမှာယခုအမိန့် ညွှန်ကြားချက်၏ ရည်ရွယ်ချက်များဖြစ်ရာ နိုင်ငံခြားလုပ်ငန်းများအမှန်တကယ် ဝင်ရောက်လာပါကယင်းရည်ရွယ်ချက် အောင်မြင်သည်ဟု ဆိုနိုင်မည်ဖြစ်သည်။

ယင်းအပြင် ပြည်တွင်းထုတ်ကုန်နှင့် ဝန်ဆောင်မှုများအရည်အသွေးနှင့် နည်းပညာတိုးတက်စေရန်၊ ပြည်တွင်းထုတ်ကုန်များဈေးကွက်ပိုရကာ အသေးစားအလတ်စားလုပ်ငန်းများဖွံ့ဖြိုးစေရန်ဆိုသည့် ရည်ရွယ်ချက်များလည်း ရှိသေးသည်။

နိုင်ငံခြားလက်လီလက်ကားလုပ်ငန်းများ ဝင်ရောက်လာသော်လည်း ပြည်တွင်းထုတ်ကုန်ထက် ပြည်ပထုတ်ကုန်များကို တင်သွင်းရောင်းချမည်ဆိုပါက ပြည်တွင်းထုတ်ကုန်ဈေးကွက် ပိုရရေးနှင့် အရည်အသွေး၊ နည်းပညာတိုးတက်ရေးဆိုသည့် ရည်ရွယ်ချက် အထမြောက်ရန် ခက်ခဲမည်ဖြစ်သည်။

အစိုးရ၏ထောက်ပံ့ကူညီမှုမရပါက ပြည်တွင်းလုပ်ငန်းများအနေနှင့် ယှဉ်ပြိုင်ရန် ခက်ခဲမည်ဖြစ်သည်။

“ပြည်ပကနေ ကုန်ပစ္စည်းတွေသွင်းလာကြမယ်။ ဒီဟာကို ဘယ်လို ထိန်းချုပ်မလဲပေါ့။ နိုင်ငံတော်အနေနဲ့ ကိုယ့်ပြည်တွင်း လုပ်ငန်းတွေကိုဘယ်လို မြှင့်တင်ပေးရမလဲဆိုတာ ကြည့်ပေးရမယ်” ဟု ဦးဇော်မင်းဝင်းကဆိုသည်။

လက်ရှိ ပြည်တွင်းမှ ဈေးဝယ်စင်တာများ၊ ၂၄ နာရီလက်လီအရောင်းဆိုင်များတွင် ရောင်းချနေသောကုန်ပစ္စည်း အားလုံး၏ ထက်ဝက်ကျော်မှာ ပြည်ပမှကုန်ပစ္စည်းများသာ အတွေ့ရများကြောင်း စီးတီးမတ်နှင့် အိုးရှင်းဆူပါစင်တာတို့တွင် ဈေးဝယ်လေ့ရှိသူ တာမွေမြို့နယ်နေ ကိုထွန်းရဲနောင်က ဆိုသည်။

“တာမွေအိုးရှင်းမှာ စားစရာမုန့်တန်းကိုကြည့်ရင် တရုတ်၊ ဗီယက်နမ်၊ မလေးရှား၊ အင်ဒိုနီးရှားနဲ့ ဥရောပမုန့်တွေ အများဆုံးတွေ့ရလိမ့်မယ်။ မြန်မာမုန့်ဆိုလို့ သကြားလုံးတို့ဘာတို့တော့ရှိတယ်။ ဒါပေမဲ့ နိုင်ငံခြားကလည်း ဒါတွေအကုန်ရှိတာပဲ”ဟု ၎င်းက ပြောသည်။

ပြည်တွင်းထုတ် မုန့်အများစုကို မိရိုးဖလာအိမ်ဆိုင်လေးများနှင့် လမ်းဘေးဆိုင်များတွင်သာ အတွေ့ရများကြောင်း ၎င်းက ဆက်ပြောသည်။

ဤသည်မှာ အစားအစာကဏ္ဍတစ်ခုသာရှိသေးပြီး ကျန်ထုတ်ကုန်များတွင်လည်း နိုင်ငံခြားကုန်စည်များကသာ အများဆုံးနေရာယူထားလေ့ရှိသည်။

ထိုင်းနိုင်ငံထုတ် နားကျပ်တံမှသည် အဝတ်အထည်၊ အသုံးအဆောင်ပစ္စည်းမျိုးစုံအထိ နိုင်ငံခြားဖြစ် ပစ္စည်းများကိုသာ ပြည်တွင်းစားသုံးသူများဝယ်ယူသုံးစွဲ နေကြရသည်။

ဂျပန်ထုတ်ကုန် ပစ္စည်းများကို သီးသန့်ရောင်းချသော နာမည်ကျော် လက်လီအရောင်းဆိုင် Miniso ၊ ယင်းနှင့်ပြိုင်ဘက် တရုတ်အမှတ်တံဆိပ် ထုတ်ကုန်များရောင်းချသော MGOU ဆိုင်များတွင် ဈေးဝယ်သူများအမြဲလိုလို စည်ကားနေသည်ကို တွေ့ရသည်။

ယင်းထုတ်ကုန်များသည် တန်ဖိုးနည်း၊ အရည်အသွေးကောင်းပြီး ပြည်တွင်းတွင် ယှဉ်ပြိုင်ထုတ်လုပ်မည့်သူမရှိသေးသော ကုန်ပစ္စည်းများဖြစ်ကြသည်။

ဝယ်ချင်စဖွယ်ဖြစ်ရန် ပြင်ဆင်ထုပ်ပိုးထားသော သော့ချိတ်၊ အရုပ်၊ ကလေးစရာ၊ မီးဖိုချောင်သုံးလက်အိတ်၊ အိမ်တွင်းစီးအဝတ်ဖိနပ် စသည့် ဖန်စီပစ္စည်းက အများစုဖြစ်သည်။

“ဒီဆိုင် (Miniso) က အရုပ်လေးတွေဆိုရင် ချစ်ဖို့ကောင်းတယ်။ ဝယ်ချင်စရာလေးတွေ။ ဈေးလည်းအရမ်းမကြီးဘူး။ တခြားပစ္စည်းတွေဆိုလည်း မြင်တာနဲ့ ဝယ်ချင်အောင်ကို သူတို့ကလုပ်ထားတာ” ဟုကျောက်တံတားမြို့နယ် ၃၈ လမ်းရှိ Minisoဆိုင်တွင် ဈေးဝယ်နေသူ တစ်ဦးက ဆိုသည်။

ယခုခွင့်ပြုမှုတွင် ကန့်သတ်တားမြစ်ထားသော ကုန်စည်များမှအပ ကျန်ကုန်ပစ္စည်းအားလုံးကို ပြည်ပမှ တင်သွင်းရောင်းချခွင့်ရရှိမည်ဖြစ်ကြောင်း အဆိုပါ အမိန့်ညွှန်ကြားချက်တွင် ဖော်ပြထားရာ နိုင်ငံခြားဖြစ်ပစ္စည်းအမယ်သစ်များစွာကို မကြာမီထပ်မံမြင်တွေ့လာရတော့မည့် အခြေအနေဖြစ်သည်။

ဤအခြေအနေတွင် ပြည်တွင်းထုတ်ကုန်များအရည်အသွေးနှင့် နည်းပညာ ပိုမိုဖွံ့ဖြိုးတိုးတက်လာစေရန်ဆိုသည့်ရည်ရွယ်ချက် အထမြောက်အကောင်အထည်ဖော်နိုင်ရန် အစိုးရဘက်က ပြည်တွင်းလုပ်ငန်းများကို ထောက်ပံ့ပေးရန်လိုကြောင်း လုပ်ငန်းရှင်များက ဆိုကြသည်။

အစိုးရ၏ ထောက်ပံ့ကူညီမှုမရှိပါက ပြည်တွင်းလုပ်ငန်းများအနေနှင့် ယှဉ်ပြိုင်နိုင်ရန် ခက်ခဲမည်ဖြစ်ပြီးလုပ်ငန်းအချို့ ရပ်ဆိုင်းနိုင်သလိုအလုပ်လက်မဲ့အခြေအနေများလည်း ဖြစ်ပေါ်လာနိုင်ကြောင်း ဦးဇော်မင်းဝင်းက ဆိုသည်။

“ယှဉ်ပြိုင်တဲ့နေရာမှာလည်း ကုန်ပစ္စည်းအမျိုးအစားပေါ် မူတည်သေးတာပေါ့။ ဒါပေမဲ့ အများစုကတော့ ယှဉ်နိုင်ဖို့မလွယ်ဘူး။ နိုင်ငံခြားကုန်စည်တွေကအမြောက်အမြားထုတ်နိုင်ကြတယ်။ ဈေးနှုန်းအားဖြင့်လည်း အများကြီးသက်သာနိုင်တယ်။ အရည်အသွေးပိုင်းမှာလည်း ပြည်တွင်းထုတ်ကုန်ထက်ပိုကောင်းတာတွေရှိတာကိုး” ဟု ၎င်းက ဆိုသည်။

ပြည်တွင်းထုတ်ကုန်များဈေးကွက်ပိုရလာရန် လက်လီလက်ကားလုပ်ငန်း ခွင့်မပြုခင်မှာပင် တင်သွင်းရောင်းချမည့် ကုန်ပစ္စည်းများ၏ ရာခိုင်နှုန်းအချိုးတစ်ခုကို မြန်မာ့ထွက်ကုန်များရောင်းချပေးရမည်ဆိုသည့် သတ်မှတ်ချက်ကို ထည့်သွင်းထားပါက ဈေးကွက်အခွင့်အလမ်းပိုရလာနိုင်ကြောင်း စီးတီးမတ်ဟိုးလ်ဒင်းလီမိတက်၏ အုပ်ချုပ်မှုဒါရိုက်တာ ဒေါ်ဝင်းဝင်းတင့်က ဆိုသည်။

ယခုအမိန့် ညွှန်ကြားချက်တွင် လက်လီလက်ကားလုပ်ငန်းလုပ်ကိုင်မည့် လုပ်ငန်းသစ်များအတွက် သတ်မှတ်ချက်များလည်းတစ်ပါတည်းဖော်ပြထားသည်။

ရာနှုန်းပြည့် နိုင်ငံခြားလုပ်ငန်းအဖြစ်လည်ပတ်မည်ဆိုပါက လက်ကားလုပ်ငန်းအတွက် မြေငှားရမ်းခမပါ အမေရိကန်ဒေါ်လာငါးသန်းနှင့် အထက်၊ လက်လီလုပ်ငန်းအတွက် မြေငှားရမ်းခမပါ အမေရိကန်ဒေါ်လာသုံးသန်းနှင့်အထက် ရင်းနှီးမြှုပ်နှံရမည်ဖြစ်သည်။

မြန်မာနိုင်ငံသားနှင့် နိုင်ငံခြားသား ဖက်စပ်လုပ်ကိုင်မည်ဆိုပါက မြန်မာနိုင်ငံသား လုပ်ငန်းရှင်ဘက်မှ ရင်းနှီးမြှုပ်နှံမှု၏ ၂၀ ရာခိုင်နှုန်းထည့်ဝင်မှသာ ဖက်စပ်လုပ်ငန်းအဖြစ်အသိအမှတ်ပြုမည်ဖြစ်ပြီး ဖက်စပ်လက်ကားလုပ်ငန်းအတွက် မြေငှားရမ်းခမပါ အမေရိကန်ဒေါ်လာ နှစ်သန်းနှင့်အထက်၊ ဖက်စပ်လက်လီလုပ်ငန်းအတွက် မြေငှားရမ်းခမပါ အမေရိကန်ဒေါ်လာခုနှစ်သိန်းနှင့်အထက် ဖြစ်ရန်လိုကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက သတ်မှတ်ထားသည်။

ရာနှုန်းပြည့် နိုင်ငံသားပိုင်လုပ်ငန်းအဖြစ် လည်ပတ်မည်ဆိုပါက တတ်နိုင်သည့် ကနဦးရင်းနှီးငွေပမာဏဖြင့် လက်လီလက်ကားလုပ်ကိုင်နိုင်ကြောင်း အဆိုပါညွှန်ကြားချက်တွင် ဖော်ပြထားသည်။

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ အမိန့်ညွှန်ကြားချက် အပိုဒ် ၇ (ခ) တွင်ပါရှိသော သတ်မှတ်ချက်အရ ပြည်တွင်းတွင် ယခင်ကတည်းက လက်လီလက်ကားလုပ်ကိုင်နေသည့် လုပ်ငန်းများအနက်မှ ကနဦး ရင်းနှီးမြှုပ်နှံမှုပမာဏ အမေရိကန်ဒေါ်လာ ခုနှစ်သိန်းနှင့်အထက် သို့မဟုတ် ယင်းနှင့် ညီမျှသော မြန်မာကျပ်ငွေဖြင့် လုပ်ငန်းဆောင်ရွက်နေသော နိုင်ငံသားပိုင်လုပ်ငန်းများအနေနှင့် အဆိုပါအမိန့်ညွှန်ကြားချက်ထုတ်ပြန်ပြီး ရက်ပေါင်း ၁၅၀ အတွင်း လက်လီလက်ကားလုပ်ငန်း ပြန်လည်မှတ်ပုံတင်ရမည်ဖြစ်ကြောင်း ဖော်ပြထား သည်။

ကုမ္ပဏီမှတ်ပုံတင်၊ လက်ရှိဖြန့်ဖြူးရောင်းချနေသော ကုန်ပစ္စည်းအုပ်စုစာရင်း၊ ရင်းနှီးမြှုပ်နှံမှုငွေပမာဏ၊ လုပ်ငန်းတည်နေရာ၊ အကျယ်အဝန်းစသည့် လုပ်ငန်းဆောင်ရွက်မှု အသေးစိတ်အခြေအနေနှင့် လုပ်ငန်းခွဲ၊ ဆိုင်ခွဲများအတွက်လည်း ယင်းသတ်မှတ်ချက်များအတိုင်းတင်ပြမှတ်ပုံတင်ရမည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက ထုတ်ပြန်ထားသည်။

လက်ရှိထုတ်ပြန်ကျင့်သုံးနေသော နည်းဥပဒေများသည် ပြည်တွင်းလုပ်ငန်းရှင်များအတွက် လုံလောက်မှုရှိပြီးဖြစ်သလို မှတ်ပုံတင်ရန်လိုအပ်ချက်များသည် တည်ရှိလည်ပတ်နေသော လုပ်ငန်းများအတွက် ရည်ရွယ်ထားခြင်းမရှိကြောင်းတွေ့ရသည့်အပြင် လုပ်ငန်းဆောင်ရွက်မှုအသေးစိတ်ဖော်ပြချက် (Business Plan) တင်ပြရမည်ဆိုသည်မှာလည်းအဓိပ္ပာယ်မရှိလှကြောင်း ဒေါ်ဝင်းဝင်းတင့်က ထောက်ပြသည်။

“ရှိပြီးသားလုပ်ငန်းတွေအနေနဲ့ ဆိုင်ပေါင်းရာနဲ့ချီဖွင့်ပြီးဖြစ်တဲ့အတွက် သူတို့ရဲ့ Business Plan ကို အကောင်အထည်ဖော်ပြီးနေပါပြီ။ ဖော်ပြထားတဲ့မှတ်ပုံတင်လိုအပ်ချက်တွေဟာ နိုင်ငံခြားကုမ္ပဏီတွေအတွက်သာ ကျင့်သုံးသင့်တယ်” ဟု ၎င်းက အကြံပြုသည်။

စီးတီးမတ်ဟိုးလ်ဒင်း လီမိတက်သည် အဓိကဈေးဝယ်စင်တာကြီးများဖြစ်သော City Mart Supermarket၊ Ocean Supercenter၊Marketplace ဆိုင်များ ဖွင့်လှစ်ထားသည့်အပြင် Sea-sons Bakery & Café၊ Season Bristo၊ City Care  ဆေးဆိုင်၊ ၂၄ နာရီဖွင့်လှစ်သော City Express၊ City Books & Music၊ City Baby Club၊ Safari Book Store နှင့် City Mart Neighbourhood Store စသည့် လက်လီလက်ကားဆိုင် အမျိုးအစားများစွာဖြင့် လည်ပတ်လျက်ရှိပြီး ဆိုင်ခွဲစုစုပေါင်း ၂၁၂ ဆိုင်အထိ ဖွင့်လှစ်ထားသည်။

ယခုထုတ်ပြန်လိုက်သော အမိန့်ညွှန်ကြားချက်တွင် မှတ်ပုံတင်ရန်စည်းကမ်းချက်အရ ဆိုင်ခွဲတစ်ခုချင်းစီနှင့် ဆိုင်အမျိုးအစားတစ်ခုချင်းစီအတွက် လုပ်ငန်းဆောင်ရွက်မှု အသေးစိတ်ဖော်ပြချက်ကို တင်ပြမှတ်ပုံတင်ရမည်ဖြစ်သည်။

“ပြည်တွင်းလုပ်ငန်းတွေအနေနဲ့ လက်ရှိစည်းမျဉ်းဥပဒေတွေနဲ့တင် အချိန်၊ ငွေကြေးကုန်ကျမှုတွေရှိပြီးသားပါ။ အခုညွှန်ကြားချက်အရဆိုထပ်ကုန်ကျရမယ့်သဘောဖြစ်နေပါတယ်။ အစိုးရအနေနဲ့ တင်းကျပ်မှုလုပ်မယ့်အစား လုပ်ငန်းလုပ်ကိုင်ဖို့ ပိုလွယ်အောင် ကူညီဆောင်ရွက်သင့်တယ်လို့ ထင်ပါတယ်” ဟုဒေါ်ဝင်းဝင်းတင့်က ဆိုသည်။

လက်ရှိ ပြည်တွင်းလက်လီလက်ကားဈေးကွက်မှာအခြားနယ်ပယ်မှ ဈေး ကွက်များကဲ့သို့ပင် ရုန်းကန်နေရသည့် အခြေအနေဖြစ်ပြီးလုပ်ငန်းသစ်များစွာဈေးကွက်တွင်းဝင်လာသည့်အတွက် ယှဉ်ပြိုင်မှု ပြင်းထန်လျက်ရှိသည်။

ပြီးခဲ့သည့် ၂၀၁၇ ခုနှစ်အတွင်း လက်လီဈေးဆိုင်သစ်ဖွင့်လှစ်မှုမှာ ၂၀၁၆ ခုနှစ်ထက် နှစ်ဆပိုများကာစံချိန်တင်ခဲ့ကြောင်းအိမ်၊ ခြံ၊ မြေဈေးကွက် အကြံပေးနှင့် သုတေသနလုပ်ငန်း Colliers International ၏ ၂၀၁၇ ခုနှစ် စတုတ္ထလေးလပတ်အစီရင်ခံစာတွင် ဖော်ပြထားသည်။

လာမည့် သုံးနှစ်မှ ငါးနှစ်အတွင်း လက်လီဈေးဆိုင်သစ်များနေရာယူမှုမှာဆက်လက်မြင့်တက်နေမည်ဖြစ်ပြီး ဈေးဆိုင်ငှားရမ်းခများလည်း ၄ ရာခိုင်နှုန်း၊ ၅ ရာခိုင်နှုန်း နှစ်အလိုက် မြင့်တက်သွားနိုင်ကြောင်း အဆိုပါအစီရင်ခံစာတွင် ခန့်မှန်းသုံးသပ်ထားသည်။

ဆိုင်ခွဲဖွင့်လှစ်မှုများပြားလာခြင်းကြောင့် အခန်းငှားရမ်းခ၊ မြေငှားရမ်းခများ မြင့်တက်လာခြင်းသည် ရင်းနှီးမြှုပ်နှံငွေကြေးရှားပါးသော ပြည်တွင်းလုပ်ငန်းရှင်များအတွက် စိန်ခေါ်မှုတစ်ရပ်ဖြစ်လာသည်။

“ပြည်တွင်းလုပ်ငန်းရှင်တွေအတွက် မြေငှားရမ်းခနဲ့မြေဈေးကြီးမြင့်လာမယ်ဆိုရင် လုပ်ငန်းတိုးချဲ့ဖို့ အခက်အခဲတွေဖြစ်နိုင်ပါတယ်။ လုပ်ငန်းက ဆက်မကြီးထွားလာဘူးဆိုရင် ဒီပေါ်မှာမှီခိုနေတဲ့ ပစ္စည်းတင်သွင်းသူတွေ၊ ဝန်ထမ်းတွေအတွက်လည်းရေရှည်အာမခံချက်ပေးနိုင်မှာမဟုတ်ပါဘူး” ဟု ဒေါ်ဝင်းဝင်းတင့်က ဆိုသည်။

နိုင်ငံခြားလုပ်ငန်းအများစုမှာ ပြည်ပဘဏ်များထံမှ အတိုးနှုန်းသက်သာသောချေးငွေများဖြင့် ပြည်တွင်းတွင် လုပ်ငန်းလာရောက်လုပ်ကိုင်နိုင်သော်လည်း ပြည်တွင်းလုပ်ငန်းအများစုအတွက် အတိုးနှုန်းသက်သာသော အရင်းအနှီးချေးငွေရရှိရေးဆိုသည်မှာခက်ခဲနေဆဲ ဖြစ်သည်။

“မျှတတဲ့ယှဉ်ပြိုင်မှုတွေဖြစ်ဖို့ အစိုးရအနေနဲ့ ထိန်းကျောင်းပံ့ပို့ပေးဖို့ လိုပါတယ်” ဟု မြန်မာနိုင်ငံလက်လီလုပ်ငန်းရှင်များအသင်းဥက္ကဋ္ဌ ဒေါ်ဝင်းဝင်းတင့်က ဆိုသည်။ 

စစ်ငြိမ်းသူ

You may also like...

Leave a Reply

Your email address will not be published. Required fields are marked *