အစိုးရလက်ကျန်သက်တမ်း မျှော်လင့်ချက် ဦးဝင်းမြင့် အဟုတ်လုပ်ပြီလား

နိုင်ငံ၏အရေးပါသည့် ပြည်ထောင်စုဝန်ကြီးတစ်ဦးသည် နောက်ဆုံးတွင် နုတ်ထွက်ခဲ့ပြီဖြစ်ရာ အစိုးရအဖွဲ့လက်ကျန် ဒုတိယသက်တမ်းဝက်သည် ကစားအား ပို၍ တက်လာတော့မည်လော။

ပြေးနေသည့် သတင်းများအရ အပြောင်းအလဲများသည် ဆက်လက်ရှိနေဦးမည့်ပုံ။

”ကျွန်တော့်အနေနဲ့ မိဘပြည်သူတွေ မျှော်လင့်နေတဲ့ အပြောင်းအလဲတွေကို မျက်ဝါးထင်ထင်တွေ့မြင်နိုင်ဖို့ ကိုယ်ရောစိတ်ပါမြှုပ်နှံပြီး ကြိုးပမ်းဆောင်ရွက်မှာ ဖြစ်ပါတယ်” ဟု သမ္မတသစ် ဦးဝင်းမြင့်က မြန်မာနှစ်သစ်ကူးမိန့်ခွန်းတွင် ပြောဆိုခဲ့သည်။

အဆိုပါမိန့်ခွန်းတွင်ပင် နိုင်ငံအတွက် လိုအပ်နေသည့် ပြုပြင်ပြောင်းလဲဖွယ်ရာများနှင့်ပတ်သက်၍ ဦးဝင်းမြင့်က သူ၏အစီအစဉ်များကို ပြည်သူလူထုသို့ အသိပေးကြေညာခဲ့သေးသည်။

သမ္မတ ဦးထင်ကျော်သည် ပြီးခဲ့သည့် မတ်လတတိယပတ်က သမ္မတအဖြစ်မှ အနားယူခဲ့ပြီး ဦးဝင်းမြင့်ဖြင့် အစားထိုးခဲ့သည်။

ယခုဆိုလျှင် သမ္မတသစ်၏သက်တမ်းသည် နှစ်လမျှ ရှိလာပြီဖြစ်သည်။

ပြည်သူ့လွှတ်တော်၏ ဥက္ကဋ္ဌလည်းဖြစ်၊ စည်းမျဉ်း၊စည်းကမ်းများနှင့်ပတ်သက်၍ အလေးအနက်ထားတတ်သည့် ဥပဒေပညာရှင်လည်းဖြစ်သူ ဦးဝင်းမြင့်သည် လက်ကျန် ဒုတိယပိုင်းကို ခြေကုန်ထုတ်၍ ကစားနေပြီလောဆိုသည့် မေးခွန်းများကို ယခုရက်များအတွင်း ပေါ်ပေါက်ခဲ့ သည့် ဖြစ်ရပ်များမှတစ်ဆင့် ပေါ်ထွက်လာစေသည်။

စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းကို မေလ ၂၅ ရက်နေ့က နုတ်ထွက်စေလိုက်သည်။

၎င်းသည် ပြီးခဲ့သည့်လများစွာကပင် ဖြုတ်ရန် သို့မဟုတ် အနားပေးရန် သတင်းထွက်ပေါ်ခဲ့သူဖြစ်သည်။

ဝန်ကြီး ဦးကျော်ဝင်းနုတ်ထွက်မှုသည် အကျင့်ပျက်ခြစားမှုနှင့်လည်း ဆက်စပ်နေပြီး မြန်မာနိုင်ငံအဂတိလိုက်စားမှု တိုက်ဖျက်ရေးကော်မရှင်က ၎င်းကိုစုံစမ်းစစ်ဆေးခဲ့သည်။ တွေ့ရှိချက်များကို နိုင်ငံတော်သမ္မတထံသို့ တင်ပြခဲ့ပြီး မကြာမီတွင်ပင် နုတ်ထွက်သွားခြင်းလည်းဖြစ် သည်။

သမ္မတ ဦးဝင်းမြင့်သည် သူမိန့်ခွန်းတွင် အဂတိလိုက်စားမှုတိုက်ဖျက်ရေးနှင့်ပတ်သက်၍ နှိုးဆော်ခဲ့ပြီး အရှိန်မြင့်လုပ်ဆောင်မည်ဖြစ်ကြောင်း ပြောဆိုခဲ့သည်။

၎င်းအနေနှင့် သမ္မတအဖြစ်တင်မြှောက်ခံရပြီး အဂတိလိုက်စားမှုတိုက်ဖျက်ရေးကော်မရှင်နှင့် ပထမဆုံးတွေ့ဆုံခဲ့သည်။

လုပ်ငန်းတာဝန်များနှင့် စပ်လျဉ်း၍ မျက်နှာကြီးငယ်မလိုက်၊ ဆူကြုံနိမ့်မြင့်မရွေး ပြတ်ပြတ်သားသားဆောင်ရွက်ရန် ၎င်းက အဆိုပါကော်မရှင်သို့ တိုက်တွန်းပြောဆိုခဲ့သည်။

များမကြာမီအတွင်း ငါးကြီးကြီး ကြော်နိုင်လိမ့်မည်ဖြစ်ကြောင်း ကော်မရှင်ဘက်ကလည်း အများပြည်သူသို့ ထုတ်ဖော် ပြောဆိုခဲ့သေးသည်။

ယင်းအပြင် ကော်မရှင်အနေနှင့်လည်း အဂတိလိုက်စားမှုတိုက်ဖျက်ရေးဥပဒေကို ပြင်ဆင်ထားပြီး လွှတ်တော်က အတည်ပြုပေးရန် စောင့်ဆိုင်းနေသည်။ ယင်းပြင်ဆင်သည့်ဥပဒေအရ အဂတိလိုက်စားမှုနှင့်ပတ်သက်၍ ကျယ်ကျယ်ပြန့်ပြန့် အရေးယူလာနိုင်မည်ဖြစ်သည်။ အဆိုပါပြင်ဆင်မှုတွင် ယခင်က တိုင်ကြားသူရှိမှသာ စစ်ဆေးအရေးယူနိုင်မည့်အခြေအနေမှ အဂတိလိုက်စားကြောင်း သတင်းကျော်စောရုံဖြင့် စစ်ဆေးအရေးယူနိုင်မည်ဖြစ်သည်။

ယခုဖြစ်ရပ်က သူ့စကားကို အကောင်ထည်ဖော်ပြခြင်းအဖြစ် လူအများက နားလည်လိုက်ကြသည်။

”သူ စပြီးတော့တက်တဲ့အချိန်မှာ အကျင့်ပျက်ခြစားမှုကိစ္စ ပြောတယ်။ နောက်တစ်ခုကကျတော့ ကော်မရှင်နဲ့လည်း ခေါ်တွေ့တယ်။ အခုကကျတော့ ဆက်ပြီးတော့ အရေးယူမှုတွေ စလာတာပေါ့နော်။ အဲဒီတော့ ဒါကတော့ ကျွန်တော်ထင်တယ်။ သူ လေးလေးနက်နက်ရှိတယ်လို့ ကျွန်တော်ထင်တယ်” ဟု မြန်မာ့မူဝါဒလေ့လာရေး သုတေသနသိပ္ပံ (ISP Myanmar) ၏ ဒါရိုက်တာ ဦးအောင်သူငြိမ်းက သုံးသပ်သည်။

မကြီးမားသော်လည်း အခြားအစိုးရအဖွဲ့ဝင်အချို့ကို ပြီးခဲ့သည့်ရက်များတွင်း အပြောင်းအလဲ လုပ်ခဲ့သေးသည်။

ပြည်ထဲရေးဝန်ကြီးဌာန ပြည်ထောင်စု ဒုတိယဝန်ကြီး၊ ချင်းပြည်နယ်အစိုးရအဖွဲ့ စည်ပင်သာယာရေး၊ လျှပ်စစ်နှင့် စက်မှုလက်မှုဝန်ကြီးဌာန ဝန်ကြီး၊ မွန်ပြည်နယ်အစိုးရအဖွဲ့၊ လျှပ်စစ်၊ စွမ်းအင်နှင့် စက်မှုဝန်ကြီးဌာန ဝန်ကြီး၊ စစ်ကိုင်းတိုင်းဒေသကြီးအစိုးရအဖွဲ့ လုံခြုံရေးနှင့် နယ်စပ်ရေးရာ ဝန်ကြီးတို့ကို အပြောင်းအလဲ ပြုလုပ်ခဲ့သည်။

ယင်းက ”ပြုပြင်ပြောင်းလဲမှုနဲ့ အံမဝင် ခွင်မကျတဲ့နေရာတွေမှာ သွက်လက်ထက်မြက်ပြီး အရည်အသွေးရှိတဲ့ လူစားလဲမှုတွေ လုပ်သင့်ရင်လည်း လုပ်ဆောင်ရမှာဖြစ်ပါတယ်” ဆိုသည့် သူ၏စကားကို အမှတ်ရစေသည်။

တစ်ချိန်တည်းမှာပင် သမ္မတ ဦးဝင်းမြင့်သည် ပြည်ထောင်စုတရားသူကြီးချုပ်နှင့် တရားလွှတ်တော်ချုပ်တရားသူကြီးများကို တောက်လျှောက်တွေ့ဆုံခဲ့ပြီး တရားစီရင်ရေးမဏ္ဍိုင် တည့်မတ်ခိုင်မာစေရေး၊ တိုင်းဒေသကြီး၊ ပြည်နယ်၊ ခရိုင်နှင့် မြို့နယ်အဆင့်များအထိ အဆင့်ဆင့် တာဝန်ယူမှု တာဝန်ခံမှုစနစ်များဖြင့် ဆင့်ကဲ ဆင့်ကဲ ကြပ်မတ်ဆောင်ရွက်ရန်နှင့် တရားခွင်များတွင် တရားသူကြီးများအနေနှင့် ဥပဒေများ၊ ကျင့်ထုံးများ၊ လုပ်ထုံးလုပ်နည်းများနှင့်အညီ တိတိကျကျ မြန်မြန်ဆန်ဆန် ဆောင်ရွက်ရေး ဆွေးနွေးခဲ့သည်။

တရားဥပဒေစိုးမိုးရေးရှိခြင်းဖြင့်သာ နိုင်ငံခြားရင်းနှီးမြှုပ်နှံမှုများကို ဆွဲဆောင်နိုင်မည်ဖြစ်ကာ နိုင်ငံ၏စီးပွားရေးကိုလည်း ဆွဲတင်နိုင်မည့်အကြောင်း ပြောဆိုခဲ့သည်။

အလားတူပင် မြန်မာနိုင်ငံအမျိုးသားလူ့အခွင့်အရေးကော်မရှင်၊ ပြည်ထောင်စု ဥပဒေဆိုင်ရာအထောက်အကူပေးရေးအဖွဲ့၊ ပြည်ထောင်စုစာရင်းစစ်ချုပ်၊ တိုင်းဒေသကြီးနှင့် ပြည်နယ်စာရင်းစစ်ချုပ်များနှင့်လည်း ဆက်လက်တွေ့ဆုံခဲ့သည်။

“အပြောင်းအလဲတွေကတော့ ရှိနိုင်ပါတယ်။ ယေဘုယျလည်း ဒီအတိုင်းတွက်ဆလို့ ရတယ်လေ” ဟု ဦးအေးမောင်ကျော်က ဆိုသည်။

၎င်းသည် နိုင်ငံရေး၊ စီးပွားရေးဆိုင်ရာများကို အဓိကရေးသားတင်ဆက်လျက်ရှိသည့် မြန်မာ့ရေးရာမဂ္ဂဇင်း၏ အယ်ဒီတာတစ်ဦးဖြစ်သည်။

၂၀၁၆ ခုနှစ် မတ်လကုန်ကစ၍ တာဝန်ယူခဲ့သည့် အစိုးရအဖွဲ့အနေနှင့် သက်တမ်း၂ နှစ်ကျော်လာပြီဖြစ်ကာ မကြာခင် ထက်ဝက်ကျိုးတော့မည်ဖြစ်သည်။ ယခုအချိန်သည် အစိုးရအဖွဲ့၊ ဝန်ကြီးဌာနများ၏ အားနည်းချက်၊ အားသာချက်တို့အပေါ် ပြန်လည်သုံးသပ်နိုင်သည့်ကာလ ဖြစ်သလို ရှေ့ဆက်သွားမည့်လမ်းအတွက် ပြင်ဆင်ရန် အကောင်းဆုံးအချိန်လည်းဖြစ်သည်။

ယင်းအပြင် သက်တမ်းကုန်ခါနီးတွင် အထွေထွေရွေးကောက်ပွဲလည်း ရှိနေသည်ဖြစ်ရာ ရွေးကောက်ပွဲတွင် အမှတ်ကောင်းရရန်ဆိုသည်မှာလည်း အစိုးရအဖွဲ့၏စွမ်းဆောင်ရည်သည် အခရာဖြစ်သည်။

“ဘာတွေလိုခဲ့သလဲ၊ ဘယ်ဌာနတွေက လိုအပ်မှုရှိတယ်၊ ဘယ်ဌာနတွေက မလိုအပ်ဘူးလဲ၊ ချတဲ့မူဝါဒတွေက ဘယ်ဟာတွေမှားတယ်၊ ဘယ်ဟာတွေမှန်တယ်ဆိုတာ သုံးသပ်လို့ရပြီလေ။ ရပြီဆိုရင် ဒီအချိန်မှာ ပြောင်းလဲရမှာ” ဟု ဦးအေးမောင်ကျော်က ဆိုသည်။

သမ္မတ ဦးဝင်းမြင့်သည် အဂတိလိုက်စားမှုတိုက်ဖျက်ရေးကိစ္စအပြင် ပြုပြင်ပြောင်းလဲမှု နှောင့်နှေးနေသည့်ဌာနများကို ကြပ်မတ်ခြင်း၊ ယိမ်းယိုင်နေသည့် တရားစီရင်ရေးကို တည့်မတ်ရေး၊ လူ့အခွင့်အရေးချိုးဖောက်မှုများကို ကာကွယ်ရေး၊ မူးယစ် ဆေးဝါးကို ပိုမိုနှိမ်နှင်းရေး၊ ပြည်သူ့ဘဏ္ဍာများ အလေအလွင့်မရှိအောင် စီမံခန့်ခွဲနိုင်ရေး၊ သိမ်းဆည်းလယ်ယာမြေများ ပြန်လည်ရရှိရေး၊ လျော်ကြေး၊ နစ်နာကြေးရရှိရေး၊ တောင်သူလယ်သမားများ၏လူနေမှုဘ၀ တိုးတက်မြင့်မားရေး၊ အလုပ်သမားများ၏ဘ၀ စိုပြည်သာယာရေး၊ ကျောင်းသားလူငယ်များ အဆင့်မြင့်ပညာရပ်များ ဆည်းပူးခွင့်ရရှိရေး၊ အစိုးရပြုပြင်ပြောင်းလဲရေးနှင့် ဗဟိုချုပ်ကိုင်မှုလျှော့ချရေးကိစ္စများနှင့် ပတ်သက်၍လည်း အစီအစဉ်များကို ၎င်းကတင်ပြထားသည်။

မြင်သာသည့်အပြောင်းအလဲများအဖြစ် ဝန်ထမ်းများ လစာတိုးခြင်း၊ အလုပ်သမားများအတွက် အနည်းဆုံးလုပ်ခလစာကို အတည်ပြုနိုင်ခြင်းတို့ကို သူ့လက်ထက်တွင် လုပ်ဆောင်ခဲ့သည်။

လယ်သမားများ၏ စိုက်ပျိုးစရိတ် ထုတ်ချေးမှုနှင့်ပတ်သက်၍လည်း ဖြေလျှော့မှုအချို့ကို လုပ်ဆောင်ခဲ့သည်။

ယခင်က ဝိုင်းလေးချုပ်ဟူသော သုံးဦးပေါင်းစပ်၍ ချေးငွေများချထားပေးခဲ့ပြီး တစ်ဦးဦးက ကြွေးကျန်လျှင် အခြားသူများကိုပါ ချေးငွေရယူခွင့်ကို ပိတ်ပင်ထားခဲ့မှုကို ပယ်ဖျက်လိုက်ကာ တစ်ဦးချင်းစီကို ထုတ်ပေးရန် ပြောင်းလဲလိုက်ခြင်းဖြစ်သည်။

အသေးစား အလတ်စားစီးပွားရေးလုပ်ငန်းများကို ငွေထုတ်ချေးရာတွင် မြန်ဆန်လွယ်ကူစေရန်နှင့် အဆိုပါလုပ်ငန်းများ၏ယုံကြည်စိတ်ချရမှုရှိစေရေး သတင်းအချက်အလက်များ စုဆောင်းသည့်အဖွဲ့အစည်းဖြစ်သည့် Credit Bureau ဖွဲ့စည်းရန်ကိုလည်း ခွင့်ပြုလိုက်သည်။

ပြုပြင်ပြောင်းလဲရေးလှိုင်းသည် လက်ကျန်ကာလတွင် အရှိန်မြှင့်လာရန် ပြည်သူများက မျှော်လင့်ကြသော်လည်း အချို့ကိစ္စများသည် ချက်ချင်းလက်ငင်း လုပ်ဆောင်ရန် မလွယ်ကူပါ။

မူဝါဒတစ်ခုကို အပြောင်းအလဲ လုပ်လိုက်လျှင်သော်မှ ယင်းမူဝါဒ၏ အကျိုးသက်ရောက်မှုကို ကာလတစ်ခုကြာမှသာ ခံစားရမည်ဖြစ်သည်။

“ကျန်တဲ့ပြုပြင်ပြောင်းလဲမှုကျတော့ အချိန်ပေးရမှာပေါ့နော်။ ကျွန်တော်တို့ ထပ်ပြီးတော့ ပြောဖို့တော့ စောသေးတယ်” ဟု ဦးအောင်သူငြိမ်းက ဆိုသည်။

မူးယစ်ဆေးဝါးများ ပေါများနေမှု၊ သက်ငယ်မုဒိမ်းမှုများ မြင့်တက်လာမှု စသည့်ပြဿနာများမှသည် ရှုပ်ထွေးသည့် မြေယာပြဿနာများကလည်း စိန်ခေါ်မှုများဖြစ်သည်။

ပြီးခဲ့သည့်နှစ်ရလဒ်များအရ ယခုနှစ်အတွင်း စီးပွားရေးတိုးတက်မှုများ ရှိလာနိုင်သည်ဟု ကမ္ဘာ့ဘဏ်က ခန့်မှန်းထားမှုသည် အစိုးရအဖွဲ့အတွက် ကျေနပ်စရာဖြစ်သော်လည်း လက်တွေ့မြေပြင်တွင် စီးပွားရေးလုပ်ငန်းရှင်များအပါအဝင် ပြည်သူများအနေနှင့် အကျပ်အတည်းများ ရှိနေသေးသည်။

သို့သော်၊ အစိုးရအနေနှင့် မြေယာနှင့်ပတ်သက်၍ အာရုံစိုက်လျက်ရှိကြောင်း သမ္မတ ဦးဝင်းမြင့်တက်လာပြီးနောက်ပိုင်း ဖြစ်ရပ်များက သက်သေထူလျက်ရှိသည်။

၂၀၁၆ ခုနှစ်ကတည်းက အတည်ပြုထားသည့် အမျိုးသားမြေအသုံးချမှုမူဝါဒနှင့်ပတ်သက်၍ ယင်းမူဝါဒပါ ရည်ရွယ်ချက်များ၊ လမ်းညွှန်ချက်များနှင့် အခြေခံမူများကို အကောင်အထည်ဖော်နိုင်ရေးအတွက် ‘အမျိုးသား မြေအသုံးချမှုကောင်စီ’ အစည်းအဝေးကို ပထမဆုံး ခေါ်ယူနိုင်ခဲ့ သည်။

မူးယစ်ဆေးဝါးများ နိုင်ငံအနှံ့ ပျံ့နှံ့နေခြင်းနှင့် လူငယ်ထုအတွင်း သုံးစွဲမှုကျယ်ပြန့်လာနေခြင်းအပါအဝင် ကြီးထွားလာနေသည့် အဆိုပါပြဿနာအတွက် မေလ ၃၁ ရက်နေ့တွင် သမ္မတ ဦးဝင်းမြင့်သည် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများအန္တရာယ် တားဆီး ကာကွယ်ရေးဗဟိုအဖွဲ့ ဥက္ကဋ္ဌ ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယ ဗိုလ်ချုပ်ကြီးကျော်ဆွေနှင့် အဖွဲ့ဝင်များနှင့် တွေ့ဆုံဆွေးနွေးခဲ့သည်။

မူးယစ်ဆေးဝါးအန္တရာယ်ကို အမျိုးသားရေးတာဝန်တစ်ရပ်အဖြစ် ပိုမိုတိုးမြှင့်လုပ်ဆောင်ရန်နှင့် မူးယစ်ဆေးဝါးစိုက်ပျိုးခြင်း၊ ထုတ်လုပ်ခြင်း၊ လက်ဝယ်ထားရှိခြင်း၊ သယ်ဆောင်ခြင်း၊ ဖြန့်ဖြူးခြင်း၊ ရောင်းဝယ်ခြင်းတို့ကို ထိရောက်သည့်ပြစ်ဒဏ်များချမှတ်နိုင်ရေး၊ ဒေသဆိုင်ရာ မူးယစ် ဆေးဝါး တားဆီးကာကွယ်နှိမ်နင်းရေးအဖွဲ့များကို မြို့နယ်၊ ခရိုင်၊ တိုင်းဒေသကြီးနှင့် ပြည်နယ်များအလိုက် ဖွဲ့စည်းသွားရေးကို ၎င်းက ပြောကြားသည်။

သမ္မတသည် သူ၏ နှစ်သစ်ကူး မိန့်ခွန်းတွင် အရပ်ဘက်အဖွဲ့အစည်းများနှင့်ပူးပေါင်းကာ အားကောင်းလာစေရေးကို ထည့်သွင်းပြောဆိုခဲ့သော်လည်း လက်တွေ့တွင် ထိုသို့ဖြစ်မလာသေး။

မကြာသေးမီကပင် ငြိမ်းချမ်းရေးအတွက် လှုပ်ရှားဆန္ဒထုတ်ဖော်သူများကို ဖမ်းဆီးရိုက်နှက်မှုများ ပေါ်ပေါက်ခဲ့သလို လူ ၂၀ ဝန်းကျင်မှာလည်း တရားစွဲဆိုခံထားရသည်။ ယင်းအပြင် ဒီမိုကရေစီကို ပုံဖျက်မည့် အရပ်ဝတ်အကြမ်းဖက်မှုများကလည်း တစ်ကျော့ပြန်ပေါ်ပေါက်လာခဲ့ သည်။

“အခုအချိန်အထိတော့ အရပ်ဘက် လူမှုအဖွဲ့အစည်းတွေဘက်က ဘယ်လိုမျိုး အစိုးရက လက်တွဲခေါ်မလဲပေါ့ဗျာ။ ဒါ မျှော်လင့်နေတုန်းပဲ” ဟု ISP Myanmar ၏ ဒါရိုက်တာ ဦးအောင်သူငြိမ်းက ဆိုသည်။

နိုင်ငံအတွင်း ပြုပြင်ပြောင်းလဲဖွယ်ရာများကို သမ္မတဦးဝင်းမြင့်အနေနှင့် အနီးစပ်ဆုံး ရှုမြင်နိုင်ကြောင်း ၎င်း၏မိန့်ခွန်းအပြီးတွင် နိုင်ငံရေးသမားအချို့က သုံးသပ်ပြောဆိုခဲ့ကြသည်။ တကယ်ဖြစ်လာရန်ကိုလည်း မျှော်လင့်ကြသည်။

“ဒါ သမ္မတတစ်ယောက်ကပြောတယ်ဆိုတာက ဘာပဲဖြစ်ဖြစ် အားပါတာပေါ့နော်။ အားရှိတာပေါ့။ သူက ဒီလိုမပြောဘူးဆိုတာထက်စာရင်၊ ကတိကဝတ်ပေးထားပြီဆိုရင် ဘာပဲဖြစ်ဖြစ် သူလုပ်ဖို့၊ လုပ်ရတော့မယ့်တာဝန်ရှိလာပြီ။ အောက်ခြေတွေကို သူတိုက်တွန်းတာတွေရှိမယ်” ဟု မြန်မာ့ရေးရာမဂ္ဂဇင်း၏ အယ်ဒီတာ ဦးအေးမောင်ကျော်ကဆိုသည်။

သို့သော် အချို့ကိစ္စများသည် အစိုးရအဖွဲ့တစ်ခုတည်း၏ စွမ်းဆောင်ရည်ဖြင့် ဖြေရှင်း၍မရ။ အစိုးရယန္တရားကို ကုစားပြုပြင်လိုက်ရုံနှင့်လည်းမရ။

ကာလကြာရှည်ဖြစ်ပွားနေသည့် စစ်ပွဲများရပ်တံ့ရေးအပါအဝင် ပြည်တွင်းငြိမ်းချမ်းရေးပြဿနာ၊ ရခိုင်ပြည်နယ်၏ ရှုပ်ထွေးလှသည့် ဘာသာရေး၊ လူမျိုးရေးနှင့် အကြမ်းဖက်မှုပြဿနာတို့သည် ကျယ်ပြန့်သည့် အရေးကိစ္စများဖြစ်သည်။

အဆိုပါကိစ္စများသည် လက်နက်ကိုင်အဖွဲ့များ၊ နိုင်ငံတကာအသိုင်းအဝိုင်းများနှင့် အိမ်နီးချင်းနိုင်ငံများနှင့်လည်း ဆက်စပ်ယှက်နွှယ်နေရာ ရေရှည်ဖြေရှင်းရမည့်ကိစ္စများဖြစ်သည်။

“ဘေးပတ်ဝန်းကျင် ပတ်သက်မှုတွေက အရမ်းများတယ်လေ။ ကိုယ့်အစိုးရတစ်ခုထဲ လုပ်လို့ရတာမျိုးမဟုတ်။ နိုင်ငံတကာတွေရော၊ လက်နက်ကိုင်အဖွဲ့တွေရော အများကြီးပေါ့။ ဘေးပတ်ဝန်းကျင် နိုင်ငံတွေရော။ ဒါမျိုးတွေကတော့ လွယ်လွယ်ကူကူနဲ့ မဖြစ်နိုင်ဘူး” ဟု ဦးအေးမောင်ကျော်က ဆိုသည်။

နိုင်ငံ၏ အရေးကြီးသည့် စီမံကိန်းနှင့်ဘဏ္ဍာရေးဝန်ကြီးဌာန၊ ပြည်ထောင်စု ဝန်ကြီးနှင့် ပြည်နယ်နှင့် တိုင်းဒေသကြီးအစိုးရအဖွဲ့ ဝန်ကြီးအချို့ အပြောင်းအလဲဖြစ်ခဲ့ပြီးသော်လည်း အပြောင်းအလဲများက ရပ်တံ့သွားပြီဆိုသည်ကိုမူ နိုင်ငံရေးလေ့လာသူများက မယုံကြည်ကြသေး။

ဆက်လက် မျှော်လင့်လျက်ရှိကြသေးသည်။

တစ်ပြိုင်တည်းတွင် အစိုးရအဖွဲ့၏ လူဟောင်းများကို ဖယ်ထုတ်ကာ လူသစ်များနှင့် အစားထိုးရေးကိစ္စ၌ မည်သို့သော လူသစ်များနှင့် အစားထိုးမည်လဲဆိုသည့် ပြဿနာကလည်း ရှိနေသည်။

နိုင်ငံအတွင်း နှစ်ပေါင်းများစွာ ပျက်စီးခဲ့သည့် ပညာရေးစနစ်နှင့်အတူ ပညာရှင်များ ရှားပါးခဲ့မှုကြောင့် အစိုးရအဖွဲ့ စတင်ဖွဲ့စည်းချိန်တွင် လုံလောက်သည့်ပညာရှင်များ မရခဲ့။ အချို့သောပညာရှင်များကလည်း အစိုးရအဖွဲ့အတွင်းပါဝင်ရန် ငြင်းဆိုခဲ့ကြသလို အချို့ကလည်း ထုတ်ပယ်ခံရသည်။

ယင်း၏နောက်ဆက်တွဲအဖြစ် အစိုးရအဖွဲ့သည် အားကောင်းမောင်းသန် မဖြစ်ကြောင်း ဝေဖန်လေ့ရှိကြသည်။

၈၈ မျိုးဆက်မှ ထင်ရှားသည့် ကျောင်းသားခေါင်းဆောင်လည်းဖြစ်၊ လက်ရှိတွင် နိုင်ငံရေးပါတီတစ်ခုကို ဦးဆောင်တည်ထောင်ရန် ပြင်ဆင်နေသူလည်းဖြစ်သည့် ဦးကိုကိုကြီးကမူ အစိုးရအဖွဲ့ဝင်များသည် ပညာရှင်ဖြစ်မှုထက် နိုင်ငံရေးသမားဖြစ်မှု၊ မဖြစ်မှုကိုသာ အလေးပေး စေလိုသည်။

ဝန်ကြီးနှင့် ဒုတိယဝန်ကြီးများသည် နိုင်ငံရေးရာထူးဖြစ်သည့်အတွက် နိုင်ငံရေးသမားဖြစ်ရန် လိုမည်၊ နိုင်ငံရေးအသိအမြင်နှင့် နိုင်ငံရေးအတိမ်အနက်ကို နားလည်သည့်သူဖြစ်ရမည်ဟု ၎င်းကရှုမြင်သည်။ သို့သော် သက်ဆိုင်ရာနယ်ပယ်များတွင် နှံ့စပ်သည့် နိုင်ငံရေးသမားဖြစ်ရန်မူ လိုမည်။

“အဲဒီသက်ဆိုင်ရာဝန်ကြီးဌာနကို တာဝန်ယူမယ့်ပုဂ္ဂိုလ်ဟာ ကျွမ်းကျင်မှုနယ်ပယ်က ပုဂ္ဂိုလ်လည်းဖြစ်တယ်၊ နိုင်ငံရေးအတိမ်အနက်ကို နားလည်တဲ့သူလည်း ဖြစ်မယ်ဆိုရင်တော့ အတိုင်းအထက် အလွန်ပေါ့။ ကျွန်တော်ပြောချင်တာက ဆရာဝန်ဖြစ်ရုံနဲ့ ကျန်းမာရေးဝန်ကြီး လုပ်လို့မရဘူး။ ကျန်းမာရေးဝန်ကြီးသည် နိုင်ငံရေးသမားဖြစ်ရမယ်” ဟု ဦးကိုကိုကြီးက ဆိုသည်။

အဆိုပါအခြေအနေတွင် ပြီးခဲ့သည့် မေလ ၂၉ ရက်နေ့က ထူးခြားသည့် ထုတ်ပြန်ကြေညာချက်တစ်စောင်ကို နိုင်ငံတော်သမ္မတရုံးက ထုတ်ပြန်လိုက်သည်။

တိုင်းဒေသကြီးနှင့် ပြည်နယ်အစိုးရအဖွဲ့များအနေနှင့် ပြည်ထောင်စုအစိုးရက ချမှတ်ထားသည့် မူဝါဒများ၊ ပြည်ထောင်စုဥပဒေများနှင့် မဆန့်ကျင်ဘဲ အလုပ်လုပ်ကြရန် သတိပေးသည့် ထုတ်ပြန်ချက်ဖြစ်သည်။ တစ်ဆက်တည်းပင် အဆိုပါအစိုးရအဖွဲ့များ၏ ဝန်ကြီးများသည်လည်း လုပ်ငန်းများလုပ်ဆောင်ရာတွင် သက်ဆိုင်ရာ ဝန်ကြီးချုပ်ထံ အသိပေးတင်ပြကာ သဘောတူညီချက်၊ အတည်ပြုချက်ရရှိပြီးမှသာ လုပ်ဆောင်ကြရန်နှင့် ဝန်ကြီးများသည် ဝန်ကြီးချုပ်များမှတစ်ဆင့် နိုင်ငံတော်သမ္မတသို့ အဆင့်ဆင့်တာဝန်ခံရကြောင်း ၂၀၀၈ ခုနှစ် ဖွဲ့စည်းပုံအခြေခံ ဥပဒေပါ ပြဋ္ဌာန်းချက်များကို ကိုးကား၍ သမ္မတရုံး၏ အမြဲတမ်းအတွင်းဝန်က ထုတ်ပြန်လိုက်ခြင်းဖြစ်သည်။

အဓိကအားဖြင့် တိုင်းဒေသကြီးနှင့် ပြည်နယ်အစိုးရအဖွဲ့များသည် အခြေခံဥပဒေနှင့်အညီ အလုပ်လုပ်ကိုင်ကြရန် သတိပေးခြင်းဖြစ်သည်။

ယင်းထုတ်ပြန်ချက်က နိုင်ငံရေးစောင့်ကြည့်သူများကို သို့လော သို့လော ဖြစ်စေသည်။

ပြည်ထောင်စုအစိုးရသည် လက်အောက်ခံ တိုင်းဒေသကြီးနှင့် ပြည်နယ်အစိုးရများကို သာမန်သတိပေးရုံလော၊ ယင်းသို့ သတိပေးရန်ဆိုလျှင် ယခုလို အများပြည်သူသို့ ထုတ်ပြန်ခြင်းမပြုဘဲ တိုးတိုးတိတ်တိတ် သတိပေး၍ မရသလော။

သို့မဟုတ် ယင်းအစိုးရများသည် အခြေခံဥပဒေကိုကျော်လွန်၍ အလုပ်လုပ်နေသည်များ ရှိနေသလော။

သို့မဟုတ် ထုတ်ပြန်ချက်သည် ရှေ့ပြေးကြေညာချက်ဖြစ်ပြီး အရေးယူမှုများက နောက်ဆက်တွဲအဖြစ်ပါလာရန် ရှိသည်ဆိုသည်ကို နိမိတ်ပြသလော။ စသည့် မေးခွန်းများဖြစ်သည်။

ထုတ်ပြန်ရခြင်းနှင့်ပတ်သက်၍ သမ္မတရုံး၏ ပြောရေးဆိုခွင့်ရှိသူ ညွှန်ကြားရေးမှူးချုပ် ဦးဇော်ဌေးကမူ အကြောင်းပြချက်မပေးပါ။

“အဲဒီမှာ အပြည့်အစုံပါပါတယ်။ ဘာလုပ်မယ်၊ ဘာလုပ်မယ် ကြိုပြောခွင့်လည်း မရှိပါဘူး။ အဲဒီဖော်ပြချက်က အားလုံး အသေးစိတ်ပါပါတယ်” ဟုသာ ပြန်လည်ဖြေဆိုသည်။

အဆိုပါထုတ်ပြန်ချက်ထွက်ရှိပြီး မကြာခင်တွင် ရန်ကုန်တိုင်းဒေသကြီး အစိုးရအဖွဲ့ခေါင်းဆောင်၊ ဝန်ကြီးချုပ် ဦးဖြိုးမင်းသိန်းကို ဒေါ်အောင်ဆန်းစုကြည်က ခေါ်ယူဆုံးမကြောင်း ပြည်တွင်းသတင်းဌာနတစ်ခုက ဖော်ပြခဲ့သည်။

ဝန်ကြီးချုပ်အနေနှင့် လွှတ်တော်နှင့်လက်တွဲရန်၊ ပူးပေါင်းဆောင်ရွက်ရန် ဒေါ်အောင်ဆန်းစုကြည်က သတိပေးခဲ့သည်ဟု အဆိုပါသတင်းက ဆိုသည်။

အစိုးရအဖွဲ့၏ အပြောင်းအလဲကိစ္စတွင် အာဏာရပါတီဖြစ်သည့် အမျိုးသားဒီမိုကရေစီအဖွဲ့ချုပ် (NLD) ပါတီကမူ ယခင်အကြိမ်များနည်းတူ ဘူးခံနေဆဲ။

ပါတီအနေနှင့် အပြောင်းအလဲအတွက် စီစဉ်ထားခြင်းမရှိဟု ဆိုသည်။

“ကျွန်တော်တို့ပါတီအနေနဲ့တော့ စီစဉ်ထားတာမရှိပါဘူးခင်ဗျ။ အုပ်ချုပ်ရေးပိုင်းကတော့ ကျွန်တော်တို့ မပြောတတ်ပါဘူး” ဟု ပါတီ၏ပြောရေးဆိုခွင့်ရှိသူ ဒေါက်တာမျိုးညွန့်က The Voice Journal သို့ ပြောဆိုသည်။

နိုင်ငံတော်၏ အတိုင်ပင်ခံပုဂ္ဂိုလ်နှင့် ရွေးကောက်ပွဲနိုင်အမတ်များ ၂၀၁၅ ခုနှစ်က ရန်ကုန်မြို့တွင် တွေ့ဆုံစဉ်။

သမ္မတ ဦးဝင်းမြင့်၏ စွမ်းဆောင်ရည်နှင့်ပတ်သက်၍မူ ပါတီက အထူးမျှော်လင့်ထားပုံရသည်။

သမ္မတသည် ဥပဒေသမားဖြစ်ရာ ဥပဒေလုပ်ထုံးလုပ်နည်းများကျွမ်းကျင်ပြီး အဂတိလိုက်စားမှုနှင့်ပတ်သက်၍လည်း ပို၍လုပ်ဆောင်လိမ့်မည်ဟု ယုံကြည်သည်ဟု ၎င်းကဆိုသည်။ သို့သော် ဥပဒေနှင့်အညီ လုပ်ဆောင်ရသည်ဖြစ်ရာ အချို့ကိစ္စများတွင် နေ့ချင်းညချင်း လုပ်မရသည်များလည်း ရှိမည်ဟု ဆိုသည်။

လက်တွေ့တွင်လည်း ဝန်ကြီးဌာနများ၏ လုပ်နည်းလုပ်ဟန်များကို ပြောင်းပစ်လျက်ရှိပြီး မြန်ဆန်သွက်လက်လာစေရန် လုပ်ဆောင်လျက်ရှိသည်ကို တွေ့ရမည်ဖြစ်ကြောင်း ၎င်းကဆိုသည်။

“သမ္မတကြီးကတော့ သူပြောသွားတဲ့အတိုင်း လုပ်မှာပါခင်ဗျ” ဟု ဒေါက်တာ မျိုးညွန့်က ဆိုသည်။

အောင်မျိုးထက်

You may also like...

Leave a Reply

Your email address will not be published. Required fields are marked *