လှိုင်သာယာရှိ အမျိုးသမီးများဘ၀ ဘေးကင်းလုံခြုံရေး လူငယ်များ ဦးဆောင်သွားမည်

လှိုင်သာယာမြို့နယ်မှ အထည်ချုပ်စက်ရုံအလုပ်သမားများ

ရန်ကုန်၊ မေ၃၁

လှိုင်သာယာမြို့နယ်အတွင်းရှိ အမျိုးသမီးများဘ၀ဘေးကင်းလုံခြုံရေးအတွက် လူငယ်များဦးဆောင်ကာ သက်ဆိုင်ရာတာဝန်ရှိသည့် အဖွဲ့အစည်းများနှင့် ပူးပေါင်းဆောင်ရွက်သွားမည်ဖြစ်ကြောင်း Action aid (မြန်မာ) မှသိရသည်။

ရန်ကုန်တိုင်းဒေသကြီးအတွင်းရှိ အမျိုးသမီးများနှင့် မိန်းကလေးငယ်များ၏ နေ့စဉ်လူမှုဘ၀လုံခြုံရေးဆိုင်ရာ ဆွေးနွေးပွဲတစ်ခုကို Action aid က ဦးဆောင်၍ မေလ ၃၁ ရက်နေ့တွင် ရန်ကုန်မြို့ရှိ Panda Hotel တွင် ပြုလုပ်ခဲ့သည်။

ယင်းဆွေးနွေးပွဲမှရရှိသော Panda Hotel များအပေါ် မူတည်ကာ လှိုင်သာယာမြို့နယ်အတွင်းရှိ အမျိုးသမီးများ ဘေးကင်းလုံခြုံရေးအတွက် လုပ်ဆောင်သွားမည်ဟု Action aid (မြန်မာ) ၏ အမျိုးသမီး အခွင့်အရေးဌာနမှ အစီအစဉ် မန်နေဂျာဒေါ်လွင်လွင်လှိုင်က ပြောကြားသည်။

“အထည်ချုပ်တွေကို နယ်တွေဘက်ကနေ လာလုပ်ကြတယ်။ လူဦးရေအရမ်းထူထပ်တဲ့နေရာ ဖြစ်တယ်။ ပျံကျတွေ များတယ်။ လူစုံတက်စုံနဲ့ပြစ်မှုတွေ အရမ်းများတဲ့နေရာ ဖြစ်တယ်။ အိမ်တွေ ဘာတွေတည်ဆောက်ထားပုံအရကို အရမ်းကို နီးနီးကပ်ကပ်တွေ ဒီလိုအခြေအနေပေါ် မူတည်ပြီး တစ်ခုခုဖြစ်ဖို့က အရမ်းမြန်တယ်။ အဲဒါကြောင့် လှိုင်သာယာကို ရွေးချယ်တာပါ”ဟု ၎င်းက ပြောကြားသည်။

အမျိုးသမီးများဘ၀ဘေးကင်းလုံခြုံရေးစီမံကိန်းကို လှိုင်သာယာမြို့နယ်အတွင်းရှိ ရပ်ကွက် ၁၅ ခုတွင် သုံးနှစ်စီမံကိန်းအဖြစ် Action aid က လုပ်ဆောင်လျက်ရှိနေပြီး တစ်နှစ်တာဆောင်ရွက်မှုပြီးစီးခဲ့ပြီဖြစ်ကြောင်း ဒေါ်လွင်လွင်လှိုင်က ဆိုသည်။
l
အဆိုပါစီမံကိန်းတွင် လှိုင်သာယာမြို့နယ်အတွင်းရှိ ဥပဒေအထောက်အကူပြုအဖွဲ့များအဖြစ် ရွေးချယ်ကာ စေတနာ့ဝန်ထမ်းလူငယ်များကို ပညာပေးခြင်းများလုပ်ဆောင်ပြီး ထိုလူငယ်များမှ အမျိုးသမီးများနှင့်ဆိုင်သည့် အကြောင်းအရာများကို ဆင့်ပွားသင်တန်းပေးခြင်းများ လုပ်ဆောင်နေကြောင်း Action aid (မြန်မာ) မှ သိရသည်။

ထို့ပြင်အကြမ်းဖက်ခံရသည့် အမျိုးသမီးများ၏ လိုအပ်ချက်များအတွက်ဝန်ဆောင်မှုပေးသည့် အဖွဲ့အစည်းများနှင့် ချိတ်ဆက်ပေးလျက်ရှိကြောင်း ဒေါ်လွင်လွင်လှိုင်က ပြောကြားသည်။

မြန်မာနိုင်ငံတွင် လိင်ပိုင်းဆိုင်ရာအကြမ်းဖက်မှုကို အမျိုးသမီးများ နေ့စဉ်နှင့်အမျှ ခံစားနေရကြောင်း၊ လမ်းပေါ်တွင် အစခံရသည်မှအစ ဘတ်စ်ကားပေါ်တွင်အထိ ခံရခြင်း၊ အကြည့်ခံရခြင်းမှာလည်း အမျိုးသမီးများအတွက် သက်သောင့်သက်သာမရှိလျှင် လိင်ပိုင်းဆိုင်ရာအကြမ်းဖက်မှုမြောက်ကြောင်း Action aid Myanmar မှ အစီအစဉ်တာဝန်ခံ ဒေါ်နန့်မေသဉ္ဇာက ဆိုသည်၊၊

“ကျွန်မတို့တွေ ဘယ်လောက်ပဲ အမျိုးသမီးတွေ လုံခြုံရေးအတွက် ထိရောက်အောင် လုပ်လုပ် အစိုးရရဲ့ ပူးပေါင်းပါဝင်မှုနဲ့ သူတို့ရဲ့သတိပြုမှုပေါ်မှာ မူတည်ပါတယ်”ဟု ဒေါ်နန့်မေသဉ္ဇာက ဆိုသည်၊၊

အမျိုးသမီးများ အကြမ်းဖက်ခံရမှု နှင့်ပတ်သက်၍ အစိုးရက ပိုမိုသိမြင်လာစေရန်၊ ပူးပေါင်းပါဝင်ပေးရန် မျှော်မှန်းကြောင်း ၎င်းက ဆက်လက်ပြောကြားသည်၊၊

You may also like...

Leave a Reply

Your email address will not be published. Required fields are marked *