ပင်လုံလာပါပြီ

အကြိမ်ကြိမ်ရွှေ့ဆိုင်းနေခဲ့ရသည့် ပြည်ထောင်စုငြိမ်းချမ်းရေးညီလာခံ (၂၁ ရာစုပင်လုံ)သည် လာမည့် ၁၁ ရက်နေ့တွင် စတင်ကျင်းပပါတော့မည်။

လက်ရှိအစိုးရလက်ထက် သုံးကြိမ်မြောက်ကျင်းပမှုဖြစ်ပြီး အစိုးရအနေနှင့် ၂၀၁၈ ခုနှစ် နှစ်ဆန်းပိုင်းကတည်းက ယခုညီလာခံကိုကျင်းပရန် စိတ်စောနေခဲ့ခြင်းဖြစ်သည်။ သို့သော် မရိုးနိုင်သောအကြောင်းများဖြင့် တစ်လပြီးတစ်လ နောက်ဆုတ်လာခဲ့ရသည်မှာ နှစ်ဝက်ပင် ကျိုးခဲ့ပြီးပြီဖြစ်သည်။

တတိယအကြိမ်မြောက် ပြည်ထောင်စုငြိမ်းချမ်းရေးညီလာခံ (၂၁ ရာစုပင်လုံ) ကို နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန -၂ (MICC – 2) တွင် ခြောက်ရက်ကြာ ကျင်းပမည်ဖြစ်သည်။

ညီလာခံတွင် နိုင်ငံရေးကဏ္ဍ၊ စီးပွားရေးကဏ္ဍ၊ လူမှုရေးကဏ္ဍ၊ လုံခြုံရေးကဏ္ဍ၊ မြေယာနှင့် သဘာဝပတ်ဝန်းကျင်ကဏ္ဍ စသည့်ကဏ္ဍများကို ဆွေးနွေးကြကာ ထွက်ရှိလာသည့် ဆုံးဖြတ်ချက်များကို ပြည်ထောင်စုသဘောတူညီချက်များအတွင်း ထည့်သွင်းမည်ဖြစ်သည်။

UPDJC (ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ) ၏ ထုတ်ဖော်ပြောဆိုချက်များအရ ယခုညီလာခံတွင် နိုင်ငံရေးကဏ္ဍအတွက် အချက်တစ်ချက်ကိုသာ ဆွေးနွေးမည်ဖြစ်သလို အခြားကဏ္ဍများအနေနှင့်လည်း ဆုံးဖြတ်ချက် များများစားစား ထွက်ပေါ်လာဖွယ်မရှိပေ။

“အခုအကြိမ်မှာ စီးပွားရေးကဏ္ဍအနေနဲ့ အချက် ၁၀ ချက်ကျော်ကို တင်သွင်းနိုင်ဖို့ ရည်ရွယ်ထားပါတယ်” ဟု UPDJC အတွင်းရေးမှူးအဖွဲ့ဝင်လည်းဖြစ်၊ အစည်းအဝေးကျင်းပရေးလုပ်ငန်းကော်မတီ အတွင်းရေးမှူးအဖွဲ့ဝင်လည်းဖြစ်သည့် ဦးလှမောင်ရွှေ က ဆိုသည်။

ဒုတိယအကြိမ်မြောက်ညီလာခံကို ပြီးခဲ့သည့် ၂၀၁၇ ခုနှစ် မေလကုန်ပိုင်းကကျင်းပခဲ့ပြီး နောက်တစ်ကြိမ် ပြန်လည်ကျင်းပနိုင်ရန် အချိန်တစ်နှစ်ကျော် ကြာမြင့်ခဲ့ခြင်းလည်းဖြစ်သည်။

အဆိုပါညီလာခံတွင် စုစုပေါင်း အချက် ၃၇ ချက်ကို သဘောတူညီနိုင်ခဲ့ပြီး ပြည်ထောင်စုသဘောတူစာချုပ်အဖြစ် ချုပ်ဆိုနိုင်ခဲ့သည်။

အကြောင်းအမျိုးအမျိုးကြောင့် ညီလာခံကျင်းပချိန် နှောင့်နှေးကြန့်ကြာခဲ့သော်လည်း အစိုးရနှင့် တိုင်းရင်းသား လက်နက်ကိုင်အဖွဲ့များအကြားတွင် နိုင်ငံရေးဆိုင်ရာ အလွတ်သဘောအစည်းအဝေး သုံးကြိမ်၊ လုံခြုံရေးဆိုင်ရာအလွတ်သဘော အစည်းအဝေးလေးကြိမ် ကျင်းပနိုင်ခဲ့ပြီး အပြန်အလှန် နားလည်မှုနှင့် ယုံကြည်မှုများ တည်ဆောက်နိုင်ခဲ့သည်ဟု UPDJC ဒုတိယဥက္ကဋ္ဌ ဒေါက်တာတင်မျိုးဝင်းက ဇွန်လ ၂၉ ရက်နေ့က နေပြည်တော်တွင် ပြုလုပ်သည့် UPDJC ၏ (၁၅) ကြိမ်မြောက်အစည်းအဝေးတွင် ပြောဆိုခဲ့သည်။

လက်ရှိတွင် မြန်မာနိုင်ငံရှိ တိုင်းရင်းသားလက်နက်ကိုင်အဖွဲ့ပေါင်း ၂၁ ဖွဲ့ အနက် ထက်ဝက်ဖြစ်သည့် ၁၀ ဖွဲ့က တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) တွင် လက်မှတ်ရေးထိုးထားသည်။

အဆိုပါလက်မှတ်ရေးထိုးထားသည့်အဖွဲ့များမှ စုစုပေါင်းကိုယ်စားလှယ် ၁၅၀ ဦး တက်ရောက်ကြမည်ဖြစ်သည်။ ၎င်းတို့နည်းတူ တပ်မတော်က ကိုယ်စားလှယ် ၁၅၀၊ နိုင်ငံရေးပါတီများမှ ကိုယ်စားလှယ် ၁၅၀၊ အစိုးရနှင့် လွှတ်တော်က ၇၅ ဦးစီ တက်ရောက်ကြမည်ဖြစ်သည်။

ယခုညီလာခံသို့ အပစ်ရပ်စာချုပ် (NCA) လက်မှတ်မရေးထိုးရသေးသည့် အဖွဲ့များကိုလည်း ညီလာခံတက်ရောက်သူအဖြစ် ဖိတ်ကြားထားသည်။ ယင်းတို့ထဲတွင် ‘၀’ အဖွဲ့ (UWSA)၊ ကချင်အဖွဲ့ (KIA)၊ မိုင်းလားအဖွဲ့ (NDAA)၊ ရှမ်းအဖွဲ့ (SSPP)၊ တအာင်း/ပလောင်အဖွဲ့ (TNLA)၊ ကိုးကန့်အဖွဲ့ (MNDAA)နှင့် ရခိုင်အဖွဲ့ (AA) စသည့် မြောက်ပိုင်းအဖွဲ့ ခုနစ်ဖွဲ့တို့လည်း ပါဝင်သည်။

ယင်းအဖွဲ့များကို အစိုးရအနေနှင့် တရုတ်နိုင်ငံမှတစ်ဆင့် ဖိတ်ကြားခြင်းဖြစ်သည်။

ခုနစ်ဖွဲ့တွင် တစ်ဖွဲ့ချင်းစီကို သီးခြားဖိတ်ကြားခြင်းဖြစ်သည်ဟု နိုင်ငံတော်သမ္မတရုံး၏ ပြောရေးဆိုခွင့်ရှိသူလည်းဖြစ်၊ ပြည်ထောင်စုငြိမ်းချမ်းရေးဖော်ဆောင်ရေးဦးစီးဌာန၏ ညွှန်ကြားရေးမှူးချုပ်လည်းဖြစ်သည့် ဦးဇော်ဌေး က ပြောဆိုသည်။

သို့သော် အဆိုပါအဖွဲ့များအနေနှင့် NCA တွင် လက်မှတ်ထိုးမထားသည်ဖြစ်ရာ ညီလာခံတွင် ပါဝင်ဆွေးနွေးခွင့်ရမည်မဟုတ်သလို ဆုံးဖြတ်ခွင့်လည်းမရှိပေ။

ယင်းအဖွဲ့များသည် ပြီးခဲ့သည့် ၂၀၁၇ ညီလာခံသို့လည်း တရုတ်နိုင်ငံ၏ ကြားဝင်စေ့စပ်ပေးမှုအရ တက်ရောက်ခဲ့သေးသော်လည်း အခမ်းအနားနေရာချထားမှုနှင့်ပတ်သက်၍ မကျေလည်မှုအချို့  ပေါ်ပေါက်ခဲ့သေးသည်။

UPDJC (ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ) အနေနှင့် ယင်းအဖွဲ့များကို ဖိတ်ကြားရေးနှင့်ပတ်သက်၍ ဆွေးနွေးခဲ့ရာတွင် မည်သို့ဖိတ်ကြားရမည်ဆိုသည့်အချက် မပါဝင်ခဲ့သော်လည်း ယခုကဲ့သို့ ဖိတ်စာများကို တရုတ်နိုင်ငံမှတစ်ဆင့် ပေးပို့စေမှုအပေါ်  နားမလည်နိုင်အောင်ဖြစ်ရကြောင်း ငြိမ်းချမ်းရေးဆိုင်ရာ ထဲထဲဝင်ဝင် လေ့လာနေသူတစ်ဦးက မှတ်ချက်ပြုသည်။

ယင်းလုပ်ရပ်သည် အစိုးရ၏အခန်းကဏ္ဍကို မှေးမှိန်စေသည်ဟု ၎င်းကဆိုသည်။

ယခုကျင်းပမည့် ညီလာခံသည် အချိန်အားဖြင့် ခြောက်ရက်ကြာမြင့်ဖြစ်ပြီး ယခင်ညီလာခံများထက် ရက်ကြာရှည်သော်လည်း ဆုံးဖြတ်ချက် များများစားစား ထွက်ပေါ်လာရန်မရှိကြောင်း ပြည်ထောင်စုငြိမ်းချမ်းရေးဆွေးနွေးမှု ပူးတွဲကော်မတီ (UPDJC) ဒုတိယဥက္ကဋ္ဌတစ်ဦးဖြစ်သည့် ဦးသုဝေက The Voice Journal သို့ ပြောဆိုသည်။

“သိပ်မများဘူးဆိုတာက ကျွန်တော်တို့လုပ်ငန်းအဖွဲ့မှာ စိစစ်လို့ ပြတ်ခဲ့တာရယ်၊ နောက်ပြီးတော့ ကျွန်တော်တို့ UPDJC ကိုရောက်တဲ့အခါမှာ စကားလုံးလေးတွေနဲ့ပတ်သက်လို့ တစ်ယောက်နဲ့တစ်ယောက် သဘောမတူတာလေးတွေရှိတယ်။ အဲဒါတော့ ကျွန်တော်တို့အကုန်လုံး ထားခဲ့လိုက်တယ်။ နောက်ညီလာခံမှပဲလုပ်မယ်ဆိုပြီးတော့ လုပ်လိုက်တယ်လေ။ ဆိုတော့ ဆွေးနွေးရမယ့်အချက်အလက်တွေက သိပ်မများဘူးပေါ့ဗျာ” ဟု ၎င်းကဆိုသည်။

လူ့အခွင့်အရေးဆိုင်ရာကိစ္စများနှင့်ပတ်သက်၍ တိုင်းရင်းသားလက်နက်ကိုင်အဖွဲ့များနှင့် တပ်မတော်တို့အကြား စကားလုံးရွေးချယ်သုံးစွဲမှုတွင် ညှိနှိုင်းမရဖြစ်ခဲ့ရာ ယင်းအချက်များကို နောင်တွင်ကျင်းပမည့် အစည်းအဝေးများတွင် ဆက်လက်ဆွေးနွေးရန် ချန်လှပ်ခဲ့ခြင်းဖြစ်သည်။

ယခုညီလာခံတွင် နိုင်ငံရေးကဏ္ဍအတွက် ခေါင်းစဉ်တစ်ခုကိုသာ ဆွေးနွေးဆုံးဖြတ်မည်ဖြစ်သည်။

UPDJC အစည်းအဝေးတွင် နိုင်ငံရေးကဏ္ဍအတွက် (၁) တိုင်းရင်းသားလူနည်းစုအခွင့်အရေးနှင့် (၂) ဒီမိုကရေစီ လူ့အခွင့်အရေးနှင့် ကျား၊ မ တန်းတူရေး စသည့် ခေါင်းစဉ်နှစ်ခုကိုဆွေးနွေးခဲ့ကြသော်လည်း နံပါတ် (၂) အချက်တွင်သာ သဘောတူညီချက်မထွက်ခဲ့ခြင်းဖြစ်သည်။

“လူနည်းစုကိစ္စအပေါ်မှာ သဘောတူညီချက်မရဘူး။ တိုင်းရင်းသားလူနည်းစုနဲ့ အခြားလူနည်းစုပါ။ ဒီအပေါ်မှာ အဓိပ္ပာယ်ဖွင့်ဆိုတဲ့အခါမှာလည်း နိုင်ငံရေးကဏ္ဍမှာ တော်တော်လေး အပြင်းအထန်ပြောရပါတယ်။ ဒီလိုပြောရတဲ့အတွက် အခုညီလာခံမှာ အဲဒီကိစ္စကို မဆွေးနွေးသေးပါ ဘူး” ဟု ဦးဇော်ဌေးက ပြောဆိုထားသည်။

ညီလာခံတွင် ကဏ္ဍငါးခုကို ဆွေးနွေးဆုံးဖြတ်ကြမည့်အနက် လူမှုရေးကဏ္ဍအတွက် အချက် ၁၀ ချက်ဝန်းကျင်ကို ဆွေးနွေးဆုံးဖြတ်နိုင်အောင် မျှော်လင့်ထားသည်ဟု ၎င်းကဆိုသည်။ အလားတူပင် မြေယာကဏ္ဍအတွက်လည်း ရည်မှန်းထားသလောက် ဆုံးဖြတ်ချက်များထွက်နိုင်လိမ့်မည်ဟု သူကဆိုသည်။

“ဆိုတော့ ဒီညီလာခံမှာ နိုင်ငံရေးကဏ္ဍမှာ သဘောတူညီချက်က နည်းမယ့်သဘောရှိတဲ့အတွက် ကျန်တဲ့ကဏ္ဍတွေကနေ သဘောတူညီချက်တွေ အများဆုံးရအောင် ကြိုးပမ်းသွားမယ်လို့ ဆုံးဖြတ်ထားတယ်” ဟု ဦးဇော်ဌေး က ဆိုသည်။

ယခုညီလာခံသည် ကဏ္ဍအလိုက် ဆွေးနွေးဆုံးဖြတ်မှုများ လျော့နည်းမည်ဖြစ်သော်လည်း အုပ်စုအလိုက်ဆွေးနွေးမှုများကို ပိုမိုအသားပေးမည်ဖြစ်သည်။

ယင်းကပင် ယခုညီလာခံ၏ ထူးခြားချက်တစ်ခုလည်းဖြစ်သည်ဟု UPDJC အတွင်းရေးမှူး အဖွဲ့ဝင်တစ်ဦးက မှတ်ချက်ပြုသည်။

အပစ်ရပ်စာချုပ် (NCA) လက်မှတ်မရေးထိုးရသေးသည့် တိုင်းရင်းသားလက်နက်ကိုင်အဖွဲ့များအနေနှင့်လည်း ကဏ္ဍအလိုက်ဆွေးနွေးမှုများတွင် ပါဝင်ဆွေးနွေး ဆုံးဖြတ်ခွင့် မရှိသော်လည်း အစိုးရအစုအဖွဲ့၊ လွှတ်တော်အစုအဖွဲ့၊ တပ်မတော် အစုအဖွဲ့၊ နိုင်ငံရေးပါတီများအစုအဖွဲ့နှင့် တိုင်းရင်းသားလက်နက်ကိုင်များအစုအဖွဲ့ စသည့် အစုအဖွဲ့အလိုက် ဆွေးနွေးမှုများတွင် ၎င်းတို့အနေနှင့် တိုင်းရင်းသားလက်နက်ကိုင်များအစုအဖွဲ့တွင် ပါဝင်နိုင်မည်ဖြစ်သည်။

လက်ရှိနောက်ဆုံးရရှိသည့် သတင်းများအရ NCA တွင် မပါဝင်သေးသည့် မြောက်ပိုင်းအဖွဲ့ ခုနစ်ဖွဲ့အနေနှင့် ညီလာခံတက်ရောက်ဖွယ်ရှိနေသည်။

အဆိုပါအဖွဲ့များအနေနှင့် ယခင်ကတည်းက ခုနစ်ဖွဲ့စလုံးကို ဖိတ်ကြားရန် တောင်းဆိုခဲ့ရာ ယခုတွင် ယင်းသို့ဖိတ်ကြားထားခြင်းလည်းဖြစ်သည်။

“အကြမ်းဖျင်းအားဖြင့်တော့ တက်မယ်လို့ ကျွန်တော်တို့သိရတယ်” ဟု နိုင်ငံတော်သမ္မတရုံး၏ ပြောရေးဆိုခွင့်ရှိသူ ဦးဇော်ဌေး က ဆိုသည်။

ညီလာခံတွင် မည်သည့်အချက်များကို ယူဆောင်လာကာ ဆွေးနွေးတင်ပြမည်ကို မဟာမိတ်ခုနစ်အဖွဲ့အနေနှင့် ဆွေးနွေးနေဆဲဖြစ်သော်လည်း ညီလာခံတက်ရောက်ရန်အတွက်ကိုမူ ပြင်ဆင်နေပြီဟု တအာင်း/ပလောင်အဖွဲ့ (TNLA) က သတင်းဌာနတစ်ခုသို့ ထုတ်ဖော်ပြောဆိုထားသည်။

ပြီးခဲ့သည့်လများအတွင်းက တပ်မတော်နှင့် မြောက်ပိုင်းအဖွဲ့အချို့အကြား ပြင်းထန်သည့်တိုက်ပွဲများနှင့် စစ်ရေးတင်းမာမှု ရှိနေခဲ့သည်။

ယခုညီလာခံသို့ တက်ရောက်ခြင်းအားဖြင့် အဆိုပါအခြေအနေများကို လျှော့ချနိုင်လိမ့်မည်ဟု TNLA ၏ သတင်းပြန်ကြားရေးတာဝန်ခံ ဗိုလ်မှူးမိုင်းအိုက်ကျော် က ဆိုသည်။

တစ်ချိန်တည်းတွင်ပင် အဆိုပါအဖွဲ့ များအနေနှင့် နေပြည်တော်သို့ရောက်ရှိခိုက် အစိုးရ၊ တပ်မတော် တာဝန်ရှိသူများနှင့်လည်း သီးခြားတွေ့ဆုံနိုင်ဖွယ်လည်း ရှိနေသည်။

၂၀၁၆ ခုနှစ် မတ်လကုန်တွင် အစိုးရအဖြစ် တာဝန်ယူခဲ့သည့် ဒေါ်အောင်ဆန်းစုကြည်၏ အမျိုးသားဒီမိုကရေစီအဖွဲ့ချုပ် (NLD) ပါတီအနေနှင့် ပြည်တွင်းငြိမ်းချမ်းရေးလုပ်ငန်းစဉ်အပေါ်  တောက်လျှောက် ဦးစားပေးနေခဲ့သည်။

ငြိမ်းချမ်းရေးဖြစ်စဉ်တွင် အစိုးရဘက်ခြမ်းမှ ပါဝင်နေရသူတို့တွင် အရည်အချင်းနှင့် နားလည်ကျွမ်းကျင်မှုဆိုင်ရာ ပြဿနာများရှိနေသော်လည်း နောက်ဆုံးအချိန်အထိ ငြိမ်းချမ်းရေးကို ဆက်တွန်းနေမည့်အလားအလာများကို တွေ့နေရသည်။

အစိုးရအနေနှင့် လက်ကျန်ကာလအတွင်း နောက်ထပ်ညီလာခံသုံးကြိမ်မျှကျင်းပရန် ရည်ရွယ်ထားပြီး ဖက်ဒရယ်ဆိုင်ရာမူဝါဒများ ချမှတ်ပြီးစီးရန်ကိုလည်း မျှော်မှန်းထားသည်။

ယခုတစ်ကြိမ် ညီလာခံကျင်းပရန် အချိန်တစ်နှစ်ကျော် ယူခဲ့ရသော်လည်း များမကြာမီ ၂၀၂၀ ပြည့်နှစ်တွင် ရွေးကောက်ပွဲကျင်းပရန်ရှိနေခြင်းကြောင့် အပါအဝင် လာမည့်အကြိမ်များတွင် ယခုကဲ့သို့ အချိန်လေးဖင့်မှု မကြုံရစေရန် ဖိဖိစီးစီးဆောင်ရွက်သွားမည့်အနေအထားလည်း ရှိနေသည်။

NCA တွင် လက်မှတ်မထိုးရသေးသည့်အဖွဲ့များနှင့် တိုက်ပွဲများ ပြင်းထန်မှု၊ လက်မှတ်ထိုးပြီးသားအဖွဲ့များနှင့်အကြား စစ်ရေးတင်းမာမှုနှင့် NCA ပါ သဘောတူညီမှုများဖြစ်သည့် အမျိုးသားအဆင့် နိုင်ငံရေးဆွေးနွေးပွဲများကိစ္စ အငြင်းပွားမှုများ ဖြစ်ပေါ်ခဲ့မှုများကြောင့် ညီလာခံကျင်းပရန် တစ်လပြီးတစ်လ နောက်ဆုတ်လာခဲ့သော်လည်း ယခုမူ မကြာခင် ကျင်းပတော့မည်ဖြစ်သည်။

ယခု ဇူလိုင်လ ၁၁ ရက်နေ့မှ ၁၆ ရက်နေ့အထိ ခြောက်ရက်ကြာကျင်းပမည့် ပြည်ထောင်စုငြိမ်းချမ်းရေးညီလာခံ (၂၁ ရာစုပင်လုံ) တတိယအကြိမ်မြောက် အစည်းအဝေးသည် နောင်လာမည့် ညီလာခံများအတွက် ခြေလှမ်းတစ်လှမ်းလည်းဖြစ်သည်ဟု UPDJC ၏ ဒုတိယဥက္ကဋ္ဌ ဦးသုဝေ က မှတ်ချက်ပြုသည်။

“ဆိုလိုတာကတော့ ဒီညီလာခံကြီးဟာ လာမယ့်ညီလာခံတွေအတွက် ကြိုတင်ပြီးတော့ လုပ်တာပဲ” ဟု ၎င်းက ဆိုသည်။ 

အောင်မျိုးထက်

You may also like...

Leave a Reply

Your email address will not be published. Required fields are marked *