ဗိုလ်ချုပ်ရုပ်တု အကြောင်းပြု၍

တိုင်းရင်းသားစည်းလုံးညီညွတ်ရေးကို ကြိုးပမ်းခဲ့သည့် ဗိုလ်ချုပ်ကိုအကြောင်းပြု၍ အကွဲအပြဲဖြစ်ကြသည်။

ဗိုလ်ချုပ်အောင်ဆန်း၏ သမီးဖြစ်သူဒေါ်အောင်ဆန်းစုကြည် ဦးဆောင်သည့် အမျိုးသားဒီမိုကရေစီအဖွဲ့ချုပ် (NLD) အစိုးရလက်ထက်တွင် ဗိုလ်ချုပ်ကို ဂုဏ်ပြုရန်နည်းလမ်းအမျိုးမျိုးဖြင့် ကြိုးပမ်းလုပ်ဆောင်လာကြသည်။

ယင်းအနက်ရုပ်တုမှာလည်း အပါအဝင်ဖြစ်သည်။ သို့သော်လည်း အချို့နေရာများတွင် ဗိုလ်ချုပ်အောင်ဆန်းရုပ်ထု ထားရှိမှုကို ဒေသခံများက ငြင်းဆန်ကန့်ကွက်ကြသည်။ ရုန်းရင်းဆန်ခတ်ဖြစ်သည်အထိ တင်းမာမှုများလည်း ရှိနေသည်။

လောလောလတ်လတ်အဖြစ်အပျက်မှာ ကယားပြည်နယ် မြို့တော်လွိုင်ကော်တွင် ဖြစ်သည်။ ကန္ဒာဟေဝန်ပန်းခြံတွင် ဗိုလ်ချုပ်ရုပ်တုကို အာဇာနည်နေ့အမီ စိုက်ထူရန်ပြင်ဆင်မှုကို ဒေသခံများ ဆန္ဒပြကန့်ကွက်ရာမှ ရဲတပ်ဖွဲ့နှင့် ရုန်းရင်းဆန်ခတ် ဖြစ်ပွားပြီးနောက် ဗိုလ်ချုပ်ရုပ်တုစိုက်ထူမှုအပေါ် မေးခွန်းထုတ်လာကြသည်။

“ သူတို့ဆက်လုပ်မယ်ဆိုရင်တော့ ကျွန်တော်တို့ကတော့ တတ်နိုင်တဲ့ဘက်က ဆန့်ကျင်သွားမယ်”ဟု ကန့်ကွက်ဆန္ဒပြရာတွင် ဦးဆောင်ပါဝင်သူ ကိုဒီးဒီ(ခေါ်) စစ်မုန်းက ပြောဆိုသည်။

မြန်မာနိုင်ငံတွင် ဗိုလ်ချုပ်ရုပ်တုများ ဒါဇင်နှင့်ချီပြီး စိုက်ထူထားကြပြီး ဖြစ်သည်။ မြို့နယ်အချို့တွင်လည်း စိုက်ထူရန် ကြိုးပမ်းနေကြဆဲ ဖြစ်သည်။ ရန်ကုန်ရှိ တောင်ဥက္ကလာပပန်းခြံတွင် ဗိုလ်ချုပ်ရုပ်တုနှစ်ခု အပြိုင်စိုက်ထူပြီး အငြင်းပွားကြသည်အထိပင် ဖြစ်သည်။

ဗိုလ်ချုပ်အောင်ဆန်းရုပ်တုများကို စိုက်ထူရန် အရေးကြီးသလော။ အခြားတစ်ဖက်တွင်လည်း အမျိုးသားခေါင်းဆောင်ကြီးဟု တင်စားဂုဏ်ပြုခံရသည့် ဗိုလ်ချုပ်၏ရုပ်တုကို မည်သည့်အကြောင်းအရင်းကြောင့် ကန့်ကွက်နေကြခြင်းဖြစ်သနည်း။

ရုပ်တုလော၊ ကတိလော

ဗိုလ်ချုပ်ရုပ်ထုကန့်ကွက်ခံရခြင်းမှာ ပထမဆုံးအကြိမ် မဟုတ်တော့ပါ။ မွန်ပြည်နယ်တွင်လည်း ဆန္ဒပြကန့်ကွက်ဖူးသည်။ ချင်းပြည်နယ်တွင်လည်း ကန့်ကွက်ဖူးသည်။ အခြားနေရာအချို့တွင်လည်း ရှိသည်။

သို့သော် ဆန္ဒပြကန့်ကွက်သူများနှင့် ရဲတပ်ဖွဲ့အကြား ရုန်းရင်းဆန်ခတ်ဖြစ်ပွားခဲ့သည့် လွိုင်ကော်မြို့က အဖြစ်အပျက်မှာ ဗိုလ်ချုပ်ရုပ်တုစိုက်ထူရန် ကြိုးပမ်းရာမှ ပေါ်ပေါက်လာသည့် အကွဲအပြဲကို ပိုမိုမီးမောင်းထိုးပြနေသည်။

ဗိုလ်ချုပ်ရုပ်ထုထက် ဗိုလ်ချုပ်ပေးခဲ့သည့် ကတိကဝတ်များကိုသာ ဦးစွာအကောင်အထည်ဖော်ပေးရန် လိုအပ်ကြောင်း ကိုဒီးဒီက ပြောဆိုသည်။

၎င်းမှာ ကယားပြည်နယ် လွိုင်ကော်မြို့တွင် ဗိုလ်ချုပ်အောင်ဆန်းရုပ်တုထားရှိသည့်အပေါ် ကန့်ကွက်ဆန္ဒပြပွဲ ဦးဆောင်ပါဝင်သူ ဖြစ်သည်။

“ ဗိုလ်ချုပ်ရုပ်တုထက် တိုင်းရင်းသားတွေ မျှော်လင့်နေတဲ့ တန်းတူအခွင့်အရေးတို့၊ ဒီမိုကရေစီဖက်ဒရယ် အဲဒီဟာတွေကို အရင်လိုချင်တယ်ပေါ့နော်။ ကျွန်တော်တို့ မျှော်မှန်းထားတဲ့အရာတွေက ဘာမှမရသေးဘဲ ရုပ်တုကြီးရောက်လာတာတော့ မလိုအပ်ဘူးလို့ ထင်တယ်” ဟု ၎င်းက ဆိုသည်။

ဗိုလ်ချုပ်အောင်ဆန်းကို အမျိုးသားခေါင်ဆောင်ကြီးအဖြစ် အသိအမှတ်ပြုသော်လည်း တိုင်းရင်းသားဒေသများတွင် တိုင်းရင်းသားခေါင်းဆောင်များ၏ ရုပ်တုကိုသာ ဦးစားပေးထားလိုကြကြောင်း တိုင်းရင်းသားနိုင်ငံရေးသမားအချို့ကို မေးမြန်းချက်အရ သိရသည်။

ရခိုင်ပြည်နယ်လွှတ်တော်ကိုယ်စားလှယ်ဦးထွန်းအောင်သိန်းကမူ ရခိုင်ပြည်နယ်တွင် ဆရာဦးဥတ္တမရုပ်တုကို မြို့နယ်တိုင်းတွင် တည်ထားကိုးကွယ်လိုသည့် အာသီသရှိနေကြောင်း မှတ်ချက်ပေးသည်။

ဗိုလ်ချုပ်ရုပ်တုကို တိုင်းဒေသကြီးများတွင် စိုက်ထူလျှင် လူထုက လက်ခံသော်လည်း တိုင်းရင်းသားပြည်နယ်များတွင် ဆန္ဒပြကန့်ကွက်မှုများ ဆက်တိုက်ဖြစ်ပေါ်လာသဖြင့် တိုင်းနှင့် ပြည်နယ်ကွာခြားချက်ကို နားလည်သဘောပေါက်ရန် လိုအပ်နေပြီဖြစ်ကြောင်း တိုင်းရင်းသားအရေးလေ့လာသုံးသပ်သူ ဦးမောင်မောင်စိုးက ထောက်ပြသည်။

“ ဗိုလ်ချုပ်အောင်ဆန်း သဘောတူညီခဲ့တဲ့ ပင်လုံသဘောတူညီချက်နဲ့ ပင်လုံကတိကဝတ်တွေမှာပါတဲ့ တိုင်းရင်းသားအခွင့်အရေး၊ တန်းတူရေးစသဖြင့် မရဘဲနဲ့ ရုပ်တုပဲ လိုက်စိုက်တာကို လက်မခံနိုင်ဘူးဆိုတာ ဖော်ပြတယ်လို့ပဲ ပြောရပါမယ်”ဟု ၎င်းက ဆိုသည်။

ပင်လုံစိတ်ဓာတ် မရှိခြင်းလော

ဗိုလ်ချုပ်ရုပ်တုများ စိုက်ထူနိုင်ရေး မှာ NLD ၏ ကြိုးပမ်းမှုအနက်တစ်ခုအပါအဝင် ဖြစ်သည်။

မြန်မာနိုင်ငံတွင် အကြီးဆုံးဖြစ်လာမည့် ဗိုလ်ချုပ်မြင်းစီးကြေးရုပ်ကို နေပြည်တော်တွင် စိုက်ထူနိုင်ရေးအမြန်ဆုံးဆောင်ရွက်ရန် သမ္မတကိုယ်တိုင် တိုက်တွန်းထားသည်။ ကျပ်သိန်း ၁၅၀၀နှင့် ၂၀၀၀ဝန်းကျင် ကုန်ကျမည့် ယင်းရုပ်တုမှာ အမြင့်ပေ ၁၈ ပေ ရှိမည် ဖြစ်သည်။

ဗိုလ်ချုပ်ကို ဂုဏ်ပြုလိုသူများက ရုပ်တုထားရှိခြင်းဖြင့် တိုင်းပြည်အတွက် ဗိုလ်ချုပ်၏ သက်စွန့်ကြိုးပမ်းမှုများကို နောင်လာနောင်သားများ အမှတ်ရနေစေရန် လုပ်ဆောင်လျှင် ကန့်ကွက်ရန်မရှိကြောင်း NLD ပါတီ၏ ပြောရေးဆိုခွင့်ရှိသူ ဒေါက်တာမျိုးညွန့်က ပြောကြားသည်။

“ ကောင်းတဲ့အလုပ်ဖြစ်တဲ့အတွက် ကျွန်တော်တို့က အားပေးကူညီမှာပါပဲ”ဟု ၎င်းက ဆိုသည်။

ဗိုလ်ချုပ်ရုပ်တုကို ကန့်ကွက်သူများက ဗိုလ်ချုပ်ပေးထားသည့် ကတိမတည်ဟု အကြောင်းပြနေကြခြင်းမှာ မှားယွင်းနေကြောင်း၊ ဖက်ဒရယ်ပြည်ထောင်စုမှာ ဗိုလ်ချုပ်ရေးဆွဲခဲ့သည့် ပင်လုံစာချုပ်ကို အခြေခံလုပ်ဆောင်နေခြင်း ဖြစ်ကြောင်း ဒေါက်တာမျိုးညွန့်က ဖြေရှင်းချက်ထုတ်သည်။

“ အဲဒီတော့ ဗိုလ်ချုပ်ကို အသိအမှတ်မပြုရင် သူတို့ ပင်လုံစာချုပ်ကို ပစ်ပယ်လိုက်ပြီလားလို့ ကျွန်တော်တို့ မေးရမလို ဖြစ်နေပြီ။ သူတို့အကြောင်းပြချက်တွေက ခိုင်လုံမှုမရှိပါဘူး” ဟု ၎င်းက တုံ့ပြန်သည်။

မခိုင်လုံသည့် အကြောင်းပြချက်ဖြင့် ကန့်ကွက်မှုများသည် တိုင်းရင်းသားအချင်းချင်း သွေးကွဲစေနိုင်ပြီး ယင်းလုပ်ရပ်ကို နိုင်ငံရေးရည်ရွယ်ချက်တစ်ခုနှင့် ကြိုးပမ်းလျှင် တိုင်းရင်းသားစည်းလုံးညီညွတ်ရေးကို အကြီးအကျယ်ဆိုးကျိုး သက်ရောက်နိုင်ကြောင်း ၎င်းက ဆိုသည်။

“ဗိုလ်ချုပ်ရုပ်တုစိုက်ထူခြင်းကို ဆန့်ကျင်ခြင်းဟာ ပင်လုံစာချုပ်ကို ဆန့်ကျင်သလို ဖြစ်နေပါ့မယ်”ဟု ဒေါက်တာမျိုးညွန့် က ဝေဖန်လိုက်သည်။

NLD ၏ ထိပ်ပိုင်းပုဂ္ဂိုလ်ဦးဝင်းထိန်ကမူ တပ်မတော်အစိုးရလက်ထက်တွင် ဗိုလ်ချုပ်၏အခန်းကဏ္ဍ ဖျောက်ဖျက်ခံခဲ့ရသဖြင့် NLD အစိုးရလက်ထက်လုပ်ပိုင်ခွင့်ရလာချိန် နေရာအနှံ့အပြား ရုပ်တုများစိုက်ထူဂုဏ်ပြုကြခြင်းဖြစ်သည်ဟု မှတ်ချက်ပေးထားသည်။

စည်းလုံးမှု ထိခိုက်နိုင်သည်

ဗမာလူမျိုးကြီးဝါဒကျင့်သုံးနေသည်ဟု ယူဆသွားနိုင်သဖြင့် သတိပြုသင့်သည်ဟု ထောက်ပြသူများရှိသည်။

ငြိမ်းချမ်းရေး၊ အမျိုးသားပြန်လည်သင့်မြတ်ရေးကို အစိုးရ၏ရည်မှန်းချက်ပန်းတိုင်တစ်ခုအဖြစ် ကြိုးပမ်း အကောင်အထည်ဖော်နေချိန် ထိခိုက်မှုများဖြစ်လာမည်ကို အထူးသတိပြုသင့်သည်။

“တိုင်းရင်းသားတွေရဲ့ စိတ်ထဲမှာက ဗမာလူမျိုးကြီးဝါဒပေါ့။ ဗမာလူမျိုးအများစုက သူတို့ရဲ့ ယဉ်ကျေးမှုအနှစ်သာရ၊ နိုင်ငံရေးသမိုင်းကြောင်းတွေကို လွှမ်းမိုးအောင်လုပ်တယ်လို့ မှတ်ယူယုံကြည်ထားတာတွေ ရှိတယ်လေ”ဟု ရန်ကုန်တိုင်းလွှတ်တော်ကိုယ်စားလှယ်ဟောင်း ဒေါ်ညိုညိုသင်းက ပြောဆိုသည်။

ယင်းသို့ အမှားမျိုးထပ်မံမဖြစ်ပွားအောင် အာဏာရပါတီနှင့် လက်ရှိအစိုးရတို့ အလေးအနက်ထားသင့်ကြောင်း ၎င်းက အကြံပြုပြီး လွိုင်ကော်ဖြစ်ရပ်မျိုးမှာ မဖြစ်သင့်ဟုလည်း မှတ်ချက်ပေးသည်။

“ ဗိုလ်ချုပ်အောင်ဆန်းက ဗမာလူမျိုးကြီးဝါဒကို အားမပေးဘူး။ ဒါကြောင့် ဗိုလ်ချုပ်ရုပ်တုတည်ဆောက်ဖို့ လုပ်နေတဲ့ အင်အားစုတွေအနေနဲ့က သူတို့လုပ်နေတဲ့အလုပ်တွေက ဗိုလ်ချုပ်လိုချင်တဲ့ တိုင်းရင်းသားစည်းလုံးညီညွှတ်ရေး ဟုတ်ပါရဲ့လား ဆိုတာ သေသေချာချာပြန်လည်ဆန်းစစ်ဖို့ လိုတာပေါ့”

ရုပ်တု အရေးကြီးသလား

စီးပွားရေးအပါအဝင်အကျပ်အတည်းများဖြင့် ရုန်းကန်နေရသည့် မြန်မာနိုင်ငံတွင် ရုပ်တုများ ဖောဖောသီသီစိုက်ထူရန် အရေးကြီးသလောဆိုသည့် မေးခွန်းလည်း ရှိနေသည်။

“အခုချိန်က တိုင်းရင်းသားတွေအတွက် ဗိုလ်ချုပ်ရုပ်တုထက် အရေးကြီးတဲ့ကိစ္စတွေ အများကြီးရှိသေးတယ်။ ဦးစားပေး လုပ်သင့်တာတွေ အများကြီး။ အဲဒါတွေကို မလုပ်ဘဲနဲ့ ငွေကုန်ကြေးကျများပြီး မလိုလားအပ်တဲ့ အရှုပ်အထွေးတွေ ဖြစ်စေတဲ့ ရုပ်တုတွေကို မလုပ်စေချင်ဘူး”ဟု ကိုဒီးဒီက ပြောဆိုသည်။

ပညာရေး၊ ကျန်းမာရေးစသည့် အရေးကြီးသည့်ကိစ္စရပ်များကို ပြည်နယ် အစိုးရက အားသွန်ခွန်စိုက်မလုပ်ဘဲ ရုပ်တုစိုက်ထူရေး ငွေကုန်ကြေးကျခံကာ ကြိုးပမ်းနေခြင်းမှာ မေးခွန်းထုတ်စရာ ဖြစ်နေကြောင်း လွိုင်ကော်တွင် ကန့်ကွက်ဆန္ဒပြသူများက ပြောဆိုသည်။

“ အဓိကကတော့ ဗိုလ်ချုပ်အောင်ဆန်း ရုပ်တုကို အကြောင်းပြပြီးမှ သူတို့နိုင်ငံရေး အမြတ်ထုတ်ချင်တယ်။ တစ်ဖက်မှာလည်း တိုင်းရင်သားပြည်နယ်တွေမှာ သွေးကွဲမှာ သူတို့မစဉ်းစားတာလည်း ဖြစ်နိုင်တယ်။ စဉ်းစားထားရင်လည်း သူတို့သပ်သပ် ကလိန်ကကျစ်ကျတာပဲပေါ့”ဟု ကိုဒီးဒီ က ဆိုသည်။

ဗိုလ်ချုပ်ရုပ်တုအများအပြားစိုက်ထူနေကြခြင်းမှာ အမှန်တကယ်လိုအပ်ပါ၏လော မေးခွန်းထုတ်စရာဖြစ်နေသည်။

နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကမူ ဖခင်ဖြစ်သူဗိုလ်ချုပ်ကို ဂုဏ်ပြုလိုလျှင် ဗိုလ်ချုပ်ဖြစ်စေ လိုသည့်နိုင်ငံမျိုးဖြစ်အောင် ကြိုးပမ်းကြရန် တိုက်တွန်းလေ့ရှိသည်။ ထိုကြောင့် ဟန်ပြမဟုတ်ဘဲ အနှစ်သာရပြည်ဝသည့်လုပ်ရပ်မျိုးကိုသာ လုပ်ဆောင်သင့်သည်ဟု တိုက်တွန်းသူများရှိသည်။

ရခိုင်ပြည်နယ်အရေးကြောင့် မြန်မာက နိုင်ငံတကာအလယ်တွင် အထီးကျန်နေသည်။ ပိတ်ဆို့အရေးယူမှုများလည်း ရှိနေသည်။ စီးပွားရေးတုံ့နှေးမှုကြောင့် ပြည်သူများအကျပ်အတည်းဆိုက်နေသည်။ ငြိမ်းချမ်းရေးကလည်း အလှမ်းဝေးနေသေး သည်။ အလုပ်လက်မဲ့နှုန်းကလည်း မြင့်နေသေးသည်။ ယင်းသို့အခြေအနေမျိုးတွင် ရုပ်တုအတွက် ငွေကြေးသုံးစွဲနေမှုမှာ သင့်တော်ပါ၏လော။

“အထူးသဖြင့် တိုင်းပြည်စီးပွားရေးကျဆင်းနေတဲ့ အခုလိုအချိန်မျိုးမှာ ပြည်သူလူထုရဲ့ငွေတွေကို ဒီလိုရုပ်တုတွေ ဆောက်တဲ့ဘက်မှာ မကုန်ဆုံးစေချင်ဘူး”ဟု ဒေါ်ညိုညိုသင်းက မှတ်ချက်ပေးသည်။

ရုပ်တုမဟုတ်ဘဲ အခြားနည်းလမ်းများဖြင့်လည်း ဂုဏ်ပြုနိုင်သေးသည်။ ဥပမာ- ပညာရေးကို အင်တာနက်မှတစ်ဆင့် လေ့လာနိုင်အောင် ဗိုလ်ချုပ်အမည်ဖြင့် Online Education Applicaton မျိုးပြုလုပ်နိုင်လျှင် ဂုဏ်ပြုရာလည်း ရောက်မည်၊ အကျိုးလည်းရှိနိုင်မည် ဖြစ်သည်။

NLD လွှတ်တော်ကိုယ်စားလှယ်များနှင့် အစိုးရကမူ ငွေစက္ကူတွင် ဗိုလ်ချုပ်ပုံရိုက်နှိပ်ဂုဏ်ပြုရန်လည်း အစီအစဉ်ရှိနေသေးသည်။ ယင်းကိစ္စကို ငွေကြေးကုန်ကျနိုင်သဖြင့် ကန့်ကွက်မှုရှိသော်လည်း ပြည်ထောင်စုလွှတ်တော်က အတည်ပြုထားပြီးဖြစ်သည်။

ဗိုလ်ချုပ်ကို မုန်းသူများလော

လွိုင်ကော်တွင် ဗိုလ်ချုပ်ရုပ်တုစိုက်ထူရန် လုပ်ဆောင်မှုကို ကန့်ကွက်သူများမှာဗိုလ်ချုပ်ကို မုန်းတီးခြင်းကြောင့်လော။

အဆိုပါမြို့နယ်၏ ပြည်သူ့လွှတ်တော်ကိုယ်စားလှယ်ဒေါက်တာခင်စည်သူကမူ ဗိုလ်ချုပ်ကို လေးစားအသိအမှတ်ပြုသူများ ဖြစ်သည်ဟု ပြောဆိုသည်။

တပ်မတော်အစိုးရလက်ထက် တင်းကျပ်ဖိနှိပ်သည့်ကာလမျိုးတွင် ဗိုလ်ချုပ်မွေးနေ့ဆိုလျှင် ဗိုလ်ချုပ်အကြောင်းစာရွက်စာတမ်းများကို ဓာတ်တိုင်များတွင် ကပ်သည့်အပြင် လိုက်လံဖြန့်ဝေခဲ့သည့် လူငယ်များဖြစ်ကြောင်း ပြောဆိုသည်။

“အဲဒီလို တင်းကျပ်နေတဲ့အချိန်မှာ ဗိုလ်ချုပ်ကို လေးလေးစားစားအသိအမှတ်ပြုခဲ့တဲ့ ကလေးတွေ အာဇာနည်နေ့ချီတက် ပွဲတွေလည်း ဒီကလေးတွေပဲ ဦးဆောင်ပြီးတော့လုပ်တာ ဖြစ်တယ်။ အခုရုပ်တုထုတဲ့ ပြည်နယ်အစိုးရအဖွဲ့က လူတွေ တစ်ယောက်မှ မပါဘူး”ဟု ၎င်းက ဆိုသည်။

ရုပ်တုကိစ္စကြောင့် ကယားပြည်နယ် NLD ပါတီတွင်လည်း သဘောထားကွဲလွဲမှုရှိကြောင်း ၎င်းက ဆိုသည်။ ပြည်နယ် အစိုးရက လွှတ်တော်ကိုယ်စားလှယ်များထံမှ သဘောဆန္ဒတောင်းခံမှုလည်းမရှိဟု ၎င်းက ဆိုသည်။

ထူးခြားသည့် ကရင်နီ

ဗိုလ်ချုပ်ရုပ်တုကို ကန့်ကွက်သဖြင့် ကျေးဇူးမသိတတ်ခြင်းဟု ဝေဖန်ပြစ်တင်မှုများလည်း ရှိနေသည်။

သို့သော်လည်း ကရင်နီတို့သည် ပင်လုံစာချုပ်တွင် လက်မှတ်ရေးထိုးထားသူများ မဟုတ်ပေ။ ဗိုလ်ချုပ်အောင်ဆန်းက ပြည်မနှင့်အတူ လွတ်လပ်ရေးရယူရန် စည်းရုံးမှုကြောင့် ပါဝင်လာခြင်းဖြစ်သည်။

ကရင်နီပြည်ကို တပ်မတော်အစိုးရလက်ထက်တွင် ကယားပြည်နယ်ဟု အမည်ပြောင်းလိုက်ခြင်းဖြစ်ပြီး ကရင်နီပြည် အမည်ပြန်လည်သတ်မှတ်ရန် ကြိုးပမ်းမှုလည်း ရှိနေသည်။

ပြည်မနှင့်အတူ လွတ်လပ်ရေးရယူရန်စည်းရုံးစဉ်က ပေးခဲ့သည့် သမိုင်းဝင်ကတိဖြစ်သည့် ကိုယ်ပိုင်အုပ်ချုပ်ခွင့်အာမခံချက် အဓိကအကောင်အထည်ဖော်ပေးစေလိုကြောင်း ရုပ်တုစိုက်ထူရေးကို ဦးဆောင်ကန့်ကွက်သူ ကိုဒီးဒီက ပြောဆိုသည်။

ယင်းအာမခံချက်ကို ၂၁ရာစုပင်လုံ ညီလာခံကလည်း အကောင်အထည်မဖော်နိုင်သေးခင် ရုပ်ထုစိုက်ထူသဖြင့် ကန့်ကွက်ရခြင်း ဖြစ်သည်ဟု ကွန့်ကွက်သူများထံမှ သိရသည်။

“ကျွန်တော်တို့ဆီမှာ တိုင်းရင်းသားခေါင်းဆောင်လက်နက်ကိုင်တွေ ရှိတယ်။ စာပေနဲ့ ယဉ်ကျေးမှုတွေ အများကြီး ရှိပါတယ်။ မတိုင်ပင်ဘဲနဲ့ ဇွတ်လုပ်တယ်လေ။ သူတို့ကိုယ်တိုင် ပင်လုံစိတ်ဓာတ်ကို အခြေခံလားလို့ ပြန်မေးချင်တယ်။ အဲဒီ ရုပ်တုထုတာ”ဟုလည်း ကိုဒီးဒီက မေးခွန်းထုတ်သည်။

သို့သော်လည်း ဗိုလ်ချုပ်အောင်ဆန်းကို တစ်နိုင်ငံလုံးလွတ်လပ်ရေးရအောင် ကြိုးပမ်းသူအဖြစ် အသိအမှတ်ပြုကြောင်း ၎င်းက ဆိုသည်။

ဗိုလ်ချုပ်ကို ဂုဏ်ပြုရန်ကြိုးပမ်းမှုများမှာ တိုင်းရင်းသားဒေသများတွင် ထင်သလောက်မထိရောက်သည့်အပြင် တစ်ခါတစ်ရံဆိုးကျိုးများပါ ဖြစ်လာတတ်သည်။

မွန်ပြည်နယ်ရှိ မော်လမြိုင်နှင့် ချောင်းဆုံမြို့နယ်တို့ကို ဆက်သွယ်ထားသည့် သံလွင်တံတား (ချောင်းဆုံ)ကို တံတားဖွင့်ပွဲနီးချိန်မှ ဗိုလ်ချုပ်အောင်ဆန်းတံတား အမည်ပြောင်းရန် ကြိုးပမ်းမှုကြောင့် ဒေသခံများ အကြီးအကျယ်ကန့်ကွက်ခဲ့ကြသည်။

သို့သော်လည်း လွှတ်တော်ဆုံးဖြတ်ချက်ဖြင့် ဗိုလ်ချုပ်အောင်ဆန်းအမည်ကို ကင်ပွန်းတပ်ခဲ့သည်။ ယင်းနောက်များ မကြာမီကျင်းပသည့် ကြားဖြတ်ရွေးကောက်ပွဲတွင် ချောင်းဆုံ၌ NLD ကိုယ်စားလှယ် ရှုံးနိမ်ခဲ့သည်။

လွိုင်ကော်တွင် ကန့်ကွက်နေသည့်ကြားမှ ပြည်နယ်အစိုးရက ရုပ်တုစိုက်ထူလျှင် ဆန့်ကျင်ကန့်ကွက်နေဦးမည်ဟု ကန့်ကွက်သူများထံမှ သိရသည်။

“ ရုပ်တုစီမံကိန်းက ပျက်ရင် ပျက်။ မပျက်ရင် အတင်းအဓမ္မနဲ့ ရောက်လာလိမ့်မယ်။ အဲဒါဆိုရင် ကျွန်တော်တို့ လေးစား အသိမှတ်ပြုရတဲ့ ဗိုလ်ချုပ်အောင်ဆန်းပုံရိပ်တွေ လျော့ကျလိမ့်မယ်”ဟု ကိုဒီးဒီက ပြောဆိုသည်။

The Voice

You may also like...

Leave a Reply

Your email address will not be published. Required fields are marked *