မြန်မာတို့ ပိတ်မိနေသောဂူ

မြန်မာတို့သည် အာရှတိုက်သားအချင်းချင်းပင်လျှင် စင်ကာပူလောက်၊ ဂျပန်လောက်မှ အထင်ကြီးပြီး အိမ်နီးချင်းနိုင်ငံများကို ထည့်မတွက်ချင်သော်လည်း ထိုင်းဂူကိစ္စက မြန်မာတို့ ပိတ်မိနေသောဂူအကြောင်း ပြသသွားပြီဖြစ်သည်။

ထိုင်းကို ရှေးအတီတေ မြန်မာမင်းများခေတ်က နိုင်ဖူးသည်နှင့် ယခုလည်းသိပ်မကွာဟု ထင်နေကြသည်။ ဘောလုံးကန်လျှင် ထိုင်းကို နိုင်ချင်သည်။ ထိုင်းတို့ကမူ မြန်မာကို မနိုင်ချင်ကြ။ ကိုရီးယား၊ ကာတာတို့ကို နိုင်ချင်နေပြီဖြစ်သည်။

ထိုင်းသည် မြန်မာနှင့် စွမ်းဆောင်မှုပိုင်းရော စဉ်းစားပုံတွင်ရော အတော်အလှမ်းကွာနေပြီဖြစ်ကြောင်း ဂူထဲတွင် ကလေးများပိတ်မိသည့်အခါတွင်မှ ဖြစ်စဉ်ကိုကြည့်ပြီး နေ့စဉ်သဘောပေါက်ကြရသည်။

နိုင်ငံတကာအကူအညီကို ဖွင့်လက်ခံလိုက်သဖြင့် ကလေးများကို ကယ်တင်ခွင့်ရသည့်အပြင် လူသားကယ်တင်ရေး နိုင်ငံတကာပူးတွဲစစ်ဆင်ရေးကြီးတစ်ရပ်ကို ဦးဆောင်ဆင်နွှဲခွင့်ရသွားသည်။ အဝေဖန်ခံနေရသော ထိုင်းတပ်မတော်အစိုးရ ပြည်တွင်း ပြည်ပတွင်ပါ နာမည်ကောင်းသွားသည်။ အကျပ်အတည်းသည် ကျော်လွှားနိုင်လျှင် အခွင့်အလမ်းဖြစ်ကြောင်း ထိုင်းက သက်သေပြသွားခြင်းဖြစ်သည်။

စင်စစ် ထိုင်းသာမက အခြားအိမ်နီးချင်းနိုင်ငံများ၊ အာဆီယံနိုင်ငံများနှင့်လည်း မြန်မာသည် နယ်ပယ်အတော်များများတွင် ကွာဟသထက် ကွာဟနေပြီဖြစ်သည်။

မြန်မာတို့ ကိုယ့်ဘာသာ ထင်တစ်လုံးနှင့် အတွေးတံခါးပိတ်၊ ပညာတံခါးပိတ်၊ နိုင်ငံတံခါးပိတ်ထားချိန်တွင် အခြားနိုင်ငံများကား မြန်မြန်ပြေး ဝေးဝေးရောက်နေပြီ။ ကမ္ဘာအကြောင်းမပြောနှင့် အိမ်နီးချင်းနိုင်ငံများအကြောင်းပင် အပ်ချမတ်ချမသိဘဲ အဆက်ပြတ်နေချိန်တွင် ထိုနိုင်ငံတို့သည် နယ်ပယ်အတော်များများတွင် မြန်မာနှင့် ကွာပြီးရင်း ကွာနေသည်။ မြန်မာများအချင်းချင်း အငြင်းပွားပြီး မရှိသေးသောအရာများကို စိတ်ကူးဖြင့်လုနေချိန်တွင် အခြားနိုင်ငံများသည် မြန်မာ့ဈေးကွက်ကို ဝင်နေပြီ။

ထိုင်းဂူဇာတ်လမ်းသည် မြန်မာတို့ယူတတ်လျှင် ရမည့်၊ မြန်မာ့နယ်စပ်နှင့် ကပ်လျက်ဖြစ်ပွားသွားသည့် ကမ္ဘာကျော်ဇာတ်လမ်းဖြစ်သည်။ ပိတ်မိနေသောဂူတွင်းမှ မြန်မာတို့ ထွက်ချိန်တန်ပြီ။ 

အယ်ဒီတာ
၁၁.၇.၂၀၁၈

You may also like...

Leave a Reply

Your email address will not be published. Required fields are marked *