ဘတ်ဂျက်ကိုကြည့်ကာ စီမံကိန်းများကိုရွေးကြသည်ဟု ဒေါ်အောင်ဆန်းစုကြည်ပြောကြား

ရန်ကုန်၊ ဇူလိုင် ၁၃

စီမံကိန်းများကို ရွေးချယ်ရာတွင် ဘတ်ဂျက်အခြေအနေကြည့်၍ ရွေးချယ်နေကြကြောင်း နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောဆိုလိုက်သည်။

ငွေရေးကြေးရေးမှာ အရေးကြီးသော်လည်း အမှန်တကယ် လုပ်သင့်လုပ်ထိုက်သည်ကိုရွေးရန် ပို၍အရေးကြီးပါကြောင်း သမ္မတအိမ်တော်တွင် ဇူလိုင်လ ၁၃ ရက်နေ့က ကျင်းပသည့် အမျိုးသားစီမံကိန်းကော်မရှင် အစည်းအဝေးတွင် ၎င်းက ယင်းသို့ပြောဆိုခြင်း ဖြစ်သည်။

မြန်မာနိုင်ငံသည် ချမ်းသာသည့်နိုင်ငံမဖြစ်သေးသဖြင့် ပို၍အရေးကြီးကြောင်း၊ နိုင်ငံအတွက် အများဆုံးအကျိုးဖြစ်စေမည့် ပြည်သူပြည်သားများဘ၀ မြှင့်တင်ရေးအတွက် အကျိုးဖြစ်စေမည့် စီမံကိန်းများကိုသာ ရွေးချယ်စေလိုကြောင်း ဒေါ်အောင်ဆန်းစုကြည်က တိုက်တွန်းသည်။

အမျိုးသားစီမံကိန်းသည် တိုင်းဒေသကြီးတစ်ခုတည်းအတွက်၊ ပြည်နယ်တစ်ခုတည်းအတွက်၊ ဝန်ကြီးဌာနတစ်ခုတည်းအတွက်မဟုတ်ဘဲ တစ်နိုင်ငံလုံးအတွက် အမျိုးသားအားလုံးအတွက် စီမံကိန်းများဖြစ်ရန် အရေးကြီးကြောင်းလည်း ၎င်းက ပြောဆိုသည်။

၂၀၁၈-၂၀၁၉ ဘဏ္ဍာနှစ်အတွက် အမျိုးသားစီမံကိန်းတွင် နိုင်ငံ၏ GDP ကို ၇ ဒသမ ၆ ရာခိုင်နှုန်း တိုးတက်မည်ဟု မျှော်မှန်းထားကြောင်း သမ္မတ ဦးဝင်းမြင့် က ပြောဆိုသည်။

နိုင်ငံ၏စီးပွားရေးသည် အရှိန် အဟုန်ဖြင့် မတိုးတက်သော်လည်း ၂၀၁၇- ၂၀၁၈ ဘဏ္ဍာနှစ် နှစ်ကုန်ခန့်မှန်းခြေတွင် စီးပွားရေးတိုးတက်မှုနှုန်းကို ၆ ဒသမ ၅ ရာခိုင်နှုန်း တိုးတက်ခဲ့သည်ကို တွေ့ရှိရကြောင်း ၎င်းကဆိုသည်။

လယ်ယာထွက်ကုန်များ ပြည်ပသို့ ပိုမိုတင်ပို့နိုင်ခြင်း၊ နိုင်ငံခြားရင်းနှီးမြှုပ်နှံမှုများ ထုတ်လုပ်မှုကဏ္ဍများသို့ စီးဝင်လာခြင်း၊ အသေးစားနှင့် အလတ်စားလုပ်ငန်းများ၊ ပို့ဆောင်ရေးနှင့် ခရီးသွားဝန်ဆောင်မှုလုပ်ငန်းများ၊ ဆက်သွယ်ရေး၊ ငွေရေးကြေးရေးနှင့် အခြားဝန်ဆောင်မှုများ
တိုးတက်ကောင်းမွန်လာခြင်းတို့ကြောင့် ယင်းသို့ တိုးတက်လာခြင်းဟု ၎င်းက ဆိုသည်။

အဆိုပါ အစည်းအဝေးသို့ သမ္မတနှင့် ဒုတိယသမ္မတများ၊ ပြည်ထောင်စုဝန်ကြီးများ၊ ပြည်ထောင်စုရှေ့နေချုပ်၊ ပြည်ထောင်စုစာရင်းစစ်ချုပ်၊ ပြည်ထောင်စု ရာထူးဝန်အဖွဲ့ ဥက္ကဋ္ဌ၊ နေပြည်တော်ကောင်စီ ဥက္ကဋ္ဌ၊ မြန်မာနိုင်ငံဗဟိုဘဏ်ဥက္ကဋ္ဌ၊ တိုင်းဒေသကြီးနှင့် ပြည်နယ်ဝန်ကြီးချုပ်များ တက်ရောက်ကြသည်။ 

You may also like...

Leave a Reply

Your email address will not be published. Required fields are marked *