ကြားဖြတ်ရွေးကောက်ပွဲ ကျင်းပမည်ကို မဲဆန္ဒရှင်အများစု မသိဟုဆို

ရန်ကုန်၊ ဇူလိုင်၁၃

ကြားဖြတ်ရွေးကောက်ပွဲကျင်းပရန် လေးလခန့်သာလိုတော့သော်လည်း မဲဆန္ဒရှင်ထက်ဝက်ကျော်က ရွေးကောက်ပွဲအကြောင်းကို မသိရှိသေးကြောင်း ရွေးကောက်ပွဲဆိုင်ရာပြည်သူ့လှုပ်ရှားမှုအဖွဲ့က အစီရင်ခံစာ ထုတ်ပြန်လိုက်သည်။

ကြားဖြတ်ရွေးကောက်ပွဲကျင်းပမည့် မဲဆန္ဒနယ် ၁၂ ခုက ပြည်သူ ၁၂၀၀ ကျော်ကို မေးမြန်းပြီး နှစ်ရက်ကြာ စစ်တမ်းပြုလုပ်ခဲ့ရာ ပြည်သူ ၄၈ရာခိုင်နှုန်းသာ ကြားဖြတ်ရွေးကောက်ပွဲကျင်းပမည့် အကြောင်းကို သိရှိကြောင်း ယင်းအဖွဲ့၏ အမှုဆောင်ဒါရိုက်တာဦးစိုင်းရဲကျော်မြင့်က ပြောကြားသည်။

ရွေးကောက်ပွဲအကြိုစစ်တမ်းနှင့် ပတ်သက်၍ ပြည်သူ့လှုပ်ရှားမှုအဖွဲ့က ဇူလိုင်လ ၁၃ ရက်က ရန်ကုန်တွင် သတင်းစာရှင်းလင်းပွဲ ပြုလုပ်သည်။

“ကော်မရှင်က ရွေးကောက်ပွဲနဲ့ ပတ်သက်လို့ အဓိကတာဝန်ရှိတဲ့သူတော့ မှန်တယ်။ နိုင်ငံရေးပါတီတွေမှာလည်း တာဝန်ရှိတယ်လို့ ယူဆတယ်”ဟု ကြားဖြတ်ရွေးကောက်ပွဲကျင်းပမည်ကို ပြည်သူသိရှိမှုအားနည်းမှုအပေါ် ဦးစိုင်းရဲကျော်မြင့်က မှတ်ချက်ပေးသည်။

အဆိုပါကိစ္စနှင့် ပတ်သက်၍ ပြည်ထောင်စုရွေးကောက်ပွဲကော်မရှင်မှ ပြောရေးဆိုခွင့်ရှိသူ ဦးမြင့်နိုင်ကို ဆက်သွယ်မေးမြန်းရာ မှတ်ချက်ပေးရန် ငြင်းဆိုခဲ့သည်။

မဲဆန္ဒရှင်များသိရှိမှုအားနည်းခြင်းမှာ ပြည်ထောင်စုရွေးကောက်ပွဲကော်မရှင်က သတင်းအချက်အလက် ဖြန့်ဝေရာတွင် လွန်စွာအားနည်းခြင်းကြောင့် ဖြစ်ကြောင်း ဦးစိုင်းရဲကျော်မြင့်က ဆိုသည်။

ထိုသို့နည်းပါးခြင်းအပေါ် မဟာဗျူဟာရေးဆွဲကာ လူ့ထုအသိပေးမှုများ လုပ်ဆောင်သင့်ကြောင်း အစီရင်ခံစာကို ပြည်ထောင်စုရွေးကောက်ပွဲကော်မရှင်သို့ ဇူလိုင် ၁၂ ရက်တွင် ပေးပို့ချိန်၌ ဆွေးနွေးခဲ့ကြောင်း ၎င်းက ဆိုသည်။

ကြားဖြတ်ရွေးကောက်ပွဲကို ချင်း၊ ရှမ်း၊ ကချင်၊ ရခိုင်ပြည်နယ်တို့နှင့် ရန်ကုန်၊ မန္တလေး၊ စစ်ကိုင်း၊ ပဲခူး၊ မကွေးတိုင်းတို့တွင် နိုဝင်ဘာလ ၄ရက်နေ့ ကျင်းပမည် ဖြစ်သည်။

You may also like...

Leave a Reply

Your email address will not be published. Required fields are marked *