ဘင်္ဂါလီများ ပြန်လည်လက်ခံရေးစတင်နိုင်ရန် ကုလကျွမ်းကျင်အဖွဲ့များ ရခိုင်သို့ စေလွှတ်မည်

ရန်ကုန်၊ ဇူလိုင်၁၃

ဘင်္ဂလားဒေ့ရ်ှနိုင်ငံသို့ ထွက်ပြေးသွားသည့် ဘင်္ဂါလီများကို မြန်မာနိုင်ငံက လက်ခံရေးလုပ်ငန်းစဉ်များ စတင်ရန်ရည်ရွယ်၍ ကျွမ်းကျင်သူများပါဝင်သည့် အဖွဲ့များကို ကုလသမဂ္ဂက စေလွှတ်မည် ဖြစ်ကြောင်း ရိုက်တာသတင်းတစ်ရပ်တွင် ရေးသားထားသည်။

အဆိုပါအဖွဲ့သည် ရခိုင်ပြည်နယ်မြောက်ပိုင်းတွင် နေထိုင်နေသည့် ဘင်္ဂါလီ နှစ်သိန်းကျော်နှင့် အခြားဒေသခံများ၏ လိုအပ်ချက်များကို ဆန်းစစ်သွားမည်ဖြစ်ကြောင်း ကုလသမဂ္ဂဖွံ့ဖြိုးရေးအစီအစဉ် (UNDP) ၏ အာရှ-ပစိဖိတ်ဒေသဆိုင်ရာ ညွှန်ကြားရေးမှူး Haoliang Xu က ပြောကြားသည်။

လက်ရှိနေထိုင်နေသည့် လူများကို အကျိုးပြုနိုင်မည့် ငွေရသည့် အလုပ်စီမံကိန်းများ၊ အခြေခံအဆောက်အဦ မြှင့်တင်ရေး သို့မဟုတ် လယ်ယာစိုက်ပျိုးရေး အစီအစဉ်များကဲ့သို့ မြန်ဆန်ထိရောက်သော စီမံကိန်းများ ဆောင်ရွက်ခြင်းဖြင့် နေရပ်ပြန်သူများအတွက် အခြေအနေများဖန်တီးပေးရန် အစီအစဉ်ကို ဒီဇိုင်းရေးဆွဲထားကြောင်း ၎င်းက ဆိုသည်။

လာရောက်မည့် အချိန်ကာလကို ယင်းသတင်းတွင် ဖော်ပြထားခြင်း မရှိပေ။

မြန်မာနိုင်ငံသို့ ရောက်ရှိနေသည့် မြန်မာနိုင်ငံဆိုင်ရာ ကုလသမဂ္ဂအထူးကိုယ်စားလှယ်နှင့် ပြည်ထောင်စုဝန်ကြီး ဦးကျော်တင်တို့ကလည်း နေပြည်တော်တွင် ဇူလိုင်လ ၁၁ ရက်နေ့က အဆိုပါကိစ္စကို ဆွေးနွေးခဲ့သေးသည်။

မြန်မာနိုင်ငံနှင့် UNHCR ၊ UNDP တို့အကြား လက်မှတ်ရေးထိုးထားသည့် နားလည်မှု စာချွန်လွှာအကောင်အထည်ဖော်နိုင်ရန်အတွက် အဆိုပါအဖွဲ့ အစည်းများနှင့် မြန်မာနိုင်ငံအကြား နည်းပညာလုပ်ငန်းအဖွဲ့အစည်းအဝေးကျင်းပရန် ဆွေးနွေးခဲ့ကြောင်း နိုင်ငံခြားရေးဝန်ကြီးဌာနက ထုတ်ပြန်သည်။

အကြမ်းဖက်တိုက်ခိုက်မှုစတင်ဖြစ်ပွားသည့် ၂၀၁၇ ခုနှစ် ဩဂုတ်လ နောက်ပိုင်း ကုလသမဂ္ဂဝန်ထမ်းများကို ပထမဆုံးအကြိမ်အဖြစ် ရခိုင်ပြည်နယ်မြောက်ပိုင်းသို့ လွတ်လပ်စွာသွားလာရန် ပြီးခဲ့သည့် တစ်ပတ်က ခွင့်ပြုပေးခဲ့ကြောင်း Haoliang Xu က ဆိုသည်။

သို့သော်လည်း သင့်လျော်သည့် အကဲဖြတ်ဆန်းစစ်မှုများ မစတင်ခင် ကနဦးလုပ်ငန်းအစီအစဉ်တစ်ခုကို အစိုးရနှင့်အတူ ချမှတ်ရန်လိုနေသေးသည်ဟု Haoliang Xu က ရိုက်တာသတင်းဌာနကို ရန်ကုန်မြို့တွင် ပြောကြားခဲ့သည်။

ကုလသမဂ္ဂနှင့် အစိုးရကြား သဘောတူညီထားမှုများသည် ထုတ်ပြန်မှုမပြုလုပ်ခဲ့သော်လည်း ပြီးခဲ့သည့်လက အွန်လိုင်းတွင် အဆိုပါဆွေးနွေးသဘောတူညီမှု မူကြမ်းပေါက်ကြားခဲ့သည်။

မြန်မာအစိုးရနှင့် ကုလသမဂ္ဂတို့ကြား နားလည်မှုစာချွန်လွှာသည် နေရပ်ပြန်သူများအတွက် နိုင်ငံသားဖြစ်ခွင့် သို့မဟုတ် မြန်မာနိုင်ငံအတွင်း လွတ်လပ်စွာသွားလာခွင့်များအပေါ် ရှင်းလင်းပြတ်သားသည့် အာမခံချက်မပါရှိဟု ဒုက္ခသည်ခေါင်းဆောင်များနှင့် လူ့အခွင့်အရေးအဖွဲ့များက ဝေဖန်ကြသည်။

You may also like...

Leave a Reply

Your email address will not be published. Required fields are marked *