ကက်ဘိနက်အကြွေးတောင်း ဇာတ်လမ်း 

အကြွေးပေးဟု တောင်းသည်။ မပေးနိုင်ဟု တုံ့ပြန်သည်။ ဘာဆက်ဖြစ်မည်နည်း။

NLD အစိုးရ၏သက်တမ်းသုံးနှစ်အတွင်း ရောက်နေချိန်တွင် မန္တလေးတိုင်းအစိုးရဟောင်း၏ ကြွေးကျန်များကို ပေးကြရန် ဝန်ကြီးချုပ်ဒေါက်တာဇော်မြင့်မောင်က တောင်းခံလိုက်ခြင်းဖြစ်သည်။

“ပြည်သူ့ငွေတွေကို ဒီလိုအကြွေးထားပြီး ဆပ်ကို ဆပ်ရမယ်။ ပေးကို ပေးရမယ်”ဟု ဒေါက်တာဇော်မြင့်မောင်က ဇွန်လ ၂၈ ရက်နေ့တွင် မီဒီယာများမှ တစ်ဆင့် အသိပေးလိုက်သည်။

“လျှော်ရိုးထုံးစံ မရှိဘူး”ဟု ၎င်းက ဆက်ပြောသည်။

ယင်းနေ့ကပြုလုပ်ခဲ့သည့် အစိုးရ၏ ဒုတိယတစ်နှစ်တာ ပြုပြင်ပြောင်းလဲမှုသတင်းစာရှင်းလင်းပွဲတွင် ဝန်ကြီးချုပ်ဖတ်ကြားခဲ့သည့် တိုင်းဒေသကြီးစာရင်းစစ်ချုပ်၏အစီရင်ခံစာအရ ယခင်အစိုးရမှ ပြန်လည်ပေးသွင်းရန်နှင့် စာရင်းရှင်းပေး ရန် ကြွေးကျန်စာရင်းမှာ သုံးဘီလီယံကျော် (ဒေသဖွံ့ဖြိုးရေး၊ ဆင်းရဲနွမ်းပါးမှုလျော့ချရေး၊ အစိုးရအဖွဲ့ရန်ပုံငွေစသည့် ကဏ္ဍအသီးသီးမှ ရရှိရန် ကျန်ရှိနေသည့် ကျပ်၂၉၅၂ ဒသမ ၇၃၂ သန်းနှင့် အစုရှယ်ယာတန်ဖိုး ၃၇၅ သန်း) ဖြစ်သည်။

“စစ်လိုက်လို့ ဒီစာရင်းတွေ ပေါ်လာတာ”ဟု မန္တလေးတိုင်းဒေသကြီးစီမံကိန်းနှင့် ဘဏ္ဍာရေးဝန်ကြီးဦးမြတ်သူက ပြောသည်။

ပြန်လည်ပေးသွင်းခြင်း၊ ရှင်းလင်းခြင်းပြုရမည်ဆိုသည့် ငွေ ၃ ဒသမ ၃ ဘီလီယံကျော်အနက် ဆင်းရဲနွမ်းပါးမှုလျှော့ချရေး ရန်ပုံငွေအဖြစ် သုံးစွဲခဲ့သည့် ကျပ်၂၃၀၃ ဒသမ ၂၈ သန်းကိုသာ ပြန်လည်ပေးသွင်းခြင်းပြုရမည်ဖြစ်ပြီး ကျန်ငွေပမာဏမှာ ဌာနဆိုင်ရာများ၊ သက်ဆိုင်ရာ ကုမ္ပဏီ၊ အဖွဲ့အစည်းများမှ ရှင်းလင်းရမည်ဖြစ်ကာ အစိုးရအဖွဲ့ဟောင်းနှင့် တိုက်ရိုက် မသက်ဆိုင်ပေ။

ကြွေးကျန်ကိစ္စနှင့် ပတ်သက်၍လည်း အစိုးရအဖွဲ့ဟောင်းက ဇူလိုင်လ ၂၆ ရက်နေ့တွင် သတင်းစာရှင်းလင်းပွဲ ပြုလုပ်ခဲ့ပြန်သည်။

၎င်းတို့ အဓိကရှင်းလင်းရန်ဖြစ်သည့် မြ၀တီဘဏ်တွင် ဆင်းရဲနွမ်းပါးမှုလျှော့ချရေးရန်ပုံငွေ စာရင်းငွေစုစာအုပ် S – 302 ဖြင့် ထားရှိသည့် ကျပ်၂၃၀၃ ဒသမ ၂၈သန်းသည် ၂၀၁၀ပြည့်နှစ်အတွင်းက စီးပွားရေးလုပ်ငန်းရှင်အချို့၏ Voluntarily Donars အဖြစ် အစိုးရအဖွဲ့ထံ ထည့်ဝင်ငွေ ၄ ဒသမ ၂၂၅ ဘီလီယံကို အခြေတည်သည့် ငွေများဖြစ်ပြီး အစိုးရပိုင်ငွေ၊ ပြည်သူ့ဘဏ္ဍာငွေများ မဟုတ်ကြောင်း ဝန်ကြီးချုပ်ဟောင်းဦးရဲမြင့်က ရှင်းပြသည်။

“အစိုးရသစ်တက်လာတော့ တို့ဆီမှာ ဘာရန်ပုံငွေမှ မရှိဘူး။ ဒါကြောင့် ငွေကြေးတတ်နိုင်တဲ့ လုပ်ငန်းရှင်တွေဆီကနေ အကူအညီတောင်းရတယ်”ဟု ၎င်းက ပြောသည်။

ထိုသို့လုပ်ငန်းရှင်အချို့၏ ကူညီထည့်ဝင်ငွေနှင့် ပတ်သက်၍ သဘောတူညီချက်အရ လုပ်ငန်းများပြီးဆုံးချိန်တွင် ထည့်ဝင်ငွေအားလုံးနှင့် ဘဏ်နှုန်းထားထက် မနိမ့်သည့် အတိုးနှုန်းတစ်ခုကို ပြန်လည်ပေးဆပ်မည်ဟု ကတိပြုခဲ့ကြကြောင်း အစိုးရအဖွဲ့ဟောင်းထံမှ သိရသည်။

ယင်းငွေများဖြင့် တိုင်းဒေသကြီးအတွင်း တောင်သူတို့၏ စိုက်ပျိုးရေးနှင့် မွေးမြူရေးလုပ်ငန်းများ၊ တစ်ပိုင်တစ်နိုင် လုပ်ငန်းများ၊ လျှပ်စစ်မီးရရှိရေးလုပ်ငန်းများ၊ အိမ်တွင်းမှုလုပ်ငန်းများလုပ်ကိုင်နိုင်ရန်အတွက် ချေးငွေကူညီပေးခဲ့ပြီး တောင်သူများမှ တစ်နှစ်အတွင်း ပြန်လည်ပေးဆပ်ကြခဲ့ကြရသည်။

ထို့ကြောင့် အစိုးရသက်တမ်းငါးနှစ်အတွင်း ယင်းငွေ၏လည်ပတ်သုံးစွဲမှုသည် ၁၉ ဒသမ ၈၈ဘီလီယံအထိ ရှိလာခဲ့ကာ ကူညီထည့်ဝင်ငွေများကို ပြန်လည်ထုတ်ပေးလိုခြင်း၊ ထပ်မံထုတ်ချေးငွေရပ်ဆိုင်းလိုခြင်းများကြောင့် မူလအလှူရှင်များထံ မတည်ငွေပြန်လည်ထုတ်ပေးခြင်းနှင့် ဂုဏ်ပြုခြင်းကို ၂၀၁၅ခုနှစ် အတွင်း ပြုလုပ်ခဲ့သည်။

“အဲဒီမှာ တချို့ကလည်း အရင်းပဲယူကြတယ်။ အတိုးမယူကြဘူး။ တချို့ကလည်း အတိုးကော အရင်းကောမယူကြတော့ဘူး”ဟု မန္တလေးတိုင်းလျှပ်စစ်ဝန်ကြီးဟောင်း ဦးကျော်မြင့်က ရှင်းပြသည်။

ထို့ကြောင့် မတည်အလှူရှင်တို့၏ သဘောတူညီချက်ဖြင့် ပရဟိတဖောင်ဒေးရှင်းတစ်ခုထူထောင်ရန် အစိုးရအကူးအပြောင်း မတိုင်မီ ၂၀၁၅ ခုနှစ်အတွင်းက ဆွေးနွေးခဲ့ကြပြီး ၂၀၁၇ ခုနှစ် ဩဂုတ်လတွင် ‘ရတနာပုံဖောင်ဒေးရှင်း’ အမည်ဖြင့် တရားဝင်ဖွဲ့စည်းခဲ့ကာ ဘဏ်တွင် ယာယီထိန်းသိမ်းထားသည့် ငွေများကို ဖောင်ဒေးရှင်းသို့ ၂၀၁၇ ခုနှစ် စက်တင်ဘာလ ၂၇ ရက်နေ့တွင် တရားဝင်လွှဲပြောင်းပေးအပ်ခဲ့ပြီးဖြစ်ကြောင်း အစိုးရအဖွဲ့ဟောင်းထံမှ သိရသည်။

“ဒီငွေကြေးဖြစ်ပေါ်လာပုံ၊ ဘယ်လို ကိုင်တွယ်သုံးစွဲတယ်ဆိုတာ အကုန်လုံးပြောပြပြီး ဖြစ်တယ်။ အဲတော့ ဒီငွေတွေကို နိုင်ငံတော်ကို ပြန်သွင်းဖို့ တစ်စုံတစ်ရာရှိ မရှိကို သုံးသပ်လို့ ရနေပါပြီ။ ကျွန်တော်တို့ကတော့ ဒီလိုပဲ ခံယူထားပါတယ်”ဟု ဝန်ကြီးချုပ်ဟောင်းဦးရဲမြင့်က ထပ်လောင်းပြောဆိုသည်။

မိမိတို့အနေဖြင့် ပြည်သူ့ဘဏ္ဍာငွေများကို ကိုယ်ကျိုးအတွက် သုံးစွဲခဲ့ခြင်းလည်း လုံးဝမရှိဟု ၎င်းက ဆိုသည်။

ထိုသို့ဆိုလျှင် အစိုးရဟောင်း၏ ရန်ပုံငွေကိစ္စမှာ အစိုးရသစ်သို့ လုံးဝလွှဲပြောင်းရန် မလိုအပ်တော့သည့် အနေအထား ဖြစ်နေသလား။

“တိုင်းဒေသကြီးက ဒေသခံတွေကို ကူညီနိုင်အောင်လို့ စေတနာရှင် စီးပွားရေးသမားတွေက လှူကြတယ်။ တို့ကလည်း ထိထိရောက်ရောက် ကူညီပေးနိုင်ခဲ့တယ်။ ပြီးတော့ သူတို့ရဲ့သဘောထားအရပဲ ပရဟိတလုပ်ငန်းတွေ ဆက်လက်လုပ်ကိုင် နိုင်အောင် ဖောင်ဒေးရှင်းတစ်ခု ထောင်လိုက်တယ်လေ”ဟု လျှပ်စစ်ဝန်ကြီးဟောင်းဦးကျော်မြင့်က ရှင်းပြသည်။

လူပုဂ္ဂိုလ်တစ်ဦးတစ်ယောက်သို့ ရည်စူးလှူဒါန်းခြင်း မဟုတ်ဘဲ အစိုးရအဖွဲ့ အစည်းတစ်ရပ်သို့ လှူဒါန်းသည့် ငွေများ ကို ယင်းကဲ့သို့ ဖောင်ဒေးရှင်း သို့မဟုတ် အဖွဲ့အစည်းတစ်ခုသို့ အလွယ်တကူပြောင်းလွှဲ၍ ရနိုင်ပါ၏လော။

“အဖွဲ့အစည်းကို လာလှူတာလေ၊ လူပုဂ္ဂိုလ်ကို ရော့ အင့် ဆိုပြီး လှူတာ မဟုတ်ဘူး။ ဒါကို ကိုယ်ပိုင်လုပ်လို့ မရဘူး။ သုံးစွဲပြီး ပိုလျှံရင် စာရင်းဇယားနဲ့တကွ အပ်ရမယ်။ နောက်လူက ဆက်ထိန်းပြီး သုံးစွဲရမယ်”ဟု မန္တလေးတိုင်းစီမံကိန်းနှင့် ဘဏ္ဍာရေးဝန်ကြီး ဦးမြတ်သူက တုံ့ပြန်သည်။

အစိုးရဟောင်းအနေနှင့် စီးပွားရေးလုပ်ငန်းရှင်တို့၏ လှူဒါန်းမှုသည် အစိုးရအဖွဲ့ကို လှူဒါန်းသည်လား၊ ပုဂ္ဂိုလ်ရေးအရ လှူဒါန်းသည်လားဆိုသည်ကို ကွဲကွဲပြားပြားပြောဆိုခဲ့ခြင်းမရှိသလို မည်သူ့ထံမှ လှူဒါန်းငွေပမာဏ မည်မျှရှိသည်ဆိုသည်ကိုလည်း မရှင်းလင်းခဲ့ပေ။

ထိုမျှမကသေး၊ အလှူငွေများ လက်ခံရရှိချိန်ကလည်း ပြည်သူထံသို့ ပွင့်လင်းမြင်သာစွာ သတင်းထုတ်ပြန်ခဲ့ခြင်း မရှိသလို ယင်းငွေများကို ပြည်သူများထံ အတိုးယူချေးငွေထုတ်ပေးနေမှုတွင် ဥပဒေအရဆောင်ရွက်ခဲ့ခြင်း ဟုတ် မဟုတ် ဆိုသည်ကိုလည်း မေးခွန်းထုတ်ရန် လိုအပ်ပါသည်။

ယင်းကြွေးကျန်များကို ပြန်လည်ပေးအပ်ရန်တောင်းဆိုခြင်းသည် ၎င်းတို့ ၏ ရတနာပုံဖောင်ဒေးရှင်းမတည်ထောင်ခင်က ဖြစ်ကြောင်း ၎င်းက ဆိုသည်။

“ဒါတွေက ကလေးတွေးတောင် ရတယ်။ ပြန်ပေးရမှာလား၊ မပေးရဘူးလား ဆိုတာ”ဟု ဦးမြတ်သူက ပြောသည်။

အဆိုပါရန်ပုံငွေများကို မြ၀တီဘဏ်တွင် S-302 ဖြင့် အပ်နှံထားကြောင်း သိရသည့်အတွက် စစ်ဆေးရန် ယင်း ဘဏ်စာအုပ်တွင် ပူးတွဲအမည်ဖွင့်ထားသည့် အစိုးရအဖွဲ့ဟောင်း၏ စိုက်/မွေးဝန်ကြီးဟောင်းဦးမြင့်သန်းနှင့် အတွင်းရေးမှူးဟောင်း ဦးအုန်းလွင်တို့ နှစ်ဦးက၂၀၁၇ ခုနှစ် စက်တင်ဘာလ ၁ ရက်နေ့တွင် လက်ရှိအစိုးရအဖွဲ့ထံ ရှင်းပြခဲ့သေးသည်။

သို့သော် ယင်းငွေများ ပြန်လည်ပေးသွင်းရန်အတွက် ၂၀၁၈ ခုနှစ် မတ်လ ၂၁ ရက်နေ့တွင် ၎င်းတို့ကို အကြောင်းကြားခဲ့သဖြင့် ငွေကြေးဖြစ်ပေါ်လာပုံ၊ သုံးစွဲလှူဒါန်းပုံနှင့် ဖောင်ဒေးရှင်းအဖြစ် ပြောင်းလဲဖွဲ့စည်းဆောင်ရွက်နေပုံတို့ကို အထောက်အထားများဖြင့် တင်ပြခဲ့ကြောင်း အစိုးရအဖွဲ့ဟောင်းထံမှ သိရသည်။

ယင်းအပြင် နိုင်ငံတော်သမ္မတထံ ၂၀၁၈ ခုနှစ် ဇွန်လ ၂၈ ရက်နေ့တွင်လည်း တင်ပြထားပြီး ဝန်ကြီးချုပ်ထံသို့လည်း စာရင်းစစ်ချုပ်အစီရင်ခံစာရရှိရန် သတင်းစာရှင်းသည့်နေ့တွင် တင်ပြခဲ့သည်။

စာရင်းစစ်ချုပ်၏ စစ်ဆေးမှုများ၊ ကြွေးကျန်ပြန်လည်တောင်းခံမှုများသည် နိုင်ငံတော်သမ္မတရုံး၏ ညွှန်ကြားချက်ဖြင့် ဆောင်ရွက်ခြင်းဖြစ်ပြီး ကြွေးကျန်များလျှော်ပေးရန် မိမိတို့က ဆုံးဖြတ်၍မရဟု ဝန်ကြီးဦးမြတ်သူက ဆိုသည်။

“အထက်က ညွှန်ကြားချက်ကို ကျွန်တော်တို့ ငြင်းလို့ မရဘူး။ နောက်ပြီး ဒီငွေတွေကို သူတို့က ဒီလိုသုံးထားတာပါ၊ မတောင်းသင့်တော့ပါဘူး ဆိုပြီးလည်း ပြောလို့မရဘူး”ဟု ၎င်းက ပြောသည်။

NLD အစိုးရသစ်တက်လာပြီးနောက် အစိုးရဟောင်း၏ ကြွေးကျန် စာရင်းများ ပေါ်ပေါက်မှုတွင် မကွေးတိုင်းက ပထမ ဖြစ်သည်။

ယခင်အစိုးရအဖွဲ့ ကြွေးကျန်ပေါင်း ၇ ဒသမ ၄၅၉ ဘီလီယံကျော်ကို စစ်ဆေး တွေ့ရှိခဲ့ရပြီး ၂၀၁၇ ခုနှစ် ဩဂုတ်လတွင် ပြန်လည်ပေးသွင်းခဲ့သည်။

စစ်ကိုင်းတိုင်းဒေသကြီးတွင်လည်း ယခင်အစိုးရကြွေးကျန် ကျပ်သန်းပေါင်း ၁၇၂၇ ကျော်ရှိခဲ့ပြီး ယင်းတို့ကို ငွေသား ကော၊ စာရင်းဇယားများပါ ရှင်းလင်းစွာပြန်လည်ရရှိခဲ့ပြီးဖြစ်ကြောင်း ဇူလိုင်လ ၁၈ ရက်နေ့က ပြုလုပ်သည့် စစ်ကိုင်းတိုင်းဒေသကြီး အစိုးရအဖွဲ့၏ ဒုတိယတစ်နှစ်တာဆောင်ရွက်မှုများ သတင်းစာရှင်းလင်းပွဲတွင် ပြောဆိုထားသည်။

အလားတူ ဧရာဝတီတိုင်းအစိုးရအဖွဲ့တွင်လည်း ကြွေးကျန် ၅ ဒသမ ၂ ဘီလီယံကို ပြန်လည်ပေးသွင်းရန်အတွက် နိုင်ငံတော် သမ္မတရုံးက ဇူလိုင်လပထမပတ်အတွင်း ညွှန်ကြားချက်ထုတ်ပြန်ထားသည်။

ယခုမန္တလေးတိုင်းတွင်မူ စာရင်းဇယားအတိအကျဖြင့် ပေါ်ပေါက်နေပြီဖြစ်သော်လည်း ပြန်ပေးမည့်အနေအထားက မရှိသေး။

“အကယ်၍ တရားတဘောင်တွေ ဖြစ်လာပါပြီတဲ့၊ လှူဒါန်းထားတဲ့ သူဌေးတွေထဲက ဘယ်သူက သက်သေအဖြစ်နဲ့ တရားရုံးကို လာမလဲ၊ မလာလောက်ဘူးနော်”ဟု အစိုးရအဖွဲ့ဟောင်းနှင့် နီးစပ်သူတစ်ဦးက ရှင်းပြသည်။

လက်ရှိအစိုးရတွင်လည်း လုပ်ငန်းရှင်များက လှူဒါန်းထားသည့် ငွေများ ရှိသည်။

အစိုးရတက်လာပြီး မကြာမီ မန္တလေးတိုင်းဒေသကြီးအတွင်း မိုးသီးကျခြင်း၊ လေပြင်းတိုက်ခြင်း စသည့်သဘာဝဘေးဒဏ်များကို ခံခဲ့ကြရပြီး ယင်းဒေသများကို ကူညီနိုင်ရန်အတွက် တိုင်းဒေသကြီးအတွင်းရှိ စီးပွားရေးသမားများထံမှ အလှူငွေများ လက်ခံခဲ့ရသည်။

“ကျွန်တော်တို့ အဲဒီဒေသတွေကို သွားတဲ့အခါမှာ လက်ချည်းဗလာနဲ့ သွားရပါတယ်။ ဘာမှထောက်ပံ့မှုတွေ မလုပ်နိုင်လို့ မျက်နှာငယ်ရတယ်။ ဒီတော့ NLD ရဲ့ထုံးစံအတိုင်း အလှူခံရတာပေါ့။ ပြင်ပစေတနာရှင်တွေက လှူဒါန်းတာတွေရှိသလို တိုင်းဒေသကြီးအတွင်းမှာရှိတဲ့ ကုမ္ပဏီတွေ အဖွဲ့အစည်းတွေနဲ့ တွေ့ဆုံပြီး သူတို့ရဲ့လုပ်ငန်းတွေအကြောင်း ရှင်းရှင်း လင်းလင်း သိရအောင် မေးမြန်းရင်း အလှူခံရတယ်”ဟု ဝန်ကြီးချုပ်ဒေါက်တာဇော်မြင့်မောင်က ထိုစဉ်က သတင်းမီဒီယာများနှင့် တွေ့ဆုံပြီး ပြောဆိုခဲ့သည်။

ယင်းငွေများသည် စုစုပေါင်းအနည်းဆုံးတစ်ဘီလီယံနီးပါးရှိပြီး နှောင်ကြိုးမဲ့အလှူငွေများအဖြစ် လက်ခံခြင်းဖြစ်ကာ လှူဒါန်းသူများကို မျက်နှာသာပေး၍ လုပ်ငန်းများ ချပေးသွားမည်မဟုတ်ဟု ၎င်းက ဆိုခဲ့သည်။

အလှူငွေများသုံးစွဲရန် သဘာဝဘေးကယ်တင်ရေးကော်မတီဖွဲ့စည်း၍ ယင်းကော်မတီကို လွှဲပြောင်းပြီး လုပ်ကိုင်သွားမည်ဟုလည်း ပြောဆိုခဲ့သည်။

ယင်းငွေများကို လက်ရှိတွင် မည်သို့မည်ပုံသုံးစွဲနေသည်ကို ပြည်သူများ မသိရှိရဘဲ အစိုးရဟောင်း၏ လမ်းစဉ်အတိုင်း ဖြစ်သွားနိုင်မည်ကို စိုးရိမ်သူများလည်း ရှိသည်။

“အခုအစိုးရဟောင်းရဲ့ ပုံက ဒီငွေတွေကို ဒီလိုလုပ်လို့ရတယ်ဆိုပြီး သင်ပေးနေသလို ဖြစ်နေတယ်”ဟု အစိုးရနှစ်ခုစလုံးနှင့် နီးစပ်သူတစ်ဦးက သူ့အမြင်ကို ပြောသည်။

သို့သော် အစိုးရသက်တမ်းသုံးနှစ်ခန့်ကျန်သေးသဖြင့် ထိုသူစိုးရိမ်သည့်အတိုင်း ဖြစ်၊ မဖြစ်ကိုမူ မသိရှိနိုင်သေးပေ။

လက်ရှိပြဿနာကမူ ကြွေးကျန်သုံးဘီလီယံနီးပါးကို ပြန်ရ၊ မရ ဆိုသည့် ပုစ္ဆာဖြစ်သည်။

ယင်းငွေများကို ရတနာပုံဖောင်ဒေးရှင်းသို့ အပြီး လွှဲပြောင်းထားပြီး ဖြစ်သော်လည်း ဖောင်ဒေးရှင်းမှ ယင်းငွေများကို သုံးစွဲခြင်းမရှိဘဲ ဘဏ်တိုးငွေများဖြင့်သာ ပရဟိတလုပ်ငန်းများ လုပ်ဆောင်နေသဖြင့် ငွေကို မဖြစ်မနေပြန်ပေးရမည့် အနေအထား ဖြစ်လာပါကလည်း အသင့်ရှိကြောင်း အစိုးရအဖွဲ့ဟောင်းတာဝန်ရှိသူတစ်ဦးက ဆိုသည်။

ယင်းနှင့်ပတ်သက်၍ တိုင်းဒေသကြီးအစိုးရအဖွဲ့အစည်းအဝေးများတွင် ဆွေးနွေးပြောဆိုမှုများရှိပြီး နောက်ဆုံးအခြေအနေကိုမူ မပြောလိုသေးကြောင်း စီမံကိန်းနှင့် ဘဏ္ဍာရေးဝန်ကြီးဦးမြတ်သူက ပြောသည်။

“ကျွန်တော်တို့က ဖောင်ဒေးရှင်းမဖွဲ့ခင်ကတည်းက တောင်းထားတာ။ သွင်းပါလို့ ပြောရင် သွင်းကို သွင်းရမှာ”ဟု ဝန်ကြီးက ကြွေးကျန်များပြန်ပေးရန် အစိုးရဟောင်းသို့ ထပ်မံပြောဆိုလိုက်လေသည်။

အကြွေးတောင်းဇာတ်လမ်းက ယခုမှစတင်ခြင်း ဖြစ်သည်။

မြတ်(ကလေး)

You may also like...

Leave a Reply

Your email address will not be published. Required fields are marked *