“ပိုက်ဆံတွေ အမှိုက်ပုံရောက်နေသလိုတွေ မြင်ရတယ်” ဒေါက်တာဦးမြင့်

မြန်မာကျပ်ငွေတန်ဖိုးကျဆင်းခြင်းနှင့် လက်ရှိမြန်မာ့စီးပွားရေးအခြေအနေတို့ကို ဘောဂဗေဒပညာရှင် ဒေါက်တာဦးမြင့်က ဩဂုတ်လ ၄ ရက်နေ့တွင် ပြည်ထောင်စုသမ္မတ မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်တွင် ဟောပြောခဲ့မှုကို ပြန်လည်အနှစ်ချုပ် ဖော်ပြလိုက်သည်။

အမျိုးသားဒီမိုကရေစီအဖွဲ့ချုပ်ပါတီအစိုးရ တာဝန်စယူသည့် ၂၀၁၆ ခုနှစ် ဧပြီလမှ ယခုနှစ် ဇွန်လအထိ ၂၆ လအတွင်း အမေရိကန် တစ်ဒေါ်လာဝယ်ယူရန် မြန်မာငွေ ၁၈၂ ကျပ်ခန့် ပိုမိုသုံးစွဲရမည်ဖြစ်ပြီး ယင်းမှာဒေါ်လာငွေလဲနှုန်းတွင် မြန်မာကျပ်ငွေတန်ဖိုး ၁၅ ဒသမ ၄ ရာခိုင်နှုန်းကျဆင်းသွားခြင်းဖြစ်သည်။

ကျပ်ငွေတန်ဖိုးကျဆင်းရာတွင် ယခုနှစ် မေလတွင် ၁ ဒသမ ၈ ရာခိုင်နှုန်း၊ ဇွန်လတွင် ၃ ဒသမ ၈ ရာခိုင်နှုန်းအသီးသီး ကျဆင်းခဲ့ပြီး လပိုင်းအတွင်း ယင်းသို့ကျဆင်းမှုသည် ပိုမိုဆိုးရွားကာ ဆက်လက်၍လည်း ကျပ်ငွေတန်ဖိုးကျဆင်းနိုင်ကြောင်း ဒေါက်တာဦးမြင့်၏ ယခုနှစ် ဇူလိုင်လ ၂၅ ရက်နေ့ ရက်စွဲဖြင့် ရေးသားထားသောစာတမ်းတွင် ဖော်ပြထားသည်။

ငွေလဲနှုန်းအတက်ကြမ်းမှုနှင့်ပတ်သက်၍ လက်ရှိအချိန်ထိဗဟိုဘဏ်တာဝန်ရှိသူများဘက်မှ လုပ်ဆောင်ချက်များကို မမြင်တွေ့ရသေးကြောင်း ဘောဂဗေဒပညာရှင် ဒေါက်တာ ဦးမြင့်က ဆိုသည်။

“ကျပ်ငွေလဲလှယ်နှုန်းကိစ္စနဲ့ပတ်သက်လို့ ဗဟိုဘဏ်ကဘာမှမယ်မယ်ရရလုပ်ထားတာမတွေ့သေးပါဘူး” ဟု ၎င်းက ဆိုသည်။

ထို့ပြင် ယခုနှစ် ဇူလိုင်လကုန်တွင် သက်တမ်းပြည့်သွားသောဗဟိုဘဏ်ဥက္ကဋ္ဌရာထူးတွင် လက်ရှိတာဝန် ထမ်းဆောင်နေသော ဦးကျော်ကျော်မောင်ကို ပြန်လည်ခန့်အပ်မှုနှင့်ပတ်သက်၍ ကန့်ကွက်မှု၊ သဘောမတူညီမှုများရှိနေရာ ယင်းခန့်အပ်မှုနှင့်စပ်လျဉ်း၍ အစိုးရအဖွဲ့က ပြန်လည်ရှင်းပြချက်ပေးရန်လိုကြောင်း၎င်းက တိုက်တွန်းသည်။

“ဘာဖြစ်လို့ သူ့ကိုခန့်တယ်၊ ဘာဖြစ်လို့ သင့်တော်တယ်၊ ဘာဖြစ်လို့ သူအလုပ်လုပ်နိုင်တယ်ဆိုတာကို ကျွန်တော်တို့ မသိရပါဘူး။ မသိရလို့ ကျွန်တော်တို့သိချင်ပါတယ်။ တိုင်းပြည်မှာကိစ္စတစ်ခုခုဖြစ်လို့ရှိရင် တိုင်းပြည်သူသားတွေအနေနဲ့ သိချင်တယ်။ ဒါကြောင့်မို့လို့ ကျွန်တော့်အနေနဲ့လေးစားစွာမေတ္တာရပ်ခံချင်တာက ဦးကျော်ကျော်မောင်ရဲ့ အရည်အချင်းတွေကို ဖော်ပြပေးပါ၊ ပြည်သူတွေကိုအသိပေးစေချင်ပါတယ်” ဟု ၎င်းက ဆိုသည်။

ယခုလိုငွေကြေးဈေးကွက်တွင် ငွေလဲနှုန်းကမောက်ကမဖြစ်နေမှုကို ဗဟိုဘဏ်အနေဖြင့် တစ်စုံတစ်ရာဆောင်ရွက်မှု မရှိသည့်အတွက် ပြည်သူ့ဘဏ္ဍာငွေများအလဟဿ ပြုန်းတီးနေသကဲ့သို့ ခံစားရကြောင်း ၎င်းက ပြောသည်။

“ကျွန်တော်တို့ဆီကကောက်လို့ရတဲ့ပိုက်ဆံတွေနဲ့ လုပ်နေကြတာ။ ဘာမှထွက်မလာတော့ စိတ်တော့မကောင်းဘူးဗျ။ ငါ့ပိုက်ဆံတွေ အမှိုက်ပုံရောက်နေသလိုတွေ မြင်ရတယ်” ဟု ဒေါက်တာ ဦးမြင့်က ဆိုသည်။

လက်ရှိဖြစ်နေသော ကျပ်ငွေတန်ဖိုးကျဆင်းမှုကိုကိုင်တွယ်ရာတွင် ဗဟိုဘဏ်ရည်ညွှန်းနှုန်း၏ သတ်မှတ်ဘောင်အတွင်း ဘဏ်များကိုရောင်းဝယ်စေခြင်းနှင့် သတိပေးချက်ထုတ်ပြန်ခြင်းများသည် ခြိမ်းခြောက်မှုတစ်ခုဖြစ်ပြီးယခင်ကဲ့သို့ အမိန့်ပေးခိုင်းစေသည့်ပုံစံဖြစ်ရာ ပြဿနာအသစ်ကို ယခင်ပုံသေနည်းအဟောင်းဖြင့် အဖြေရှာနေခြင်းဖြစ်သည်။

အစိုးရအဆက်ဆက်နှင့် ဗဟိုဘဏ်တာဝန်ရှိသူများသည် အမေရိကန်ဒေါ်လာနှင့်ပတ်သက်၍ သဘာဝဘေးအန္တရာယ်ကဲ့သို့ အရေးပေါ်အခြေအနေတွင်ဖြစ်လာမည့် ဒေါ်လာလိုအပ်ချက်နှင့် ဒေါ်လာငွေဈေးကစားခြင်းကြောင့် ဈေးကွက် ကမောက်ကမဖြစ်ချိန်တွင် ထိန်းသိမ်းနိုင်မည့် ဒေါ်လာလိုအပ်ချက်ကိုသာ အဓိကအာရုံစိုက်လေ့ရှိပြီး သွင်းကုန်ပို့ကုန်ကဏ္ဍအတွက် ဈေးကွက်တွင် လိုအပ်နေသောဒေါ်လာလိုအပ်ချက်ကို ဖြည့်ဆည်းပေးရန် အာရုံစိုက်မှုနည်းပါးနေသည်။

တစ်ဆက်တည်းတွင် မြန်မာ့ကုန်သွယ်မှုတွင် အစိုးရသည် ကုန်သွယ်မှုပိုငွေ အမြဲလိုလိုဖြစ်ပေါ်ပြီး ပုဂ္ဂလိကကဏ္ဍတွင် ကုန်သွယ်မှုလိုငွေ အမြဲလိုလိုဖြစ်ပေါ်လျက်ရှိသည်။ ပုဂ္ဂလိကကဏ္ဍ၏ ကုန်သွယ်မှုလိုငွေ တစ်နည်းအားဖြင့် အမေရိကန်ဒေါ်လာလိုအပ်ချက်ကို ကုန်သွယ်မှုပိုငွေ အများအပြားရှိနေသော အစိုးရကဏ္ဍမှ ဖြည့်ဆည်းပေးရန်လိုကြောင်း ဒေါက်တာဦးမြင့်က ထောက်ပြထားသည်။ ထို့ပြင် လက်ရှိကာလတွင် ကုန်သွယ်ရေးလိုငွေပိုငွေတစ်ခုတည်းကြည့်ရုံမျှ မလုံလောက်တော့ဘဲ ပြည်ပနေနိုင်ငံသားများ၏ ပြည်တွင်းသို့ လွှဲငွေများ၊ နိုင်ငံခြားရင်းနှီးမြှုပ်နှံမှုစီးဝင်မှု၊ ပြည်ပအထောက်အပံ့နှင့် ပြည်ပချေးငွေ စသည့်အချက်များကိုလည်း ထည့်သွင်းစဉ်းစားရန်လိုသည်။

နိုင်ငံခြားငွေကြေးစီမံခန့်ခွဲမှုနှင့်ပတ်သက်၍ ဗဟိုဘဏ်သည် အမှန်တကယ်သီးခြားလွတ်လပ်သည့်အဖွဲ့အစည်းအဖြစ် လုပ်ဆောင်နိုင်ရန်နှင့် ဗဟိုဘဏ်၏ စွမ်းဆောင်ရည်ကိုထိခိုက်စေသည့် ဩဇာလွှမ်းမိုးမှုမျိုး မလုပ်ဆောင်ရန်လိုကြောင်း ဒေါက်တာဦးမြင့်က အကြံပေးသည်။ စင်ကာပူငွေရေးကြေးရေးအာဏာပိုင်အဖွဲ့ (ဗဟိုဘဏ်) တွင် တစ်ချိန်က နိုင်ငံခြားသားပညာရှင်ခန့်အပ်ခြင်းနှင့် လက်ရှိအင်္ဂလန်ဗဟိုဘဏ်ဥက္ကဋ္ဌမှာ ကနေဒါလူမျိုးခန့်အပ်သကဲ့သို့ မြန်မာနိုင်ငံတော်ဗဟိုဘဏ်တွင် မြန်မာလူမျိုးဗဟိုဘဏ်ဥက္ကဋ္ဌနှင့် နိုင်ငံခြားမှ ကျွမ်းကျင်ပညာရှင်များကိုအကြံပေးအဖွဲ့ဖွဲ့ကာ လုပ်ဆောင်စေသင့်ကြောင်းဦးမြင့်က အဆိုပြုသည်။

နောက်တစ်ချက်မှာ အစိုးရအဖွဲ့သည် မိမိကိုယ်ကိုယ် အလွန်အမင်းအမွှမ်းမတင်မိရန်နှင့် ထိုသို့အမွှမ်းတင်ခြင်းကို အမှန်တကယ် မယုံကြည်မိရန်လိုကြောင်း ၎င်းက သတိပေးသည်။ နိုင်ငံအလိုက် တစ်ဦးချင်းဝင်ငွေတွင် စင်ကာပူကို အနှစ် ၂၀ အတွင်းအမီလိုက်မည်၊ မြန်မာ့စီးပွားဂျက်လေယာဉ်ပျံကြီးပျံတက်တော့မည် စသည့် အမွှမ်းတင်မှုများလျှော့ရန် ဆိုလိုခြင်းဖြစ်သည်။

“လျှောက်လျှောက်ပြောမနေပါနဲ့။ သိပ်ပြီးတော့လည်းအမွှမ်းတင်မနေပါနဲ့။ နည်းနည်းပါးပါးစဉ်းစားပါ” 

 

စစ်ငြိမ်းသူ

You may also like...

Leave a Reply

Your email address will not be published. Required fields are marked *