မုဒိမ်းမှုများကို ကြီးလေးသည့်ပြစ်ဒဏ်ပေးရန် ရာဇသတ်ကြီးကို ပြင်ဆင်မည်

ရန်ကုန်၊ ဩဂုတ် ၁၀

သက်ငယ်မုဒိမ်းအပါအဝင်အရွယ် မျိုးစုံအပေါ်ကျူးလွန်လျက်ရှိသည့် မုဒိမ်းမှုများနှင့် ပတ်သက်၍ ကြီးလေးသည့် ပြစ်ဒဏ်များချမှတ်နိုင်ရန် ရာဇသတ်ကြီးကို ပြင်ဆင်ရန် ယနေ့ပြုလုပ်သည့် အမျိုးသားလွှတ်တော် အစည်းအဝေးက လက်ခံလိုက်သည်။

မုဒိမ်းမှုကျူးလွန်သူများကို ထောင်ဒဏ်တစ်သက် (အသက်သေဆုံးသည်အထိ အကျဉ်းကျခံစေခြင်း) အပါအဝင် ထောင်ဒဏ်၂၀၊ ၁၀ နှစ်တို့အပြင် ငွေဒဏ်များချမှတ်နိုင်သည့်အချက်များကို ထပ်မံဖြည့်သွင်းထားသည့် ပြင်ဆင်မှုကို ပဲခူးတိုင်းဒေသကြီး မဲဆန္ဒနယ်အမှတ် (၁၂) မှ အမျိုးသားလွှတ်တော်ကိုယ်စားလှယ် ဦးအောင်သိန်းက တင်သွင်းခဲ့ခြင်းဖြစ်ပြီး ကန့်ကွက်သူမရှိခဲ့သဖြင့် လွှတ်တော်က ပြင်ဆင်ရန် လက်ခံခဲ့ခြင်းဖြစ်သည်။

ရာဇသတ်ကြီးပါမုဒိမ်းမှုနှင့် ပတ်သက်၍ ပုဒ်မ ၃၇၆ ပြဋ္ဌာန်းချက်ကို ပုဒ်မခွဲသုံးခုဖြင့် အစားထိုးပြင်ဆင်ရန် ဦးအောင်သိန်းက အဆိုပြုထားသည်။

မသန်စွမ်းသူ အမျိုးသမီးကို ဖြစ်စေ၊ အသက် ၁၂နှစ်အောက် မိန်းကလေးကို ဖြစ်စေ မုဒိမ်းမှုကျူးလွန်ပါက ထောင်ဒဏ်နှစ်၂၀ဖြစ်စေ၊ ထောင်ဒဏ်တစ်သက်ဖြစ်စေ ချမှတ်ရန်နှင့် အသက် ၁၂ ကျော်လွန်သည့် အမျိုးသမီးများအပေါ် ကျူးလွန်သည့် မုဒိမ်းမှုများကို ထောင်ဒဏ်နှစ် ၂၀ ဖြစ်စေ၊ ဆယ်နှစ်ဖြစ်စေ ချမှတ်ရန်ဖြစ်သည်။

ပြီးလျှင် အသက် ၁၂ အောက်မဟုတ်သည့် မိမိ၏ ဇနီးမယားအပေါ် ကျူးလွန်သည့် မုဒိမ်းမှုအတွက် ၂ နှစ်အထိ ထောင်ဒဏ် သို့မဟုတ် ငွေဒဏ် သို့မဟုတ် ဒဏ်နှစ်ရပ်စလုံးဖြစ်စေ ချမှတ်ရန်ပြင်ဆင်ရန် ပါရှိသည်။

လက်ရှိတည်ဆဲပြဋ္ဌာန်းချက်တွင် မုဒိမ်းမှုကျူးလွန်သူကို ထောင်ဒဏ် တစ်သက် တစ်ကျွန်းဖြစ်စေ၊ ဆယ်နှစ်အထိဖြစ်စေ ချမှတ်နိုင်ပြီး သက်ငယ်နှင့် မသန်စွမ်းတို့အပေါ် ကျူးလွန်သည့် မုဒိမ်းမှုများအတွက် သီးခြားပြဋ္ဌာန်းချက် မရှိပေ။

“သက်ငယ်မုဒိမ်းမှုများ တိုးပွားလာနေတဲ့အတွက် လူမှုပတ်ဝန်းကျင်တစ်ခုလုံး ကို ခြိမ်းခြောက်လာနေသကဲ့သို့ ဖြစ်ပေါ်နေမှုကို ထိန်းချုပ်ဟန့်တားနိုင်ရေးအတွက် ပြစ်ဒဏ်တိုးမြှင့်ရန် ပြင်ဆင်တဲ့ ဥပဒေကြမ်းကို တင်သွင်းရခြင်း ဖြစ်ပါတယ်”ဟု ဦးအောင်သိန်းက ဆိုသည်။

ယခုပြင်ဆင်မှုသည် ရာဇသတ်ကြီးတွင် လစ်လပ်လျက်ရှိသည့် ပုဒ်မများအနက် မသန်စွမ်းသူဆိုသည့် အဓိပ္ပာယ် ဖွင့်ဆိုမှုနှင့် ထောင်ဒဏ်တစ်သက်ဆိုသည့် အဓိပ္ပာယ်ဖွင့်ဆိုမှုနှစ်ရပ်ကိုလည်း ပုဒ်မနှစ်ခုအဖြစ် ဖြည့်သွင်းထားသည်။

The Penal Code ခေါ် ရာဇသတ် ကြီးသည် မြန်မာနိုင်ငံကို အင်္ဂလိပ်တို့ အုပ်ချုပ်စဉ် လွန်ခဲ့သည့် နှစ်ပေါင်း ၁၅၀ ကျော် ၁၈၆၀ ပြည့်နှစ်က ပြဋ္ဌာန်းထားခြင်းဖြစ်ပြီး မူရင်းမှာ အင်္ဂလိပ်ဘာသာဖြင့် ဖြစ်သည်။

ယင်းကို မြန်မာဘာသာသို့ ပြန်ဆိုကာ အသုံးပြုလျက်ရှိကာ ယခုပြင်ဆင်မှုသည် ဒုတိယအကြိမ်ပြင်ဆင်မှုဖြစ်ပြီး ၂၀၁၆ ခုနှစ်က တစ်ကြိမ်ပြင်ဆင်ခဲ့သေးသည်။

သက်ငယ်မုဒိမ်းမှုများကို သေဒဏ်ချမှတ်ရေးအပါအဝင် မုဒိမ်းမှုများကို ကြီးလေးသည့်ပြစ်ဒဏ်ချမှတ်နိုင်ရေး အတွက် ရာဇသတ်ကြီးကို ပြင်ဆင်ရန် ပြီးခဲ့သည့် ဖေဖော်ဝါရီလအတွင်း ရခိုင်ပြည်နယ် ရသေ့တောင်မြို့နယ်မှ ပြည်သူ့လွှတ်တော်ကိုယ်စားလှယ် ဒေါ်ခင်စောဝေက ပြင်ဆင်သည့် ဥပဒေကြမ်းကို တင်သွင်းခဲ့သော်လည်း မူလ ဥပဒေသည် အင်္ဂလိပ်ဘာသာဖြင့်ဖြစ်ရာ ပြင်ဆင်လိုသည့်အချက်များကိုလည်း အင်္ဂလိပ်ဘာသာဖြင့်သာ တင်သွင်းရမည်ဟုဆိုကာ လွှတ်တော်က ပယ်ချခဲ့သည်။

ဦးအောင်သိန်းသည် ပြင်ဆင်ရန်တင်သွင်းမှုကို အင်္ဂလိပ်ဘာသာဖြင့် တင်သွင်းခဲ့ခြင်းဖြစ်သည်။

You may also like...

Leave a Reply

Your email address will not be published. Required fields are marked *