ခြောက်လသား သမ္မတကြီးကို ခြေရာကောက်ခြင်း

ခြောက်လသား သမ္မတတစ်ဦးအနေနှင့် မည်မျှဝေးဝေး လျှောက်နိုင်ပါမည်နည်း။

အနေအေးပြီး ငြိမ်သက်တိတ်ဆိတ်စွာနေထိုင်တတ်သည့် သမ္မတဦးထင်ကျော် ရာထူးတာဝန်များမှ အနားယူသွားခဲ့ပြီးနောက် လွှတ်တော်ဥက္ကဋ္ဌအဖြစ်နှင့် နှုတ်စောင်းလက်စောင်းထက်သည့် ဦးဝင်းမြင့်က ယခုနှစ် မတ်လကုန်တွင် နိုင်ငံတော်သမ္မတဖြစ်လာသည်။

သမ္မတအဖြစ် ရွေးကောက်တင်မြှောက်ခြင်းခံရချိန်မှာပင် ပြည်ထောင်စုလွှတ်တော်တွင် မိန့်ခွန်းပြောကြားခဲ့ပြီး (၁) တရားဥပဒေစိုးမိုးရေးနှင့် ပြည်သူများ၏ လူမှုစီးပွားဘ၀တိုးတက်မြင့်မားရေး၊ (၂) အမျိုးသားပြန်လည်သင့်မြတ်ရေးနှင့် ပြည်တွင်းငြိမ်းချမ်းရေး၊ (၃) ဒီမိုကရေစီ ဖက်ဒရယ်ပြည်ထောင်စုကြီးတည်ဆောက်ရေးအတွက် အခြေခံအုတ်မြစ်ဖြစ်တဲ့ ဖွဲ့စည်းပုံအခြေခံဥပဒေ ပြင်ဆင်ရေးတို့ကို ဦးတည်ကြိုးပမ်း ဆောင်ရွက်သွားမည်ဟု ပြောဆိုခဲ့သည်။

“သမ္မတကြီးကလေ၊ ဦးဝင်းမြင့်က တာထွက်ကောင်းတယ်လို့ အန်တီယူဆတယ်” ဟု လွှတ်တော်ကိုယ်စားလှယ်ဟောင်းလည်းဖြစ်၊ နိုင်ငံရေးလေ့လာစောင့်ကြည့်သူလည်းဖြစ်သည့် ဒေါက်တာညိုညိုသင်းက Th Voice Journal သို့ ပြောဆိုသည်။

သမ္မတအဖြစ် တာဝန်ယူပြီး မကြာခင်မှာပင် နိုင်ငံ၏အရေးပါသည့် အဖွဲ့အစည်းများနှင့် တွေ့ဆုံခဲ့သည်။

အဂတိလိုက်စားမှုတိုက်ဖျက်ရေးကော်မရှင်နှင့် ဦးစွာတွေ့ဆုံခဲ့ပြီး မြန်မာနိုင်ငံတွင် ကျယ်ပြန့်စွာအမြစ်တွယ်နေသည့် အဂတိလိုက်စားမှုများ အရှိန်မြှင့်တိုက်ဖျက်ရန် သူကအလေးထားလျက်ရှိကြောင်း ပြသလိုက်ခြင်းဖြစ်သည်။

အဂတိလိုက်စားမှုတိုက်ဖျက်ရေး ကော်မရှင်အနေနှင့် လုပ်ငန်းတာဝန်များနှင့် စပ်လျဉ်း၍ မျက်နှာကြီးငယ်မလိုက်၊ ဆူကြုံနိမ့်မြင့်မရွေး ပြတ်ပြတ်သားသားဆောင်ရွက်ရန် သမ္မတဦးဝင်းမြင့်က တိုက်တွန်းပြောဆိုခဲ့သည်။

ယခုဆိုလျှင် သူ၏သက်တမ်းသည် ငါးလကျော် ခြောက်လထဲသို့ ချဉ်းနင်းခဲ့ပြီ ဖြစ်သည်။

တာထွက်ကောင်းခဲ့သည့် သမ္မတကြီးသည် ခြောက်လတာအတွင်း မည်သည်တို့ကို စွမ်းဆောင်နိုင်ခဲ့သနည်း၊ သို့မဟုတ် ပျက်ကွက်ခဲ့သနည်း။

အဂတိလိုက်စားမှုနှင့်ပတ်သက်၍ အလေးထားကြောင်းပြမှုနှင့်အတူ မကြာခင်မှာပင် အစိုးရသစ်သက်တမ်းတစ်လျှောက်တွင် နာမည်ကောင်းမထွက်ခဲ့သည့် စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းကို နုတ်ထွက်စေလိုက်သည်။

အဆိုပါဝန်ကြီးသည် ယင်းမတိုင်မီလများစွာကပင် ဖြုတ်ရန် သို့မဟုတ် အနားပေးရန် သတင်းထွက်ပေါ်ခဲ့သူ ဖြစ်သည်။

ဝန်ကြီး ဦးကျော်ဝင်းနုတ်ထွက်မှုသည် အကျင့်ပျက်ခြစားမှုနှင့်လည်း ဆက်စပ်နေပြီး မြန်မာနိုင်ငံ အဂတိလိုက်စားမှုတိုက်ဖျက်ရေးကော်မရှင်က ၎င်းကို စုံစမ်းစစ်ဆေးခဲ့သည်။ တွေ့ရှိချက်များကို နိုင်ငံတော်သမ္မတထံသို့ တင်ပြခဲ့ပြီး မကြာခင်မှာပင် နုတ်ထွက်သွားခြင်းလည်း ဖြစ်သည်။

ယင်းဖြစ်ရပ်မတိုင်မီက များမကြာမီအတွင်း ငါးကြီးကြီးကြော်နိုင်လိမ့်မည်ဖြစ်ကြောင်း အဂတိလိုက်စားမှုတိုက်ဖျက်ရေးကော်မရှင်က ကြုံးဝါးခဲ့ပြီး ပျော့ပျော့ပျောင်းပျောင်းနှင့် လျော့ရိလျော့ရဲဖြစ်နေသည့် အဂတိလိုက်စားမှုတိုက်ဖျက်ရေးဥပဒေကို ပြင်ဆင်ခဲ့သေးသည်။

ယင်းပြင်ဆင်သည့် ဥပဒေအရ အဂတိလိုက်စားမှုနှင့်ပတ်သက်၍ ကျယ်ကျယ်ပြန့်ပြန့်အရေးယူလာနိုင်မည် ဖြစ်သည်။ အဆိုပါပြင်ဆင်မှုတွင် ယခင်က တိုင်ကြားသူရှိမှသာ စစ်ဆေးအရေးယူနိုင်မည့်အခြေအနေမှ အဂတိလိုက်စားကြောင်း သတင်းကျော်စောရုံဖြင့် စစ်ဆေး အရေးယူနိုင်မည်ဖြစ်သည်။

သို့သော်၊ နောက်ပိုင်းတွင် ဝန်ကြီးသည် အဂတိလိုက်စားမှု သက်သေမရှိကြောင်း ကော်မရှင်က ထုတ်ဖော်ကြေညာခဲ့ရာ စောင့်ကြည့်သူများက စိတ်ပျက်ခဲ့ကြသည်။

သီးခြားအတည်မပြုနိုင်သည့် တီးတိုးသတင်းများအရ ငါးကြီးကြီးကြော်ရန် ဆီအိုးတည်ပြီးခါမှ တားမြစ်ချက်အမိန့်တစ်ခုကြောင့် အစီအစဉ်ပျက်သွားခြင်း ဖြစ်သည်။

“အရေးကြီးတာက အရေးယူစရာတွေ တွေ့လို့ရှိရင် ရှင်းရှင်းလင်းလင်း၊ တိတိကျကျ၊ ပြတ်ပြတ်သားသား အရေးယူဖို့အပိုင်းမှာ အရမ်းအားနည်းတာကို တွေ့ရတယ်ပေါ့နော်” ဟု ဒေါက်တာ ညိုညိုသင်းက ဆိုသည်။

“ဒါမျိုးဆိုရင် ဒါသမ္မတကြီးရဲ့ နိုင်ငံရေးပုံရိပ် အရမ်းကိုကျဆင်းတဲ့အပိုင်းမှာ ရှိတယ်ပေါ့။ ကိုယ့်လူမို့ ညှာတာလားဆိုတဲ့ အပိုင်းတွေပေါ့။ ပြည်သူလူထုကြားထဲမှာ တွေးစရာတွေဖြစ်တယ်ပေါ့” ဟု စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီးနှင့်ပတ်သက်၍ ၎င်းက ထပ်လောင်းပြောဆိုသည်။

အဆိုပါပြည်ထောင်စုဝန်ကြီး အပြောင်းအလဲနှင့်အတူ ပြည်ထဲရေးဝန်ကြီးဌာန ပြည်ထောင်စုဒုတိယဝန်ကြီး၊ ချင်းပြည်နယ်အစိုးရအဖွဲ့ စည်ပင်သာယာရေး၊ လျှပ်စစ်နှင့် စက်မှုလက်မှုဝန်ကြီးဌာန ဝန်ကြီး၊ မွန်ပြည်နယ်အစိုးရအဖွဲ့ လျှပ်စစ်၊ စွမ်းအင်နှင့် စက်မှုဝန်ကြီးဌာနဝန်ကြီး၊ စစ်ကိုင်းတိုင်းဒေသကြီးအစိုးရအဖွဲ့ လုံခြုံရေးနှင့် နယ်စပ်ရေးရာဝန်ကြီးတို့ကို အပြောင်းအလဲလုပ်ခဲ့သည်။

ယင်းလုပ်ရပ်သည် သမ္မတအဖြစ်တာဝန်ယူပြီး များမကြာမီ မြန်မာနှစ်သစ်ကူးအခါသမယတွင် ပြောကြားခဲ့သည့်မိန့်ခွန်းတွင် ထည့်သွင်းပြောဆိုခဲ့မှုများအနက် တစ်ခုကိုအကောင်အထည်ဖော်ပြလိုက်ခြင်းလည်း ဖြစ်သည်။

“ပြုပြင်ပြောင်းလဲမှုနဲ့ အံမဝင် ခွင်မကျတဲ့နေရာတွေမှာ သွက်လက်ထက်မြက်ပြီး အရည်အသွေးရှိတဲ့ လူစားလဲမှုတွေ လုပ်သင့်ရင်လည်း လုပ်ဆောင်ရမှာ ဖြစ်ပါတယ်” ဟု သမ္မတ ဦးဝင်းမြင့်က ပြောဆိုခဲ့ခြင်းဖြစ်သည်။

သို့သော်၊ အပြောင်းအလဲသည် ထိုမျှဖြင့်သာရပ်တန့်သွားပြီး ကောလာဟလနှင့် သတင်းပြေးမှုများ ရက်ရှည်ထွက်ပေါ်နေခဲ့သည့် အစိုးရအဖွဲ့ဝင် ပြည်ထောင်စုဝန်ကြီးများ၏အပြောင်းအလဲကိစ္စသည် မျှော်လင့်နေသူများကို ဆန့်တငင်ငင်ဖြင့်သာ ပြီးဆုံးသွားစေခဲ့သည်။

သမ္မတသစ် ဦးဝင်းမြင့်သည် ပြုပြင်ပြောင်းလဲလုပ်ငန်းများအဖြစ် ပြည်ထောင်စုတရားသူကြီးချုပ်နှင့် တရားလွှတ်တော်ချုပ် တရားသူကြီးများကိုလည်း တောက်လျှောက်တွေ့ဆုံခဲ့ပြီး တရားစီရင်ရေးမဏ္ဍိုင် တည့်မတ်ခိုင်မာစေရေး၊ တိုင်းဒေသကြီး၊ ပြည်နယ်၊ ခရိုင်နှင့် မြို့နယ်အဆင့်များအထိ အဆင့်ဆင့်တာဝန်ယူမှု တာဝန်ခံမှုစနစ်များဖြင့် ဆင့်ကဲ ဆင့်ကဲ ကြပ်မတ်ဆောင်ရွက်ရန်နှင့် တရားခွင်များတွင် တရားသူကြီးများအနေဖြင့် ဥပဒေများ၊ ကျင့်ထုံးများ၊ လုပ်ထုံးလုပ်နည်းများနှင့်အညီ တိတိကျကျမြန်မြန်ဆန်ဆန် ဆောင်ရွက်ရေးပေးခဲ့သည်။

ပြီးခဲ့သည့်လများကလည်း ရှမ်း၊ ပဲခူး၊ ရန်ကုန်နှင့် စစ်ကိုင်း စသည့် ပြည်နယ်နှင့် တိုင်းဒေသကြီးများတို့ တိုင်းခန်းလှည့်လည်ခဲ့ပြီး အုပ်ချုပ်ရေး၊ ဥပဒေပြုရေးနှင့် တရားစီရင်ရေးမဏ္ဍိုင်များမှ အကြီးအကဲများနှင့် တွေ့ဆုံခဲ့ပြီး ဩဝါဒခြွေခဲ့သေးသည်။

တိုင်းဒေသကြီးနှင့် ပြည်နယ်အစိုးရအဖွဲ့ခေါင်းဆောင် ဝန်ကြီးချုပ်များ၏ လုပ်ရည်ကိုင်ရည်နှင့်ပတ်သက်၍ ကြိမ်းမောင်းမှုများကို ၎င်း၏ခရီးစဉ်အတွင်း ပြုလုပ်ခဲ့သည်။

မြေပြင်အခြေအနေနှင့် မကိုက်ညီသည့် စာရင်းအင်းများကို မတင်ပြရန်၊ ပြည်ထောင်စုအစိုးရ၏ လုပ်ပိုင်ခွင့်များကို မကျော်ရန်၊ ပြည်သူလူထုသို့ နှုတ်မကျွံစေရန် စသည့်ကိစ္စများအပြင် သက်ဆိုင်ရာတိုင်းဒေသကြီးနှင့် ပြည်နယ်လွှတ်တော်များအနေနှင့် မိမိတို့၏ လုပ်ထုံးလုပ်နည်းများကို ကျွမ်းကျင်နှံ့စပ်ရန်၊ ယိမ်းယိုင် သို့မဟုတ် ပြိုလဲ သို့မဟုတ် တိမ်းစောင်းလျက်ရှိသည့် တရားစီရင်ရေးနယ်ပယ်ကို ဝိုင်းဝန်းတည့်မတ်ကြရန် ဆော်ဩခဲ့သည်။

မြန်မာ့မူဝါဒလေ့လာရေး သုတေသနသိပ္ပံ (ISP Myanmar) ၏ ဒါရိုက်တာ ဦးအောင်သူငြိမ်းကမူ ခြောက်လသား သမ္မတကြီးနှင့်ပတ်သက်၍ ယခုထက်ပိုမို၍ နယ်လှည့်ခရီးထွက်သင့်သေးသည်ဟု ပြောဆိုသည်။

ပြီးခဲ့သည့်လများက မြန်မာနိုင်ငံ အလယ်ပိုင်းနှင့် အောက်ပိုင်းဒေသများစွာတွင် ရေကြီးရေလျှံမှုများစွာဖြစ်ပေါ်ခဲ့ပြီး သောင်းနှင့်ချီသည့် ပြည်သူများ ရေဘေးဒဏ်သင့်ခဲ့ကြသော်လည်း သမ္မတအနေနှင့် ကိုယ်တိုင်သွားရောက်၍ မကြည့်ရှုခဲ့။

ယင်းကို ဦးအောင်သူငြိမ်းကလည်း ထောက်ပြသည်။

“နောက်တစ်ခါကျတော့ ဒီထက်ခရီးထွက်ပြီးတော့ ဒီတိုင်းပြည်ကို ငါအုပ်ချုပ်နေတယ်ဆိုတဲ့ဟာမျိုးလည်း ပြဖို့လိုမှာပေါ့” ဟု ၎င်းက ဆိုသည်။

ယင်းအပြင် တိုင်းရင်းသားဒေသများသို့ ခရီးထွက်ကာ တိုင်းရင်းသားခေါင်းဆောင်များနှင့် တွေ့ဆုံကာ ချစ်ကြည်ရေးတည်ဆောက်သည်မျိုး လုပ်နိုင်သည်။

လက်ရှိတွင် နိုင်ငံ၏ ငြိမ်းချမ်းရေးဖြစ်စဉ်သည် သွေးအေးလျက်ရှိသလို အချို့တိုင်းရင်းသားလက်နက်ကိုင်အဖွဲ့များအကြားတွင် တင်းမာမှုများ ရှိနေသည်။

“ဒီလိုဗျာ၊ တိုင်းရင်းသားဒေသအသီးသီးကိုသွားပြီးတော့ တိုင်းရင်းသားခေါင်းဆောင်တွေနဲ့ ချစ်ကြည်ရေးတို့၊ ထမင်းအတူတူစားတာတို့ လက်ဆွဲနှုတ်ဆက်တာတို့ ဒါမျိုးတွေလည်း လိုလိမ့်မယ်ပေါ့ဗျာ” ဟု ဦးအောင်သူငြိမ်းက ဆိုသည်။

သမ္မတ ဦးဝင်းမြင့်သည် လူ့အခွင့်အရေးချိုးဖောက်မှုများကို ကာကွယ်ရေး၊ မူးယစ်ဆေးဝါးကို ပိုမိုနှိမ်နှင်းရေး၊ ပြည်သူ့ဘဏ္ဍာများ အလေအလွင့်မရှိအောင် စီမံခန့်ခွဲနိုင်ရေး၊ သိမ်းဆည်းလယ်ယာမြေများ ပြန်လည်ရရှိရေး၊ လျော်ကြေး၊ နစ်နာကြေးရရှိရေး၊ တောင်သူလယ်သမားများ၏ လူနေမှုဘ၀ တိုးတက်မြင့်မားရေး၊ အလုပ်သမားများ၏ဘ၀ စိုပြေသာယာရေး၊ ကျောင်းသားလူငယ်များ အဆင့်မြင့်ပညာရပ်များ ဆည်းပူးခွင့်ရရှိရေး၊ အစိုးရပြုပြင်ပြောင်းလဲရေးနှင့် ဗဟိုချုပ်ကိုင်မှုလျှော့ချရေးကိစ္စများနှင့်ပတ်သက်၍လည်း အစီအစဉ်များကို ၎င်း၏ နှစ်သစ်ကူးမိန့်ခွန်းတွင် ထည့်သွင်းပြောဆိုခဲ့သည်။

မြင်သာသည့်အပြောင်းအလဲများအဖြစ် ဝန်ထမ်းများလစာတိုးခြင်း၊ အလုပ်သမားများအတွက် အနည်းဆုံးလုပ်ခလစာကို အတည်ပြုနိုင်ခြင်းတို့ကို သူ့ လက်ထက်တွင် လုပ်ဆောင်ခဲ့သည်။

လယ်သမားများ၏ စိုက်ပျိုးစရိတ်ထုတ်ချေးမှုနှင့်ပတ်သက်၍လည်း ဖြေလျှော့မှုအချို့ကို လုပ်ဆောင်ခဲ့သည်။

ယခင်က ဝိုင်းလေးချုပ်ဟုသော သုံးဦးပေါင်းစပ်၍ ချေးငွေများချထားပေးခဲ့ပြီး တစ်ဦးဦးက ကြွေးကျန်လျှင် အခြားသူများကိုပါ ချေးငွေရယူခွင့်ကို ပိတ်ပင်ထားခဲ့မှုကို ပယ်ဖျက်လိုက်ကာ တစ်ဦးချင်းစီကို ထုတ်ပေးရန် ပြောင်းလဲလိုက်ခြင်း ဖြစ်သည်။

အသေးစား အလတ်စားစီးပွားရေးလုပ်ငန်းများကို ငွေထုတ်ချေးရာတွင် မြန်ဆန်လွယ်ကူစေရန်နှင့် အဆိုပါလုပ်ငန်းများ၏ ယုံကြည်စိတ်ချရမှုရှိစေရေး သတင်းအချက်အလက်များ စုဆောင်းသည့်အဖွဲ့အစည်းဖြစ်သည့် Credit  Bureau ဖွဲ့စည်းရန်ကိုလည်း ခွင့်ပြုလိုက်သည်။

သမ္မတ ဦးဝင်းမြင့်၏ ထင်ရှားသည့်ဆောင်ရွက်ချက်များအနက် မူးယစ်ဆေးဝါးတိုက်ဖျက်ရေးသည် ထင်ရှားသည်။

သမ္မတ ဦးသိန်းစိန်လက်ထက် ပထမအကြိမ် ပြည်ထောင်စုလွှတ်တော်သက်တမ်းတွင် လွှတ်တော်ကိုယ်စားလှယ်အဖြစ်ရှိနေခဲ့သည့် ဦးဝင်းမြင့်သည် မြန်မာနိုင်ငံ၏ မူးယစ်ဆေးဝါးပြဿနာသည် ကြီးမားနက်ရှိုင်းနေကြောင်း သတိပြုမိခဲ့သည်။

ထိုစဉ်က ပြည်သူ့လွှတ်တော်၊ တရားဥပဒေစိုးမိုးရေးနှင့် တည်ငြိမ်းချမ်းရေးကော်မတီတွင် အတွင်းရေးမှူး (ဥက္ကဋ္ဌမှာ ဒေါ်အောင်ဆန်းစုကြည် ဖြစ်သည်) အဖြစ် ရှိနေခဲ့သည့် ဦးဝင်းမြင့်သည် တာဝန်အရ ကွင်းဆင်းရာတွင် နယ်ဒေသများတွင် ကလေးသူငယ်ကျောင်းသားများ မူးယစ်ဆေးဝါးသုံးစွဲလျက်ရှိသည်ကို ကြားသိခဲ့ရခြင်း ဖြစ်သည်။

သမ္မတဖြစ်လာပြီး နှစ်လမျှအကြာတွင် မူးယစ်ဆေးဝါးတိုက်ဖျက်ရေးတွင် အဓိကအဖွဲ့ကြီးဖြစ်သည့် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများအန္တရာယ်တားဆီးကာကွယ်ရေးဗဟိုအဖွဲ့ဥက္ကဋ္ဌ ပြည်ထဲရေးဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ကျော်ဆွေနှင့် အဖွဲ့ဝင်များနှင့် တွေ့ဆုံဆွေးနွေးခဲ့ပြီး မူးယစ်ဆေးဝါးအန္တရာယ်ကို အမျိုးသားရေးတာဝန်တစ်ရပ်အဖြစ် ပိုမိုတိုးမြှင့်လုပ်ဆောင်ရန် ပြောဆိုခဲ့သည်။

တစ်ချိန်တည်းမှာပင် မူးယစ်ဆေးဝါး ဖြန့်ဖြူး၊ သုံးစွဲနေမှုများနှင့်ပတ်သက်၍ အများပြည်သူက သတင်းပေးတိုင်ကြားနိုင်ရန် ‘မူးယစ်ဆေးဝါး အထူးသတင်းတိုင်ကြားရေးဌာန’ ကို ဇွန်လကုန်ပိုင်းက နိုင်ငံတော်သမ္မတရုံးတွင် ဖွင့်လှစ်လိုက်သည်။

တိုင်ကြားသူများကို ဆုကြေးချီးမြှင့်မည်ဖြစ်သလို ၎င်းတို့၏ သတင်းအချက်လက်မပေါက်ကြားရေးနှင့် လုံခြုံရေးကိစ္စအတွက်လည်း သမ္မတရုံးက လျှို့ဝှက်လုပ်ဆောင်လျက်ရှိသည်။

တိုင်ကြားမှုများနှင့်ပတ်သက်၍ အရေးယူမှုများကို တစ်ပတ်လျှင် တစ်ကြိမ် အပတ်စဉ်ထုတ်ပြန်ကြေညာလျက်ရှိပြီး စတင်ဖွင့်လှစ်စဉ်မှ စက်တင်ဘာလဆန်းအထိ အမှုပေါင်း ၂၀၉ မှုကို ဖော်ထုတ်ခဲ့ပြီး စုစုပေါင်း တရားခံ ၃၃၅ ဦးကို အရေးယူနိုင်ခဲ့သည်။

မူးယစ်ဆေးဝါး ရောင်းဝယ်ဖောက်ကားမှုများနှင့်ပတ်သက်၍ လက်ကြီးသမားများကို အရေးမယူနိုင်သေးဘဲ အနည်းအကျဉ်းသမား လက်သေးများသာဖြစ်နေမှုအပေါ် ဝေဖန်နေမှုများရှိနေလင့်ကစား စောင့်ကြည်သူအများစုကမူ သမ္မတဦးဝင်းမြင့်ကို အမှတ်ပေးကြသည်။

“ကျွန်မအမြင်ကတော့ သမ္မတကြီးကတော့ မူးယစ်ဆေးဝါးနဲ့ပတ်သက်လို့ စိတ်ဝင်စားတယ်။ နောက်တစ်ခုကတော့ သူ့ရဲ့ပထမဦးစားပေးထဲမှာ ထည့်ထားတော့ နိုင်ငံအတွက်တော့ အများကြီးကောင်းတာပေါ့” ဟု မူးယစ်ဆေးသုံးစွဲမှုများ လျော့ကျရန်အသိပညာများ ဖြန့်ဝေနေသလို သုံးစွဲသူများ၏ ကျန်းမာရေးနှင့် လူမှုဘ၀ဆိုင်ရာ ပြန်လည်ထူထောင်ရေးကိစ္စများကို အကူအညီပေးနေသည့် ဒေါ်နန်းပန်းအိခမ်းက The Voice Journal သို့ ပြောဆိုခဲ့ဖူးသည်။

၎င်းသည် Drug Policy Advocacy Group – Myanmar ၏ ညှိနှိုင်းရေးတာဝန်ခံလည်း ဖြစ်သည်။

လူမှုကွန်ရက် ဟာသသရုပ်ဆောင်အောင်ရဲထွေးအသတ်ခံရမှုဖြစ်စဉ်နှင့် ပတ်သက်၍ လူသတ်မှုအတွက် ကိုယ်တိုင်လာရောက်အဖမ်းခံထားသည့် တရားခံများကို ပြီးခဲ့သည့်လပိုင်းက တရားသူကြီးက ပြန်လည်လွှတ်ပေးလိုက်ရာ ပြည်သူလူထုအတွင်း ဟိုးလေးတကျော် ဖြစ်ပွားခဲ့သည်။

ယင်းအမှုနှင့်ပတ်သက်၍လည်း သမ္မတဦးဝင်းမြင့်က ဝေဖန်ပြောဆိုခဲ့ရာ ဥပဒေပညာရှင်အသိုင်းအဝိုင်းနှင့် ပြည်သူလူထုက ဩဘာပေးခဲ့ကြသည်။

အဆိုပါအမှုကို ပြန်လည်စစ်ဆေးရန် တရားရုံးများက လုပ်ဆောင်လာခဲ့သလို အမှုရုပ်သိမ်းခွင့်ပြုခဲ့သည့် တရားသူကြီးအပါအဝင် ဆက်စပ်သူများကို အဂတိလိုက်စားမှုတိုက်ဖျက်ရေးကော်မရှင်က စုံစမ်းစစ်ဆေးခဲ့ပြီး တရားခံများကို ပြန်လည်လွှတ်ပေးသည့်ဖြစ်စဉ်အပါအဝင် အမှုကိုစစ်ဆေးခဲ့သည့်ဖြစ်စဉ်တို့နှင့်ပတ်သက်၍ ရန်ကုန်တိုင်းဒေသကြီးဥပဒေချုပ်၊ ရန်ကုန်တိုင်းဒေသကြီးဥပဒေအရာရှိ၊ ရန်ကုန်အရှေ့ပိုင်းခရိုင် ဥပဒေအရာရှိ၊ ဒုတိယခရိုင်ဥပဒေအရာရှိ၊ ဒုတိယခရိုင်တရားသူကြီးနှင့် ရန်ကုန်တိုင်းဒေသကြီးရဲတပ်ဖွဲ့၊ ရွှေပေါက္ကံနယ်မြေစခန်းမှူး (ယခင် သုဝဏ္ဏနယ်မြေစခန်းမှူး) တို့ကို အဂတိလိုက်စားမှုတိုက်ဖျက်ရေးဥပဒေဖြင့် စက်တင်ဘာ ၁၃ ရက်တွင် အမှုဖွင့်လှစ်အရေးယူလိုက်ပြီဖြစ်သည်။

“တွေ့ရသလောက်တော့ မဆိုးဘူးလို့ ပြောရမှာပေါ့။ မူးယစ်ဆေးဝါးနှိမ်နှင်းဖို့ကိစ္စတွေမှာလည်း သမ္မတက တိုက်ရိုက်ကိုင်တွယ်ပြီးတော့ ဆောင်ရွက်ဖို့ အဖွဲ့အစည်းတွေဖွဲ့တာ၊ ဒီဆောင်ရွက်ချက်တွေက ကောင်းပါတယ်” ဟု ရှမ်းတိုင်းရင်းသားများဖွံ့ဖြိုးတိုးတက်ရေးပါတီ (SNDP) ၏ ပြည်သူ့လွှတ်တော်ကိုယ်စားလှယ်ဟောင်းလည်းဖြစ်၊ လက်ရှိတွင် နိုင်ငံရေးလေ့လာစောင့်ကြည့်သူလည်းဖြစ်သည့် ဦးရဲထွန်းက ဆိုသည်။

သမ္မတအဖြစ် တာဝန်ယူပြီးနောက် မေလကုန်ပိုင်းတွင်လည်း ဦးဝင်းမြင့်သည် နိုင်ငံတော်သမ္မတရုံးမှတစ်ဆင့် ကြေညာချက်တစ်စောင်ကို ထုတ်ပြန်ခဲ့သေးသည်။

တိုင်းဒေသကြီးနှင့် ပြည်နယ်အစိုးရအဖွဲ့များအနေနှင့် ပြည်ထောင်စုအစိုးရက ချမှတ်ထားသည့် မူဝါဒများ၊ ပြည်ထောင်စုဥပဒေများနှင့် မဆန့်ကျင်ဘဲ အလုပ်လုပ်ကြရန်နှင့် အဆိုပါအစိုးရအဖွဲ့များ၏ ဝန်ကြီးများသည်လည်း လုပ်ငန်းများလုပ်ဆောင်ရာတွင် သက်ဆိုင်ရာဝန်ကြီး ချုပ်ထံ အသိပေးတင်ပြကာ သဘောတူညီချက်၊ အတည်ပြုချက်ရရှိပြီးမှသာ လုပ်ဆောင်ကြရန်နှင့် ဝန်ကြီးများသည် ဝန်ကြီးချုပ်များမှတစ်ဆင့် နိုင်ငံတော်သမ္မတသို့ အဆင့်ဆင့်တာဝန်ခံကြရန် ထုတ်ပြန်လိုက်ခြင်း ဖြစ်သည်။

အဓိကအားဖြင့် တိုင်းဒေသကြီးနှင့် ပြည်နယ်အစိုးရအဖွဲ့များသည် အခြေခံဥပဒေနှင့်အညီ အလုပ်လုပ်ကိုင်ကြရန် သတိပေးခြင်းဖြစ်သည်။

ယင်းနောက် မကြာမီပင် ပွဲလမ်းနှင့် အခမ်းအနားများတွင် ဟိုမှာလည်းပါ၊ သည်မှာလည်းပါ၊ ပါလေရာဖြစ်နေသည့်ဝန်ကြီးများနှင့်ပတ်သက်၍ ခြေထောက်ကို ထိန်းချုပ်သည့် ညွှန်ကြားချက်ကိုလည်း ထုတ်ပြန်ခဲ့ပြန်သည်။

နိုင်ငံတော်အစိုးရ သို့မဟုတ် တိုင်းဒေသကြီးနှင့် ပြည်နယ်အစိုးရများနှင့် ပူးပေါင်းလုပ်ကိုင်ဆောင်ရွက်ထားခြင်းမရှိသည့် ပြည်တွင်း၊ ပြည်ပ ပုဂ္ဂလိက စီးပွားရေးလုပ်ငန်းများ၏အစီအစဉ်ဖြင့် ကျင်းပပြုလုပ်သည့် အခမ်းအနားများသို့ မတက်ရောက်ရန် ဇွန်လ ဒုတိယပတ်အတွင်းက နိုင်ငံတော်သမ္မတရုံးက ညွှန်ကြားလိုက်ခြင်း ဖြစ်သည်။

သူ့စီးပွားရေးသူလုပ်နေသည့် လုပ်ငန်းရှင်များ၏ ဖိတ်ကြားမှုများတွင် အချို့သောဝန်ကြီးများတွင် အမြင်မတော်မှုများ တွေ့လာရသည်ဟု သမ္မတရုံး၏ ပြောရေးဆိုခွင့်လည်းရှိသူဖြစ်သည့် ညွှန်ကြားရေးမှူးချုပ် ဦးဇော်ဌေးက The Voice Journal သို့ ထိုစဉ်က ပြောကြားခဲ့သည်။

သမ္မတ ဦးဝင်းမြင့်သည် ၎င်း၏ရည်ရွယ်ထားသည့်လုပ်ငန်းစဉ်များနှင့်ပတ်သက်၍ မြန်မာ့နှစ်ဆန်းတစ်ရက်နေ့မိန့်ခွန်းတွင် ကျယ်ကျယ်ပြန့်ပြန့် ပြောဆိုခဲ့သည်။

ယင်းတို့အထဲတွင် အရပ်ဘက်အဖွဲ့အစည်းများနှင့်ပူးပေါင်းကာ အားကောင်းလာစေရေးကို ထည့်သွင်းပြောဆိုခဲ့သလို စတုတ္ထမဏ္ဍိုင်ဖြစ်သည့် သတင်းမီဒီယာကို အလေးထားကြောင်းတို့လည်း ပါဝင်သည်။

သို့သော်၊ စစ်ပွဲများရပ်တန့်ရေး၊ ငြိမ်းချမ်းရေးအတွက်လှုပ်ရှားဆန္ဒထုတ်ဖော်သူများကို ဖမ်းဆီးရိုက်နှက်မှုများ ပေါ်ပေါက်ခဲ့ကာ လူ ၂၀ ဝန်းကျင်မှာလည်း တရားစွဲဆိုခံခဲ့ရသလို ရခိုင်ကိစ္စသတင်းရယူခဲ့သည့် ရိုက်တာသတင်းထောက်နှစ်ဦးမှာလည်း မကြာသေးခင်ကပင် နှစ်ရှည် ထောင်ဒဏ် ချမှတ်ခံလိုက်ရသည်။

“အခုအချိန်အထိတော့ အရပ်ဘက်လူမှုအဖွဲ့အစည်းတွေဘက်က ဘယ်လိုမျိုး အစိုးရကလက်တွဲခေါ်မလဲပေါ့ဗျာ။ ဒါ မျှော်လင့်နေတုန်းပဲ” ဟု ISP Myanmar ၏ ဒါရိုက်တာ ဦးအောင်သူငြိမ်းက ဆိုသည်။

ယင်းစကားကို လွန်ခဲ့သည့်သုံးလအကြာက ဦးအောင်သူငြိမ်းက ပြောဆိုခဲ့ခြင်းဖြစ်သည်။ သို့သော်၊ သုံးလအကြာတွင် The Voice Journal က ထပ်မံဆက်သွယ်မေးမြန်းရာ ၎င်းက ယခုလိုပင် ပြန်လည်ပြောဆိုသည်။

“မိန့်ခွန်းပြောပြီးကတည်းက အရပ်ဘက်လူမှုအဖွဲ့အစည်းတွေနဲ့ တွေ့တာတို့၊ ဆွေးနွေးတာတို့ ဒါမျိုးတွေ တစ်ခုမှ မရှိသေးဘူးပေါ့။ ဆိုတော့ အဲဒါတော့ အားနည်းချက်လို့ မြင်ပါတယ်”

သမ္မတ ဦးဝင်းမြင့်အနေနှင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို မည်မျှကျော်လွန်ကာ လုပ်ဆောင်နိုင်မည်နည်းဆိုသည့် မေးခွန်းများက ၎င်းစတင်တာဝန်ယူချိန်ကတည်းက ရှိနေခဲ့သည်။ အရေးပါသည့်ဆုံးဖြတ်ချက်များသည် ဒေါ်အောင်ဆန်းစုကြည်၏လက်ထဲတွင်သာရှိနေကြောင်း နိုင်ငံရေးလေ့လာသူများက နဂိုကပင် သဘောပေါက်ထားပြီးဖြစ်သည်။

သို့သော် ယခင်သမ္မတဖြစ်သည့် ဦးထင်ကျော်နှင့်စာလျှင် ဦးဝင်းမြင့်သည် ပို၍လှုပ်ရှားခွင်ကျယ်ပြန့်စွာ လုပ်ဆောင်နိုင်သည်ကို တွေ့ရသည်ဟု ဦးရဲထွန်းက ကောက်ချက်ချသည်။

“သိပ်ပြီးတော့ လွတ်လွတ်လပ်လပ်ကြီးမဟုတ်တောင်မှ တော်တော်လေးလွတ်လွတ်လပ်လပ်လုပ်နိုင်တယ်လို့တော့ ယူဆရပါတယ်” 

လာမည့် နိုဝင်ဘာလဆန်းတွင် မဲဆန္ဒနယ်အနည်းငယ်ပါဝင်သည့် ကြားဖြတ်ရွေးကောက်ပွဲကျင်းပရန် ရှိနေသည်။ ရွေးကောက်ပွဲကို ဝင်နွှဲမည့်ပါတီများအနေဖြင့် မဲဆွယ်စည်းရုံးရေးများကို ယခုလဆန်းကစတင်ကာ လုပ်ဆောင်နေကြသည်။

ယင်းနှင့် အချိန်ကိုက်စွာပင် သမ္မတကြီးက သူ၏အိမ်တော်၌ ရိုးရာခြင်းလုံးကို ၎င်း၏အနီးကပ်လက်တွဲဖော်များနှင့် ဝိုင်းဖွဲ့ကစားလျက်ရှိသည့်ဓာတ်ပုံများကို အဆိုပါခြင်းဝိုင်းတွင် ပါဝင်သူတစ်ဦးက လူမှုကွန်ရက်တွင် ဖြန့်ဝေလိုက်ရာ ပြည်သူလူထု၏ လက်ခုပ်သံများကို ရယူလိုက်နိုင်သည်။

အနီရောင်အင်္ကျီဝတ်ပြီး ခွပ်ဒေါင်းသစ်သားရုပ်ထုကြီးနှင့်အတူ ဓာတ်ပုံတွဲရိုက်လိုက်ကြလိုက်သေးသည်။

ခြင်းဝိုင်းတွင် ဟန်ရေးကြွယ်စွာကစားပြနေသည့် သမ္မတကြီးသည် ကျန်းမာရေးကောင်းမွန်နေကြောင်း ပြသလျက်လည်း ရှိသည်။

ဦးဝင်းမြင့်သည် ၎င်းကို သမ္မတ အဖြစ် ရွေးကောက်တင်မြှောက်သည့် အခမ်းအနားတွင် တရားဥပဒေစိုးမိုးရေးနှင့် ပြည်သူ့လူမှုစီးပွားဘ၀ တိုးတက်မြင့်မားရေး၊ အမျိုးသားပြန်လည်သင့်မြတ်ရေးနှင့် ပြည်တွင်းငြိမ်းချမ်းရေး၊ ဖွဲ့စည်းပုံအခြေခံဥပဒေ ပြင်ဆင်ရေးတို့ကို ဦးတည်ကြိုးပမ်းဆောင်ရွက်သွားမည်ဟု ပြောဆိုခဲ့သော်လည်း ငြိမ်းချမ်းရေးကိစ္စနှင့် စီးပွားရေးကိစ္စများတွင် ဒေါ်အောင်ဆန်းစုကြည်ကသာ အဓိကလုပ်ဆောင်နေကြောင်း တွေ့ရမည်ဖြစ်သည်။

လက်ရှိ မြန်မာနိုင်ငံအနေနှင့် တရားဥပဒေစိုးမိုးရေးကိစ္စသည် စိုးရိမ်နေရဆဲအခြေအနေတွင် ရှိနေဆဲဖြစ်ပြီး ပြည်တွင်းငြိမ်းချမ်းရေးကိစ္စသည်လည်း ရှေ့သို့ သိသာစွာတိုးမလာသေးသလို အခြေခံဥပဒေပြင်ဆင်ရေးကိစ္စသည်လည်း ခပ်ဝေးဝေးမှာပင် ရှိနေဆဲဖြစ်သည်။

ခြောက်လမျှကာလကို ဖြတ်ကျော်လာပြီဖြစ်သည့် သမ္မတသည် သမ္မတ၏ လက်ကျန်ကာလ ၂ နှစ်ခွဲမျှ ကျန်ရှိနေသေးသည်။

တာထွက်ကောင်းခဲ့သည့် သမ္မတကြီးနှင့်ပတ်သက်၍ ဦးအောင်သူငြိမ်းကမူ တိုတုတ်စွာပင် အကဲဖြတ်ချက်ပေးသည်။ သူ့အကဲဖြတ်ချက်သည် ခြင်းဝိုင်းနှင့်တော့ မသက်ဆိုင်ပါ။

“အမှတ်တော့လည်း မပေးချင်ဘူးပေါ့ဗျာ။ ခြေသိပ်မပေါ်သေးဘူးလို့တော့ ပြောချင်တာပေါ့” 

 

အောင်မျိုးထက်

You may also like...

Leave a Reply

Your email address will not be published. Required fields are marked *