လူနည်းစုအခွင့်အရေးများကို လေးစားတတ်ခြင်း

လစ်ဘရယ်ဒီမိုကရေစီ၏ စံနှုန်းတန်ဖိုးများသည် လူ့အခွင့်အရေးကို အခြေခံသည်။လူ့အခွင့်အရေးသည်ကား ‘တန်းတူညီမျှမှု’ ရှိခြင်းကို အလေးအနက်ထားသည်။ တန်းတူညီမျှမှု၏ အဓိကရည်ရွယ်ချက်ကတော့ လူနည်းစုတို့၏အခွင့်အရေးကို လေးစားမှုအပြည့်ရှိခြင်းပင်ဖြစ်သည်။ ထို့ကြောင့် ဒီမိုကရေစီနိုင်ငံတစ်ခုအတွက် မရှိမဖြစ်လိုအပ်သောအချက်မှာ လူနည်းစု၏ အခွင့်အရေးကိုလေးစားပြီး အားလုံးကို ခွင့်တူညီမျှမှုရှိစေဖို့ပင်ဖြစ်ပါသည်။

လူနည်းစု ဆိုသည်မှာ

နိုင်ငံတော်တစ်ခုအတွင်း မှီတင်းနေထိုင်လျက်ရှိကြသော လူအများစုနှင့် မတူကွဲပြားသည့် အနည်းအကျဉ်းမျှသော လူမှုအစုအဖွဲ့ များကို လူနည်းစု ( Minority ) ဟု ခေါ်သည်။ ၎င်းတို့မှာ သက်ဆိုင်ရာ လူမျိုး၊ ဘာသာအယူဝါဒ၊ လိင်စိတ်ကွဲပြားမှု ၊ အတွေးအခေါ်အယူအဆ၊ ခန္ဓာကိုယ်ချို့တဲ့မှုနှင့် အသက်အရွယ်ကျန်းမာရေးအရ လူများစုကြီးနှင့် ကွဲပြားခြားနားနေသော အစုအဖွဲ့များဖြစ်ကြသည်။

မြန်မာနိုင်ငံတွင်မူ လူနည်းစုအခွင့်အရေးဟုဆိုလျှင် တိုင်းရင်းသားကိစ္စကိုသာ ပြေးမြင်ကြသည်။ တကယ်တမ်းမှာ တိုင်းရင်းသားအရေးချည်းသာမဟုတ်။ အခြားသော ပုံသဏ္ဌာန်ကွဲပြားသည့် လူနည်းစုအကြောင်းအရာများလည်း ပါဝင်နေပါသည်။

လူနည်းစုများကို ၎င်းတို့အခြေခံသည့် အကြောင်းအရာများအတိုင်း ခွဲခြမ်းစိတ်ဖြာကြည့်လျှင် လေးမျိုးတွေ့နိုင်သည်။

၁။ လူမျိုးစုဆိုင်ရာ လူနည်းစု (Ethnic  Minority)
၂။ ကျား/မ လိင်စိတ်ကွဲပြားမှုဆိုင်ရာ လူနည်းစု
(Gender Minority)
၃။ သဘောတရားအယူအဆဆိုင်ရာ လူနည်းစု
(Ideology Minority)
၎။ လူမှုရေးဆိုင်ရာ ခွဲခြားခံရသော လူနည်းစု
(social   discrimination  Minority) ဟူ၍ ဖြစ်သည်။

‘လူမျိုးစုဆိုင်ရာ လူနည်းစု’ ဆိုသည်မှာ နိုင်ငံအတွင်း လူဦးရေနည်းပါးသော လူမျိုးစုငယ်များကို ဆိုလိုပါသည်။ မြန်မာနိုင်ငံတွင် ဗမာလူမျိုးက အများဆုံးရှိနေပြီး ကျန်လူမျိုးစုများက အရေအတွက်အားဖြင့် နည်ပါးသည်။ ထိုအထဲကမှ လူဦးရေအရ ပို၍နည်းပါးစွာရှိနေသော လူမျိုးစုငယ်များလည်း ရှိနေပါသေးသည်။ ‘ကျား/ မ လိင်စိတ်ကွဲပြားမှု ဆိုင်ရာလူနည်းစု’ ဟူသော ခေါင်းစဉ်အောက်တွင် ကျား/မ အခွင့်အရေး တန်းတူညီမျှရှိမှုအပါအဝင် Gay များ၊ Lesbian များ၊ Tomboy များ၏ အကြောင်းအရာများ ပါဝင်သည်။ ‘သဘောတရားအယူအဆဆိုင်ရာ လူနည်းစုများ’ ကတော့ ဘာသာရေးအရ အများစုနှင့်ကွဲပြားနေသော ဘာသာခြားလူနည်းစုများ ၊ နိုင်ငံရေးအရ အင်အားကြီးမားမှုမရှိ သော ပါတီငယ်များ၊ လူမှုအဖွဲ့အစည်းအတွင်း အများနှင့်ဆန့်ကျင်သော တစ်စုတစ်ဖွဲ့ တစ်စုံတစ်ယောက်ကို ထောက်ခံအားပေးနေသူများ ပါဝင်ပါသည်။

‘လူမှုရေးဆိုင်ရာ ခွဲခြားခံရသောလူနည်းစု’ ဆိုသည်ကတော့ မသန်စွမ်းသူများ (Disabilities )၊ ကျန်းမာရေးအရ ခွဲခြားခံရသူများ (HIV / AIDS  အပါအဝင် အခြားသောကူးစက်ရောဂါဝေဒနာရှင်များ)၊ အသက်အရွယ်အရ ကလေးသူငယ်ဖြစ်ခြင်း၊ သက်ကြီးရွယ်အို လူကြီးဖြစ်ခြင်းတို့ကြောင့် ခွဲခြားဆက်ဆံခံရသူများ စသည်တို့ဖြစ်ကြသည်။

လူနည်းစုအခွင့်အရေး ချိုးဖောက်ခံရခြင်း

လူ့အခွင့်အရေးဆိုသည်မှာ လူတစ်ဦးတစ်ယောက်စီတိုင်းအတွက် မွေးလာကတည်းက ပိုင်ဆိုင်ခွင့်ရှိပြီးသားအခွင့်အရေးများသာဖြစ်သည်။ လူသားအခွင့်အရေးကို တောင်းယူနေရပြီဆိုလျှင် အဆိုပါဒေသသည် လူ့တန်ဖိုးနှင့် လူ့သား၏ ဂုဏ်သိက္ခာကို အလေးအနက်မထားတတ်ကြသော နယ်မြေတစ်ခုဖြစ်နေမည်မှာ သေချာသည်။ သို့ဆိုလျှင် ရိုင်းစိုင်းကြမ်းတမ်းသော ဒေသတစ်ခုအဖြစ် လူ့အသိုင်းအဝိုင်းက သတ်မှတ်နိုင်သည်။ ထို့ကြောင့် ကမ္ဘာပေါ်ရှိ နိုင်ငံတိုင်း၊ နယ်မြေဒေသတိုင်းသည် လူသားများ၏ အခြေခံအခွင့်အရေးနှင့် လူသားများ၏ ဂုဏ်သိက္ခာကို လေးစားတန်ဖိုးထားတတ်ဖို့လိုသည်။

ဆိုခဲ့ပါလူနည်းစုတို့၏ အခွင့်အရေးများမှာ နယ်မြေဒေသအလိုက် ယခုထက်တိုင် ချိုးဖောက်ခံနေကြရဆဲသာဖြစ်သည်။ လူနည်းစု၏ အခွင့်အရေးကို ချိုးဖောက်သည်ဆိုရာတွင် နည်းလမ်းသုံးမျိုးရှိသည်။

၁။ နိုင်ငံရေးနည်းလမ်းဖြင့် ချိုးဖောက်ခံရခြင်း
(Political Way)
၂။ လူ့အဖွဲ့အစည်း၏ ဓလေ့အားဖြင့် နိမ့်ချဆက်ဆံကြခြင်း
(Culture way)
၃။ စစ်ရေးနည်းလမ်းအသုံးပြု၍ ဗိုလ်ကျစိုးမိုးခြင်း
(War way) ဟူ၍ဖြစ်သည်။

အထက်ပါအချက်များထဲမှ နံပါတ်သုံးအချက်ဖြစ်သော စစ်ရေးနည်းလမ်းအသုံးပြုကြခြင်းမှာ လူမျိုးစုအခွင့်အရေးများကို ကန့်သတ်လိုသောအခါ နောက်ဆုံးနည်းလမ်းအဖြစ် အသုံးပြုကြခြင်းဖြစ်သည်။ အခြားသော အသွင်မတူသည့်လူနည်းစုများကိုတော့ နံပါတ်တစ်နှင့် နံပါတ်နှစ် နည်းလမ်းများအသုံးပြု၍ ခွဲခြားဆက်ဆံခြင်း၊ ကန့်သတ်နှိမ့်ချ ခြင်းများကို ပြုလုပ်လေ့ရှိကြသည်။

ဥပမာ – ကျားမအခွင့်အရေး တန်းတူညီမျှမှု မပေးထားဘဲ ဓလေ့ထုံးစံအရ ခွဲခြားထားခြင်း၊ LGBT တို့၏ အခွင့်အရေးများကို မလေးစားသည့်အပြင် ၎င်းတို့၏ကိုယ်ပိုင်လွတ်လပ်ခွင့်နှင့် လူမှုဘ၀များကို နှိမ့်ချဆက်ဆံခြင်း၊ ကလေးသူငယ်အခွင့်အရေးဟူ၍ မရှိသလို သက်ကြီးရွယ်အိုလူကြီးသူမများ၏ ဘ၀ရပ်တည်နေထိုင်မှုကိုလည်း အလေးမထားခြင်း၊ မသန်စွမ်းသူများအပေါ်တွင်ရင့်သီးသော အပြောအဆို အသုံးအနှုန်းများဖြင့် နှိမ်ချဆက်ဆံတတ်ခြင်း၊ ကျန်းမာရေးရှုထောင့်ကကြည့်လျှင် AIDS ရောဂါအပါအဝင် အခြားသောကူးစက်ရောဂါဝေဒနာရှင်များအနေနှင့် ဖြစ်ပြီဆိုသည်နှင့် လူတောမတိုးရဲတော့ခြင်း၊ နိုင်ငံရေးနယ်ပယ်မှာဆိုလျှင် လူထုထောက်ခံမှုအားနည်းသော နိုင်ငံရေး အုပ်စုများ၊ ပါတီများအပေါ်မလေးစားခြင်း၊ ဂရုမစိုက်ခြင်း အစရှိသည့် လုပ်ရပ်များအားလုံးသည် လူနည်းစုအခွင့်အရေးကို အကြီးအကျယ် ချိုးဖောက်နေသော ဓလေ့စရိုက်နှင့် လုပ်ရပ်များပင်ဖြစ်လေသည်။

မြန်မာနိုင်ငံမှာလည်း ယခုလိုခွဲခြားဆက်ဆံနေမှုတွေရှိသည်။ အများဆုံးကတော့ ယဉ်ကျေးမှုဓလေ့စရိုက်အားဖြင့် ခွဲခြားဆက်ဆံကြခြင်းဖြစ်သည်။ Gay များ၊ Tomboy များသည် မြန်မာရုပ်ရှင်များထဲတွင် ခပ်ပေါပေါဇာတ်ကောင်များအဖြစ် ပါဝင်နေကြရသည်။ ဒီနိုင်ငံ၏ လူမှုဓလေ့ကလည်း ၎င်းတို့ကို ပုံမှန်လူသားများအဖြစ် မသတ်မှတ်နိုင်ဘဲ ထူးခြားသောကန့်သတ်မှုအမြင်စရိုက်များဖြင့် ဘောင်ခတ်ကြည့်နေကြဆဲ ဖြစ်သည်။ ဘာသာရေးအရ ပိတ်ပင်မှုတွေအပြင် ဓလေ့စရိုက်အရ လှောင်ပြောင်စရာလူသားများအဖြစ်ပါ သတ်မှတ်ခံနေကြရဆဲ ဖြစ်ပါသည်။

နိုင်ငံရေးနယ်ပယ်မှာလည်း ထိုနည်းလည်းကောင်းပင်။ အင်အားနည်းပါးသော နိုင်ငံရေးပါတီငယ်များ၏အသံကို အစိုးရ၊ လွှတ်တော် အစရှိသည်တို့က အလေးထားနားထောင်ခြင်းမရှိ။ ယင်းမှာ နိုင်ငံရေးအရ ခွဲခြားဆက်ဆံမှု (Political Discrimination) ပြုလုပ်ခြင်း တစ်မျိုး လည်းဖြစ်သည်။ သို့ဖြင့်ပင် ပါတီငယ်များ၏ အသံနှင့် ဆန္ဒများက နိုင်ငံရေးနယ်ပယ်အတွင်း ထိုးဖောက်နိုင်မှုမရှိတော့ပေ။ ပါတီငယ်များ၏ ဆန္ဒကို လိုက်နာဖို့ ဆိုလိုခြင်းမဟုတ်ပါ။ တန်ဖိုးထားပြီး အသိအမှတ်ပြု နားထောင်ပေးဖို့ကို ဆိုလိုခြင်းဖြစ်ပါသည်။

ကျန်းမာရေးအရဆိုလျှင် လူတစ်ယောက်မှာ HIV ပိုးရှိပြီ ဆိုသည်နှင့် အဆိုပါလူနာသည် လူတွေကို မတွေ့ရဲတော့။ လူနာရှင်သည်ပင်လျှင် မိမိလူနာ၏ရောဂါကို ဖြေရမှာရှက်သည်။ တကယ်ဆို HIV ရောဂါပိုးဆိုသည်မှာ လိင်မှုကိစ္စတစ်ခုတည်းသာမဟုတ်ဘဲ အခြားသော မတော် တဆနည်းလမ်းများဖြင့်လည်း ကူးစက်နိုင်သည်။ သို့သော် ဒီနိုင်ငံမှာက HIV ဟူသောအသံကြားလျှင် လိင်မှုကိစ္စရှုပ်ပွေခြင်းဟူသော ခေါင်းစဉ်ကြီးကို တပ်လိုက်ကြသည်။ အခြားနိုင်ငံတွေလို ဝေဒနာရှင်တွေကို နှစ်သိမ့်ဆွေးနွေးအားပေးဖို့ ဝေးစွ။ ဤသို့ဖြင့် ရောဂါထက် ရှက်စိတ်ဖိစီးမှုကြောင့် အချိန်မတန်ဘဲ ဆုံးပါးသွားရသည့် ဝေဒနာရှင်တွေ ရှိခဲ့သည်။

တန်းတူညီမျှမှုနှင့် လူနည်းစုအခွင့်အရေး

‘ခွင့်တူညီမျှ ဝါဒဖြူစင်တဲ့ပြည်’ ဟူ၍ နိုင်ငံတော်သီချင်းမှာ ဖွဲ့သီထားတာ တွေ့ရသည်။ အမှန်တကယ်ရော အခွင့်အရေးတွေ သာတူညီမျှ ရကြပြီလောဟု တစ်စုံတစ်ယောက်က မေးခွန်းထုတ်လာခဲ့လျှင် ဘယ်လိုဖြေကြပါမည်နည်း။

အထက်တွင်ဆိုခဲ့ပြီးသော လူနည်းစုများအပေါ် တန်းတူညီမျှသောအခွင့်အရေးနှင့် တန်းတူညီတူဆက်ဆံမှုတွေရှိမနေသေးသမျှ ဒီနိုင်ငံမှာ တန်းတူညီမျှမှုရှိပြီဟု မဆိုနိုင်သေးပါ။ ဆိုခဲ့ပါ လူနည်းစု၏ လူ့အခွင့်အရေးနှင့်လူ့ဂုဏ်သိက္ခာအပေါ် ယဉ်ကျေးမှု (Culture) အားဖြင့်ရော၊ ဖွဲ့စည်းတည်ဆောက်ပုံ (Structure) အားဖြင့်ပါ ခွဲခြားဆက်ဆံမှုတွေ ပပျောက်သွားမှသာလျှင် တန်းတူညီမျှမှုရှိသော လူ့အဖွဲ့ အစည်းတစ်ခု ဖြစ်လာပါလိမ့်မည်။ ယင်းအတွက် အဖြေက လူနည်းစုအခွင့်အရေးကို လေးစားတတ်သော လူ့အဖွဲ့အစည်းတစ်ခုဖြစ်လာအောင် လုပ်ယူကြဖို့ပင်ဖြစ်ပါသည်။ လူနည်းစုအခွင့်အရေးကို ချိုးဖောက်သလိုဖြစ်နေသောတည်ဆောက်ပုံ (Structure) နှင့် ယဉ်ကျေးမှု (Culture) များကို လိုအပ်သလိုပြုပြင်တည့်မတ်ယူကြရပါမည်။ သည်နေရာတွင် Structure Change မှာ အသွင်သဏ္ဌာန်ပိုင်းကို ပြုပြင်ပြောင်းလဲပေးပြီး Culture Change မှာ အနှစ်သာရပိုင်းကို ပြုပြင်ပြောင်းလဲပေးပါသည်။

အသွင်သဏ္ဌာန်ပိုင်းအတွက်ဆိုလျှင် နိုင်ငံရေးနည်းလမ်းအားဖြင့် လူနည်းစုဆိုင်ရာဥပဒေများ ပြဋ္ဌာန်းသတ်မှတ်၍အကာအကွယ်ပေးခြင်း၊ အခြေခံပညာရေးအဆင့်မှစ၍ လူနည်းစုအခွင့်အရေးများကို လေးစားတတ်စေရန် သွန်သင်ပေးခြင်း စသည်တို့ကိုပြုလုပ်နိုင်သည်။ အနှစ်သာရပိုင်းအရဆိုလျှင် လက်ရှိလူ့အဖွဲ့အစည်းအတွင်းမှာ လူနည်းစုတို့၏ လူသားအခွင့်အရေးနှင် လူ့ဂုဏ်သိက္ခာကို စာနာထောက်ထား တတ်လာကြစေဖို့ အရပ်ဘက်အဖွဲ့အစည်းများ၊ မီဒီယာများ၊ အနုပညာရှင်များအပါအဝင် တတ်သိပညာရှင်များက ဦးဆောင်၍ လူနည်းစု အခွင့်အရေးအတွက် လမ်းညွှန်တိုက်တွန်းမှုတွေ၊ အသိပညာပေးမှုတွေ ပြုလုပ်ရမှာဖြစ်ပါသည်။

အချုပ်ဆိုရလျှင် လူသားအချင်းချင်းကြားတွင် အသားအရောင်ကြောင့်ဖြစ်စေ၊ လူမျိုးစုကွဲပြားမှုကြောင့်ဖြစ်စေ၊ ဘာသာရေးနှင့် အိုက်ဒီယို လော်ဂျီ ကွဲပြားမှုကြောင့်ဖြစ်စေ ၊ လိင်စိတ်နှင့် အခြားသောတန်ဖိုးထားမှုစံများ ကွဲပြားမှုကြောင့်ဖြစ်စေ မည်သည့်နည်းနှင့်မျှ ခွဲခြားဆက်ဆံမှုကို အားမပေးသင့်ပါ။ တစ်နိုင်ငံတည်းမှာ အတူတကွနေထိုင်ကြသူများအကြားတွင် ပို၍သတိထားသင့်ပါသည်။ သို့နှင့် မိမိတို့ လူ့အဖွဲ့အစည်းကို မတူကွဲပြားမှုတွေအပေါ်လေးစားတတ်လာဖို့၊ အကြောင်းအမျိုးမျိုးကြောင့် ကွဲပြားခြားနားနေသော လူနည်းစုတို့၏အခွင့်အရေးနှင့် ဖြစ်တည်မှုများအပေါ် တန်ဖိုးထားတတ်လာကြစေဖို့ တိုက်တွန်းသင့်သည်။မတူညီမှုများကို လေးစားတတ်ခြင်းနှင့် ကွဲပြားသောလူနည်းစုများ၏အခွင့်အရေးကို တန်ဖိုးထားတတ်ခြင်းသည် လူသားများ၏ မြင့်မြတ်သော ဂုဏ်သိက္ခာနှင့် အဆင့်မြင့်သော လူသားယဉ်ကျေးမှုတစ်ရပ် ဖြစ်ကြောင်း နားလည်ဖို့လိုပါသည်။

အဓိကတော့ မိမိတို့ကိုယ်တိုင်လူနည်းစုတို့၏နေရာမှာ ဝင်ရောက်ခံစားခြင်းဖြင့် လူသား၏အဆင့်မြင့်ဆုံးသော စရိုက်ဖြစ်သည့် ‘ကိုယ်ချင်း စာနာသည့်စိတ်’ (Sympathy) ကို မွေးမြုကြရင်း အမှန်တကယ် လူသားအဆင့်အတန်းမြင့်မားသော ခွင့်တူညီမျှမှုရှိသည့် လူ့ဘောင်အသစ်တစ်ခုကို တည်ဆောက်ယူကြပါရန် မီးမောင်းထိုးတင်ပြအပ်ပါသည်။

 

ဝင်းကို

You may also like...

Leave a Reply

Your email address will not be published. Required fields are marked *