ပုဒ်မနောက်က စိတ်

တစ်ဖွဲ့နှင့် တစ်ဖွဲ့၊ တစ်ဦးနှင့်တစ်ဦး အငြင်းပွားမှုများကို အခြားနည်းများဖြင့်မဖြေရှင်းလိုသည့်အခါ တရားစွဲဆိုကြသည်။ တရားစွဲဆိုမည် ဆိုလျှင် မည်သည့်ပုဒ်မဖြင့် မည်သည့်ဥပဒေဖြင့် စွဲဆို၍ရသလဲ စဉ်းစားရသည်။

တရားစွဲဆို၍ရနိုင်သောပုဒ်မ တစ်ခုထက်မကရှိလျှင် ထိုအထဲကမှ ထပ်မံရွေးချယ်ရသည်။

မိမိရွေးသော ပုဒ်မသည် မိမိစိတ်၊ မိမိခံယူချက်ကို ဖော်ပြသည်။ လူပုဂ္ဂိုလ်ကစွဲဆိုလျှင် လူပုဂ္ဂိုလ်၏စိတ်၊ အဖွဲ့အစည်းကစွဲဆိုလျှင် ထိုအဖွဲ့အစည်း၏စိတ်ကိုဖော်ပြသည့်အတွက် တရားစွဲဆိုမည်ဆိုလျှင် ပုဒ်မရွေးရာတွင် သေချာစွာ စဉ်းစားရန်လိုသည်။

အစိုးရတစ်ရပ်က တရားစွဲဆိုပြီဆိုလျှင် အထက်ပါအချက်များကို ပိုပြီးပင်စဉ်းစားရန်လိုသည်။ အစိုးရဆိုသည် အာဏာသိမ်းပြီး တက်လာသော အစိုးရဖြစ်လျှင်ပင် နိုင်ငံကို အတိုင်းအတာတစ်ခုထိ ကိုယ်စားပြုသည့်အတွက် နိုင်ငံ၏စိတ်ကို ဖော်ပြသလိုဖြစ်သောကြောင့်။ အမှန်ဆိုလျှင် အစိုးရသည် အားကြီးပြီးသားဖြစ်သဖြင့် တရားစွဲခြင်းကိုပင် အလွယ်တကူ မပြုလုပ်သင့်ပါ။

အစိုးရများအနက်တွင်မှ ရွေးကောက်ပွဲနှင့် တက်လာသောအစိုးရဆိုလျှင် တရားစွဲသောအခါ ပိုစဉ်းစားရန်လိုသည်။ ထိုအစိုးရမျိုးသည် နိုင်ငံကို ပိုကိုယ်စားပြုသည့်အတွက် တာဝန်ပိုကြီးသည်။

တစ်ဖန် ရွေးကောက်ပွဲဖြင့်တက်လာသောအစိုးရချင်းတူလျှင်ပင် ဒီမိုကရေစီရရေး ချွေးနှင့်သွေးနှင့် ရုန်းကန်ပြီးတက်လာသော အစိုးရမျိုးဆိုလျှင် ပိုပြီးသတိထားသင့်သည်။ အတိုက်အခိုက်အခက်အခဲများကြားမှ သူတည်ဆောက်နေသော ဒီမိုကရေစီစနစ်ကို သူကိုယ်တိုင် မယုံကြည်သည့်စိတ်မျိုး သူစွဲဆိုသည့်ပုဒ်မတွင် မပြမိရန် လိုသည်။

ဒီမိုကရေစီနှင့် အလှမ်းဝေး အတွေ့အကြုံနည်းခဲ့သော ပြည်သူပြည်သားများသည် ဒီမိုကရေစီရေး လှုပ်ရှားရုန်းကန်ခဲ့သော၊ ဒီမိုကရေစီတည်ဆောက်နေသော အစိုးရ၏လုပ်ရပ်များကိုကြည့်ပြီး စံနမူနာအဖြစ် သိစိတ်တွင်ရော မသိစိတ်တွင်ရော အတုယူနေသည့်အတွက် ထိုသို့ ပိုသတိထားသင့်ခြင်းဖြစ်သည်။

ပြင်ပမှ ဒီမိုကရေစီရေးကူညီအားပေးနေသော မိတ်ဆွေနိုင်ငံများသည်လည်း အစိုးရ၏ဒီမိုကရေစီပေါ်ထားရှိသည့် စိတ်သဘောထားမြင့်မားလျှင် မြင့်မားသလို အကူအညီပေးကြသည့်အတွက် ဒီမိုကရေစီအပေါ်ထားသော ‘စိတ်’ ကို ပြသရန်လိုသည်။

‘ပုဒ်မနောက်က စိတ်’ သည် မြန်မာနိုင်ငံလက်ရှိရင်ဆိုင်နေရသော ပြည်တွင်းပြည်ပအခြေအနေများအတွက် အလွန်အရေးကြီးကြောင်း Eleven Media Group မှ သတင်းစာဆရာသုံးဦးအား ရန်ကုန်တိုင်းဒေသကြီးအစိုးရအဖွဲ့က ပုဒ်မ ၅၀၅(ခ)ဖြင့် တရားစွဲဆိုသည့်အမှုကို အကြောင်းပြု၍ ရေးသားခြင်းဖြစ်သည်။ 

 

အယ်ဒီတာ
၁၁.၁၀.၂၀၁၈

You may also like...

Leave a Reply

Your email address will not be published. Required fields are marked *