ကြားဖြတ်တွင် မဲဆန္ဒရှင် ကိုးသိန်းကျော်အတွက် မဲရုံ ၁၃၀၀ ကျော် ထားမည်

မန္တလေး၊ အောက်တိုဘာ ၁၉

နိုဝင်ဘာလ၃ရက်နေ့တွင် ပြုလုပ်မည့် ကြားဖြတ်ရွေးကောက်ပွဲအတွက် တစ်နိုင်ငံလုံးတွင်မဲရုံပေါင်း ၁၃၈၃ ရုံထားရှိမည်ဟု ပြည်ထောင်စုရွေးကောက်ပွဲကော်မရှင်ထံမှ သိရသည်။

လစ်လပ်မဲဆန္ဒနယ် ၁၃ နေရာရှိပြီး မန္တလေးတိုင်းတွင် သုံးနေရာဖြင့် အများဆုံး ပြုလုပ်မည်ဖြစ်သည်။

“မန္တလေးကတော့ ရှမ်းတိုင်းရင်းသားရေးရာ ဝန်ကြီးနေရာလည်းရှိတော့  သူက မဲရုံအများဆုံး ဖြစ်သွားတာပေါ့”ဟု ရွေးကောက်ပွဲကော်မရှင်ပြောရေးဆိုခွင့်ရှိသူ ဦးမြင့်နိုင်က ပြောကြားသည်။

တစ်နိုင်ငံလုံးအနေနှင့် မဲဆန္ဒရှင်ပေါင်းကိုးသိန်းကျော်ရှိကာ အပြောင်းအလဲအနည်းငယ်ကို မဲပေးမည့်နေ့ မတိုင်မီတွင် ထပ်မံကြေညာပေးနိုင်ဖွယ်ရှိကြောင်း ၎င်းက ဆိုသည်။

မန္တလေးတိုင်းဒေသကြီးတွင် မဲဆန္ဒရှင်ပေါင်း သုံးသိန်းတစ်သောင်းကျော်ရှိပြီး  မဲရုံ ၆၇၇ ရုံ ထားမည်ဟု တိုင်းဒေသကြီးရွေးကောက်ပွဲကော်မရှင် အဖွဲ့ခွဲ ဥက္ကဋ္ဌဦးရှိန်ဝင်းက ပြောကြားသည်။

ယင်းအနက် ရှမ်းတိုင်းရင်းသားလူမျိုးများ မဲဆန္ဒနယ်အတွက် မဲဆန္ဒရှင် လေးသောင်းတစ်ထောင်ကျော်ရှိပြီး မဲရုံပေါင်း ၃၆၄ ရုံ ထားမည်ဖြစ်သည်။

ရှမ်းတိုင်းရင်းသားလူမျိုးများ မဲဆန္ဒနယ်အတွက် နိုင်ငံရေးပါတီလေးခုနှင့် တစ်သီးပုဂ္ဂလတို့မှ ကိုယ်စားလှယ်လောင်းငါးဦး ယှဉ်ပြိုင်နေပြီး မန္တလေးတိုင်း ၂၈ မြို့နယ်အနက် ၂၅ မြို့နယ်တွင် ပြုလုပ်သွားမည်ဖြစ်သည်။

မဲရုံသို့ လာရောက်မဲမပေးနိုင်သည့် ဆေးရုံတက်လူနာ၊ မီးဖွားလူနာ၊ အချုပ်ကျ အကျဉ်းသားနှင့် နာတာရှည်ရောဂါခံစားနေရသူများအနေနှင့် နိုဝင်ဘာလ ၁ရက်နှင့်၂ ရက်နေ့တို့တွင် ကြိုတင်မဲပေးနိုင်ရန်အတွက် စီစဉ်နေကြောင်း ၎င်းက ဆိုသည်။

၂၀၁၈ ကြားဖြတ်ရွေးကောက်ပွဲ မဲဆန္ဒနယ်မြေ ၁၃ နေရာအတွက် ကျပ်သန်းပေါင်း ၁၆၀၀ ကျော် (တစ်ဘီလီယံခွဲခန့်) သုံးစွဲရန်အတွက် ပြည်ထောင်စုရွေးကောက်ပွဲကော်မရှင်က ဇန်နဝါရီလအတွင်းက တောင်းခံခဲ့သည်။

ပြီးခဲ့သည့် ၂၀၁၇ ကြားဖြတ်ရွေးကောက်ပွဲတွင်လည်း မဲဆန္ဒနယ်မြေ ၁၉ နေရာအတွက် ကျပ်သန်းပေါင်း ၁၆၀၀ကျော် (တစ်ဘီလီယံခွဲခန့်)ကို အသုံးပြုခဲ့သဖြင့် ယခုနှစ်ရွေးကောက်ပွဲတွင် ပိုမို၍သုံးစွဲသည်ဟု ဆိုနိုင်သည်။

တစ်အိမ်တက်ဆင်း မဲစာရင်းကောက်ယူခြင်း၊ မဲရုံမှူးများ၊ မဲရုံအဖွဲ့ဝင်များ၊ မဲပုံးများအတွက် သုံးစွဲရခြင်းဖြစ်ပြီး ၂၀၁၅ ခုနှစ် အထွေထွေရွေးကောက်ပွဲတွင်မူ မဲဆန္ဒနယ်မြေ၁၁၇၁နေရာအတွက် ကျပ် ၃၇ဘီလီယံ သုံးစွဲခဲ့သည်ဟု ပြည်ထောင်စုရွေးကောက်ပွဲကော်မရှင်ထံမှ သိရသည်။

You may also like...

Leave a Reply

Your email address will not be published. Required fields are marked *