မတူကွဲပြားမှုများ ရေးသားဖော်ပြမှုကို ဝတ္ထုတို သုံးထောင်ကျော်ဖတ်၍ သုတေသနလုပ်မည်

ရန်ကုန်၊ အောက်တိုဘာ ၁၆

မြန်မာနိုင်ငံရှိ လူမျိုး၊ ဘာသာ၊ ဒေသစသည့် မတူကွဲပြားမှုများကို စာဖြင့် ရေးသားပုံဖော်မှု မည်မျှရှိကြောင်းသိရှိစေရန် ဝတ္ထုတိုသုံးထောင်ကျော်ဖတ်၍ သုတေသနတစ်ခုပြုလုပ်မည်ဖြစ်ကြောင်း စာရေးဆရာမမသီတာ (စမ်းချောင်း)က ပြောကြားသည်။

အဆိုပါသုတေသနကို Pen Myanmar အနေနှင့်ပြုလုပ်မည်ဖြစ်ပြီး မြန်မာနိုင်ငံအတွင်း စုံလင်ကွဲပြားစွာတည်ရှိ နေသည့် လူမျိုး၊ ဘာသာ၊ ဒေသစသည့် အကြောင်းအရာများကို စာပေစိစစ်ရေးအဖွဲ့ မဖျက်သိမ်းခင် ငါးနှစ်နှင့် ဖျက်သိမ်းပြီး ငါးနှစ်အတွင်း ထုတ်ဝေခဲ့သော ဝတ္ထုတိုများတွင် ဖော်ပြထားမှု အခြေအနေကို လေ့လာမည်ဖြစ်သည်။

သုတေသနအမည်ကို Literature inclusive in Myanmar လတ်တလော ပေးထားကာ သုတေသနလုပ်ငန်းများကို အောက်တိုဘာပထမပတ်က စတင်ခဲ့ပြီး၂၀၁၉ ခုနှစ် ဖေဖော်ဝါရီတွင် ရလဒ်များကို တင်ပြမည်ဖြစ်ကြောင်း ၎င်းက ပြောကြားသည်။

“ ဗမာပြည်ကြီးက ကြီးပေမယ့် ဝတ္ထုတိုတွေမှာ ပါတဲ့ဒေသတွေက အားလုံးလွှမ်းခြုံရဲ့လား။ ဒါလည်း သိချင်တယ်။ လူမျိုးလည်း ဒီတိုင်းပဲ။ ဘာသာလည်း ဒီတိုင်းပဲပေါ့။ တကယ့် အစစ်အမှန်ပုံရိပ်ဟာ စုံလင်ကွဲပြားမှု ရှိနေတယ်ဆိုတာ ကျွန်မတို့ အကုန်လုံးသိနေတယ်။ အဲဒါကို ဘာဖြစ်လို့ ဒီလက်ရာတွေမှာ မထင်ဟပ်နိုင်ရတာလဲ။ အဲဒါကိုတော့ ဖြစ်ချင်တယ်” ဟု စာရေးဆရာမမသီတာ (စမ်းချောင်း)က ပြောကြား သည်။

အဆိုပါသုတေသနရလဒ်များကို အဓိကတိုင်းရင်းသားရှစ်မျိုး၏ ဘာသာစကားသို့ ပြန်ဆို၍ ဗီဒီယိုမှတ်တမ်းတစ်ခု ပြုလုပ်သွားမည်ဖြစ်သည်။

“တချို့ပြည်နယ်တွေမှာ အဲဒီ အကြောင်းကိုလည်း ရေးတဲ့သူ အရမ်းနည်းနေတယ်။ အဲဒီပြည်နယ်မှာ နေတဲ့သူလည်း အရမ်းနည်းနေလိမ့်မယ်။ ဝတ္ထုတိုသမားတွေ မထွက်ဘူးပေါ့။ အဲဒီလိုမျိုး ဖြစ်နေတယ်ဆိုရင် ဘယ်လိုအဖြေရှာမလဲပေါ့” ဟု ၎င်းက ပြောကြားသည်။

သုတေသနလုပ်ငန်းအတွက် ငွေကြေးကို လန်ဒန်အခြေစိုက် School of Oriental and African Studies  တက္ကသိုလ်နှင့် Jawaharlal Nehru အပါအဝင် တက္ကသိုလ်လေးခုခန့်မှ ပြင်ပသုတေသန ပြုလုပ်လိုသူများအတွက် ပေးအပ်သော ငွေကြေးပံ့ပိုးမှုဖြင့် ပြုလုပ်ခြင်းဖြစ်ကြောင်းလည်း ၎င်းက ဆိုသည်။

အဆိုပါသုတေသနအတွက် ဆရာမမသီတာ (စမ်းချောင်း) အပါအဝင် စာရေးဆရာမောင်သာချို၊ ဆရာမရာသက်ပန်၊ ဆရာမမိချမ်းဝေ၊ ဆရာမစုမီအောင်၊ ဆရာခွန်ရှားလှိုင်နှင့် ဆရာမနန်းကြာဖြူ (ဘားအံ)တို့ ပါဝင်မည်ဖြစ်ကြောင်း ၎င်းက ဆိုသည်။

You may also like...

Leave a Reply

Your email address will not be published. Required fields are marked *