ပူမှာကြောက်ရင် မီးဖိုထဲကထွက်

‘If you don’t like the heat, get out of the kitchen.’ ပူမှာကြောက်ရင် မီးဖိုထဲကထွက်’ ဟု ဝေဖန်သည့်ဒဏ်ကိုခံနိုင်ရန် အမေရိကန်သမ္မတ Harry Truman က ဆိုဖူးပြီး ထိုစကားမှာ ယနေ့ထက်တိုင် နာမည်ကျော်သည်။

မည်သည့်အလုပ်ဖြစ်စေ ထိုအလုပ်နှင့်တွဲပါလာသောဖိအားဆိုသည်မှာ ရှိမြဲဖြစ်ပြီး ထိုဖိအားဒဏ်ကိုမခံနိုင်လျှင် ထိုအလုပ်မှထွက်ရန်သာရှိသည်ဟူသော ထိုစကားသည် နိုင်ငံ့တာဝန်ကြီးများကို ယူထားသော အစိုးရအဖွဲ့ဝင်များ အမြဲနှလုံးသွင်းရမည့် စကားဖြစ်သည်။

အစိုးရဆိုသည်မှာ နိုင်ငံကို ဦးဆောင်မောင်းနှင်နေသော အဖွဲ့အစည်းဖြစ်သည်နှင့်အညီ ပြည်သူများ၏ ဝေဖန်ချက်များကို ခံရလေ့ရှိသည်မှာ ဓမ္မတာဖြစ်သည့်အတွက် အရေထူရန်လိုသည်။ အစိုးရအဖွဲ့ဝင်များသည် လူအများ၏ မြင်ကွင်းတွင် အမြဲမြင်နေရသူများဖြစ်သလို လူအများအပြားကို ရိုက်ခတ်သည့် ဆုံးဖြတ်ချက်ချနေကြသူများဖြစ်သည့်အတွက် ဝေဖန်မှုအများဆုံးခံရမည်မှာ သဘာဝဖြစ်သည်။ တစ်ဖန် ဝေဖန်သူများသည် ကိုယ့်အကြောင်းကို တကယ်သိသည်ဖြစ်စေ၊ မသိသည်ဖြစ်စေ ဝေဖန်ကြမည်ဖြစ်သည့်အတွက် ‘ငါ့ကိုမှရွေးပြီး တိုက်ခိုက်နေကြတာပဲ’ ဟု စိတ်မထိခိုက် မနာကြည်းသင့်ပါ။

အစိုးရကို ဝေဖန်ခြင်းသည် အစိုးရနှင့် အတူတွဲပေါ်ပေါက်ခဲ့သော်လည်း ယနေ့ကာလ လူမှုမီဒီယာ Facebook ခေတ်တွင် အစိုးရကို ဝေဖန်ရသည်မှာ ပိုပြီးပင်လွယ်ကူပြီး ပရိသတ်အများအပြားထံသို့လည်း အလွယ်တကူရောက်ရှိသည့်အတွက် အစိုးရအဖွဲ့ဝင်များသည် အခံရခက်ကောင်းခက်မည်ဖြစ်သည်။ သို့သော် ဝေဖန်ခံရခြင်းသည် ကိုယ့်အလုပ်နှင့်တွဲပါလာသည့် ဝတ္တရားဖြစ်သည့်အတွက် ခံယူချက်မှန်မှန်ဖြင့် ခံယူရန်သာရှိသည်။

ဝေဖန်ဒဏ်မခံနိုင်ခြင်းသည် Yes Man ခေါ် ‘မှန်ပါ့ဘုရား’ များကို အားပေးအားမြှောက်ပြုရာ ရောက်သည့်အတွက် ခရိုနီစနစ်ကို အသက်သွင်းပေးနိုင်သည်။ ဝေဖန်ဒဏ်မခံနိုင်ခြင်းသည် အာဏာရှင်တို့၏ စရိုက်လက္ခဏာတွင် တစ်ပါးအပါအဝင်ဖြစ်သည့်အတွက် ဒီမိုကရေစီအစိုးရသည် ဝေဖန်ဒဏ်ခံနိုင်ရန် ပိုပြီးပင်လိုအပ်သည်။

ချစ်သူဖြစ်စေ၊ မုန်းသူဖြစ်စေ၊ မချစ်မမုန်းသူဖြစ်စေ၊ ပညာရှိသူဖြစ်စေ၊ မရှိသူဖြစ်စေ ပြည်သူမှန်လျှင် အစိုးရကို ဝေဖန်ထောက်ပြခွင့်ရှိကြောင်း အသိအမှတ်ပြုခြင်းဖြင့် ဒီမိုကရေစီအစိုးရများ၏ အကျင့်အကြံကို နောင်လာနောက်သားများသို့ လက်ဆင့်ကမ်းစေချင်သည်။ 

အယ်ဒီတာ
၂၅.၁၀.၂၀၁၈

You may also like...

Leave a Reply

Your email address will not be published. Required fields are marked *