ကုလအချက်အလက်ရှာဖွေရေးအဖွဲ့ ကျင့်ဝတ်ချိုးဖောက်ကြောင်း မြန်မာပြော

ရန်ကုန်၊ အောက်တိုဘာ ၂၆

ရခိုင်ပြည်နယ်အရေးကိုစုံစမ်းကာ အစီရင်ခံစာတင်သည့် ကုလသမဂ္ဂအချက်အလက်ရှာဖွေရေးအဖွဲ့ (FFM) ဥက္ကဋ္ဌသည် ကုလသမဂ္ဂဝန်ထမ်းများ၏ ကျင့်ဝတ်ကို ကြီးမားစွာဖောက်ဖျက်ကျူးလွန်ကြောင်း ကုလသမဂ္ဂဆိုင်ရာ မြန်မာသံအမတ်ကြီးက ပြောဆိုလိုက်သည်။

ကုလသမဂ္ဂလုံခြုံရေးကောင်စီတွင် ရခိုင်ပြည်နယ်အရေးကို စုံစမ်းသည့် အဆိုပါအချက်အလက်ရှာဖွေရေးအဖွဲ့၏ ပြောကြားမှုအပေါ် အောက်တိုဘာလ ၂၄ ရက်နေ့က တုံ့ပြန် ပြောကြားရာတွင် ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ်၊ သံအမတ်ကြီး ဦးဟောက် ဒိုဆွမ်းက ယင်းသို့ တုံ့ပြန်ခြင်း ဖြစ်သည်။

လူအခွင့်အရေးဆိုင်ရာ အထူးအစီရင်ခံစာတင်သွင်းသူ မစ္စယန်ဟီလီနှင့် FFM အဖွဲ့တို့၏ အစီအရင်ခံစာများကို တင်သွင်းသည့် တတိယကော်မတီ အစည်းအဝေးကျင်းပစဉ် မြန်မာနိုင်ငံနှင့် ပတ်သက်သည့် လက်ကမ်းစာစောင်များကို အစည်းအဝေးခန်းမ (၁) တွင် ဖြန့်ဝေခဲ့ကြကြောင်း ၎င်းကဆိုသည်။

ကုလသမဂ္ဂအဆောက်အအုံ၌ ကျင့်ဝတ်သိက္ခာကို အလေးမထားသည့်လုပ်ရပ်ဖြစ်ကြောင်း ၎င်းကပြောဆိုသည်။

ယင်းလုပ်ရပ်ကို လုပ်ဆောင်သူမှာ စည်းမျဉ်း၊ ဥပဒေကို အလေးမထားသည့် အစိုးရအပေါ်မကျေနပ်သူ မဟုတ်သကဲ့သို့ လူ့အခွင့်အရေးလှုပ်ရှားသူလည်း မဟုတ်ကြောင်း၊ ကုလသမဂ္ဂ၏ လက်အောက်ခံ အဖွဲ့အစည်းဖြစ်သည့် လူ့အခွင့်အရေးကောင်စီက ခန့်အပ်တာဝန်ပေးထားသော FFM ၏ဥက္ကဋ္ဌသာဖြစ်ကြောင်း ဦးဟောက် ဒိုဆွမ်းက ပြောကြားသည်။

သူတောင်ကောင်းယောင်ဆောင်မှုများ ကုလသမဂ္ဂအဖွဲ့ကြီးတွင် နေရာရရှိနိုင်သည်မှာ နားမလည်နိုင်အောင်ဖြစ်ရပြီး ယင်းလုပ်ရပ်သည် ကုလသမဂ္ဂအပေါ် အရှက်ရစေကြောင်း ၎င်းက ပြောဆိုသည်။

ယင်းလက်ကမ်းစာစောင်များမှာ ကုလသမဂ္ဂအဖွဲ့ဝင်နိုင်ငံဖြစ်သည့် မြန်မာနိုင်ငံ၏ ခေါင်းဆောင်များကို လုံးဝစော်ကားခြင်းသာဖြစ်ကြောင်း၊ မြန်မာနိုင်ငံအစိုးရအနေနှင့် ယင်းလုပ်ရပ်ကို အပြင်းထန်ဆုံးအတိုင်းအတာဖြင့် ပြစ်တင်ရှုတ်ချကြောင်း ဦးဟောက်ဒိုဆွမ်းက ဆက်လက်ပြောဆိုသည်။

ငြိမ်းချမ်းရေး၊ သဟဇာတဖြစ်ရေးနှင့် ခွင့်လွှတ်သည်းခံရေးတို့အတွက် လုပ်ဆောင်နေကြသည့် ကုလသမဂ္ဂ၏အစည်းအဝေးခန်းမများအတွင်းသို့ အမုန်းစကားများနှင့် ရန်စမှုများ ချဉ်းနင်းဝင်ရောက်လာနေပြီဖြစ်ကြောင်း ၎င်းကဆိုသည်။

အဆိုပါအချက်အလက်ရှာဖွေရေးအဖွဲ့ တည်ထောင်မှုတွင် အားနည်းချက်များ၊ ဘက်လိုက်မှုများ ပါဝင်နေပြီး မူလကပင် နိုင်ငံရေးအရ တွန်းအားပေးမှုရှိနေကြောင်း ၎င်းကပြောဆိုသည်။

ခိုင်လုံမှုမရှိသော ပြောဆိုဖြေကြားချက်များအပေါ်တွင်သာ အခြေခံထားသည့် အစီရင်ခံစာသည် လက်ရှိတင်းမာမှုများကို ဆက်လက်တိုးပွားစေမည်သာမက၊ လူမှုအသိုက်အဝန်းအကြား သဟဇာတဖြစ်စေရေးအတွက် အစိုးရ၏ကြိုးပမ်းဆောင်ရွက်ချက်များကိုလည်း နှောင့်နှေးစေမည်ဖြစ်ကြောင်း ၎င်းကဆိုသည်။

ယင်းအပြင် မောင်တောဒေသတွင် အကြမ်းဖက်မှုများကို ကျူးလွန်ခဲ့သည့် ARSA လုပ်ရပ်နှင့် ဟိန္ဒူများ အစုံလိုက်အပြုံလိုက် သတ်ဖြတ်ခံရမှုကိုလည်း FFM ၏ အစီရင်ခံစာတွင် ဖုံးကွယ်ထားကြောင်း ဦးဟောက်ဒိုဆွမ်းက ပြောဆိုသည်။ 

You may also like...

Leave a Reply

Your email address will not be published. Required fields are marked *