ကုန်စည်များထုတ်လုပ်တင်သွင်းရာတွင် မြန်မာဘာသာဖြင့် ဖော်ပြရမည်

ရန်ကုန်၊ အောက်တိုဘာ ၂၆

ကုန်စည်များ ထုတ်လုပ်ခြင်းနှင့် ကုန်သွယ်ခြင်းတို့ ပြုလုပ်ရာတွင် ကုန်စည်များ၌ မြန်မာဘာသာဖြင့် အညွှန်းတပ်၍ ထုတ်လုပ်ရမည်ဖြစ်ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူအကာအကွယ်ပေးရေး ဗဟိုကော်မတီက အောက်တိုဘာ ၂၆ ရက် တွင် အမိန့်ကြော်ငြာစာထုတ်ပြန်လိုက်သည်။

စားသုံးသူဘေးကင်းလုံခြုံရေးအတွက် သုံးစွဲပုံနှင့် ပတ်သက်သည့် သတင်းအချက်အလက် ညွှန်ကြားချက်များကို မြန်မာဘာသာဖြင့် ဖြစ်စေ၊ မြန်မာ နှင့် အခြားဘာသာတွဲလျက်ဖြစ်စေ ဖော်ပြရမည်ဖြစ်ပြီး သုံးစွဲပုံအညွှန်း၊ ထားသိုသိမ်းဆည်းပုံအညွှန်း၊ ဓာတ်မတည့်ကြောင်း ဖော်ပြချက်နှင့် ကြိုတင်သတိပေးချက်၊ ဘေးထွက်ဆိုးကျိုးစသည့် အချက်များ ပါဝင်ရမည်ဖြစ်ကြောင်း အမိန့်ကြော်ငြာစာတွင် ဖော်ပြထားသည်။

အဆိုပါအမိန့်ကြော်ငြာစာထုတ်ပြန်သည့်နေ့မှ ခြောက်လပြည့်သည့်နေ့ တွင် အသက်ဝင်မည်ဖြစ်ပြီး အဆိုပါအချက်များကိုလိုက်နာခြင်းမရှိသော စီးပွားရေးလုပ်ငန်းရှင်များကို စားသုံးသူအကာ အကွယ်ပေးရေး ဥပဒေပုဒ်မ ၁၉ အရ အရေးယူခံရမည်ဖြစ်ကြောင်းလည်း ပါရှိသည်။

“လုပ်ငန်းရှင်တွေကို လိုက်နာဖို့ ပညာပေးဆွေးနွေးတာတွေ လုပ်သွားမယ်။ အများပြည်သူသိအောင်လည်း ကြေညာသွားမှာပါ။ ထုပ်လုပ်တင်ပို့ရောင်းချသူအသင်းလို UMFCCI လို အသင်းအဖွဲ့တွေနဲ့လည်း ကြေညာချက်မထုတ်ခင်ကတည်းက ဆွေးနွေးထားပါတယ်။ ခြောက်လပြည့်လို့ လိုက်နာမှုမရှိတဲ့ လုပ်ငန်းတွေ  ကိုတော့ သူတို့ထုတ်တဲ့ ပစ္စည်းတွေကို ဈေးကွက်ထဲကနေ ပြန်လည်သိမ်းဆည်းတာတို့ လုပ်ငန်းရပ်နားတာတို့နဲ့ အရေးယူသွားမှာပါ”ဟု စားသုံးသူရေးရာဦးစီးဌာနညွှန်ကြားရေးမှူးချုပ် ဦးမြင့်လွင်က The Voice Journal သို့ ပြောကြားသည်။

မြန်မာဘာသာ၊ မြန်မာနှင့် အခြားဘာသာတွဲလျက် ဖော်ပြရမည့် ဦးစားပေး ကုန်စည်များတွင် အစားအသောက်များထဲမှ အချိုရည်နှင့် ယိုမျိုးစုံ၊ နို့နှင့် နို့ထွက်ပစ္စည်းအမျိုးမျိုး၊ အသားနှင့် အသားထွက်ပစ္စည်းအမျိုးမျိုး၊ ဥနှင့် ဥထွက်ပစ္စည်းအမျိုးမျိုး၊ စားသုံးဆီအမျိုးမျိုး၊ အသင့်ဖျော်  ကော်ဖီနှင့် လက်ဖက်ရည်ထုပ်အမျိုးမျိုး၊ အသင့်စားခေါက်ဆွဲခြောက်ထုပ်အမျိုးမျိုး၊ အရန်သင့်အစားအစာအမျိုးမျိုးစသဖြင့် ပါဝင်သည်။

ထို့ပြင် အိမ်သုံးပစ္စည်းများ၊ ကလေးအသုံးအဆောင်ပစ္စည်းများ၊ ဆက်သွယ်ရေးသုံးပစ္စည်းများ၊ ဆေးဝါးနှင့် ဖြည့်စွက်စာများ၊ဓာတုဗေဒပစ္စည်းများ၊ အလှကုန်၊ လူသုံးကုန်နှင့် လုပ်ငန်းသုံးပစ္စည်းကိရိယာများလည်း ပါဝင်သည်။

You may also like...

Leave a Reply

Your email address will not be published. Required fields are marked *