၂၀၃၀ ဂျပန် လုပ်သားလိုအပ်ချက် ၆ ဒသမ ၄ သန်းကို ဘယ်လိုရှင်းမလဲ

အာရှနှင့် ကမ္ဘာတွင် စီးပွားရေးအင်အားကြီးဂျပန်သည် နောင် ၁၀ နှစ်ကျော်အကြာ ၂၀၃၀ တွင် လုပ်သားလိုအပ်ချက်  ၆ ဒသမ ၄ သန်းရှိမည်ဟု Chuo တက္ကသိုလ်နှင့် Persol သုတေသနနှင့် အတိုင်ပင်ခံကုမ္ပဏီတို့က ထုတ်ပြန်သော သုတေသနစစ်တမ်းတွင် ဖော်ပြသည်။

လက်ရှိစီးပွားရေးကို ဆက်ထိန်းနိုင်ဖို့  လုပ်အားတည်ငြိမ်မှုကို ထိန်းသိမ်းနိုင်အောင် ဘာတွေ ဆက်လုပ်ကြမည်နည်း။  ဂျပန်၏ ဖြေရှင်းနည်းများသည် ဂျပန်အတွက် သာမက ဂျပန်၏ ရင်းနှီးမြှုပ်နှံမှုများကို အားကိုးရပြီး ဂျပန်တွင် သွားရောက်နေထိုင်လုပ်ကိုင်ကြသူများ မနည်းလှသည့် မြန်မာနိုင်ငံအတွက်ပါ အရေးကြီးသည်။

လုပ်ခလစာတိုးရမည်၊ အမျိုးသမီးများအပြင် အလုပ်ထွက်လုပ်ရန် ကလေးများကို စောင့်ရှောက်ပေးမည့် အစီအစဉ်များ ချရမည်။ လုပ်သားအင်အားစု တည်ငြိမ် ခိုင်မာရန် အခြားသော အစီအမံများစွာ  လိုအပ်သည်။

၆ ဒသမ ၄ သန်း လိုအပ်ချက်သည် ၂၀၁၇ ဂျပန်လူဦးရေ၏ ၅ ရာခိုင်နှုန်းရှိပြီး  ၂၀၁၇တွင် လုပ်သားလိုအပ်ချက် ၁ ဒသမ ၂ သန်းထက် ၅ ဆ တိုးသည်။

လုပ်သားလိုအပ်ချက်သည် ၂၀၃၀ တွင် ၇၀ ဒသမ ၇၃ သန်း လိုအပ်ပြီး လုပ်သားရနိုင်မှုမှာ ၆၄ ဒသမ ၂၉ သန်းသာရှိသည်ဟု အဆိုပါစစ်တမ်းက ဆိုသည်။ လုပ်ခလစာများသည် ၂၀၃၀ တွင် ၂၀၁၇ ထက်  ၁၄ ရာခိုင်နှုန်းတိုးတက်ရန် လိုအပ်သည်ဟု  စစ်တမ်းက ခန့်မှန်းသည်။

“လုပ်ခလစာများသာ ခန့်မှန်းသလောက်မတက်လျှင် လုပ်သားလိုအပ်ချက်သည် ၁၀ သန်းသို့  ရောက်နိုင်သည်” ဟု Chuo တက္ကသိုလ်မှ  ဘောဂဗေဒ ပါမောက္ခ Masahiro Abe က ရှင်းပြသည်။

အမျိုးသမီးများ၊ သက်ကြီးများ၊ ပြည်ပလုပ်သားများကို လုပ်ငန်းခွင်တွင်း ဝင်ရောက်လာအောင် အားပေးခြင်းဖြင့် ဂျပန်၏ လုပ်သားပြတ်လပ်မှုကို ကုစားသင့်သည်ဟု Persol ကုမ္ပဏီနှင့် Chuo တက္ကသိုလ်နှစ်ခုလုံးက ဆိုသည်။ အမျိုးသမီးများသည် ကလေးထိန်းရလျှင် အလုပ်လုပ်ကိုင်နိုင်စွမ်း လျော့ကျသည်။ ထို့ကြောင့် ကလေးတစ်သန်းလောက်သာ ကလေးထိန်းဌာနများသို့ ပို့နိုင်လျှင် မိန်းမတစ်သန်း လုပ်ငန်းခွင်ထဲရောက်မည်ဟု ခန့်မှန်းကြသည်။

အငြိမ်းစားယူရသည့် အသက်ကို တိုးမြှင့်ခြင်းအပါအဝင် သက်ကြီးပိုင်းများအတွက် အခြားအစီအစဉ်များ ဆောင်ရွက်လိုက်လျှင် လုပ်သား ၁ ဒသမ ၆၃ သန်းတိုးလာမည်ဟု ယခု သုတေသနက ခန့်မှန်းသည်။ ထိုကိန်းဂဏန်းတွင် ယောက်ျားနှစ်သိန်းနှစ်သောင်းနှင့် မိန်းမ ၁ ဒသမ ၄၁ သန်း ပါဝင်သည်။ ထိုခန့်မှန်းချက်အရ အမျိုးသမီးများအတွက် အလုပ်အကိုင်အခွင့်အလမ်းများ တိုးလာမည်။

ထို့အတူ နိုင်ငံခြားလုပ်သားများကို ဂျပန်သို့ ပိုမိုခေါ်ယူမည့် အစိုးရအစီအမံကို   ဆက်လက် အကောင်အထည်ဖော်လျှင် ထိုအချိန်တွင် နိုင်ငံခြားလုပ်သား ၈ သိန်း ၁ သောင်း ရောက်ရှိလာမည် ဖြစ်သည်။ ဂျပန်တွင် ပြည်ပသားများ အစုလိုက်အပြုံလိုက် ဝင်ရောက်ခြင်းသည် နိုင်ငံရေးတွင်  ထိလွယ်ရှလွယ်သဖြင့် ဂျပန်အစိုးရ အစဉ်အဆက်သည် ထိုကိစ္စတွင် လက်တွန့်သည်။  ပြည်ပလုပ်သားများကြောင့် ရာဇဝတ်မှုများ တိုးလာမည်၊ နိုင်ငံခြားသားများကို ဂျပန်များက မုန်းတီးလာကြမည်ကို စိုးရိမ်ကြသည်။  လက်ရှိစီးပွားရေးကို ထိန်းထားနိုင်ရေး  ရေရှည် စဉ်းစားကြရာတွင် ပြည်ပလုပ်သား များ ဝင်ရောက်ခွင့်ပြုရေးသည် အဖြေကောင်းဖြစ်လာသဖြင့် ဂျပန်အစိုးရ၏ ပြည်ပလုပ်သားမူဝါဒသည် ယခင်ကထက် ပြေလျော့လာသည်။

ယခု သုတေသနအစီရင်ခံစာတွင် ဖော်ပြထားသည့် နည်းလမ်းများအတိုင်း ဆောင်ရွက်လျှင် ဂျပန်ရှိ လုပ်သားအင်အားစု တွင်းသို့ ၃ ဒသမ ၄၆ သန်းသော အမျိုးသမီးများ၊ သက်ကြီးပိုင်းများ၊ ပြည်ပလုပ်သားများ ရောက်ရှိလာမည်ဖြစ်သော်လည်း ထိုပမာဏသည် လုပ်သားအင်အားထပ်တိုး  လိုအပ်ချက်၏ ထက်ဝက်ကျော်ကျော်ကိုသာ ကာမိမည်။ ဉာဏ်ရည်တု Artificial Intelligence အပါအဝင် နည်းပညာတိုးတက်မှုများဖြင့် ကျန်သောလုပ်အားလိုအပ်ချက်ကို ဖြည့်ဆည်းနိုင်မည်ဟု ပါမောက္ခ Abe က ဆိုသည်။ လုပ်သားဆယ်ယောက်ဖြင့် လုပ်ရမည့်လုပ်ငန်းခွင်တွင် စက်များသုံးပြီး နှစ်ယောက်သာလုပ်နိုင်လျှင် လုပ်သား ရှစ်ဦးသက်သာမည့် အစီအမံများကို  ပါမောက္ခ  Abe  က ရည်ညွှန်းခြင်းဖြစ်သည်။  ဂျပန်သည် နည်းပညာတွင် ရှေ့ဆုံးမှ ဦးဆောင်ထားသည့် နိုင်ငံဖြစ်သည့် အတွက် လုပ်သားလိုအပ်ချက်လျော့ပါးစေမည့် နည်းပညာများကိုသာ အာရုံစိုက်လိုက်လျင် လုပ်သားလိုအပ်ချက်ပြဿနာ အများအပြား လျော့ပါးသွားစေမည်။ 

လုပ်သားရှားပါးမှုသည် ဂျပန်၏ စီးပွားရေးကို ပြင်းထန်စွာ ထိခိုက်နိုင်သည်။  လုပ်သားရှားပါးမှုကြောင့် ၂၀၁၇ ဘဏ္ဍာရေးနှစ်တွင် ကုမ္ပဏီ ၁၁၄ ခု ပိတ်လိုက်ရသည်။ ယင်းသို့ ပိတ်ရခြင်းသည် လေးနှစ် ဆက်တိုက်ကာလတွင် တစ်နှစ်ပြီး တစ်နှစ်မြင့်တက်လာခြင်းဖြစ်ကြောင်း ဈေးကွက်သုတေသနနှင့် အချက်အလက်ကုမ္ပဏီ Teikoku Databank က ဆိုသည်။

လူသားရင်းမြစ်ပြဿနာသည် ဂျပန်ကဲ့သို့ နည်းပညာ၊ စီးပွားရေးအင်အားကြီးနိုင်ငံပင် ခေါင်းခဲရသည့် ပြဿနာဖြစ်သည်။  ဂျပန့်ဖြေရှင်းနည်းများကို မြန်မာတို့ လေ့လာလျှင် မြန်မာလုပ်သားတို့အတွက် အခွင့်အလမ်းများ ဖော်ထုတ်နိုင်မည်။ မြန်မာ့လူသားရင်းမြစ် ပြဿနာများအတွက် ဖြေရှင်းနည်းများ ပေါ်လာနိုင်သည်။

ဝိဇ္ဇာ

Ref: Nikkei Asian Review: Worker shortage in Japan to hit 6.4m by 2030, survey finds

You may also like...

Leave a Reply

Your email address will not be published. Required fields are marked *