ကိုကွန်းရှိလျှင် …

မိုးလေကင်းစင်လေပြီ။ ရွှေဝါရောင်သန်းရင့်မှည့်နေသော စပါးများကို ရိတ်သိမ်းတော့မည်။

စပါးရိတ်သိမ်းပြီးနောက်တွင် ရောင်းချမည့်စပါးကို တင်းတောင်းများဖြင့်ချိန် ထည့်ထားသည်။ ထိုတစ်ချိန်တည်းမှာပင် နောက်တစ်ရာသီအတွက်လိုအပ်သည့် စပါးမျိုးစေ့များကို အခြောက်လှန်းရသည်။ ထို့နောက် အိတ်ထဲထည့်သိမ်းသည်။

မြန်မာနိုင်ငံရှိ လူဦးရေ၏ ၇၀ ရာခိုင်နှုန်းသည် လယ်သမားများဖြစ်ကြသည်။ ရာသီဥတုပြောင်းလဲမှုဒဏ်ကို အများဆုံးခံစားရသူများလည်းဖြစ်သည်။ နှစ်စဉ်ရေကြီး၊ ရေလျှံမှုများကြောင့် လယ်ယာမြေဧက သိန်းချီပျက်စီးဆုံးရှုံးရသည်။ မျိုးစပါးများပါ ပျက်စီးနိုင်ခြင်းဖြစ်သည်။

ရာသီဥတုပြောင်းလဲမှုကြောင့် ဖြစ်ပေါ်လာသည့် ဘေးအန္တရာယ်များကို ကာကွယ်နိုင်မည့် လေလုံအိတ် (ကိုကွန်း) အသုံးပြုပါက မျိုးစပါးပျက်စီးမှုနည်းမည်ဟု အစိုးရဘက်က ဆိုထားသည်။ သို့သော် လယ်သမားများအလွယ်တကူ မသုံးနိုင်ပေ။ အဘယ်ကြောင့်နည်း။

မြန်မာနိုင်ငံတွင် လွန်ခဲ့သည့် ၁၅ နှစ်ခန့်က လေလုံအိတ်များကို သုတေသနပြု သုံးစွဲခဲ့ကြသည်။ သို့သော် လက်ရှိအချိန်ထိ အသုံးပြုမှုတွင်ကျယ်လာခြင်း မရှိပေ။

အကြောင်းမှာမူ လေလုံအိတ် တန်ဖိုးကြီးမြင့်၍ဖြစ်သည်။

“အဲဒါအမျိုးစားအိတ် (လေလုံအိတ်) ဈေးနှုန်းက လယ်သမားတွေအပေါ် အများအားဖြင့်က ရုတ်တရက် မတတ်နိုင်ဘူး။ အဲဒီတော့ နေခြောက်အောင်လှမ်းပြီးတော့ အိတ်ထဲထည့်။ အိတ်ကိုပဲ မိုးလုံ လေလုံနေရာမှာ သိမ်းကြတယ်” ဟု လယ်သမားကြီး ဦးသိန်းအောင်က ဆိုသည်။

၎င်းသည် ဧရာဝတီတိုင်းဒေသကြီး၊ ဓနုဖြူမြို့နယ် ဇီးဖြူကုန်းကျေးရွာတွင် လယ်ဧကများစွာပိုင်ဆိုင် စိုက်ပျိုးသူဖြစ်သည်။ ဘိုးဘွားလက်ထက်ကတည်းက လယ်ယာလုပ်ငန်းကို လုပ်ကိုင်လာသူဖြစ်သည်။ လယ်ယာလုပ်ငန်းကို ကျွမ်းကျင်သူလည်းဖြစ်သည်။

လယ်ယာများရိတ်သိမ်းပြီးနောက်ပိုင်း လာမည့်နှစ်မှာစိုက်ပျိုးမည့် မျိုးစပါးကို ပလတ်စတစ်အိတ်ဖြင့်သာ ထည့်နိုင်ကြောင်း ဦးသိန်းအောင်က ဆိုသည်။ ပလတ်စတစ်အိတ် (ခေါ်) မြွေရေခွံအိတ် အသုံးပြုသည်။

မိုးဒဏ်၊ လေဒဏ်၊ ရာသီဥတုပြောင်းလဲမှုဒဏ်ကိုခံနိုင်သော မျိုးစပါးထည့်အိတ်ဖြစ်သည့် လေလုံအိတ် (ကိုကွန်း) ကို လယ်သမားများအတွက် အစိုးရက မည်သို့ထောက်ပံ့ပေးနိုင်မည်နည်း။

၂၀၁၅ နှစ်ကဖြစ်ပွားခဲ့သည့် ရေကြီးရေလျှံမှုကြောင့် လယ်ယာမြေများစွာပျက်စီးခဲ့ရပြီး ပြည်တွင်းထုတ်လုပ်မှုတန်ဖိုး မှ ၃၁ ဒသမ ၁ ရာခိုင်နှုန်း လျော့နည်းခဲ့ရသည်။

ယင်းကြောင့် ရေကြီးနှစ်မြုပ်မှုကြောင့် ပျက်စီးမှုကို ကာကွယ်နိုင်ရန်အတွက် World Bank (ကမ္ဘာ့ဘဏ်)၏ ချေးငွေဖြင့် အရေးပေါ်တုံ့ပြန်မှုစီမံကိန်း Immediate Response Mechanism (IRM) အစီအစဉ်ဖြင့် လေလုံအိတ်များဝယ်ယူထားရာ ရေကြီးနစ်မြုပ်မှုကို ခံစားရသည့် တိုင်းဒေသကြီးနှင့် ပြည်နယ်များရှိ ဒေသခံလယ်သမားများကို ပေးသွားမည်ဖြစ်ကြောင်း စိုက်ပျိုးရေးဦးစီးဌာနထံမှ သိရသည်။

ယင်းအစီအစဉ်အဖြစ် လေလုံအိတ်များကို ဖြန့်ဖြူးပေးနေခြင်းဖြစ်သည်။

သို့သော် ယခုနှစ်တွင်လည်း မွန်၊ ကရင်ပြည်နယ်နှင့် ပဲခူးတိုင်းဒေသကြီးတို့တွင် ရေကြီးမှုများဖြစ်ပေါ်သဖြင့် ယင်းဒေသရှိ လယ်သမားများလည်း လေလုံအိတ်များ ရရှိမည်ဖြစ်သည်။

ယင်းကြောင့် ရေကြီးမှုဒဏ်ခံရသည့် တိုင်းဒေသကြီးနှင့် ပြည်နယ်ခုနစ်ခုဖြစ်သော စစ်ကိုင်း၊ မကွေး၊ ဧရာဝတီ၊ ပဲခူး၊ ရန်ကုန်၊ ချင်းနှင့် ရခိုင်တို့ရှိဒေသခံလယ်သမားများသည် လေလုံအိတ်များရရှိ မည်ဖြစ်သည်။

လေလုံအိတ် တစ်တင်းခွဲဝင်အိတ် ၄၅,၄၇၅ လုံးနှင့် တစ်တန်အိတ် ၅၅၄၈ လုံး ထောက်ပံ့မည်ဖြစ်သည်။

အဆိုပါအိတ်များကို ဖိလစ်ပိုင်နိုင်ငံ Grain Pro Inc ကုမ္ပဏီမှထုတ်လုပ်သည်။ ယင်းအိတ်ထဲတွင် ရိတ်သိမ်းပြီးစပါးကို ထည့်ထားပါက အင်းဆက်ပိုးမွှားဒဏ်နှင့် ရာသီဥတုပြောင်းလဲမှုဒဏ်များကို  ၁၀ နှစ်အထိ ခံနိုင်ကြောင်း Grain Pro Inc ကုမ္ပဏီထံမှ သိရသည်။

ယင်းအိတ်များကိုအာဆီယံနိုင်ငံများမှာ တွင်တွင်ကျယ်ကျယ်အသုံးပြုလျက်ရှိကြောင်း Grain Pro Inc ကုမဏီထံမှ သိရသည်။

သို့ရာတွင် မြန်မာနိုင်ငံရှိ တောင်သူလယ်သမားတွင် အဆိုပါလေလုံအိတ်အကြောင်း သိသူလည်းရှိသလို။ မသိသူများလည်း ရှိသေးသည်။

လက်ရှိအချိန်က စပါးရိတ်သိမ်းနေချိန်ဖြစ်သည်။ ယင်းအတူ မျိုးစပါးချန်ချိန်လည်းဖြစ်သည်။

“လေလုံမိုးလုံ သေချာကျကျနနနဲ့ အင်းဆက်တွေ၊ စပါးပိုးတွေ မဝင်နိုင်တဲ့အိတ်မျိုးတွေ ထည့်ချင်တာပေါ့။ ဒါပေမဲ့ ဈေးနှုန်းကြီးပြီးတော့ သိုလှောင်စရိတ်က အများကြီးကြီးတယ်” ဟု ဦးသိန်းအောင် က ဆိုသည်။

လက်ရှိမျိုးစပါးထည့်ရန်အတွက် ပီနံအိတ် စပါးနှစ်တင်းဝင် တစ်အိတ်လျှင်၂၀၀ ကျပ်ဝန်းကျင်ရှိသည်။ စပါးတင်း ၁၀၀ ထည့်ရန်အတွက် ကျပ်တစ်သောင်းသာကျကြောင်း၊ သို့သော် လေလုံအိတ်သုံးစွဲပါက စပါးတင်း ၁၀၀ အတွက် လေလုံအိတ်တန်ဖိုးမှာ ကျပ်သိန်းချီရှိကာ ဈေးကွာခြားမှုများကြောင်း ၎င်းကတွက်ချက်ပြသည်။

နောက်နှစ်အတွက် လိုအပ်သည့် မျိုးစပါးကိုပျှမ်းမျှတစ်တင်းမှ သုံးတင်းထိ ထားကြောင်း၊ ကြွက်ဖောက်၍ ကြွက်စားခြင်းကြောင့် မျိုးစပါးနည်းနည်းပါးပါးပျက်စီးခြင်းများရှိကြောင်း ဧရာဝတီတိုင်းဒေသကြီး၊ ဓနုဖြူမြို့နယ် ဇီးဖြူကုန်းကျေးရွာမှ လယ်သမားကြီး ဦးသိန်းအောင် က ဆက်လက်ပြောကြားသည်။

“စပါး ၁၀၀ ထည့်ဖို့ သိုလှောင်စရိတ် က သိန်းကျော်တယ်။ စပါး ၁၀၀ အပေါ်မှာ အန်ကယ်တို့မြတ်တဲ့ အမြတ်ကကုန်ရော။ အဲဒီလိုဆိုတော့လည်း ရုတ်တရက် ဘယ်သုံးနိုင်မလဲ” ဟု ကိုကွန်းနှင့် ပတ်သက်၍ လယ်လုပ်သက် နှစ် ၅၀ ရှိသူ ဦးသိန်းအောင်က ဆိုသည်။

အဆိုပါလေလုံအိတ်က မျိုးစပါးများကို သိမ်းဆည်းထားနိုင်မည်ဖြစ်သည်။ ယင်းက လေလုံပိတ်သိုလှောင်မှုစနစ်ဖြစ်သည်။ ပြင်ပရာသီဥတု၏ အပူချိန်၊ စိုထိုင်းဆ စသည့်အခြေအနေများကို မထိတွေ့အောင် သီးသန့်ပြုလုပ်ထားသည့် ယင်းအိတ်ထဲတွင် မျိုးစေ့ (မျိုးစပါး) များကို သိုလှောင်နိုင်ကြောင်း ပိုင်အိုးနီးယား အဂရိုဗဇ်ကုမ္ပဏီမှ အုပ်ချုပ်မှုဒါရိုက်တာ ဒေါက်တာမျိုးအောင်ကျော်က ဆိုသည်။

“ဒီလိုအိတ်မျိုးတွေဟာ တန်ဖိုးအားဖြင့်လည်း သိပ်ပြီးမမြင့်မားကြပါဘူး။ အလွယ်တကူ ထည့်သွင်းသိုလှောင်ထားနိုင်ကြပါတယ်။ သက်တမ်းအားဖြင့်လည်း ၁၀ နှစ်က ၁၅ နှစ်ထိ ခံပါတယ်” ဟု ၎င်းကဆက်လက်ပြောကြားသည်။

ယင်းအိတ်ထဲတွင် ထည့်ထားပါက ပိုးမထိုး၊ မှိုရောဂါလည်းမဝင်၊ အစိုဓာတ်လည်းပြန်မစုပ်၊ အရည်အသွေးလည်း မပြောင်းလဲကြောင်း၊ နှစ်ရှည်သိုလှောင်နိုင်ကြောင်း ၎င်းကဆိုသည်။

မည်သို့ပင်ဆိုစေကာမူ ရာသီဥတုပြောင်းလဲမှုကြောင့် မြန်မာနိုင်ငံအတွင်း မိုးရွာသွန်းမှုပုံစံပြောင်းလဲလာပြီး မိုးရေချိန်ပြောင်းလဲခဲ့သည်။ ၂၀၁၅ ခုနှစ်က ရေကြီးရေလျှံမှုများဖြစ်ပေါ်မှုကြောင့် တိုင်းဒေသကြီးနှင့် ပြည်နယ်ခုနစ်ခုတွင် စိုက်ပျိုးရေးကဏ္ဍ ထိခိုက်မှုများရှိခဲ့သည်။

ယင်းအပြင် ယခုနှစ်အတွင်းက ရေကြီးမှုကြောင့် စိုက်ပျိုးဧက ခြောက်သိန်း ပျက်စီးဆုံးရှုံးခဲ့သည်။

ရာသီဥတုအပြောင်းအလဲကြောင့် အထွက်နှုန်းလျော့ကြောင်း၊ သီးနှံများ၏ အရည်အသွေးကျသည့်အပြင် ဈေးနှုန်းအတက်အကျများကြောင့် စိုက်ပျိုးရေးသမားများ အရှုံးပေါ်နေရကြောင်း ပဲခူးတိုင်းဒေသကြီး အနောက်ပိုင်း ပြည်မြို့နယ် မှော်ဇာကျေးရွာတွင် လယ်ယာနှင့် ဥယျာဉ်ခြံလုပ်ငန်းကို လုပ်ကိုင်သူ ဦးနေဦးက ညည်းတွားသည်။

“ကျွန်တော်က လေလုံအိတ်တော့ မကြားဖူးသေးဘူး။ ပလတ်စတစ်အိတ်နဲ့ စက္ကူအိတ်သုံးတာပဲ ရှိသေးတယ်” ဟု စိုက်ပျိုးရေးလုပ်သက် ၄၄ နှစ်ရှိသူ ဦးနေဦးက ဆိုသည်။

စိုက်ပျိုးရေးကဏ္ဍအတွက် ပြောင်းလဲလာသည့် နည်းပညာများအကြောင်း တောင်သူများ နားလည်သိရှိစေရန် ပညာပေးရမည်ဖြစ်သည်။

တောင်သူများ၏ အတွေးအခေါ် ပြောင်းလဲလာသည်အထိ လုပ်ဆောင်သွားရန်လိုအပ်ကြောင်း ဦးနေဦးက ထောက်ပြသည်။

လက်ရှိတွင် ပြောင်းလဲလာသည့် ရာသီဥတုနှင့် စိုက်ပျိုးရေးကဏ္ဍအကြောင်း တောင်သူလယ်သများထံ ပညာပေးလျက်ရှိသည်ဟု ပြောကြားလာသူက စိုက်ပျိုးရေး၊ မွေးမြုရေးနှင့် ဆည်မြောင်းဝန်ကြီး ဌာန၊ စိုက်ပျိုးရေးဦးစီးဌာနမှ ညွှန်ကြားရေးမှူး ဒေါက်တာရဲတင့်ထွန်း ဖြစ်သည်။

ယင်းတို့တွင် ရိတ်သိမ်းချိန်လွန် နည်းပညာများနှင့် လေလုံအိတ်များအကြောင်းပါဝင်ကြောင်း ၎င်းကဆိုသည်။

အဆိုပါ လေလုံအိတ်ကို လွန်ခဲ့သည့် ၁၅ နှစ်ခန့်က မိတ်ဆက်ထားပြီးဖြစ်သော်လည်း တွင်တွင်ကျယ်ကျယ် အသုံးပြုနိုင်သည့် အနေထားရောက်ရှိခြင်းမရှိကြောင်း ၎င်းကပြောဆိုသည်။

တောင်သူများက စိုက်ပျိုးချိန်မှ ရိတ်သိမ်းချိန်အထိ ကြိုးစားဆောင်ရွက်နေသော်လည်း ရိတ်သိမ်းပြီးနောက်ပိုင်းတွင် လိုအပ်သည့်အခြောက်ခံခြင်း၊ သိုလှောင်သိမ်းဆည်းရာတွင် လုပ်ငန်းရှင်နှင့် တောင်သူ၏ လုပ်ဆောင်မှုအားနည်းနေသည်ကို တွေ့ရှိရကြောင်း ဒေါက်တာရဲတင့်ထွန်းက ဆိုသည်။

ယင်းကြောင့် ရိတ်သိမ်းချိန်လွန် ကာလများတွင် ဆုံးရှုံးမှုတန်ဖိုးမှာ ၁၀ မှ ၂၅ ရာခိုင်နှုန်းအထိရှိသည်။ ခြောက် သွေ့အောင် လုပ်ချိန်တွင် အရေအတွက်အရ ၅ ရာခိုင်နှုန်းမှ ၈ ရာခိုင်နှုန်းမှာ သိုလှောင်မှုမမှန်ကန်ခြင်းနှင့် အခြောက်ခံမှုမမှန်ကန်ခြင်းတို့ကြောင့် ဆုံးရှုံးနေရခြင်း ဖြစ်သည်။ ယင်းအပြင် အရည်အသွေးပိုင်းတွင်လည်း ရာနှုန်းပြည့်ဆုံးရှုံးမှုများကြောင်း ၎င်းကဆိုသည်။

အဆိုပါဆိုးကျိုးများကို ကာကွယ်နိုင်ရန်အတွက် လေလုံအိတ်များကိုသုံးစွဲနိုင်ရန် စိုက်ပျိုးရေးဦးစီးဌာနက ဖြန့်ဝေပေးမည်ဖြစ်ကြောင်း ညွှန်ကြားရေးမှူးချုပ် ဒေါက်တာရဲတင့်ထွန်းက ဆိုသည်။

သို့ရာတွင် အစိုးရ၏ထောက်ပံ့မှုမရရှိသည့် လယ်သမားများ မည်သို့အခြေအနေရှိမည်နည်း။

မိုးလုံ၊ လေလုံနှင့် ပိုးမွှားဒဏ်ခံနိုင်သော ရာသီဥတုဒဏ်ခံနိုင်သော လေလုံအိတ်ကိုကွန်းများကို အစိုးရအနေနှင့် အကြွေးဖြင့် ရောင်းချပေးစေချင်ကြောင်း ဦးသိန်းအောင်က ဆိုသည်။

“အလကားလိုချင်တယ်ဆိုရင် လယ်သမားတွေက အလကားပဲ လိုချင်တယ်ဆိုတဲ့ ဥစ္စာဖြစ်မှာစိုးတယ်။ အစိုးရမှာလည်း ဘတ်ဂျက်ကနည်းတယ်ဆိုတော့ အန်ကယ်တို့က ဒီအိတ်တွေ အလကားရဖို့ မမျှော်လင့်ပါဘူး” ဟု ၎င်းက ဆိုသည်။ 

 

ဥမ္မာလွင်

You may also like...

Leave a Reply

Your email address will not be published. Required fields are marked *