နှုတ်ခမ်းကွဲ၊ အာခေါင်ကွဲလူနာများကို အခမဲ့ခွဲစိတ်ကုသပေးမည်

နှုတ်ခမ်းကွဲ၊ အာခေါင်ကွဲလူနာများကို တောင်ကြီးမြို့ ပြည်တော်သာရပ် ကြံ့ခိုင်ရေးလမ်းရှိ မြတ်တော်ဝင်ဆေးရုံ၌ နိုဝင်ဘာ ၃ ရက်နှင့် ၄ ရက်တို့တွင် အခမဲ့ ခွဲစိတ်ကုသပေးသွားမည်ဖြစ်ကြောင်း မြတ်တော်ဝင်ဆေးရုံမှ Business Development Director ဒေါက်တာ စဝ်လေင်ဝမ်းက ပြောကြားသည်။

အခမဲ့ခွဲစိတ်မှုကို မြတ်တော်ဝင်ဆေးရုံနှင့် အမေရိကန်အခြေစိုက် ကျန်းမာရေးအဖွဲ့အစည်းဖြစ်သော Smile Train  အဖွဲ့တို့က ပူးပေါင်းဆောင်ရွက်သွားမည်ဖြစ်ပြီး လူနာအရေအတွက် ကန့်သတ်မထားသောကြောင့် အနယ်နယ်အရပ်ရပ်မှ နှုတ်ခမ်းကွဲ၊ အာခေါင်ကွဲလူနာများ လာရောက်ခွဲစိတ်မှုခံယူနိုင်မည်ဖြစ်ကြောင်း ၎င်းက ပြောကြားသည်။

“နှုတ်ခမ်းကွဲဆိုရင် အသက်ခြောက်လကနေစပြီး ခွဲပေးသွားမယ်။ အာခေါင်ကွဲဆိုရင်တော့ အသက် တစ်နှစ်သုံးလကနေ စပြီးတော့ ခွဲပေးသွားမယ်။ အသက်အရွယ် ကန့်သတ်ချက်မရှိပါဘူး” ဟု ဒေါက်တာ စဝ်လေင်ဝမ်းက ပြောကြားသည်။

ခွဲစိတ်မှုကို ရန်ကုန်နှင့် မန္တလေးဆေးရုံကြီးများမှ ဆရာဝန်ကြီးများက ဆောင်ရွက်ပေးသွားမည်ဖြစ်ပြီး ယခုခွဲစိတ်မှုမှာ ခုနစ်ကြိမ်မြောက်ဖြစ်ကြောင်း ၎င်းကပြောကြားသည်။

လူနာများနှင့် မိသားစုများအတွက် နေထိုင်ရေးကို ဆေးရုံအနီးရှိ ဘုန်းတော်ကြီးကျောင်းတွင် စီစဉ်ပေးမည်ဖြစ်ပြီး နံနက်စာ သို့မဟုတ် နေ့လယ်စာတစ်နပ်ကို တာဝန်ယူသွားမည်ဖြစ်ကြောင်း ဒေါက်တာ စဝ်လေင်ဝမ်းက ပြောကြားသည်။

ခွဲစိတ်ကုသလိုသူများအနေနှင့် မြတ်တော်ဝင်ဆေးရုံ (တောင်ကြီး) ဖုန်း- ၀၈၁ ၂၀၅၂၅၉၊ ၀၈၁ ၂၀၅၁၃၉ သို့ အောက်တိုဘာ ၃၁ ရက်အထိ ဆက်သွယ်စာရင်းပေးသွင်းနိုင်မည်ဖြစ်သည်။ 

You may also like...

Leave a Reply

Your email address will not be published. Required fields are marked *