“Gay တို့ မိန်းမလျာ အဲဒီလိုမျိုးကာရိုက်တာတွေဆို မရိုက်ဖို့ဆုံးဖြတ်ထားတာပါ။ ဘာဖြစ်လို့လဲဆိုတော့ အရင်ကတည်းက အဲဒါတွေကို ဟာသအနေနဲ့လုပ်နေတာကို သဘောမကျဘူး။ ပြီးတော့ သူတို့ကို ကိုယ်ချင်းစာတယ်”

photo by Tyron Bejay FB

မနေ့ကဖြစ်သည်ဇာတ်လမ်းတွဲနဲ့ ပရိသတ်အားပေးမှုရလာတဲ့ သရုပ်ဆောင်တိုင်ရွန်ကို မကြာမီ ရုံတင်ပြသတော့မယ့် တစ်ခုလပ်ဇာတ်ကားရဲ့ ကာရိုက်တာအကြောင်း၊ ဇာတ်ရုပ်အတွက် ပြင်ဆင်မှုအပိုင်းတွေနဲ့ အနုပညာလှုပ်ရှားမှုအကြောင်းတွေကို မေးမြန်းထားတာဖြစ်ပါတယ်။

Voice       :       မနေ့က ဖြစ်သည်ဇာတ်လမ်းတွဲအပေါ် ပရိသတ်အားပေးမှုရတဲ့အပေါ် ခံစားချက်က ဘယ်လိုဖြစ်မိလဲ။

Tyron       :        ဒီဇာတ်လမ်းတွဲလေးက ပရိသတ်တွေကြားမှာ အတော်လေးပေါက်သွားတဲ့အတွက် ပျော်ပါတယ်။ပြီးတော့ နယ်က ပရိသတ်တွေလည်း တော်တော်လေးကို အားပေးကြတယ်။ ဒီဇာတ်ကားမှာပါဝင်တဲ့ ခန့်ထည် ကာရိုက်တာအတွက် တော်တော်လေးကို ကြိုးစားထားရတာပါ။ ပြီးတော့ ဒီကားမှာ မျက်လုံးနဲ့ သရုပ်ဆောင်ရတာတွေ များတယ်။ ဒိုင်ယာလော့ခ်နည်းတယ်။ စိတ်သွင်းထားတာက အဖေကြောင့် အမေ သေခဲ့တော့ ဝမ်းနည်းနေတဲ့ အဆွေးရိပ်အမြဲရှိတယ်။ အဲဒါကတော့ အမှတ်တရပါပဲ။

Voice       :       မကြာခင် ရုံတင်ပြသမယ့် တစ်ခုလပ်ဇာတ်ကားမှာ ကာရိုက်တာက ဘယ်လိုမျိုးလဲ။

Tyron       :        ရပ်ကွက်လူမိုက်ပုံစံနဲ့ သရုပ်ဆောင်ထားတာပါ။ အမေက တစ်ခုလပ် သားကို ရှာဖွေကျွေးမွေးတယ်။ ဒါပေမဲ့ အမေက ယောက်ျားတွေနဲ့ အရောတဝင် ရုန်းကန်လုပ်နေရတာကို လုံးဝမကျေနပ်ဘူး။ မကျေနပ်တော့ ကိုယ်တိုင်လည်း မလိမ္မာဘူး။ နောက်ဆုံးတော့မှ အမြင်မှန် ရသွားတာပေါ့။ အဲဒီလိုပုံစံမျိုးပေါ့။

Voice       :       ဒီဇာတ်ကားမှာ ဝါရင့်သရုပ်ဆောင်တွေပါတော့ ကိုယ်အတွက် ဘယ်လိုမျိုး အတွေ့အကြုံတွေရခဲ့လဲ။

Tyron       :        အတွေ့အကြုံတွေက အများကြီးရခဲ့ပါတယ်။ မလင်းဇာနည်ဇော်နဲ့ အခန်းတွေဆိုရင် ပရိသတ်ကြည့်ရင် မြင်ရမှာပါ။ အဲဒီအခန်းတွေ ရိုက်တုန်းကတည်း ပျော်စရာ တော်တော်ကောင်းခဲ့တယ်။

Voice       :       နောက်ထပ် ဘယ်လိုမျိုး  ဇာတ်ကားတွေ လက်ခံထားလဲ။

Tyron       :        ကြောက်ကြောက်ကြောက်  ဇာတ်ကားရိုက်ဖို့ ရှိတယ် ။ အဲဒီကားအတွက် တော်တော်လေး စိတ်လှုပ်ရှားနေတယ်။ဘာဖြစ်လို့လဲဆိုတော့ ပထမဦးဆုံးလုပ်ရမယ့် ဟာသဖြစ်နေတာကြောင့် အတော်လေး ရင်ခုန်နေတယ်။ ပြီးတော့ အဲဒီလိုမျိုး ဟာသဇာတ်ရုပ်နဲ့ အဆင်ပြေပါ့မလားဆိုပြီးတော့ စိတ်ပူနေမိတယ်။

Voice       :       ကာရိုက်တာအတွက် ပြင်ဆင်မှုအပိုင်း ဘာတွေလုပ်ပြီးပြီလဲ။

Tyron       :        အိုက်တင်အပိုင်းကို သေချာလေးလုပ်နေတယ်။ ဘာဖြစ်လို့လဲဆိုတော့ ဒါရိုက်တာကကိုယ်ပိုင်အိုက်တင်မျိုးနဲ့ ဟာသ ပုံစံမျိုးလိုချင်တာဆိုတော့လေ ပြီးတော့ ကိုထွန်းထွန်း၊ ကိုနေတိုးသူတို့ကလည်း သရုပ်ဆောင်အပိုင်းမှာ အများကြီးတော်တဲ့ လူတွေ အဲဒီလို လူမျိုးတွေနဲ့ တွဲဖက်သရုပ်ဆောင်ရမှာဆိုတော့ အကောင်းဆုံးပြင်ဆင်ပြီးတော့ လေ့လာနေပါတယ်။

Voice       :       အရင်နှစ်တွေထက် ဒီနှစ်က ဇာတ်ကားရိုက်ကူးမှုတွေ ပိုများလာတယ်နော်။

Tyron       :        ဟုတ်တယ်ဗျာ။ အဲဒါကတော့ ဆရာတွေနဲ့ ပရိုဂျူဆာတွေက ချစ်ကြလို့ ခေါ်ပြီးတော့ ရိုက်ကြတယ်။ ပြီးတော့ ကျွန်တော့်ကို ယုံယုံကြည်ကြည်နဲ့ခေါ်ပြီးတော့ ရိုက်ကြတဲ့အတွက် အခုနောက်ပိုင်း ဇာတ်ကားရိုက်ကူးမှုတွေများလာတယ်လို့ ထင်ပါတယ်။

Voice       :       လက်ရှိ ဘာဇာတ်ကားတွေ ရိုက်ကူးနေလဲ။

Tyron       :       သတိ အန္တရာယ်ရှိသည် ဆိုတဲ့ ဇာတ်ကားရိုက်ကူးနေတာပါ။အဲဒီ ဇာတ်ကို ကျွန်တော် တော်တော်လေးကြိုက်တယ်။ ဇာတ်ကို စပြောကတည်းက တိုင်ရွန် မင်း ဘယ်ဟာလုပ်ကြည့်ချင်လဲဆိုတော့ ကျွန်တော ဒီကာရိုက်တာမျိုး လုပ်ကြည့်ချင်တယ်။ ဗန့်က ဒီကားထဲမှာ အရမ်းအားကောင်းတယ်။ မင်းကို ပရိသတ်မုန်းမှာ မကြောက်ဘူးလားဆိုတော့ မကြောက်ဘူး။ အရမ်းလုပ်ချင်တဲ့ ကာရိုက်တာကို လုပ်ခွင့်ရတာနဲ့တင် ကျေနပ်ပါတယ်။

Voice       :       ကိုယ့် မရိုက်ချင်တဲ့  ကာရိုက်တာတွေဆို ဘာတွေဖြစ်မလဲ။

Tyron       :       Gay တို့ မိန်းမလျာတို့ အဲဒီလိုမျိုး ကာရိုက်တာတွေဆို မရိုက်ဖို့ ဆုံးဖြတ်ထားတာပါ။ ဘာဖြစ်လို့လဲဆိုတော့ အရင်ကတည်းက အဲဒါတွေကို ဟာသအနေနဲ့ လုပ်နေတာကို သဘောမကျဘူး။ ပြီးတော့သူတို့ကို ကိုယ်ချင်းစာတယ်။ အဲဒါကြောင့်ပါ။ ဒါပေမဲ့ ပညာပေးဇာတ်လမ်းတွေဆိုရင် ကြိုက်ပါတယ်။ အဲဒါတွေကို ဟာသအဖြစ် ရိုက်မယ့် ဇာတ်လမ်းမျိုးတွေဆို ကျွန်တော် ရိုက်မှာ မဟုတ်ဘူး။ကျွန်တော်တို့ ရုပ်ရှင်ဆိုတာ လူတွေကို လွှမ်းမိုးနိုင်စွမ်းရှိတယ်လေ။

Voice       :       ဟိန်းမင်းသူနဲ့ပတ်သက်ပြီး Cyber Bullying လုပ်တဲ့အပေါ် ခံစားချက်က ဘယ်လိုဖြစ်မိလဲ။

Tyron       :        စိတ်မကောင်းပါဘူး။ကျွန်တော်တို့က ထုံနေပြီ။ အဲဒီလိုပြောခံရတာ သူက သိပ်ပြီးတော့ မတည်ဆောက်နိုင်ဘူး။ နောက်တစ်ခါ အဲဒီလိုမဖြစ်ပါစေနဲ့လို့ ဆုတောင်းပါတယ်။ အနုပညာအလုပ်မှာ လျှောက်လှမ်းရင် ဒီထက်ပိုပြီး တွန်းလှန်ခံရမယ်။ အပြောခံရမယ်။ ထိုးနှက်ခံရမယ်။ ရှေ့ကစီနီယာတွေက အဲဒီထက်ပိုပြီးတော့ အပြောခံရတာတွေဆိုတော့ အဲဒီအရာတွေကို စိတ်ထဲမှာ မထားစေချင်ဘူး။ ဟာသလိုပဲ တွေးစေချင်တယ်။ ပြီးတော့ အခုနောက်ပိုင်းဆို ဖေ့စ်ဘွတ်ခ် သိပ်မသုံးဖြစ်တော့ဘူး။ ကျွန်တော်အကောင့်ကိုလည်း Admin တစ်ယောက်ထားပေးထားတယ်။ Page လည်းသူကိုင်ပေးထားတယ်။ ပုံတွေနဲ့  Reply တွေကိုတော့ ကျွန်တော် ပြန်ပေးဖြစ်ပါတယ်။

ဆုအိနြေ္ဒဦး

You may also like...

Leave a Reply

Your email address will not be published. Required fields are marked *