ကမ္ဘာ့ဘဏ်၏ စီးပွားရေးလုပ်ကိုင်ရလွယ်ကူမှုအဆင့် မြန်မာဘာကြောင့်မတက်သလဲ

ဓာတ်ပုံ - မိုးကျော်လွင်

၂ နှစ်ဆက်တိုက် အခြေအနေဆိုးမှ နာလန်မထူနိုင်သေးသည်မှာ မြန်မာနိုင်ငံ၏ စီးပွားရေးလုပ်ကိုင်ရလွယ်ကူမှုအဆင့် သတ်မှတ်ချက်ဖြစ်သည်။

၂၀၁၉ ခုနှစ်အတွက် ထုတ်ပြန်သော ကမ္ဘာ့ဘဏ်၏ စီးပွားရေးလုပ်ကိုင်ရလွယ်ကူမှု (Ease of Doing Business) ကမ္ဘာ့အဆင့်သတ်မှတ်ချက်တွင် မြန်မာနိုင်ငံသည် အဆင့် ၁၇၁ နေရာတွင် အတက်အကျမရှိဘဲ ရပ်တည်လျက်ရှိသည်။ အဆိုပါ Doing Business အစီရင်ခံစာသည် ကမ္ဘာ့နိုင်ငံပေါင်း ၁၉၀ ကို လေ့လာပြုစုထားခြင်း ဖြစ်သည်။

Doing Business တွင် ၂၀၁၈ ခုနှစ်က မြန်မာနိုင်ငံသည် အဆင့် ၁၇၁ နေရာတွင်ရှိခဲ့ပြီး ၂၀၁၉ ခုနှစ်တွင်လည်း ယင်းနေရာ၌ပင် တည်ရှိနေခြင်းဖြစ်သည်။

မြန်မာနိုင်ငံသည် အီရတ်နိုင်ငံနှင့် အဆင့်တန်းတူဖြစ်ပြီး အာဆီယံအဖွဲ့ဝင် နိုင်ငံများထဲတွင် အနိမ့်ဆုံးဖြစ်သည်။ အာဆီယံအဖွဲ့ဝင်နိုင်ငံများဖြစ်သည့် စင်ကာပူက အဆင့် ၂၊ မလေးရှားက ၁၅၊ ထိုင်းက ၂၇၊ ဘရူနိုင်းက ၅၅၊ ဗီယမ်နမ်က ၆၉၊ အင်ဒိုနီးရှားက ၇၃၊ ဖိလစ်ပိုင်က ၁၂၄၊ ကမ္ဘောဒီယားက ၁၃၈ နှင့် လာအိုက ၁၅၄ အဆင့်အသီသီး ရပ်တည်လျက်ရှိသည်။

မြန်မာနိုင်ငံအောက်တွင် န်ိုင်ငံ ၁၈ ခုသာရှိပြီး အရှေ့တီမော၊ ဘင်္ဂလားဒေ့ရ်ှနိုင်ငံတို့ တည်ရှိနေသည်။

၂၀၁၉ ခုနှစ်တွင် အဆင့်ထူးထူးခြားခြား မြင့်တက်ခဲ့သည့် နိုင်ငံမှာ အာဖဂန်နစ္စတန်နိုင်ငံဖြစ်ပြီး ယခင်က မြန်မာနိုင်ငံ အောက်အဆင့် ၁၈၃ နေရာတွင် တည်ရှိရာမှာ ယခုနှစ်တွင် ၁၆၇ နေရာတွင် ရှိသည်။ အဆင့် ၁၅ ဆင့် ခုန်တက်ခဲ့ခြင်းလည်း ဖြစ်သည်။

၂၀၂၀ ပြည့်နှစ်တွင် စီးပွားရေး လုပ်ကိုင်လွယ်ကူမှု အဆင့် ၁၀၀ အတွင်းဝင်ရန်၊ ၂၀၁၉ ခုနှစ်တွင် ၂၄ ဆင့် မြင့်တက်လာရန်ကြိုးပမ်းမည်ဖြစ်ကြောင်း ဒုတိယသမ္မတ (၁)ဦးမြင့်ဆွေက ရည်မှန်းထားသည်။

အဆင့်သတ်မှတ်ချက် မြင့်တက်လာရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီးဦးအောင်ထူး ဦးဆောင်သော စီးပွားရေးလုပ်ကိုင်ရလွယ်ကူမှု အဆင့်တိုးတက်ရေးလုပ်ငန်းအဖွဲ့ကို ဖွဲ့စည်းဆောင်ရွက်ခဲ့သည်။

သို့သော် ရလဒ်များ ထုတ်ပြန်ချိန်တွင် မြန်မာနိုင်ငံ၏အဆင့်သတ်မှတ်ချက်  မပြောင်းလဲသဖြင့် ကြိုးပမ်းမှုများမှာ အထမမြောက်သေး။

NLD နှင့် နှီးနွှယ်သူများကမူ အခြေအနေများဆိုးသွားခြင်း မဟုတ်ကြောင်း ဆိုကြသည်။ နိုင်ငံစီးပွားရေးအတက်အကျနှင့်ပတ်သက်၍လည်း စီးပွားရေးကျဆင်းခြင်း မဟုတ်ဘဲ တန့်နေခြင်းဖြစ်ကြောင်း ဤကဲ့သို့ပင် မှတ်ချက်များပြုလေ့ရှိခဲ့ကြသည်။

Doing Business တွင် အဆင့်အတက်အကျမရှိဘဲ အဆင့်တည်ငြိမ်နေခြင်းသည် အခြေအနေပိုဆိုးသွားခြင်း မဟုတ်ကြောင်း အမျိုးသားဒီမိုကရေစီအဖွဲ့ချုပ် (NLD) ဗဟိုစီးပွားရေး ကော်မတီအဖွဲ့ဝင် ဦးရဲမင်းဦးက ပြောကြားသည်။

“အခုကတော့ ပိုတော့ ဆိုးမသွားဘူး။ ပြောင်းလဲစရာတွေ ရှိသေးတယ်ဆိုတဲ့ သဘောပါ။ လိုအပ်တဲ့ Criteria (သတ်မှတ်ချက်)တွေ ဖြည့်ပေးနိုင်ရန်တော့ အဆင့်က တက်တက်သွားတာပေါ့” ဟု ၎င်းက ဆိုသည်။

စီးပွားရေးလုပ်ကိုင်ရလွယ်ကူမှု အဆင့်သတ်မှတ်ချက်ကို ရင်းနှီးမြှုပ်နှံမှုလုပ်ငန်းများ ဆောင်ရွက်ရာတွင် ဆက်စပ်ပတ်သက်သော နယ်ပယ် ၁၀ ခုအပေါ်တွင် တိုင်းတာအမှတ်ပေးခြင်း ဖြစ်သည်။

စီးပွားရေးလုပ်ငန်းစတင်ခြင်း၊ လုပ်ငန်းစာချုပ်အတိုင်း လိုက်နာဆောင်ရွက်ခြင်း၊ လျှပ်စစ်မီးရရှိမှု၊ တည်ဆောက်ရေးလုပ်ငန်းများ ခွင့်ပြုချက်ပေးခြင်း၊ ချေးငွေရရှိမှု၊ အနည်းစုရင်းနှီးမြှုပ်နှံမှုများကို အကာအကွယ်ပေးခြင်း၊ အခွန်စည်းကြပ်ခြင်း၊ နယ်စပ်ဖြတ်ကျော်ကုန်စည်ရောင်းဝယ်ခြင်း၊ ပိုင်ဆိုင်မှုမှတ်ပုံတင်ခြင်းနှင့် အကြွေးမဆပ်နိုင်ခြင်းကို ဖြေရှင်းနိုင်ခြင်းစသည့် နယ်ပယ်များဖြစ်သည်။

မြန်မာနိုင်ငံ၏ရမှတ်များကို ကြည့်လျှင် လုပ်ငန်းစတင်ခြင်းနယ်ပယ်သည် ရမှတ်အမြင့်ဆုံးဖြစ်ပြီး ချေးငွေရရှိခြင်းနယ်ပယ်သည် ရမှတ်အနည်းဆုံးဖြစ်သည်။  World Bank ၏အစီရင်ခံစာအရ ၂၀၁၉ ခုနှစ်တွင် မြန်မာနိုင်ငံတွင် လုပ်ငန်းစတင်ခြင်းနှင့် လျှပ်စစ်မီးရရှိခြင်းတို့ကို တိုးတက်မှုရှိကြောင်း မှတ်ချက်ပြုထားသည်။

လုပ်ငန်းစတင်ရာတွင် ကုန်ကျစရိတ်နှင့် မှတ်ပုံတင်ကြေးနှုန်းထားများလျှော့ချခြင်းတို့ဖြစ်ပြီး လျှပ်စစ်မီးရရှိမှုနယ်ပယ်တွင် လျှပ်စစ်မီတာခကို အွန်လိုင်းစနစ်ဖြင့် ပေးချေခြင်းနှင့် လျှပ်စစ်မီးပြတ်တောက်မှုကို စောင့်ကြည့်ထိန်းချုပ်ရာတွင် တိုးတက်မှုရှိကြောင်း ယင်းအစီရင်ခံစာအရ သိရသည်။

လက်တွေ့လုပ်ငန်းဆောင်ရွက်ရာတွင်လည်း ကြိုးနီစနစ်များလျှော့ချနေသည်ကို တွေ့ရပြီး လာမည့်နှစ်တွင် အဆင့်တက်လာဖွယ်ရှိသည်ဟု မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်ဒုတိယဥက္ကဋ္ဌ ဒေါက်တာမောင်မောင်လေးက မျှော်လင့်လျက်ရှိသည်။

အဆင့်သတ်မှတ်ရန် စစ်ဆေးသည့်အချိန်တွင် မြန်မာနိုင်ငံသည် မပြီးပြတ်သေးသည့် ဖြေလျှော့မှုများရှိသဖြင့် ယခင်ဒေတာအချက်အလက်များအပေါ် မူတည်အကဲဖြတ်သဖြင့် ရလဒ်မတိုးတက်ခြင်း ဖြစ်နိုင်ကြောင်း ၎င်းက ယူဆသည်။

“ဒီနှစ်က ထူးခြားမှုဖြစ်လာမှာ မဟုတ်ဘူး။ နောင်နှစ်မှာ ထူးခြားမှုဖြစ်လာမယ်လို့ ထင်တယ်။ သူတို့ စစ်တဲ့အချိန်မှာ မပြီးသေးတာတွေ ရှိတော့လေ”ဟု ၎င်းက မျှော်မှန်းသည်။

စီးပွားရေးလုပ်ကိုင်ရ လွယ်ကူမှု အဆင့်တက်ရန်၊ မြေပြင်လက်တွေ့လုပ်ငန်းများချောမွေ့ရန် ၂၀၁၈ ခုနှစ်မှ စတင်၍ ကမ္ဘာ့ဘဏ်မှ ကျွမ်းကျင်ပညာရှင်များနှင့် ပူးပေါင်းဆောင်ရွက်နေကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနလက်ထောက်အမြဲတမ်းအတွင်းဝန် ဦးခင်မောင်လွင်က ပြောကြားသည်။

ကမ္ဘာ့ဘဏ်သည် စီးပွားရေးလုပ်ကိုင်ရလွယ်ကူမှု သတ်မှတ်ချက်အစီရင်ခံစာကို ၂၀၀၃ ခုနှစ်မှစတင်၍ နှစ်စဉ်ထုတ်ပြန်ခဲ့သော်လည်း မြန်မာနိုင်ငံနှင့် ပတ်သက်သည့် အဆင့်သတ်မှတ်ချက်ကို သမ္မတဟောင်းဦးသိန်းစိန်အစိုးရလက်ထက် ၂၀၁၄ ခုနှစ်တွင် စတင်ဖော်ပြခဲ့သည်။ ထိုအချိန်က မြန်မာနိုင်ငံသည် အဆင့် ၁၈၂ ဖြစ်သည်။ အဆင့်တက်ရန် အကူအညီပေးမည့်အဖွဲ့လည်း မရှိခဲ့ပေ။

ယခုနှစ်မှသာ ကမ္ဘာ့ဘဏ်မှ Doing Business Mission အဖွဲ့က စတင်အကူအညီပေးကာ Doing Business တွင် အဆင့်တက်ရေး အဆိုပါ အဖွဲ့နှင့် နှစ်ပတ်တစ်ကြိမ်ဆွေးနွေးလျက်ရှိသည်ဟု စီးပွားရေးနှင့်ကူးသန်းရောင်းဝယ်ရေးဝန်ကြီးဌာနလက်ထောက်အမြဲတမ်းအတွင်းဝန် ဦးခင်မောင်လွင်က ဆိုသည်။

“ဒီလိုကူညီတဲ့အတွက် ဒီအဆင့်သတ်မှတ်မှုနဲ့ ပတ်သက်တဲ့ ဆန်းစစ်ချက်တွေ၊ ပါဝင်တဲ့အချက်တွေကို တော်တော်များများ သိလာတယ်။ လုပ်ရမယ့်လုပ်ငန်းစဉ်တွေကို ဆက်တိုက်လုပ်သွားမှာ ဖြစ်ပါတယ်” ဟု ၎င်းက ပြောကြားသည်။

မြန်မာနိုင်ငံကဲ့သို့ပင် အခြားနိုင်ငံများကလည်း Doing Business အဆင့်တက်ရေး ဆောင်ရွက်နေသဖြင့် ယှဉ်ပြိုင်ရသည့်သဘောလည်း ရှိသည်။

ဤသို့ဆိုလျှင် ယင်းအဆင့်သတ်မှတ်ချက်မြင့်ရန် အဘယ့်ကြောင့် လိုအပ်သနည်း။

အဓိကမှာနိုင်ငံတကာရင်းနှီးမြှုပ်နှံမှု လုပ်ငန်းများကို ဆွဲဆောင်ရန်ဖြစ်သည်။ အဆင့်သတ်မှတ်ချက်မြင့်လျှင် ရင်းနှီးမြှုပ်နှံရန် ယုံကြည်မှုရှိသည်။ ဥပမာအားဖြင့် စစ်အုပ်ချုပ်ရေးကာလတွင် မြန်မာ့အချက်အလက်များမှာ ကမ္ဘာ့ဘဏ်နှင့်  ADB ကဲ့သို့ အဖွဲ့အစည်းများတွင် မရှိ၊ ထို့ကြောင့် အဆိုပါအဖွဲ့များက အကဲမဖြတ်နိုင်။ အနောက်နိုင်ငံများ၏ ပြည်ပရင်းနှီးမြှုပ်နှံမှုမှာလည်း မဝင်ရောက်ပေ။

တစ်နည်းအားဖြင့် ရင်းနှီးမြှုပ်နှံမှုများ ဆွဲဆောင်သည့် အညွှန်းကိန်းတစ်ခုဟု ဆိုနိုင်ကြောင်း လုပ်ငန်းရှင်များက ဆိုသည်။

သို့သော် Doing Business  တွင် အဆင့်နိမ့်သည်ကို သဘောကျသော ပြည်တွင်းလုပ်ငန်းရှင်များလည်း ရှိကြောင်း ဒေါက်တာမောင်မောင်းလေးက ဆိုသည်။ ဤအချက်သည် ထူးခြားချက်ဖြစ်သည်။

စီပွားရေးလုပ်ကိုင်ရလွယ်ကူမှု အဆင့်နိမ့်လျှင် နိုင်ငံခြားလုပ်ငန်းများကို မဆွဲဆောင်နိုင်ပေ။ နိုင်ငံခြားလုပ်ငန်းများ မဝင်လာလျှင် ပြည်တွင်း၌ အောင်မြင်နေသော လုပ်ငန်းများသည် ပြိုင်ဘက်မရှိဘဲ လုပ်ငန်းလုပ်ကိုင်နိုင်သည်။ ဆိုရလျှင် ပြည်တွင်းလုပ်ငန်းရှင်အချို့က ဈေးကွက်ကို လက်ဝါးကြီးအုပ်ချင်သောကြောင့် ဖြစ်သည်။

သို့သော်လည်း တိုင်းပြည်ဖွံ့ဖြိုးတိုးတက်ရန်မူ ပြည်ပရင်းနှီးမြှုပ်နှံမှုများ စီးဝင်ရန်လိုကြောင်း ဒေါက်တာမောင်မောင်လေးက ဆိုသည်။

မည်သို့ဆိုစေ အဆိုပါ အဆင့်သတ်မှတ်ချက်များသည် စာရွက်ပေါ်တွင်သာ တည်ရှိနေခြင်း မဟုတ်ပေ။ လက်တွေ့လုပ်ငန်း ဆောင်ရွက်ရာတွင် လွယ်ကူချောမွေ့ရန် ရည်ရွယ်သည်။

ထို့ကြောင့် ယင်း အဆင့်သတ်မှတ်ချက်သည် စီးပွားရေးကဏ္ဍတိုးတက်ရန် အရေးပါသည့်အချက်တစ်ချက် ဖြစ်သည်။

၂၀၁၉ ခုနှစ်တွင်မူ မြန်မာနိုင်ငံသည် ကမ္ဘာတွင် နိမ့်ပါးသည့်အဆင့် သတ်မှတ်ချက်ဖြင့် စခန်းသွားရဦးမည်ဖြစ်သော်လည်း ယခင်နှစ် အောက်အဆင့် မကျခြင်းကြောင့် ဆုတ်ယုတ်သည့် လက္ခဏာမဟုတ်ကြောင်း ဦးရဲမင်းဦးက ယခုကဲ့သို့ဆိုသည်။

“Ranking ငြိမ်နေတဲ့သဘောက ဆုတ်ယုတ်မှုတော့ မရှိဘူး။ ပိုဆိုးလာတယ်လို့ ပြောနေတာ မဟုတ်ဘူး။ ဒါကို မြင်ရတာပေါ့။ ဒါပေမဲ့ ကျွန်တော်တို့က ဒီထက်ပိုကောင်းအောင်တော့ လုပ်သင့်တာပေါ့”

နိုင်လင်းအောင်

You may also like...

Leave a Reply

Your email address will not be published. Required fields are marked *