မျှခြေရောက် မော်တော်ယာဉ်မူဝါဒ

ဓာတ်ပုံ - မြင့်မိုးညို

ယခင်နှစ်က ပွဲအတော်ဆူခဲ့သည်။ အားလုံးကလည်း မျှော်လင့်ခဲ့ကြသည်။ ယခုအခါ ထိုသို့ မဟုတ်ကြတော့ပေ။

ပြီးခဲ့သည့် အောက်တိုဘာလ ၂၆ရက်က ၂၀၁၉ ခုနှစ်အတွက် မော်တော်ယာဉ် တင်သွင်းခွင့်မူဝါဒများ ထွက်ရှိလာသည်။ အဆိုပါမူဝါဒသည် ယခင်နှစ်လောက် ပွဲမဆူသော်လည်း ပြည်တွင်းလုပ်ငန်းရှင်များအတွက်မူ အရေးကြီးသည့်မူဝါဒပင် ဖြစ်သည်။

ယခု ထွက်ရှိလာသည့်မော်တော်ယာဉ် တင်သွင်းခွင့်မူဝါဒသည် မြန်မာနိုင်ငံ၏ ရှေ့ဆက်သွားမည့် စီးပွားရေးလမ်းကြောင်းပုံစံကို တစ်ပိုင်းတစ်စလှစ်ဟလျက်  ရှိသည်။

မြန်မာနိုင်ငံကဲ့သို့ ဆင်းရဲသည့်နိုင်ငံသည် ရောက်ရှိနှစ်နှင့် နှစ်အနည်းငယ်သာခြားသည့် မော်တော်ယာဉ်များကို တင်သွင်းရန် အဆိုပါမူဝါဒတွင် ဖော်ပြထားသည်။ ယင်းသို့ တင်သွင်းရမည့် မော်တော်ယာဉ်များတွင် စီးတီးဘတ်စ်များလည်း ပါဝင်လျက်ရှိသည်။ ထို့ကြောင့်ပင် ရန်ကုန်မြို့တွင်းခရီးသည်ပို့ဆောင်ရေး ကုမ္ပဏီများ၏ အခြေအနေမှာ မည်သို့ ဖြစ်ပေါ်လာနိုင်သနည်း။

နောက်တစ်ချက်မှာ သွင်းကုန်လျှော့ချရေးလမ်းကြောင်းကို ၂၀၁၉ မော်တော်ယာဉ်တင်သွင်းခွင့်မူဝါဒက ဆက်လက်ကိုင်စွဲထားခြင်းကြောင့် ပြည်တွင်း SKD  ဈေးကွက်မှာ အခြေအနေမှာ တက်ရိပ်ပြလျက်ရှိနေပြန်သည်။ သို့သော်လည်း ပြီးခဲ့သည့်နှစ်က အထိနာခဲ့သည့် တစ်ပတ်ရစ်ကားဈေးကွက်မှာလည်း အသစ်ထွက်ရှိလာသည့် ၂၀၁၉ မော်တော်ယာဉ်တင်သွင်းခွင့်မူဝါဒအရ ဆိုပါက ဆက်လက်အသက်ရှူကျပ်ဦးမည်လော။

စီးတီးဘတ်စ်များ အသစ်သွင်းရန်အခက်အခဲ၊ SKD ဦးဆောင်သည့် ပြည်တွင်းဈေးကွက်နှင့် အသက်ရှူကျပ်တစ်ပတ်ရစ် ဂျပန်ဈေးကွက်တို့မှာ အသစ်ထွက်ရှိလာသော မူဝါဒက ဆက်လက် ဦးတည်လျက်ရှိသော လမ်းကြောင်းများလည်း ဖြစ်သည်။

ဆက်လက်စွဲကိုင်ခဲ့သော မူဝါဒများ

၂၀၁၉ ခုနှစ်အတွက် မော်တော်ယာဉ်တင်သွင်းခွင့်မူဝါဒ ထွက်ရှိလာရာတွင် ယမန်နှစ်က ထွက်ရှိခဲ့သောမူဝါဒအပေါ်အခြေခံထားကြောင်း မော်တော်ယာဉ်လုပ်ငန်းရှင်အသိုင်းအဝိုင်းက ဆိုသည်။

ပြီးခဲ့သည့်နှစ်က ၂၀၁၈ ခုနှစ် အတွက် မော်တော်ယာဉ်တင်သွင်းခွင့်မူဝါဒ ထွက်ရှိရာတွင် အပြောင်းအလဲများစွာ ဖြစ်ပေါ်ခဲ့သည်။ အဓိကအချက်မှာ အသစ်သွင်းမည့် မော်တော်ယာဉ်များနှင့် တစ်ပတ်ရစ်မော်တော်ယာဉ်များ တင်သွင်းရာတွင် ဘယ်မောင်းများကိုသာ တင်သွင်းခွင့်ပြုလိုက်ခြင်းဖြစ်သည်။ ယခုနှစ်တွင်လည်း ဘယ်မောင်းများကိုသာ တင်သွင်းခွင့်ပြုမည်ဖြစ်သည်။

ဘယ်မောင်းများ တင်သွင်းရခြင်း၏ အဓိကအချက်မှာ Road Safety ဖြစ် သည်။ ယာဉ်အန္တရာယ်ကင်းရှင်းရေးဖြစ်သည်။ ဘယ်မောင်းများသည် နိုင်ငံတကာစံသတ်မှတ်ချက်အရ ညာမောင်းများထက် အန္တရာယ်ပိုကင်းစေသည်။

နောက်တစ်ချက်မှာ သွင်းကုန်လျှော့ချရေးအတွက် မော်ဒယ်လ်နှစ်သတ်မှတ်ချက်ကို မြှင့်ထားခဲ့ခြင်းဖြစ်သည်။ ထို့ကြောင့်ပင် ပြီးခဲ့သည့် ၂၀၁၈ ခုနှစ်အတွင်း မော်တော်ယာဉ်တင်သွင်းမှုမှာ လျော့ကျခဲ့သည်။ ယခုနှစ်တွင်လည်း လူစီးမော်တော်ယာဉ်များကို ယာဉ်အိုယာဉ်ဟောင်းလဲလှယ်ခြင်းစနစ်ဖြင့် တင်သွင်းမည်ဆိုပါက အနည်းဆုံး ၂၀၁၆ ခုနှစ်ထုတ်၊ လူပုဂ္ဂိုလ်တစ်ဦးချင်းစနစ်ဖြင့် တင်သွင်းရမည်ဆိုပါက အနည်းဆုံး ၂၀၁၇ ခုနှစ် ထုတ်ဖြစ်ရန် လိုအပ်သည်။

ကုန်တင်ယာဉ်နှင့် ခရီးသည်တင်ယာဉ်များကိုမူ ယာဉ်အိုယာဉ်မောင်းစနစ်ဖြင့် တင်သွင်းသည် ဖြစ်စေ၊ လူပုဂ္ဂိုလ်တစ်ဦးချင်းစနစ်ဖြင့် တင်သွင်းသည့် ဖြစ်စေ အနည်းဆုံး ၂၀၁၅ ခုနှစ်ထုတ် ဖြစ်ရန် လိုအပ်သည်။

အထက်ပါတင်သွင်းရမည့် အချက်များကို ကြည့်လျှင် ရောက်ရှိ ခုနှစ်နှင့် ကွာဟချက်သိပ်မရှိသည့် မော်တော်ယာဉ်များကို တင်သွင်းရန်မူဝါဒက သတ်မှတ်ထားခြင်း ဖြစ်သည်။

ယင်းသည် မော်တော်ယာဉ်တင်သွင်းမှုလျော့ကျရေး တစ်နည်းအားဖြင့် သွင်းကုန်လျော့ကျရေးကို ရည်ရွယ်ခြင်းပင် ဖြစ်သည်။ မော်တော်ယာဉ်တင်သွင်းမှုလျော့ကျလျှင် စက်သုံးဆီတင်သွင်းမှုလည်း လျော့ကျမည်။ ထိုနောက်တွင် ဒေါ်လာဈေးကဲ့သို့ မြင့်တက်ခြင်းကို ထိန်းညှိရန်လည်း တစ်မျိုးတစ်ဖုံအကျိုးသက်ရောက်နိုင်မည် ဖြစ်သည်။

“အမှန်ကတော့ သွင်းကုန်မူဝါဒအရ လျှော့ချတဲ့ သဘောမျိုးပဲ။ သွင်းကုန်များရင်တော့ ဒေါ်လာဈေးက အပေါ်ရောက်မှာပဲလေ။ ဒေါ်လာဈေးက ဆက်ကောင်းနေမှာပဲ” ဟု မြန်မာ့ မော်တော်ယာဉ်ရောင်းဝယ်ရေးလုပ်ငန်းရှင်များအသင်းဥက္ကဋ္ဌ ဦးအောင်သန်းဝင်းက ဆိုသည်။

သွင်းကုန်လျှော့ချရေးသည် မြန်မာ့စီးပွားရေးနှင့်လည်း ဆက်စပ်လျက်ရှိပြီး ရန်ကုန်တွင် ယာဉ်ကြောကျပ်တည်းမှုကို လျှော့ချနိုင်ရန်လည်း ရည်ရွယ်ခဲ့ခြင်း ဖြစ်သည်။

SKD က ဦးဆောင်မည်

စက်မှုဝန်ကြီးဌာန၏ မူဝါဒအရဆိုပါက ပြည်တွင်း၌တစ်စိတ်တစ်ပိုင်းတပ်ဆင်ထုတ်လုပ်သည့်စနစ် (SKD-Semi Knocked Down) မှ ယာဉ်တစ်စီးလုံးအစအဆုံးထုတ်လုပ်သည့်စနစ် (CKD- Completely Knocked Down) စနစ်အထိ သွားရန်ရည်ရွယ်ထားခြင်း  ဖြစ်သည်။

ပြည်ပမှမော်တော်ယာဉ်များ တင်သွင်းခြင်းကိုသာ အားပေးပါက ပြည်တွင်းထုတ်လုပ်မှု လျော့ကျသွားမည်ဟု ရှုမြင်ထားကြသည်။ ထို့ကြောင့်ပင် ပြည်ပမှ မော်တော်ယာဉ်တင်သွင်းမှုအပေါ် Model Year များကို မြှင့်တင်ထားခြင်းဖြစ်သည်။ Model Year မြှင်တင်ထားခြင်းကြောင့် သွင်းကုန်တန်ဖိုးမှာ ပိုမိုဈေးကြီးလာသည်။ ယင်းအပေါ် အခွန်ကောက်ခံသည်။

လက်ရှိတွင် ပြည်တွင်းဈေးကွက်၌  SKD ကားများကပင် ဦးဆောင်လျက် ရှိသည်။ ပြီးခဲ့သည့် ၂၀၁၇ ခုနှစ်က ‘၂၀၁၈ ခုနှစ်အတွက် မော်တော်ယာဉ်တင်သွင်းခွင့် မူဝါဒ’ ထွက်ရှိလာပြီးနောက်ပိုင်းမှ SKD ယာဉ်များမှာ ဈေးကွက်အတွင်းတစ်စတစ်စနေရာယူလာခြင်း ဖြစ်သည်။

သို့သော်လည်း SKD ယာဉ်များသည်သတ်မှတ်ထားသည့်အတိုင်း ပြည်တွင်း၌ တစ်စိတ်တစ်ပိုင်း ထုတ်လုပ်ခြင်း ဟုတ်၊ မဟုတ် အငြင်းပွားမှုများလည်း ရှိနေပြန်သည်။

“အခု လူတစ်ဦးကောင်းစားရေးလုပ်နေတဲ့ SKD၊ CKD ။ အခု ရောင်းနေ ကြတာတွေက မြန်မာပြည်မှာ တကယ် တပ်လား။ ဆင်လား။ မဆင်ဘူး။ ကားပေါ်က တိုက်ရိုက်ချပြီး တိုက်ရိုက်ရောင်းတာ။ ဒီမှာ တပ်ဆင်တဲ့ စက်ရုံရှိတယ်ဆိုပြီး လုပ်နေ ကြတာ”ဟု မြန်မာ့မော်တော်ယာဉ်ရောင်းဝယ်ရေးလုပ်ငန်းရှင်များအသင်းဥက္ကဋ္ဌ ဦးအောင်သန်းဝင်းက ဆိုသည်။

ထိုသို့ SKD စနစ်ဖြင့် တပ်ဆင်သည်ဆိုကာ ရောင်းချခြင်းဖြင့် အခွန်သက်သာခြင်း၊ ရန်ကုန်လိုင်စင်ရရှိခြင်း စသည့် အကျိုးကျေးဇူးများရရှိကြောင်းလည်း ၎င်းက ထောက်ပြသည်။

မည်သို့ပင်ဆိုစေ SKD ယာဉ်များသည် ဘဏ်များဖြင့် ချိတ်ဆက်၍ အရစ်ကျစနစ်ဖြင့် ဝယ်ယူနိုင်ခြင်း၊ ယာဉ်သစ်များဖြစ်ခြင်းနှင့်အတူ ကြော်ငြာအားကောင်းခြင်းတို့ကြောင့်လည်း သုံးစွဲသူများ ကြိုက်နှစ်သက်ကာ ဈေးကွက်တွင် နေရာရလာခြင်း ဖြစ်ကြောင်း ပြည်တွင်းမော်တော်ယာဉ်ဈေးကွက်အတွင်းမှ စုံစမ်းသိရှိရသည်။

“ပြည်တွင်းထုတ်ကိုပဲ ဦးစားပေးဖို့အတွက် ရည်မှန်းချက်က များတယ်”ဟု မြန်မာနိုင်ငံ မော်တော်ယာဉ်တင်သွင်းထုတ်လုပ်ရောင်းချသူများ အသင်း ဒုတိယဥက္ကဋ္ဌဦးရန်မျိုးအောင်က လက်ရှိမူဝါဒအပေါ် မှတ်ချက်ပြုသည်။

လက်ရှိတွင် ပြည်တွင်း၌ ဆူဇူကီး၊  KIA နှင့် Ford အစရှိသော ကုမ္ပဏီတို့ ကလည်း SKD စနစ်ဖြင့် မော်တော်ယာဉ်များ တပ်ဆင်ထုတ်လုပ်လျက်ရှိသည်။

စီးတီးဘတ်စ်များ တင်သွင်းကြရာဝယ်

ယခုထုတ်ပြန်လိုက်သည့် မူဝါဒအရ ခရီးသည်တင်ယာဉ်ခေါ်ခရီးသည်တင်ယာဉ်၊ စီးတီးဘတ်စ်များ တင်သွင်းမှုသည်လည်း အခက်အခဲများဖြစ်ပေါ်လာနိုင်ကြောင်း ပြည်တွင်းမော်တော်ယာဉ်လုပ်ငန်းရှင်များက ဆိုသည်။

အသစ်ထွက်မူဝါဒအရ ခရီးသည်တင်ယာဉ်များကို ယာဉ်အိုယာဉ်မောင်းစနစ်ဖြင့် တင်သွင်းသည် ဖြစ်စေ၊ လူပုဂ္ဂိုလ်တစ်ဦးချင်းစနစ်ဖြင့် တင်သွင်းသည်ဖြစ်စေ အနည်းဆုံး ၂၀၁၅ ခုနှစ်ထုတ် ဖြစ်ရန်လိုအပ်သည်။

မြို့တွင်းခရီးသည် ပို့ဆောင်ရေးတွင် ခရီးသည်တင်ယာဉ် အရေအတွက်မှာ အစီးရေ ၆၃၀၀ ကျော်ရှိပြီး ယင်းတို့အနက်၂၀၀၀ ခန့်သည် အသစ်သွင်းထားခြင်းဖြစ်ကာ ၅၀၀ ခန့်သည် မီနီဘတ်စ်များ ဖြစ်သည်။

ကျန်ရှိသည့် အစီးရေ ၃၈၀၀ကျော်သည် စီးတီးဘတ်စ်များဖြစ်ကြပြီး အများစုမှာ ကိုရီးယားနိုင်ငံထုတ် ဟွန်ဒိုင်းယာဉ်များ ဖြစ်ကြသည်။ အဆိုပါယာဉ်များမှာ ယာဉ်ဟောင်းများသာ ဖြစ်ကြသည်။

လက်ရှိတွင် မြို့တွင်း၌ ပြေးဆွဲနေသည့် ၂၀၀၇၊ ၂၀၀၈၊ ၂၀၀၉ ခုနှစ်ထုတ် စီးတီးဘတ်စ်များမှာ အရင်းသိန်း ၃၀၀ ဝန်းကျင်သာ ကျသင့်လျက်ရှိသည်။ အသစ်ထွက်မူဝါဒအရ တင်သွင်းရမည့် ၂၀၁၅ ခုနှစ်ထုတ် စီးတီးဘတ်စ်များ ဆိုပါက ကျပ်သိန်း ၈၀၀ မှ ကျပ်သိန်း ၁၀၀၀ အထိ ကျသင့်မည်ဖြစ်ကြောင်း Power Eleven ကုမ္ပဏီအုပ်ချုပ်မှုဒါရိုက်တာဦးသက်တင်ဝင်းက ဆိုသည်။

လက်ရှိပြေးဆွဲနေသာ ယာဉ်ဟောင်းများသက်တမ်းကုန်ဆုံး၍ အသစ်တင်သွင်းရမည်ဆိုပါက ယင်းကဲ့သို့ ဈေးနှုန်းများအလွန်မြင့်မားလျက်ရှိသောကြောင့် လုပ်ငန်းရှင်များ အခက်တွေ့မည်ဖြစ်ကြောင်း ယခင်ခေတ်သစ်ငြိမ်းချမ်းရေး  အများပိုင်ကုမ္ပဏီလီမိတက်ဥက္ကဋ္ဌ ဦးမောင်စံက ဆိုသည်။

“ကုမ္ပဏီတွေ အများစုတော့ သွင်းနိုင်ကြမှာ မဟုတ်ဘူးဗျ။ ကျွန်တော်တို့ ကုမ္ပဏီလည်း မသွင်းနိုင်ဘူး။ ရန်ကုန်မြို့ရဲ့ယာဉ်စီးခနှုန်းထားနဲ့ ဒီကားတွေသွင်းရမှာနဲ့က မကိုက်ဘူး ဖြစ်နေတယ်”ဟု ၎င်းက ဆိုသည်။

Power Eleven ကုမ္ပဏီအုပ်ချုပ်မှုဒါရိုက်တာ ဦးသက်တင်ဝင်းကမူ လက်ရှိထုတ်ပြန်လိုက်သော မော်တော်ယာဉ်မူဝါဒအရ တစ်ဦးချင်းမော်တော်ယာဉ်ပိုင်ဆိုင်သူများကမူ စီးတီးဘတ်စ်များ  တင်သွင်းရန်များစွာ အခက်တွေ့နိုင်သည့်အခြေအနေဟု ရှင်းပြသည်။ ထို့ကြောင့် တစ်ဦးချင်းယာဉ်ပိုင်ရှင်များသည် အများပိုင်ကုမ္ပဏီအဖြစ် တည်ထောင်ကြရန်လည်း ၎င်းက တိုက်တွန်းသည်။

ဘဏ်များထံမှ ငွေချေးရာတွင်လည်း လုပ်ငန်းလိုင်စင်၊ ဝင်ငွေရလမ်း ဖော်ပြချက်၊ အခွန်ဆောင်ထားကြောင်း သက်သေခံချက် စသည့်အချက်အလက်များမှာပြည့်စုံမှသာ ငွေချေးနိုင်ခြင်းဖြစ်သောကြောင့် တစ်ဦးချင်းယာဉ်ပိုင်ရှင်များအတွက်မူ ရပ်တည်ရန်ခက်ခဲလာမည်ဟု ၎င်းက ဆိုသည်။

“သာမန်လုပ်ငန်းရှင်ဆိုရင်တော့ ဒီလုပ်ငန်းတွေကို ဝင်ရောက်လုပ်ကိုင်ဖို့ မလွယ်တော့ဘူး။ တစ်ယောက်ချင်းဆိုရင်တော့ ရုန်းကန်ရမှာပဲ။ အစုအဖွဲ့ဆိုရင်တော့ ရပ်တည်ကောင်း ရပ်တည်နိုင်မှာပါ”ဟု ဦးသက်တင်ဝင်းက ရှင်းပြသည်။

လက်ရှိမူဝါဒအရဆိုပါက စီးတီးဘတ်စ်များကို တင်သွင်းနိုင်သည် ကုမ္ပဏီ များမှာ လက်ချိုးရေနိုင်ပြီး ယင်းကုမ္ပဏီများအနက် ငွေကြေးအင်အားတောင့်တင်းသော ဦးဇော်ဇော်၏ လူထုမိတ်ဆွေ၊ ရန်ကုန်တိုင်းဒေသကြီးအစိုးရအဖွဲ့က အစုရှယ်ယာထည့်ထားသော YBPC ကုမ္ပဏီတို့ကသာ ဦးဆောင်လျက်ရှိကြောင်း ပြည်တွင်းခရီးသည်တင်ယာဉ်ပြေးဆွဲသည့် ကုမ္ပဏီများထံမှ စုံစမ်းသိရှိရသည်။

ဓာတ်ပုံ – မြင့်မိုးညို

အသက်ရှူကျပ် အဟောင်းဈေးကွက်

၂၀၁၈ ခုနှစ် မော်တော်ယာဉ်မူဝါဒနှင့် အောက်တိုဘာလ ၂၆ ရက်က ထုတ်ပြန်ခဲ့သော ၂၀၁၉ ခုနှစ်အတွက် မော်တော်ယာဉ်တင်သွင်းခွင့်မူဝါဒများတွင် မူဝါဒများ၏ အကျိုးသက်ရောက်မှု အခံရဆုံး၊ အနစ်နာဆုံးသူများမှာ တစ်ပတ်ရစ်ကားဈေးကွက် ဖြစ်သည်။

ယခင်ကမူ ပြည်တွင်းတစ်ပတ်ရစ်ယာဉ်ဈေးကွက်ကို ဂျပန်ညာမောင်းယာဉ်များက ကြီးစိုးထားခြင်း ဖြစ်သည်။ ၂၀၁၈ ခုနှစ် မော်တော်ယာဉ်မူဝါဒ ထွက်ရှိလာပြီးချိန်မှာစ၍ တစ်ပတ်ရစ်ယာဉ်ဟောင်း ဈေးကွက်မှာ ကျဆင်းစပြုလာခဲ့သည်။ ထို့ကြောင့် တစ်ပတ်ရစ်ယာဉ်ဟောင်း အရောင်းအဝယ်သမားများမှာ များစွာ ထိခိုက်နစ်နာခဲ့ရသည်။ ၂၀၁၉ မော်တော်ယာဉ်တင်သွင်းခွင့်မူဝါဒတွင်လည်း ၂၀၁၈ ခုနှစ်က မူဝါဒအပေါ်အခြေခံ၍ ဆက်လက် စွဲကိုင်ချမှတ်ခဲ့ခြင်းဖြစ်ရာ တစ်ပတ်ရစ်ယာဉ်ဟောင်း အရောင်းအဝယ်သမားများမှာ ယခုနှစ်အတွက်လည်း အခြေအနေမကောင်းလှပေ။

“ကျွန်တော်တို့ အရောင်းအဝယ်သမားတွေမှာ မှီခိုနေတဲ့ မိသားစုတွေ ရှိသေးတယ်။ မူဝါဒက ကျွန်တော်တို့လို လူတွေကို ထည့်မစဉ်းစားဘူး”ဟု မြန်မာ့မော်တော်ယာဉ်ရောင်းဝယ်ရေး လုပ်ငန်းရှင်များအသင်းဥက္ကဋ္ဌ ဦးအောင်သန်းဝင်းက ဆိုသည်။

တစ်ပတ်ရစ်ယာဉ်ဈေးကွက်အတွက် နောက်ထပ်ထိုးနှက်ချက်တစ်ခုမှာ ဈေးကွက်အကြိုက် ပြောင်းလဲခဲ့ခြင်းဖြစ်သည်။ ဈေးကွက်က ပြည်တွင်း၌ SKD  စနစ်ဖြင့် ထုတ်လုပ်သော မော်တော်ယာဉ်အသစ်များကို စိတ်ဝင်စားလာပြီဖြစ်သည်။ ကီလိုသုညမှ စတင်သုံးစွဲနိုင်ခြင်း၊ အာမခံရရှိနိုင်ခြင်းနှင့် အရစ်ကျစနစ်ဖြင့် ဝယ်ယူနိုင်ခြင်းတို့သည်လည်း SKD များ၏ အားသာချက်များ ဖြစ်လာသည်။

ဦးအောင်သန်းဝင်းကမူ အစိုးရသည် ဘယ်မောင်း၊ ညာမောင်း မခွဲခြားဘဲ တင်သွင်းခွင့် ပေးသင့်သည်ဟု ဆိုသည်။ အကြောင်းမှာ ဂျပန်တစ်ပတ်ရစ်ယာဉ် အများစုမှာ ညာမောင်းများ ဖြစ်သောကြောင့် အစိုးရက ဘယ်မောင်းတစ်မျိုးတည်းသာ တင်သွင်းခွင့်ပြုချိန်တွင် ၎င်းတို့ တစ်ပတ်ရစ်ယာဉ်ဈေးကွက်မှာ ပျက်လုနီးပါးဖြစ်ခဲ့ရသောကြောင့် ဖြစ်သည်။

“ဦးသိန်းစိန်လက်ထက်တုန်းက သူတို့ လုပ်တာကိုင်တာ မှားတယ် ထားဦး။ ပြည်သူတွေ ဒုက္ခမရောက်ဘူး။ အခုက တိုင်းပြည်လည်း နာတယ်။ ပြည်သူလည်း ဒုက္ခရောက်တယ်”ဟု မော်တော်ယာဉ်မူဝါဒကြောင့် ဖြစ်ပေါ်လာသည့် မကျေနပ်မှုကို ဦးအောင်သန်းဝင်းက ဖွင့်ဟသည်။

မူဝါဒအကျိုးဆက်

အသစ်ထွက်ရှိလာသော မူဝါဒသည် ယေဘုယျအားဖြင့် ခြုံကြည့်လျှင် အကောင်း၊ အဆိုးနှစ်မျိုးနှစ်စား ယှဉ်တွဲထွက်ရှိလာခြင်းဖြစ်ကြောင်း ပြည်တွင်းမော်တော်ယာဉ် ဈေးကွက်အတွင်းမှ သိရှိရသည်။

မူဝါဒတစ်ခု ထွက်ရှိလာပါက မူဝါဒ၏ အကျိုးခံစားရသည့် အသာရသူနှင့် မူဝါဒ၏ ဆိုးကျိုးကို ခံစားရသည့် နစ်နာသူများမှာ ရှိစမြဲဖြစ်ရာ ယခုမူဝါဒကြောင့်လည်း အသာရသူ၊ နာသူများ ရှိလာတော့မည် ဖြစ်သည်။

သို့သော်လည်း ရန်ကုန်မြို့တွင်းခရီးသည်ပို့ဆောင်ရေးလုပ်ငန်းကဲ့သို့ ပြည်သူ့ဝန်ဆောင်မှုလုပ်ငန်းများအတွက်မူ ရေရှည်အဆင်ပြေစေရန် အစိုးရက မည်သို့ ထောက်ကူနိုင်မည်နည်းဟု မေးခွန်းများလည်း ရှိသည်။

အကြောင်းမှာ မြို့တွင်းခရီးသည်ပို့ဆောင်ရေးလုပ်ငန်းများတွင် အစိုးရရှယ်ယာများ ပါဝင်ထားသည့် YBPC နှင့် YUPT ကုမ္ပဏီမှစ၍ အခြားသော မြို့တွင်းခရီးသည် ပို့ဆောင်ရေးကုမ္ပဏီအားလုံးနီးပါး အရှုံးပေါ်နေခြင်းကြောင့် ဖြစ်သည်။

အဆိုပါကွက်လပ်ကို ဖြည့်ဆည်းပေးရန် Power Eleven ကုမ္ပဏီအုပ်ချုပ်မှုဒါရိုက်တာ ဦးသက်တင်ဝင်းက ယခုလိုဆိုသည်။

“အစိုးရဆီကပဲ ဖြစ်ဖြစ်၊ ဘဏ်တွေဆီကပဲ ဖြစ်ဖြစ် Supporting ရမှပဲ လုပ်ငန်းလည်ပတ်နိုင်မယ့် အခြေအနေတစ်ခု ဖြစ်နေပါပြီ။ စောင့်တော့ စောင့်ကြည့်ရမှာပဲ”

ရဲနိုင်ဦး

You may also like...

Leave a Reply

Your email address will not be published. Required fields are marked *