ပြည်တွင်းရေးသည် ပြည်ပရေး

မြန်မာ့ပြည်တွင်းရေးကို ဖြေရှင်းလိုလျှင် ‘ပြည်တွင်းရေးသည် ပြည်တွင်းရေးသာ’ ဟူသော မြန်မာတို့၏ စိတ်ထား Mindset ကို ပြောင်းပြီး ပြည်ပရေးကို ဂရုစိုက်ရလိမ့်မည်။

မြန်မာနိုင်ငံခေတ်အဆက်ဆက်တွင် ပြည်ပရေးထက် ပြည်တွင်းရေးသာ အရေးကြီးလေ့ရှိသည်။ ပြည်ပရေးကို စိတ်ရှုပ်မခံ၊ ပြည်ပစွက်ဖက်မှုကို မကြိုက်၊ ကိုယ့်သဘောနှင့်မညီက မဆက်ဆံရုံသာ။ လိုအပ်လျှင် ပြည်ပနှင့် မဆက်ဆံရအောင် တံခါးပိတ်ခဲ့သည့်အခါများစွာ။ ရလဒ်က တစ်ကမ္ဘာလုံးနောက်တွင် ပြတ်ကျန်ခဲ့ခြင်း။ ယခုအထိလည်း ရုပ်ပိုင်းဆိုင်ရာကော၊ အတွေးအမြင်ပိုင်းဆိုင်ရာကော အမီပြန်လိုက်ရန်ခက်ခဲနေဆဲ။ အများထက်နောက်ကျသည့်အခါ အားနည်းသည့်အခါ အနိုင်ကျင့်ခံရရန် အခွင့်အလမ်းပိုများသည်။

လူထုက ရွေးချယ်သောအစိုးရဖြင့် ဒီမိုကရေစီအပြောင်းအလဲကို ဦးဆောင်စက အာဆီယံဒေသတစ်ခုလုံး၏ ခေါင်းဆောင်တမျှ သွေးနားထင်ရောက်စရာဖြစ်ခဲ့သည်။ မျှော်လင့်စရာဖြစ်ခဲ့သည်။ တကယ်တော့ မငြိမ်းချမ်းနိုင်သေးသော ငြိမ်းချမ်းရေးနှင့် ရုန်းမထနိုင်သေးသော စီးပွားရေး၊ လူမှုရေးတို့တွင် ရခိုင်အရေး ထပ်ဆင့်သောအခါ ယခုအချိန်တွင် အာဆီယံကို ဦးဆောင်နိုင်ရန် ဝေးစွ၊ အိမ်တွင်းမသာယာ သွေးကွဲမှု ခိုက်ရန်ဖြစ်ပွားမှုကို လက်ကိုင်တုတ်လုပ်ကာ ရပ်ကွက်အတွင်း သင်းခွဲအပုပ်ချခံရသည့် အိမ်ထောင်စုလိုဖြစ်လာသည်။

ပြည်ပနှင့်ဆက်ဆံရေးဆိုသည်မှာ တစ်ရပ်ကွက်တွင်းနေသူများနှင့် သဏ္ဌာန်တူသည်။ ဆိုးသူရှိသလို၊ ကောင်းသူရှိသည်။ အားကိုးရသူရှိသလို အနိုင်ကျင့်သူရှိသည်။ မကောင်းသူများရှိသည့်အတွက် ရပ်ကွက်တွင်းတွင် စိတ်တံခါးပိတ်၊ ရုပ်တံခါးပိတ်ပြီးနေစရာမူ အကြောင်းမရှိ။ ကိုယ်ညံ့လျှင် ကိုယ်ခံရမည့် ရှောင်မလွတ်သော ပတ်ဝန်းကျင်ဖြစ်ရာ သတိမလွတ်စေဘဲ ရဲရဲရင်ဆိုင်ရန်သာရှိသည်။ ထိုသို့ရင်ဆိုင်ရာတွင်မူ ရပ်ကွက်အကြောင်းသိရန်လိုသည်၊ ရပ်ကွက်က လက်ခံသူများကို သုံးရန်လိုသည်။

‘ကိုယ်ကောင်းလျှင် ခေါင်းဘယ်မရွေ့ဆိုသော်ငြား’ တစ်ရပ်ကွက်လုံးနှင့် တစ်ယောက်ဆိုလျှင် ကိုယ့်အိမ်ကိုယ်တံခါးပိတ်နေရုံဖြင့် ဘ၀က သာယာလုံခြုံ နေမည်မဟုတ်။ ‘အပြင်လူမဝင်ရ အတွင်းလူ မထွက်ရ’ ဆိုသောအခြေအနေသည် မြန်မာတို့သွားလိုသည့် တိုးတက်ရေးလမ်းကြောင်းနှင့် ဝေးကွာလှသည်။ ကြိုက်သည်ဖြစ်စေ မကြိုက်သည်ဖြစ်စေ အိမ်နီးချင်း တစ်ရပ်ကွက်ထဲသားများဖြင့် ရောနှောနေထိုင်နိုင်ရမည်ဖြစ်သလို မိမိပြဿနာ သူ့ပြဿနာ အတူတကွ ဖြေရှင်းန်ိုင်ရမည့် သဘောတရားကို နားလည်ရပေမည်။

တစ်ကမ္ဘာလုံး တိုးလျှိုပေါက်နေသည့် လူမှုမီဒီယာခေတ်တွင် ပြည်တွင်းရေးသည် ပြည်ပရေးဖြစ်သည်၊ ပြည်ပရေးသည် ပြည်တွင်းရေးဖြစ်သည်။ 

အယ်ဒီတာ
၈.၁၁.၂၀၁၈

You may also like...

Leave a Reply

Your email address will not be published. Required fields are marked *