တောင်းပန်ခံလိုသည့် ဝန်ကြီးချုပ်၏ ရှင်းလင်းချက်

စိတ်ကြိုက်ရွေးပြီး ခေါ်ထားသည့် သတင်းမီဒီယာလေးခုမှတစ်ဆင့် ရန်ကုန်တိုင်းဝန်ကြီးချုပ်က ဖြေရှင်းချက်ပေးလိုက်သည်။

Weekly Eleven ဂျာနယ် အယ်ဒီတာချုပ်အပါအဝင် သုံးဦးကို တရားစွဲထားမှုနှင့်ပတ်သက်၍ သတင်းစာရှင်းလင်းမည်ဟုပြောဆိုပြီး ၁၁ ရက်အကြာတွင် ပြုလုပ်သည့် ရှင်းလင်းပွဲလည်း ဖြစ်သည်။

အစိုးရ၏ မီဒီယာဖြစ်သည့် MRTV အပါအဝင် အစိုးရကို ဝေဖန်ထောက်ပြမှုနည်းပါးသည့် မီဒီယာအချို့ကို ရွေးဖိတ်ကာ ရှင်းလင်းခြင်းလည်း ဖြစ်သည်။

ယင်းရှင်းလင်းပွဲတွင် တိတိကျကျပေးလိုသည့် ရန်ကုန်ဝန်ကြီးချုပ် ဦးဖြိုးမင်းသိန်း၏ သတင်းစကားမှာ တောင်းပန်မှ အမှုပြီးစီးမည်ဆိုသည့် ပြောဆိုချက်ဖြစ်သည်။ သတင်းမီဒီယာကောင်စီမှတစ်ဆင့်ညှိနှိုင်းမည် စကားဆိုထားသော်လည်း ရန်ကုန်တိုင်းအစိုးရ၏ ရလိုမှုမှာ Weekly Eleven ဂျာနယ်ထံမှ တောင်းပန်မှုဖြစ်သည်။

ယင်းသို့ ပြောဆိုပြီးတစ်ရက်အကြာ နိုဝင်ဘာလ ၉ ရက်နေ့က အဆိုပါအမှုရုံးထုတ်တွင် တိုင်းအစိုးရက အမှုရုပ်သိမ်းလိုက်သည်။

သိုသိုသိပ်သိပ် ပြုလုပ်ခဲ့သည့် ရန်ကုန်တိုင်းဝန်ကြီးချုပ်၏ ရှင်းလင်းပွဲနှင့်ပတ်သက်၍ ဝေဖန်မှုများလည်း ရှိနေသည်။

“ရန်ကုန်တိုင်းအစိုးရအဖွဲ့ရဲ့ သဘောထားဆိုရင် ရှင်းချင်မှ ရှင်းမှာ။ အပေါ်က သူ့အထက်ကနေ Pressure (ဖိအား) ကြောင့် ရှင်းတယ်ထင်တယ်” ဟု ရန်ကုန်တိုင်းလွှတ်တော်ကိုယ်စားလှယ် ဦးကျော်ဇေယျ က မှတ်ချက်ပေးသည်။

ငွေစာရင်းရှင်းတမ်း

၁၅ မိနစ်ခန့် ကြာမြင့်သည့် ရှင်းလင်းပြောဆိုချက်တွင် ငွေစာရင်းရှင်းတမ်းကို ၁၂ မိနစ်ကျော်အထိ ရန်ကုန်တိုင်းဝန်ကြီးချုပ်က ရှင်းလင်းသည်။

၂၀၁၆ – ၂၀၁၇ ဘဏ္ဍာနှစ်တွင် ဖြည့်စွက်ဘတ်ဂျက်အဖြစ် ၁၃၄ ဘီလီယံရင်းနှီးမြှုပ်နှံရန် သုံးစွဲခွင့်ရခဲ့ပြီး ယင်းဘတ်ဂျက်ကို သယ်ယူပို့ဆောင်ရေးနှင့် အိမ်ရာစီမံကိန်းကဏ္ဍနှစ်ခုတွင် ရင်းနှီးမြှုပ်နှံရန် လွှတ်တော်က အတည်ပြုပေးကြောင်း ဦးဖြိုးမင်းသိန်းက ပြောဆိုသည်။

သယ်ယူပို့ဆောင်ရေးနှင့်ပတ်သက်၍ ကုမ္ပဏီနှစ်ခုတွင် ကျပ် ၃၅ ဘီလီယံစီဖြင့် ၇၀ ဘီလီယံ ရင်းနှီးမြှုပ်နှံထားကြောင်း၊ ဆောက်လုပ်ရေးနယ်ပယ်အတွက် Yangon  Metropolitan Development ကုမ္ပဏီတွင် ကျပ် ၅၄ ဘီလီယံနှင့် ရန်ကုန်မြို့သစ် ဖွံ့ဖြိုးရေးကုမ္ပဏီတွင် ၁၀ ဘီလီယံ ရင်းနှီးမြှုပ်နှံကြောင်း ၎င်းကဆိုသည်။

ရင်းနှီးမြှုပ်နှံထားသည့် ဘတ်ဂျက်မှာ ကြွေးမြီအဖြစ်သုံးစွဲရန် ခွင့်ပြုထားခြင်းဖြစ်သဖြင့် ငွေလုံးငွေရင်း အသုံးစရိတ်ကဲ့သို့ သုံးစွဲ၍မရကြောင်း ၎င်းက ဆက်လက်ပြောဆိုသည်။

“ငွေလုံးငွေရင်း အသုံးစရိတ်ဆိုတာ ကားဝယ်လိုက်တယ်။ တံတားဆောက်လိုက်တယ်။ ပြီးရင်း စစ်ဆေးတယ်ဆိုရင် ပြီးပြီ။ ဒီကြွေးမြီခေါင်းစဉ်ဟာ ပျောက်သွားလို့ မရပါဘူး။ အစိုးရစာရင်းမှာ အမြဲတမ်း ကြွေးမြီအဖြစ်နဲ့ ရှိနေမှာပါ”

သယ်ယူပို့ဆောင်ရေးအတွက် ရင်းနှီးမြှုပ်နှံထားသည့် ကျပ် ၇၀ ဘီလီယံမှာ ကြွေးမြီအဖြစ်ရရှိထားခြင်းဖြစ်သဖြင့် အစိုးရက ကိုယ်တိုင် ကားဝယ်ယူ၍မရဘဲ ရင်းနှီးမြှုပ်နှံရခြင်းသာဖြစ်ကြောင်း ၎င်းက ဆိုသည်။

ထို့ကြောင့် YBS ပြုပြင်ပြောင်းလဲရေးအတွက် ရန်ကုန်မြို့ပြအများနှင့် သက်ဆိုင်သည့် သယ်ယူပို့ဆောင်ရေး ကုမ္ပဏီ (YUPT) နှင့် ရန်ကုန်ဘတ်စ်ကားအများပိုင်ကုမ္ပဏီ (YBPC) ကုမ္ပဏီနှစ်ခု တွင် ကျပ် ၇၀ ဘီလီယံ ရင်းနှီးမြှုပ်နှံကြောင်း ဦးဖြိုးမင်းသိန်းက ရှင်းလင်းသည်။

ကားဝယ်ယူမှုများကို ယင်းကုမ္ပဏီများက လုပ်ဆောင်ခြင်းဖြစ်ပြီး တိုင်းအစိုးရအနေနှင့် ကားဝယ်ရာတွင် ဈေးနှုန်းသက်သာရေး၊ အရည်အသွေး ကောင်းမွန်ရေးတို့အတွက် တရုတ်ဗဟိုအစိုးရနှင့် အစိုးရချင်းညှိနှိုင်းကာ ဆောင်ရွက်ပေးခဲ့ကြောင်း ၎င်းကရှင်းပြသည်။

ကားဝယ်ရာတွင်မူ Business  to Business ဖြစ်သည့် ကုမ္ပဏီအချင်းချင်း ဆောင်ရွက်ခြင်းဖြစ်ပြီး တိုင်းအစိုးရကိုယ်တိုင် ဝယ်ယူခြင်းမဟုတ်ဟုလည်း ငြင်းချက်ထုတ်သည်။

တိုင်းလွှတ်တော်ကိုယ်စားလှယ် ဒေါ်စန္ဒာမင်းကမူ Business to Business  ကို လုပ်ဆောင်နိုင်သော်လည်း တိုင်းအစိုးရအနေနှင့် အစိုးရချင်းညှိနှိုင်းဆောင်ရွက်သည့် G to G ကို လုပ်ဆောင်၍မရကြောင်း၊ G to G မှာ ပြည်ထောင်စုအစိုးရကသာ လုပ်ပိုင်ခွင့်ရှိကြောင်း ထောက်ပြသည်။

ကုမ္ပဏီများမှာ အများပိုင်ကုမ္ပဏီဖြစ်သောကြောင့် ပုဂ္ဂလိကလုပ်ငန်းများ၊ ပြည်သူများ၏ အစုရှယ်ယာများပါဝင်သဖြင့် တိုင်းအစိုးရ ၁၀၀ ရာခိုင်နှုန်း ပိုင်ဆိုင်ခြင်းမဟုတ်ကြောင်း ဝန်ကြီးချုပ်ကဆိုသည်။

အစိုးရကိုယ်တိုင် စီးပွားရေးလုပ်နိုင်သော်လည်း ပွင့်လင်းမြင်သာမှု ရှိရန်လိုအပ်ပြီး ယင်းသို့ ပွင့်လင်းမြင်သာမှု မရှိသဖြင့် ပြဿနာများ ပေါ်ပေါက်လာခြင်းဖြစ်ကြောင်း ရန်ကုန်တိုင်းလွှတ်တော်ကိုယ်စားလှယ် ဦးကျော်ဇေယျက မှတ်ချက်ပေးသည်။

“အစကတည်းက ပွင့်လင်းမှုမရှိတဲ့အခါကျတော့ အခုကျမှ အသစ်အဆန်းစကားလုံးတွေ ကြားရတာပေါ့။ ဥပမာဗျာ- Business to Business ၊ B to B ဆိုတဲ့ စကားလုံးတွေ အခုမှကြားလာရတာ။ အစကတည်းက ပွင့်လင်းမှုရှိတယ်။ ရိုးသားမှုရှိတယ်ဆိုရင် အစကတည်းက ချပြထားရင် ဘာမှပြဿနာတက်စရာ မရှိပါဘူး၊

တရားစွဲရခြင်း

Eleven ဂျာနယ်ကို တရားစွဲခြင်းမှာ ဝန်ကြီးဦးမြင့်သောင်းနှင့်ပတ်သက်သည့် အချက်ဖြစ်သည်။

ရန်ကုန်တိုင်းအစိုးရအဖွဲ့က မြို့သစ်စီမံကိန်းအတွက် တည်ထောင်သည့် Yangon Metropolitan Development  အများပိုင်ကုမ္ပဏီ၏ အစုရှယ်ယာတွင် တိုင်းစီမံကိန်းနှင့် ဘဏ္ဍာရေးဝန်ကြီး ဦးမြင့်သောင်းအမည်ပေါက်ဖြင့် အစုရှယ်ယာဝင်ထားသည်ဟု ရေးသားချက်ကြောင့်ဖြစ်သည်။

အစုရှယ်ယာများကို ဘဏ္ဍာရေးဝန်ကြီးဆိုသည့် ရာထူးအောက်တွင် ရှယ်ယာများကို မထားဘဲ ဦးမြင့်သောင်းအောက်တွင် ထားခြင်းမှာ လုပ်ထုံးလုပ်နည်းအရ လွဲမှားနေကြောင်း Weekly Eleven  ဂျာနယ်က ရေးသားခဲ့ခြင်းဖြစ်သည်။

ယခင်နှစ် ၅၀ ကလည်း ပြည်သူ့ဘဏ္ဍာငွေကို လူအမည်ပေါက်ဖြင့် ရယူခဲ့ဖူးပြီး လက်ရှိအစိုးရတွင်လည်း ပြည်သူ့ဘဏ္ဍာကို လူအမည်ပေါက်ဖြင့် ရယူနေသည့် ကောက်ချက်ဖော်ပြမှုအပေါ် တရားစွဲဆိုခြင်းဖြစ်ကြောင်း ဦးဖြိုးမင်းသိန်းက ပြောဆိုသည်။

အိမ်ရာဖွံ့ဖြိုးတိုးတက်ရေးတွင် ရင်းနှီးမြှုပ်နှံသည့် ကုမ္ပဏီမှာ ဆောက်လုပ်ရေးလုပ်ငန်းရှင်များအသင်းက ထည်ထောင်ထားသည့် ကုမ္ပဏီနှင့် ပူးပေါင်းကာ အများပိုင်ကုမ္ပဏီတည်ထောင်ခြင်းဖြစ်ပြီး ယင်းကုမ္ပဏီတွင် ၅၄ ဘီလီယံ ရင်းနှီးမြှုပ်နှံထားကြောင်း ၎င်းကဆိုသည်။

ယင်းကျပ် ၅၄ ဘီလီယံ ရင်းနှီးမြှုပ်နှံရာတွင် ပါဝင်ခွင့်ရသူမှာလည်း တိုင်းအစိုးရကိုကိုယ်စားပြုကာ ပါဝင်ရခြင်းဖြစ်ကြောင်း ဝန်ကြီးချုပ်က ဖြေရှင်းချက်ပေးသည်။

တိုင်းဝန်ကြီးသည် ပြည်ထောင်စုဝန်ကြီးဌာန သုံးခု၊ လေးခုခန့်ကို တစ်ဦးတည်း တာဝန်ယူကိုင်တွယ်ရခြင်းဖြစ်ပြီး တိုင်းစီမံကိန်းနှင့် ဘဏ္ဍာရေးဝန်ကြီးသည် စီးပွားရေးနှင့်သက်ဆိုင်သည့် ဝန်ကြီးဌာနအားလုံးကို ပူးပေါင်းကိုင်တွယ်ရသဖြင့် ဝန်ကြီးဌာနတစ်ခုတည်း အမည်ဖြင့်ဆောင်ရွက်၍မရကြောင်း ၎င်းကဆိုသည်။

ထို့ကြောင့် စီးပွားရေးဝန်ကြီးဌာနအားလုံးကို ကိုယ်စားပြုကာ ဝန်ကြီး ဦးမြင့်သောင်းက တာဝန်ယူဆောင်ရွက်ပေးခြင်းဖြစ်ကြောင်း ဦးဖြိုးမင်းသိန်းက ရှင်းပြသည်။

“တိုင်းဒေသကြီးမှာရှိတာက တိုင်းအစိုးရကို ကိုယ်စားပြုတဲ့ ဘတ်ဂျက်ငွေပဲ ဖြစ်ရမှာ ဖြစ်ပါတယ်။ ဒါကြောင့် တိုင်းကိုယ်စားပြုမယ့် ပုဂ္ဂိုလ်အဖြစ်နဲ့ ရပ်တည်ရမှာဖြစ်ပါတယ်။ ဒီဥစ္စာကို လူပုဂ္ဂိုလ်နာမည်ဖြစ်သွားတယ်ဆိုတဲ့ အခြေအနေနဲ့ ပတ်သက်ပြီး စွပ်စွဲခဲ့မှုကတော့ လုံးဝမှားယွင်းနေ ပါတယ်။”

လူပုဂ္ဂိုလ်အမည်ဖြင့် ဖြစ်သွားပြီဟု စာရင်းစစ်ချုပ်အစီရင်ခံစာတွင်လည်း ဖော်ပြထားခြင်းမရှိကြောင်း၊ စာရင်းစစ်ချုပ်ကို မေးမြန်းရာတွင်လည်း ပြည်သူ့ဘဏ္ဍာငွေကို လူပုဂ္ဂိုလ်အမည်ဖြင့်ဆောင်ရွက်ထားသည်ဆိုသည့် သုံးသပ်ချက် လုံးဝင်မပါဝင်ဟု အကြောင်းပြန်ကြောင်း ဝန်ကြီးချုပ်က ဆိုသည်။

Eleven ဂျာနယ်ရေးသားချက်သည် တိုင်းစာရင်းစစ်ချုပ် အစီရင်ခံစာအပေါ် လွှတ်တော်ကိုယ်စားလှယ်များ ဆွေးနွေးမှုကို အခြေခံကာ ရေးသားခြင်းဖြစ်ပြီး စာရင်းစစ်ချုပ်ကလည်း တိုင်းအစိုးရ၏ ပြောဆိုမှုကို ရေးသားထားခြင်းသာဖြစ်ကြောင်း ဒေါ်စန္ဒာမင်းက ပြောဆိုသည်။

မီဒီယာများကို ရှောင်သလော

လုပ်ထုံးလုပ်နည်းအတိုင်းဆောင်ရွက်ရန် သမ္မတ၏ညွှန်ကြားချက်ကြောင့် ဝန်ကြီးချုပ်ကိုယ်တိုင် ရှင်းလင်းရခြင်းဖြစ်ကြောင်း ရှုမြင်သူများရှိသည်။

သတင်းမီဒီယာကောင်စီကို ဦးစွာတိုင်တန်းကာ ညှိနှိုင်းဖြေရှင်းပြီး ကျေနပ်မှုမရှိမှသာလျှင် တရားရုံးတွင် တရားဥပဒေနှင့်အညီ လုပ်ဆောင်ရန် ညွှန်ကြားထားချက်ကြောင့်ဖြစ်သည်။

“သတင်းစာရှင်းလင်းပွဲလို့ မမြင်ဘူးဗျ။ သူက လူကြီးတစ်ယောက်အနေနဲ့ ရှက်ရမ်းရမ်းတယ်လို့ မြင်တယ်။ ဘာလို့လဲဆိုတော့ သူလုပ်တာမှားတာရှိတာကို။ ရှိလို့လည်း သမ္မတရုံးက အဲဒီလိုမလုပ်ဖို့ ညွှန်ကြားချက်ထုတ်ပေးတာလေ” ဟု မော်ကွန်းမဂ္ဂဇင်းတည်ထောင်သူ ဦးဇေယျာလှိုင်က မှတ်ချက်ပေးသည်။

Eleven ဂျာနယ်ကို တရားစွဲမှုအပေါ် သမ္မတက လမ်းညွှန်ချပေးပြီးနောက် အာမခံလျှောက်ထားမှုကို မကန့်ကွက်ခဲ့ကြောင်း၊ ယင်းအမှုကို သတင်းမီဒီယာကောင်စီမှ တစ်ဆင့်ရှင်းလင်းမည်ဖြစ်ပြီးကောင်စီ၏ ညှိနှိုင်းမှုမအောင်မြင်လျှင် တရားဥပဒေအရ ဆက်လက်ဆောင်ရွက် မည်ဖြစ်ကြောင်း ဦးဖြိုးမင်းသိန်းက ဆိုသည်။

Eleven ဂျာနယ်အနေနှင့် မှားယွင်းကြောင်း နိုင်ငံပိုင်သတင်းမီဒီယာများ၊ စာနယ်ဇင်းများ၊ Eleven Media တို့က ပြန်လည်ဖော်ပြပေးရန်အတွက် တောင်းဆိုထားကြောင်း၊ ယင်းသို့ Eleven Media ဘက်က လိုက်နာကျင့်သုံးဆောင်ရွက်မည်ဆိုလျှင် အမှုပြီးစီးမည်ဖြစ်ကြောင်း ၎င်းကဆိုသည်။

သတင်းမီဒီယာလွတ်လပ်ခွင့်ကို မထိပါးစေနိုင်သည့် ဥပဒေလုပ်ထုံးလုပ်နည်းများနှင့် အညီဆောင်ရွက်ရန် ကြိုးပမ်းသွားမည်ဟုလည်း ဝန်ကြီးချုပ်ကပြောဆိုသည်။ သတင်းမီဒီယာလွတ်လပ်ခွင့်၊ သတင်းစာများ ရပ်တည်ရှင်သန်နိုင်ခွင့်အတွက် ဆက်လက်ကြိုးပမ်းမည်ဖြစ်သည်ဟုလည်း ၎င်းကပြောဆိုခဲ့သည်။

ဦးဇေယျာလှိုင်ကမူ ရန်ကုန်တိုင်းဝန်ကြီးချုပ် သတင်းမီဒီယာလွတ်လပ်ခွင့်ကို အလေးထားကြောင်းပြောဆိုချက်ကို အယုံအကြည်မရှိကြောင်း ပြောဆိုသည်။

“တကယ်တမ်း မီဒီယာလွတ်လပ်ခွင့်ကို အလေးထားတယ်ဆိုရင် ကြားမှာ ကြားဝင်ညှိနှိုင်းဖြေရှင်းတဲ့ လုပ်ငန်းစဉ်ရှိတယ်။ အဲဒီလုပ်ငန်းစဉ်ကို သူက တလေးတစားနဲ့ လုပ်ရမှာပေါ့။ အဲဒီအလုပ်ကို တလေးတစားမလုပ်လို့၊ ကျော်သွားလို့ သမ္မတက ဒါကိုလုပ်ပါလို့ ပြန်ပြီးတော့ ဆုံးမတဲ့ သဘောပဲ”

တစ်ချိန်က သတင်းမီဒီယာလွတ်လပ်ခွင့်အတွက် လုပ်ဆောင်ခဲ့သည်ဆိုသည့် ဝန်ကြီးချုပ်၏ ပြောဆိုချက်ကို ငြင်းချက်မထုတ်လိုသော်လည်း လက်ရှိဆောင်ရွက်ချက်များမှာ သတင်းမီဒီယာကို နားမလည်သည့်သဘောဖြစ်ကြောင်း သတင်းမီဒီယာကောင်စီ တွဲဖက်အတွင်း ရေးမှူး ဦးမြင့်ကျော် ပြောဆိုသည်။

“အခုလက်ရှိ သတင်းမီဒီယာလွတ်လပ်ခွင့်ကို နားမလည်တာတော့ ထင်ရှားတာပေါ့ဗျာ။ ဆိုလိုချင်တာက ဖြစ်တာနဲ့ ကောင်စီကိုမသွားဘဲနဲ့ အမှုလာဖွင့်တာပေါ့”

Weekly Eleven ဂျာနယ်ကမူ မှားယွင်းထားခြင်းမရှိသဖြင့် တောင်းပန်မည်မဟုတ်ကြောင်း တုံ့ပြန်သည်။

“ကျွန်တော်တို့ မမှားတာကို အတင်းအကျပ်တောင်းပန်ခိုင်းမယ်ဆိုလည်း ဒါက အဓိပ္ပာယ်မရှိဘူး။ ကျွန်တော်တို့ကတော့ ရင်ဆိုင်ရုံပဲ ရှိတာပဲ။ သတင်းမီဒီယာကောင်စီ Process အတိုင်းသွားမယ်” ဟု ယင်းဂျာနယ်၏ အယ်ဒီတာချုပ် ဦးကျော်ဇောလင်းက ပြောဆိုသည်။

သတင်းမီဒီယာလေးခုကို စိတ်ကြိုက်ရွေးခေါ်ကာ ရှင်းလင်းမှုအပေါ်လည်း ဝေဖန်မေးခွန်းထုတ်မှုများစွာ ရှိနေသည်။

စာရင်းစစ်ချုပ် အစီရင်ခံစာပါ အကြောင်းအရာများ၊ စီမံကိန်းများ၊ ဘတ်ဂျက်ခွဲဝေသုံးစွဲမှု အခြေအနေများကြောင့် ရန်ကုန်တိုင်းအစိုးရအဖွဲ့၏ လုပ်ရပ်များကို မေးခွန်းထုတ်မည့်အကြောင်းအရာများရှိနေချိန် သတင်းမီဒီယာအများအပြားကိုမဖိတ်ဘဲ ရှင်းလင်းမှုမှာ ထူးဆန်းသည်။

Eleven Media Group နှင့် ပတ်သက်၍ ရန်ကုန်တိုင်းအစိုးရ ၂၀၁၆ ခုနှစ်ကလည်း တရားစွဲဖူးသည်။ ယခုကဲ့သို့ပင် ချက်ချင်းဖမ်းဆီးနိုင်သည့် ပုဒ်မတပ်ကာ ဖမ်းဆီးတရားစွဲခြင်းဖြစ်သည်။ စီးပွားရေးလုပ်ငန်းရှင်တစ်ဦးထံမှ ရန်ကုန်တိုင်းဝန်ကြီးချုပ် ဦးဖြိုးမင်းသိန်းက အမေ ရိကန်ဒေါ်လာတစ်သိန်းတန် နာရီရယူခဲ့သည်ဟု ရေးသားဖော်ပြချက်ကြောင့် ဖြစ်သည်။

ယင်းအချိန်က သတင်းစာရှင်းလင်းရာတွင် သတင်းမီဒီယာအများအပြားကို ခေါ်ယူရှင်းလင်းခဲ့ခြင်းဖြစ်သော်လည်း ယခုတစ်ကြိမ်တွင် မီဒီယာလေးခုကိုရွေးဖိတ်ကာ ရှင်းလင်းခဲ့သည်။ ယခုတစ်ကြိမ် ဝန်ကြီးချုပ်ရှင်းလင်းမှုကို သတင်းစာရှင်းလင်းပွဲဟု ခေါင်းစဉ်မတပ်ထားပေ။

“ဆိုလိုချင်တာ မီဒီယာကို စိုးရိမ်တယ်။ မီဒီယာရဲ့ မေးတဲ့မေးခွန်းတွေကို ဖြေရခက်မှာစိုးတဲ့အတွက် အဲဒီလိုလုပ်လိုက်တာပေါ့။ ပြောရရင် မီဒီယာနဲ့ ဆက်ဆံဖို့အတွက် လုံလောက်တဲ့အရည်အချင်း သူတို့မှာ မရှိဘူးလို့ပဲ မြင်တယ်” ဟု ဦးမြင့်ကျော်က မှတ်ချက်ပေးသည်။

ရန်ကုန်တိုင်းလွှတ်တော်ကိုယ်စားလှယ် ဒေါ်စန္ဒာမင်းကမူ ရန်ကုန်တိုင်းအစိုးရသည် ၎င်းတို့နှင့် အဆင်ပြေသူများကို ဖိတ်ကြားရှင်းလင်းမှုများရှိကြောင်း ပြောဆိုသည်။

“ဒါကြောင့် ဒီမီဒီယာတွေလောက်နဲ့ပဲ ရန်ကုန်တိုင်းအစိုးရက အဆင်ပြေတယ်ဆိုတဲ့သဘော သက်ရောက်ပါတယ်။ အဲဒီလိုပဲ မြင်ပါတယ်”

လွှတ်တော်ကိုယ်စားလှယ်များ လွှတ်တော်အတွင်း မေးမြန်းထားမှုများကိုလည်း လွှတ်တော်ခန်းမတွင် တရားဝင်လာရောက်ဖြေရှင်းမှ ဂုဏ်သိက္ခာရှိမည်ဟုလည်း ၎င်းကမှတ်ချက်ပေးသည်။

အစိုးရ၏ သတင်းမီဒီယာဖြစ်သည့် MRTV အပါအဝင် အစိုးရကို ဝေဖန်ထောက်ပြမှုနည်းပါးသည့် မီဒီယာအချို့ကိုသာ ဖိတ်ကြားကာ ရှင်းလင်းပြောကြားမှုအပေါ် သတင်းမီဒီယာကောင်စီ တွဲဖက်အတွင်းရေးမှူး ဦးမြင့်ကျော်က အောက်ပါအတိုင်း မှတ်ချက်ပေးသည်။

“မီဒီယာကို ရင်ဆိုင်ဖြေရဲတဲ့သတ္တိ သူတို့မှာ မရှိဘူးလို့ပဲ ပြောရမှာပေါ့” 

 

အေအမ်တီ၊ ဇင်လင်းထက်

You may also like...

Leave a Reply

Your email address will not be published. Required fields are marked *