မြ၀တီနယ်စပ်ကုန်သွယ်ရေးဇုန် ညပိုင်းသွားလာခွင့်ပိတ်

ရန်ကုန်၊ နိုဝင်ဘာ၉

မြန်မာနိုင်ငံ၏ အဓိကကုန်သွယ်ရေးဇုန်တစ်ခု ဖြစ်သော မြ၀တီနယ်စပ်ကုန်သွယ်ရေးဇုန်တွင် ကုန် ပစ္စည်းတင်ဆောင်လာသည့် မော်တော်ယာဉ်များကို နိုဝင်ဘာ ၆ ရက်နေ့မှစကာ ညပိုင်းသွားလာခွင့်ပိတ်ထားကြောင်း ကရင်ပြည်နယ် လွှတ်တော်၊ပြည်နယ်ကိုယ်စားလှယ် ဦးသန့်ဇင်အောင်က ဆိုသည်။

ကရင်ပြည်နယ် မြ၀တီကုန်သွယ်ရေးဇုန် အရှေ့ဘက်ရှိ အာရှလမ်းမကြီးမှ ညပိုင်းအချိန်တွင် ကုန်ပစ္စည်းတင်ဆောင်ထားသည့် ယာဉ်ကြီး၊ ယာဉ် ငယ်များ ဖြတ်သန်းသွားလာမှုမရှိစေရေးအတွက် နေ့စဉ်ည ၈ နာရီမှ နံနက် ၆ နာရီအထိ ပိတ်ထားခြင်းဖြစ်ကြောင်း ၎င်းက ဆက်လက်ပြောကြားသည်။

“အခုက ယာဉ်စစ်ကွင်းထဲကို မဝင်ဘဲ ဖြတ်သွားနေတော့ တရားမဝင် ကုန်စည်စီးဆင်းမှုကို ဖြစ်စေတယ်။ အခွန်အကောက်လည်း မရဘူး။ အလွတ်ကြီးဖြစ်နေလို့ ည ၈ နာရီကနေ မနက် ၆ နာရီ ပိတ်ထားလိုက်တာ။ ဖြတ်သန်းခွင့် မပြုဘူး။ ခရီးသွားယာဉ်၊ အိမ်စီးကားတွေက ပြဿနာ မရှိပါဘူး” ဟု ဦးသန့်ဇင်အောင်က ဆိုသည်။

ယခု ကန့်သတ်ချိန်သည် မြ၀တီကုန်သွယ်ရေးဇုန်မှ ပို့ကုန်၊ သွင်းကုန်များကို စစ်ဆေးသည့် သက်ဆိုင်ရာ အစိုးရဝန်ထမ်းများကလည်း အနားယူချိန်ဖြစ်ကြောင်း၊ ထိုအချိန်အတွင်း ဖြတ်သန်းသွားသည့် ကုန်တင်ယာဉ်များတွင် တရားမဝင်ကုန်စည်စီးဆင်းမှုကို ဖြစ်စေကြောင်း ၎င်းက ဆက်လက်ပြောကြားသည်။

မြ၀တီကုန်သွယ်ရေးဇုန်က ကုန်ပစ္စည်းတင်ဆောင်ထားသည့် ယာဉ်ကြီး၊ ယာဉ်ငယ်များ ဖြတ်သန်းခွင့်ပိတ်သည့် ကြေညာချက်ကို ဗီနိုင်းဖြင့် ကပ်ကာထုတ်ပြန်ထားသည်။

ယခုနှစ် ဧပြီမှ စက်တင်ဘာလပထမပတ်အထိ မြ၀တီနယ်စပ်ကုန်သွယ်ရေးစခန်း ပို့ကုန်တန်ဖိုးမှာ ကန်ဒေါ်လာ ၃၄ ဒသမ ၅ သန်းကျော်ရှိသည်။

You may also like...

Leave a Reply

Your email address will not be published. Required fields are marked *