အချင်းချင်းချခြင်း ခေတ္တရပ်

တစ်နိုင်ငံနှင့် တစ်နိုင်ငံ ဝေဖန်ကြလေ့မရှိသော ဒေသတွင်း အာဆီယံထိပ်သီးဆွေးနွေးပွဲတွင်ပင် အခြားနိုင်ငံခေါင်းဆောင်များက ဒေါ်အောင်ဆန်းစုကြည်ကို နှစ်ဦးချင်းတွေ့ဆုံပွဲတွင်လည်းကောင်း၊ သတင်းမီဒီယာမှတစ်ဆင့်လည်းကောင်း ပြင်းပြင်းထန်ထန်ဝေဖန်ကြပြီး သတင်းမီဒီယာတို့ကလည်း အားရပါးရရေးသားကြသည်ကိုကြည့်လျှင် မြန်မာနိုင်ငံပေါ် ကျရောက်နေသော ပြည်ပဖိအား အလွန်ကြီးမားကြောင်း ထင်ရှားသည်။

နိုင်ငံအထီးကျန်ဖြစ်ပြီး နိုင်ငံတကာစင်မြင့်မျိုးစုံတွင် ဝေဖန်ခံခဲ့ရသည့်၊ အရေးယူပိတ်ဆို့မှုများခံခဲ့ရသည့် တပ်မတော်အစိုးရလက်ထက်တွင်ပင် ယခုကဲ့သို့ ဝေဖန်မှုမျိုး၊ ဖိအားပေးမှုမျိုး မကြုံခဲ့ရသည့်အတွက် မြန်မာနိုင်ငံရင်ဆိုင်နေရသော ပြည်ပဖိအားသည် မြန်မာ့သမိုင်းတွင် အကြီးဆုံးပင် ဖြစ်သည်။

ကိုယ့်အိမ်နီးပတ်ဝန်းကျင်တွင်ပင် ကိုယ့်နိုင်ငံ၏ ထိပ်ဆုံးခေါင်းဆောင်ကို ပြင်းပြင်းထန်ထန် ဝေဖန်ရှုတ်ချမှုများ၊ ဖိအားများပေးခြင်းသည် ယခုအတိုင်း ရပ်နေမည်မဟုတ်ဘဲ အရေးယူပိတ်ဆို့မှုများ၊ သပိတ်မှောက်ခြင်းများအဖြစ် ပြောင်းလဲသွားမည်ဖြစ်သည့်အတွက် ထိုဒဏ်ကို တစ်နိုင်ငံလုံး ညီညီညွတ်ညွတ်ဖြင့် တောင့်ခံရန် လိုနေပြီဖြစ်သည်။ ခါးစည်းခံရမည်ဖြစ်သော်လည်း ညီညွတ်လျှင် နိုင်ငံသက်သာမည်။

ပြည်ပဒဏ်ခတ်မှုများသည် ဒေါ်အောင်ဆန်းစုကြည်ကိုထောက်ခံသူ၊ ဆန့်ကျင်သူဟု ခွဲခြားဒဏ်ခတ်မည်မဟုတ်ဘဲ မြန်မာတစ်နိုင်ငံလုံးပေါ် ကျရောက်မည်ဖြစ်ပြီး နောင်လာမည့် ဆယ်စုနှစ်များစွာတိုင် အတွင်းအပြင် အမာရွတ်စွဲထင်စေမည့်အတွက် ပြည်တွင်းတွင် စည်းလုံးညီညွတ်ရန် The Voice Weekly Journal က တိုက်တွန်းရခြင်းဖြစ်သည်။

သမိုင်းတစ်လျှောက် အားရလောက်အောင် အချင်းချင်းချခဲ့ကြပြီဖြစ်ရာ ယခုကဲ့သို့ စစ်ပွဲတမျှအရေးကြီးချိန်တွင် အချင်းချင်းချခြင်းများကို ခေတ္တရပ်ထားစေလိုသည်။ 

 

အယ်ဒီတာ
၁၅.၁၁.၂၀၁၈

You may also like...

Leave a Reply

Your email address will not be published. Required fields are marked *