ပြဿနာအဟောင်းကို ရှင်းရမည့် ဝန်ကြီးဌာနအသစ်

ဓာတ်ပုံ - မြင့်မိုးညို

ပြဿနာအဟောင်းကို ရှင်းရန် ဝန်ကြီးဌာနအသစ်ဖွဲ့တော့မည်။

NLD အစိုးရသည် နိုင်ငံတော်၏ အာဏာအရပ်ရပ်ကို နှစ်နှစ်ခွဲကြာ ထမ်းဆောင်ခဲ့ပြီးနောက် ပြည်ပရင်းနှီးမြှုပ်နှံမှုအားကောင်းမောင်းသန် ဖြစ်လာရေးနှင့် မြန်မာ့စီးပွားနာလန်ထူနိုင်ရေး မျှော်လင့်ချက်အတွက် ဝန်ကြီးဌာနအသစ်တစ်ခု ထပ်မံဖွဲ့စည်းရန် စီစဉ်လျက်ရှိသည်။

အဆိုပါဝန်ကြီးဌာနသည် NLD အစိုးရ၏ ၂၅ ခုမြောက် ဝန်ကြီးဌာနဖြစ်လာမည် ဖြစ်သည်။

ပြည်ပရင်းနှီးမြှုပ်နှံမှုများ ဝင်ရောက်လာရေး၊ ဝင်ရောက်လာသော ပြည်ပရင်းနှီးမြှုပ်နှံမှုများသည် တာဝန်ယူမှုရှိသော ရင်းနှီးမြှုပ်နှံမှုများဖြစ်ရေးတို့အတွက် ‘ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေး ဝန်ကြီးဌာန’ ကို ဖွဲ့စည်းရခြင်းဖြစ်ကြောင်း ရှေ့နေချုပ်ဦးထွန်းထွန်းက နိုဝင်ဘာလ ၁၂ ရက်တွင် ကျင်းပသည့် ပြည်ထောင်စုလွှတ်တော်တွင် ဆိုသည်။

လွန်ခဲ့သည့် နှစ်နှစ်ခွဲကြာကာလအတွင်း မြန်မာသည် နိုင်ငံတကာအသိုင်းအဝိုင်းကြားတွင် ဗီလိန် ဖြစ်ခဲ့ရသည်။

ARSA အကြမ်းဖက်အဖွဲ့ကို မြန်မာ့တပ်မတော်က တိုက်ထုတ်ခဲ့ချိန်တွင် အင်အားအလွန်အကျွံသုံးခဲ့ခြင်းနှင့် ဘင်္ဂလားဒေ့ရ်ှသို့ ထွက်ပြေးခဲ့သည့် ဘင်္ဂါလီများကို ပြန်လည်လက်ခံရေးတွင် နှောင့်နှေးလျက်ရှိသည်ဟူသော နိုင်ငံတကာစွပ်စွဲချက်များအကြား မြန်မာနိုင်ငံအတွင်း ဝင်ရောက်လာမည့် ပြည်ပရင်းနှီးမြှုပ်နှံမှုများမှာ တွန့်ဆုတ်ခဲ့ရသည်။

ထိုပြင်လည်း ရခိုင်အရေးနှင့် ပတ်သက်၍ ဥရောပသမဂ္ဂက မြန်မာအပေါ် ပေးအပ်ထားသည့် အထူးအခွန်သက်သာခွင့်ကို လတ်တလောတွင် ပြန်လည်သုံးသပ်နေပြီလည်း ဖြစ်သည်။

နိုင်ငံ့အနောက်ပိုင်းရှိ ရခိုင်အရေးဂယက်ကြောင့် ပြည်ပရင်းနှီးမြှုပ်နှံမှုများ ထင်သလောက် ဝင်ရောက်လာမှုမရှိခြင်းကို ပြန်လည်အဖတ်ဆယ်ရန်အတွက် ယခုအသစ်ဖွဲ့စည်းမည့် ဝန်ကြီးဌာနက တာဝန်ယူဆောင်ရွက်ရတော့မည် ဖြစ်သည်။

လက်ရှိဖွဲ့စည်းမည့် ‘ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန’သည် ဝန်ကြီးဌာနချင်း ပေါင်းစပ်လုပ်ကိုင်မှုကို ဦးဆောင်သွားမည့် သဘောရှိကြောင်း ပြည်ထောင်စုမြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်ဒုတိယဥက္ကဋ္ဌဒေါက်တာမောင်မောင်လေးက ဆိုသည်။

 “အခုသတင်းကြားနေတာကတော့ Banking ပါ တစ်ခါတည်းကိုင်မယ်ဆိုတော့ ကြိုးနီစနစ်ဖျက်ပြီး ကော်ဇောနီခင်းမယ့် သဘောရှိတဲ့အတွက် ကြိုဆိုပါတယ်။ လုပ်နိုင်မယ်ဆိုရင်တော့ အရမ်းကောင်း ပါတယ်”ဟု ၎င်းက ဆိုသည်။

ဝန်ကြီးဌာနများသည် တစ်ရွာတစ်ပုဒ်ဆန်း မလုပ်ကြဘဲ ရှေ့ကို မြော်မြင် စဉ်းစားကြရန်လိုအပ်ကာ ယင်းတို့ကို စုစည်းဦးဆောင်မည့်သူများလည်း လိုအပ်လျက်ရှိသည်ဟု ၎င်းက ထောက်ပြသည်။

သမ္မတဦးသိန်းစိန် အစိုးရလက်ထက် ကမူယင်းကဲ့သို့ ဝန်ကြီးဌာနချင်းပေါင်းစပ်လုပ်ကိုင်မှုအတွက် သမ္မတရုံးဝန်ကြီးများဖြစ်ကြသော သမ္မတရုံးဝန်ကြီး ဦးတင်နိုင်သိန်းနှင့် သမ္မတရုံးဝန်ကြီးဦးစိုးသိမ်းတို့က လုပ်ဆောင်ခဲ့ကြသည်။

ပြီးခဲ့သည့် နိုဝင်ဘာလ ၁၂ ရက်က အာဆီယံအစည်းအဝေးအကြိုစီးပွားရေးဖိုရမ်တွင် ပြည်ပ ရင်းနှီးမြှုပ်နှံမှုများကို ဖိတ်ခေါ်ကြောင်း နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဆိုသည်။

“မြန်မာနိုင်ငံဟာ အရှေ့တောင်အာရှရဲ့ နောက်ဆုံးဈေးကွက် ဖြစ်ပါတယ်။ ကျွန်မတို့နိုင်ငံမှာ မြေတွေ ရှိတယ်။ ငယ်ရွယ်တဲ့ အလုပ်သမားတွေလည်း ရှိတယ်။ သယံဇာတအရင်းအမြစ်တွေလည်း ရှိပါတယ်”ဟု အတိုင်ပင်ခံပုဂ္ဂိုလ်က ရင်းနှီးမြှုပ်နှံမှုဆွယ်တရားဟောခဲ့သည်။

နိုင်ငံအတွင်းရှိ အဖိုးတန်ကျောက်မြတ်ရတနာများ၊ ပေါကြွယ်ဝလှသော စိုက်ပျိုးမြေများနှင့် ရေအရင်းအမြစ်အစရှိသည့် အလျှံပယ်ကြွယ်ဝသော သဘာဝအရင်းအမြစ်များကို ကိုယ်ကျိုးရှာ အမြတ်ထုတ်မည်ကိုမူ ခွင့်ပြုမည် မဟုတ်ကြောင်း အတိုင်ပင်ခံပုဂ္ဂိုလ်က သတိပေးစကားဆိုခဲ့သေးသည်။

အင်အားကြီးအနောက်နိုင်ငံများက မြန်မာနိုင်ငံတွင် ရင်းနှီးမြှုပ်နှံရန်အကြောင်းအမျိုးမျိုးပြ ရှောင်လွှဲနေချိန်တွင် အတိုင်ပင်ခံ ပုဂ္ဂိုလ်ဒေါ်အောင်ဆန်းစုကြည်က အာရှ နိုင်ငံများသို့ လှည့်လည်၍ မြန်မာနိုင်ငံတွင် ရင်းနှီးမြှုပ်နှံမှုပြုလုပ်ရန် ပြောကြားခဲ့ခြင်းဖြင့် မြန်မာတို့၏ အရှေ့မျှော်ရင်းနှီးမြှုပ်နှံမှုမူဝါဒကို ပြန်လည်အသက်သွင်းစ ပြုနေခဲ့သည်။

ယခုနှစ် ဧပြီလ ၁ရက်မှ စက်တင်ဘာလ၃၀ရက်အထိ မြန်မာနိုင်ငံတွင် အများဆုံးလာရောက်မြှုပ်နှံကြသည့် နိုင်ငံများမှာ စင်ကာပူ၊ တရုတ်နှင့် ဂျပန် အပါအဝင်အာရှနိုင်ငံများမှသာဖြစ်ပြီး ရင်းနှီးမြှုပ်နှံမှုစုစုပေါင်းမှာ အမေရိကန် ဒေါ်လာ ၁ ဒသမ ၇၆၄ ဘီလီယံသာ ရှိသည်။

ရင်းနှီးမြှုပ်နှံမှုမြင့်တက်ရေးနှင့် မြန်မာ့စီးပွားကုထုံးသစ်အတွက် လွှတ်တော်တွင်မူ ‘ရင်းနှီးမြှုပ်နှံမှုနှင့် နိုင်ငံခြား စီးပွားဆက်သွယ်ရေးဝန်ကြီးဌာန’  ဖွဲ့စည်းရန် ဆွေးနွေးလျက်ရှိသည်။ နိုဝင်ဘာလ ၁၅ ရက်က ကျင်းပသော ပြည်ထောင်စုလွှတ်တော်တွင် ယင်းကိစ္စအတွက် လွှတ်တော်ကိုယ်စားလှယ် ကိုးဦး ဆွေးနွေးခဲ့ကြသည်။

ဝန်ကြီးဌာနအသစ်တစ်ခု ဖွဲ့စည်းမည့်အစား လက်ရှိရှိနေသော စီးပွားရေးနှင့် ဆက်စပ်သည့် ဝန်ကြီးဌာနများ၏ ဆောင်ရွက်ချက်များ ထိရောက်မှု ရှိ မရှိ၊ အဆိုပါ ဝန်ကြီးဌာနရှိ ဝန်ကြီးများ၏စွမ်းဆောင်ရည်နည်းပါးလျှင် အစားထိုး သင့်မသင့် မအူပင်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးစိန်ဝင်းက ထောက်ပြခဲ့သည်။

အမျိုးသားလွှတ်တော်ကိုယ်စားလှယ်ဦးသန်းစိုး(ဘောဂဗေဒ) ကမူ ပြည်ပရင်းနှီးမြှုပ်နှံမှုဝင်ရောက်ရေးအတွက် ဥပဒေအခင်းအကျင်း၊ ကောင်းမွန်သော စီးပွားရေးဝန်းကျင်၊ နိုင်ငံ့စီးပွားရေးမူဝါဒနှင့် အစိုးရ၏ ကောင်းမွန်သော အုပ်ချုပ်မှုတို့ လိုအပ်ကြောင်း ထောက်ပြခဲ့သည်။

အမျိုးသားလွှတ်တော်ကိုယ်စားလှယ်ဒေါက်တာခွန်ဝင်းသောင်းကမူ “ရန်အမြဲဖြစ်နေတဲ့ အိမ်ဂေဟာကို ဘယ် ဧည့်သည်မှ ကြာကြာ အလည်မလာချင်ပါဘူး”ဟု ဆိုသည်။ ၎င်း၏ မဲဆန္ဒနယ်မြေဖြစ်သည့် ကချင်ပြည်နယ်တွင် တိုက်ပွဲများ မကြာခဏဖြစ်ပေါ်လျက်ရှိသောကြောင့် ယင်းအခြေအနေကို အခြေခံ၍ ပေါ်ထွက်လာသော ဒေါက်တာခွန်ဝင်းသောင်း၏အမြင်မှာလည်း စဉ်းစားဖွယ်ပင်ဖြစ်သည်။

ဝန်ကြီးဌာနသစ်ဖွဲ့စည်းရေးအတွက် ‘နှောင့်ယှက်ဖျက်ဆီးလိုသူများ၏စကားကို နားမယောင်ဘဲ’ လုပ်ဆောင်သင့်ကြောင်း လွှတ်တော်ကိုယ်စားလှယ်ဦးကျော်နိုင်က ဆွေးနွေးခဲ့သည်။ ဝန်ကြီးဌာနသစ် ဖွဲ့စည်းရေး ဝေဖန်ထောက်ပြသူများကို ‘နှောင့်ယှက်ဖျက်ဆီးလိုသူများ’ဟု တံဆိပ်ကပ်ခဲ့ပြောဆိုခဲ့ခြင်းပင် ဖြစ်သည်။

ယခုဖွဲ့စည်းမည့် ‘ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီး ဌာန’အတွက် မည်သူက ပြည်ထောင်စု ဝန်ကြီးအဖြစ် တာဝန်ယူမည်ကိုမူ မသိရှိရသေးပေ။ သို့သော်လည်း မြန်မာ့စီးပွားရေးရပ်ဝန်းတွင် ထွက်ပေါ်လာသည့် သတင်းများအရ ဆိုပါက ပြည်ထောင်စုအစိုးရအဖွဲ့ရုံးဝန်ကြီးဌာန ပြည်ထောင်စုဝန်ကြီး ဦးသောင်းထွန်းနှင့် မြန်မာနိုင်ငံရင်းနှီးမြှုပ်နှံမှုကော်မရှင်အတွင်းရေးမှူး ဦးအောင်နိုင်ဦးတို့မှာ ရေပန်းစားလျက် ရှိသည်။

‘ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန’ဟူသော အမည်သည်ပင် ပြည်တွင်းပြည်ပရင်းနှီးမြှုပ်နှံမှုကဏ္ဍနှင့် နိုင်ငံခြားစီးပွားဆက်သွယ်ရေးကဏ္ဍဟူ၍ နှစ်ပိုင်းပါရှိသည်ကို တွေ့ရမည်ဖြစ်သည်။ ထိုကဏ္ဍနှစ်ခုသည် အသစ်ဖွဲ့ဝန်ကြီးဌာန၏ ဌာနသစ်နှစ်ခုဖြစ်လာဖွယ် ရှိနေသည်။ ယင်းကဏ္ဍများသည် မြန်မာနိုင်ငံ ရင်းနှီးမြှုပ်နှံမှု ကော်မရှင်နှင့် အဓိကဆက်စပ်လျက်ရှိသည်ကိုလည်း တွေ့ရမည် ဖြစ်သည်။

ဒေါက်တာမောင်မောင်လေးကမူ လုပ်ရည်ကိုင်ရည်ရှိပြီး လုပ်ရဲကိုင်ရဲရှိသောပုဂ္ဂိုလ်များ ပါဝင်စေချင်သည်ဟု မှတ်ချက်ပြုသည်။ အချို့သော ပုဂ္ဂိုလ်များသည် ယခင်က ထူးချွန်စွာလုပ်ဆောင်နိုင်ခဲ့သော်လည်း တာဝန်ပြောင်းထမ်းဆောင်ပါက ထူးချွန်စွာလုပ်ဆောင်နိုင်ချင်မှ လုပ်ဆောင်နိုင်မည်ဟု ၎င်းက မှတ်ချက်ပြုသည်။

ယခင် အိန္ဒိယဝန်ကြီးချုပ်ဟောင်းမန်မိုဟန်ဆင်းသည် ဘဏ္ဍာရေးဝန်ကြီးအဖြစ် ကောင်းစွာ တာဝန်ထမ်းဆောင်နိုင်ခဲ့သော်လည်း ဝန်ကြီးချုပ်ဘ၀တွင် အခြေမလှခြင်းမျိုးက သိသာထင်ရှားသည့် ဥပမာလည်း ဖြစ်သည်။

အတိုင်ပင်ခံပုဂ္ဂိုလ်နှင့် အမေရိကန် ပြည်ထောင်စုဒုတိယသမ္မတမိုက်ပန့်စ်တို့ တွေ့ဆုံမှု၊ မလေးရှားဝန်ကြီးချုပ် မဟာသီက ဘင်္ဂါလီအရေးနှင့်ပတ်သက်ပြီး ဒေါ်အောင်ဆန်းစုကြည်အပေါ် အလွန်အကျူး ဝေဖန်မှုများကိုကြည့်လျှင် နိုင်ငံတကာက မြန်မာနိုင်ငံတွင် လာရောက်ရင်းနှီးမြှုပ်နှံရန် မည်သို့အမြင်များ ရှိသည်ကိုလည်း တွေးဆနိုင်မည်ဖြစ်သည်။

အခြားတစ်ဖက်တွင်လည်း မြန်မာနိုင်ငံသို့ အနောက်နိုင်ငံများ၏ ရင်းနှီးမြှုပ်နှံမှုများ အလုံးအရင်းဝင်ရောက်ရန်မှာ ဆယ်ရေးတစ်ရေး၊ ကိုးရေးတစ်ရာ ဖြစ်သည်။ ဥရောပသမဂ္ဂကပင် ၎င်းတို့၏ အထူးအခွန်သက်သာခွင့်ကို ပြန်လည် သုံးသပ်လျက်ရှိပြီး ယင်းကိစ္စသည် သန်းနှင့်ချီသော မြန်မာ့လုပ်သားများ၏ အလုပ်အကိုင်ကို ခြိမ်းခြောက်လျက် ရှိသည်။

‘ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန’ သည် ဤသို့သော အခင်းအကျင်းမျိုးတွင် ပေါ်ပေါက်လာမည့် ဝန်ကြီးဌာနဖြစ်သည်။

အစိုးရက ပြည်ပရင်းနှီးမြှုပ်နှံမှုဖိတ်ခေါ်လျက်ရှိသော်လည်း ပြည်တွင်းလုပ်ငန်းရှင်များပင် အနိုင်နိုင်ရပ်တည်နေရသည်ဟု ဆန်စပါး၊ မော်တော်ယာဉ်နှင့် ဘဏ္ဍာရေးလုပ်ငန်းများ လုပ်ကိုင်လျက်ရှိသူ ဒေါက်တာစိုးထွန်းက ဆိုသည်။

“ကိုယ့်ပြည်တွင်းက လုပ်ငန်းရှင်တွေကိုတောင် အဆင်ပြေအောင် မလုပ်ပေးနိုင်ရင် ပြည်ပက ဘယ်လာပါ့မလဲ”ဟု ၎င်းက မှတ်ချက်ပြုသည်။

သံချေးတက် အစိုးရယန္တရားလည်ပတ်မှု မချောမွေ့ခြင်းကလည်း လုပ်ငန်းရှင်များအတွက် အခက်ဖြစ်စေ သည်ဟု Genius ကော်ဖီလုပ်ငန်းရှင်ဦးငွေထွန်းက ဆိုသည်။

ဥပမာအားဖြင့် ဝန်ကြီးဌာနက မြေယာလာလျှောက်ရန် ကြေညာထားသော်လည်း အမှန်တကယ်သွားလျှောက်ချိန်တွင် အောက်ခြေဝန်ထမ်းများ မသိရှိသည့်ကိစ္စမျိုးဖြစ်ပေါ်လျက်ရှိပြီး အစိုးရယန္တရားတွင်ပင် ကွဲလွဲချက်များ ရှိနေသည်ဟု ၎င်းက ဆိုသည်။

“အချို့သောဟာတွေက Power မပေးထားဘူးဗျာ။ ပွင့်ပွင့်လင်းလင်းပြောရရင် Decentralized ဖြစ်နေတယ်။ အာဏာက အပေါ်ကနေပဲ ဖြစ်နေတာမျိုး”ဟု ဦးငွေထွန်းက ဆိုသည်။

ယင်းကဲ့သို့သော ပြဿနာများသည်လည်း ‘ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန’ သန္ဓေမတည်မီကပင် စောင့်ကြိုနေသည့် ပြဿနာများ ဖြစ်သည်။

ဘင်္ဂါလီအရေး အမေရိကန်ပြည်ထောင်စုနှင့် အနောက်နိုင်ငံများ၏ ဖိအား၊ ရုတ်သိမ်းရန်ဟန်တပြပြ ဖြစ်နေသည့်ဥရောပ GSP ၊ အလုပ်အကိုင်မဲ့သွားနိုင်သည့် မြန်မာ့အလုပ်သမားများ၏ ဘ၀များနှင့် ၂၀၂၀ ရွေးကောက်ပွဲအမီ မြန်မာ့စီးပွားနာလန်ထရေး NLD အစိုးရ၏ မျှော်လင့်ချက်အကြား  ‘ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီး ဌာန’ မှာ အမယ်ဘုတ်ကယ့် သူ့ချည်ခင်ကို ဖြည်ရပေတော့မည်။

‘ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန’ ကြုံတွေ့ရမည့် ခရီးလမ်းကို ဒေါက်တာ မောင်မောင်လေးက ယခုလို ထုတ်ဖော်ပြောဆိုသည်။

“Political Economy ပေါ့။ နိုင်ငံရေးအရရော၊ စီးပွားရေးအရရော ဒါတွေကို ကျော်လွှားနိုင်ဖို့ လိုတယ်။ တော်တော်လေးကို စိန်ခေါ်မှု များတယ်။ တော်တော်ရုန်းရမယ်”

ရဲနိုင်ဦး

You may also like...

Leave a Reply

Your email address will not be published. Required fields are marked *