ငြိမ်းချမ်းရေး နောက်ပြန်လျှောပြီလော

ငြိမ်းချမ်းရေးနောက်ပြန်လျှောပြီလားဟု စိုးရိမ်နေကြသည်။

တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် Nationwide Ceasefire Agreement – NCA ထိုးထားသည့်အဖွဲ့များထဲမှ အကြီးဆုံးနှစ်ဖွဲ့ ဖြစ်သည့် KNU နှင့် RCSS နှစ်ဖွဲ့က ငြိမ်းချမ်းရေးဆွေးနွေးပွဲများ ဆိုင်ရာ အရေးပေါ်အစည်းအဝေးများ ထိုင်ကာ တရားဝင်ငြိမ်းချမ်းရေးဆွေးနွေးပွဲများတွင် ဝင်ရောက်ဆွေးနွေးခြင်းမှ ရပ်ဆိုင်းကြောင်း နိုဝင်ဘာ ၁၀ ရက်နေ့နှင့် နိုဝင်ဘာ ၁၂ ရက်နေ့တို့တွင် ရှေ့ဆင့် နောက်ဆင့် ထုတ်ပြန်ကြေညာလိုက်သည့်အတွက် စိုးရိမ်ကြခြင်းဖြစ်သည်။ ဒီအတိုင်းဆို ပြန်တိုက်ကြတော့မည်လား။ ဒေသခံပြည်သူလူထုတို့ ကျီးလန့်စာစား ပြန်နေကြရတော့မည်လား။ ရှမ်းပြည်နယ်နှင့် ကရင်ပြည်နယ်တို့သို့ သွားရောက်လည်ပတ်သင့်ပါသေးသလား။ ထိုမှတစ်ဆင့် ရန်ကုန်၊ မန္တလေး၊ တစ်နိုင်ငံလုံးသို့ ပြည်တွင်းစစ်မီးကြီး ပျံ့နှံ့လာနိုင်သလား။

ထိုဖြစ်နိုင်ခြေအကျိုးဆက်များကို မလေ့လာမီ NCA အကြောင်း ခဏလောက် လေ့လာကြည့်ရန်လိုသည်။ NCA သည် ငြိမ်းချမ်းရေးဖြစ်စဉ်တွင် ပါဝင်ပတ်သက်နေသူတိုင်း၊ စိတ်ဝင်စားသူတိုင်း သိရမည့် အဓိက အတိုကောက်စကားလုံး ဖြစ်သည်။ တရားဝင်ဆွေးနွေးပွဲကြီးများတွင်ပင် စကားအပြည့်အစုံထက် NCA ဟု အတိုသာ ခေါ်သည်။ စင်စစ် ငြိမ်းချမ်းရေးဖြစ်စဉ်သည်  အင်္ဂလိပ်ဘာသာအားဖြင့် အတိုကောက်များ စုဝေးရာ Alphabet Soup ဖြစ်သည်။ ငြိမ်းချမ်းရေးအကြောင်း စိတ်ဝင်စားသူတိုင်း UPDJC ၊ JICM ၊ PPST စသည့် အင်္ဂလိပ်ဘာသာ အတိုကောက်များကို ရှောင်ရှားမရနိုင်။ လက်နက်ကိုင်တပ်ဖွဲ့နာမည်များဖြစ်သည့် TNLA ၊ KIA တို့ကို ထပ်ပေါင်းလိုက်လျှင် အတိုကောက်များ ပိုများသွားပြီ။ အတိုကောက်များ များပြားလွန်းခြင်းကပင် မြန်မာ့ငြိမ်းချမ်းရေး၏ ရှုပ်ထွေးသော၊ ဖြေရှင်းရခက်သောသဘောကို ဆောင်သည်။ ထဲထဲဝင်ဝင်ပါနေသူများပင် ဆွေးနွေးကြသည့်အခါ အတိုကောက်များကို မှားယွင်းခေါ်ဝေါ်တတ်ကြသည်အထိ မြန်မာ့ငြိမ်းချမ်းရေး ဖြစ်စဉ်သည် ရှုပ်ထွေးသည်။ ပါဝင်ပတ်သက်နေသည့် အဖွဲ့ Player လည်း များလွန်းသည်။ ငြိမ်းချမ်းရေး ဆွေးနွေးရာတွင် အောင်မြင်သောနိုင်ငံများ၏ အတွေ့အကြုံကို ယူရန် မြန်မာ့ငြိမ်းချမ်းရေး ဖော်ဆောင်ဘက်များကို ခေါ်ယူသင်တန်းပေးသော ကိုလံဘီယာ၊ နီပေါ၊ မြောက်အိုင်ယာလန်စသည့် နိုင်ငံများတွင် ငြိမ်းချမ်းရေးလက်မှတ်ထိုးခဲ့သော သူပုန်အဖွဲ့သည် တစ်ဖွဲ့သာရှိသည်ကို ကြည့်လျှင် မြန်မာ့ငြိမ်းချမ်းရေးဖြစ်စဉ် ရှုပ်ထွေးနက်နဲကြောင်း ငြိမ်းချမ်းရေးနှင့်ဝေးသူများပင် သဘောပေါက်ကြမည်။

NCA သည် မြန်မာနိုင်ငံကို ပြည်ထောင်စုအဖြစ် လွတ်လပ်ရေးရယူပေးခဲ့သည့် ပင်လုံစာချုပ်နောက်ပိုင်းတွင် ငြိမ်းချမ်းရေးသဘောတူညီမှုရရန် ပထမဆုံးပေါ်လာသည့် Framework မူဘောင် ဖြစ်သည်။ Framework ဖြစ်သည့်အတွက် တစ်ဖွဲ့တစ်မျိုးလုပ်ရန် မလို။ အဖွဲ့ပေါင်းစုံဝင်လာလျှင်လည်း NCA တွင်ပါသည့် စည်းမျဉ်းစည်းကမ်း၊ လုပ်ထုံးလုပ်နည်းများအတိုင်း လုပ်ဆောင်ကြရုံသာ ဖြစ်သည်။ ကုလသမဂ္ဂ၊ အာဆီယံ၊ ကမ္ဘာ့ကုန်သွယ်ရေးအဖွဲ့စသည့် စည်းမျဉ်းစည်းကမ်းများအတိုင်း ဖြစ်သည်။ ငြိမ်းချမ်းရေးဖြစ်စဉ်သည် အစိုးရတစ်ဆက်၊ နှစ်ဆက်နှင့် ပြတ်မည် မဟုတ်သည့်အတွက် နောက်အစိုးရတစ်ဆက်တက်၊ တစ်မျိုးပြောင်း မဖြစ်ရလေအောင် Framework မူဘောင်လိုအပ်သည်။ လောလောဆယ်တွင် ထိုမူဘောင်သည် NCA ဖြစ်သည်။

NCA နှင့်ပတ်သက်လျှင် စိတ်ပျက်အားလျော့မှုများစွာ ရှိနေသော်လည်း NCA သည် အစိုးရနှစ်ဆက်တိုင် တည်တံ့သည့် မူဘောင် Framework ဖြစ်လာသည်။ ဦးသိန်းစိန်နှင့် ဒေါ်အောင်ဆန်းစုကြည် အစိုးရအဖွဲ့တို့ သည် လာရာချင်းကွဲပြားသော်လည်း ဒေါ်အောင်ဆန်းစုကြည် အစိုးရအဖွဲ့က NCA ကို အမွေဆက်ခံယူခဲ့သည်။ ငြိမ်းချမ်းရေးဖြစ်စဉ်ကို ဆက်လက်အကောင်အထည်ဖော်ရာတွင် ယခင်အစိုးရနှင့် ယခုအစိုးရ လုပ်ပုံကိုင်ပုံ ကွဲပြားချက်များရှိသော်လည်း အခြေခံက NCA သာဖြစ်သည်။

NCA တွင် ပစ်ခတ်တိုက်ခိုက်မှုများ ကျယ်ပြန့်မသွားအောင် စောင့်ကြည့်သော ယန္တရားဖြစ်သည့် ပစ်ခတ်တိုက်ခိုက်မှုရပ်ဆိုင်းရေးဆိုင်ရာ ပူးတွဲစောင့်ကြည့်ရေးကော်မတီ JMC (Joint Monitoring Committee) ရှိသည်။

NCA တွင် ပါဝင်လက်မှတ်ရေးထိုးထားသည့်အဖွဲ့ ၁၀ ဖွဲ့ ရှိသည်။ ယခင်သမ္မတ ဦးသိန်းစိန် အစိုးရလက်ထက်က ရှစ်ဖွဲ့ထိုးထားသည်။ ယခုဒေါ်အောင်ဆန်းစုကြည် လက်ထက်တွင် နှစ်ဖွဲ့ထပ်ထိုးသည်။ ၁၀ ဖွဲ့ရှိသည့်အနက် RCSS နှင့် KNU က မပါဝင်သည်နှင့် NCA ပျက်နိုင်သလား။

ပျက်နိုင်သည်။ ယခု ကြေညာချက်ထုတ်ကြသည့် KNU နှင့် RCSS တို့သည် လက်နက်ကိုင်တပ်ရှိသည့်အဖွဲ့များ ဖြစ်သည်။ အင်အားအကြီးဆုံးအဖွဲ့များဖြစ်သည်။ KNU သည် NCA ထိုးထားသော အဖွဲ့များတွင် အင်အား အကြီးဆုံး၊ သမိုင်းကြောင်းအရှိဆုံးဖြစ်သောကြောင့် NCA ဆိုင်ရာ အစည်းအဝေးများပင် ခေါ်ဖို့ ခက်သွားသည်။ NCA-(KNU+RCSS)=0 ဟုပင် ဆိုနိုင်သည်။

NCA ပျက်ရုံနှင့် ငြိမ်းချမ်းရေး ပျက်နိုင်သလား။ နောက်မေးခွန်းရှိလာပြန်သည်။ ပျက်နိုင်သည်။ ယခုငြိမ်းချမ်းရေးဖြစ်စဉ်သည် NCA ကို ဗဟိုပြုလည်ပတ်နေရသည်။ NCA ပျက်လျှင် ပစ်ကြ ခတ်ကြနှင့် ဒုံရင်းဒုံရင်း ပြန်ဆိုက်မည်ကို စိုးရိမ်ကြသည်။

NCA ပျက်မည်ကို စိုးရိမ်ကြသည့် အကြောင်း နောက်တစ်ရပ်လည်းရှိသည်။ NCA ကို လက်မှတ်ထိုးထားသည့်အဖွဲ့များသည် ငြိမ်းချမ်းရေးဖြစ်စဉ်ကို အစောဆုံး သက်ဝင်ယုံကြည်သူ Early Birds များ ဖြစ်သည်။ အစောဆုံးသက်ဝင်ယုံကြည်သူများပါ လန်သွားလျှင် အခြားအဖွဲ့များ ဆိုဖွယ်မရှိ။

NCA မရှိဘဲ ငြိမ်းချမ်းရေးမဆောင်ရွက်နိုင်သည် မဟုတ်ပါ။ ဆောင်ရွက်နိုင်ပါသည်။ သို့ရာတွင် တပ်မတော်အစိုးရခေတ်၊ မြန်မာ့ဆိုရှယ်လစ်လမ်းစဉ်ပါတီခေတ်နှင့် ပါလီမန်ဒီမိုကရေစီခေတ်က ငြိမ်းချမ်းရေးဆွေးနွေးပွဲမျိုးဆန်ဆန်ပြန် ဖြစ်သွားမည်။ ယင်းဆွေးနွေးပွဲများသည် အစိုးရတစ်ဆက်တက်လျှင် တစ်မျိုးပြောင်းမည်။ အစမှ ပြန်စရသည်။ သူ့နည်းနှင့်သူ အောင်မြင်သည်များလည်း ရှိသည်။ တပ်မတော်အစိုးရလက်ထက်က KIA နှင့် အပစ်အခတ်ရပ်စဲခဲ့သည်။ ကိုးကန့်၊ ‘၀’ အဖွဲ့များနှင့် သဘောတူညီချက်များ ရခဲ့သည်။ သို့သော် တစ်ဖွဲ့ချင်းစီ ဆွေးနွေးရသည့်အတွက် လက်လီစိတ်မည်။ တစ် နိုင်ငံလုံးငြိမ်းချမ်းသွားရန် မဖြစ်နိုင်ဟု ဆိုကြသည်များရှိသည်။

NCA အပြင်ဘက်တွင် ရပ်တည်နေသည့် လက်နက်ကိုင်တပ်ဖွဲ့များ မရှိ မဟုတ်ပါ။ မြောက်ပိုင်းအဖွဲ့ဝင်များဟု အသိများသည့် အင်အားကြီး ‘၀’ အဖွဲ့၊ KIA တို့သည် NCA အပြင်ဘက်တွင် ရပ်နေကြသည်။ ယခုနောက်ပိုင်း အလှုပ်အရှားများလာသော ရခိုင် AA၊ တအောင်း (ပလောင်) TNLA တို့သည်လည်း NCA အပြင်ဘက်မှ ဖြစ်သည်။ သို့ရာတွင် အစိုးရနှင့် တပ်မတော်တို့သည် ထိုအဖွဲ့များကို NCA မူဘောင်အတွင်းမှ ဝင်ရောက်ဆွေးနွေးစေချင်သည်။

ထူးဆန်းသည်မှာ NCA ထိုးထားသူများနှင့် အဆုတ်ဘက်ရောက်သည့် ကိန်းဆိုက်ချိန်တွင် NCA ထိုးမထားသူ non-NCA များနှင့်မူ ဆက်ဆံရေးတိုးတက်သယောင် ဖြစ်သည်။

လက်မှတ်ထိုးမထားသည့် မြောက်ပိုင်းအဖွဲ့မှ ခေါင်းဆောင်များသည် ပြီးခဲ့သည့် ပင်လုံညီလာခံတွင် တက်ရောက်ခဲ့သည်။ မြောက်ပိုင်းအဖွဲ့မှ TNLA ၊ AA၊ နှင့် MNDAA တို့ကို တပ်မတော်က ၂၀၁၅  လောက်ကိုင်တိုက်ပွဲ အပြီးကတည်းက ခါးခါးသီးသီးဖြစ်ခဲ့သော်လည်း ထိုညီလာခံကာလတွင် ဒုတိယ တပ်မတော်ကာကွယ်ရေးဦးစီးချုပ် ဒုတိယဗိုလ်ချုပ်မှူးကြီး စိုးဝင်းက လက်ခံတွေ့ဆုံသည်။ KIA နှင့် ‘၀’ အဖွဲ့တို့ကိုမူ ကာကွယ်ရေးဦးစီးချုပ်က လက်ခံတွေ့ဆုံသည်။

‘၀’ အပါအဝင် မြောက်ပိုင်းအဖွဲ့များသည် တရုတ်နိုင်ငံ၏ BRI ခေါ် OBOR ခေါ် ကုန်းရေပိုးလမ်းမသစ် စီမံကိန်းကြီးကို ကြိုဆိုသည့် ထုတ်ပြန်ချက်ထုတ်ခဲ့ဖူးသည်။ ထိုစီမံကိန်းကြီး၏ အဓိကကျသော စီမံကိန်းဖြစ်သည့် ကျောက်ဖြူရေနက်ဆိပ်ကမ်းစီမံကိန်းသည် သဘောတူညီချက်မရဘဲ သုံး၊ လေးနှစ်ကြာရာမှ မကြာသေးမီက မြန်မာ-တရုတ် နှစ်ဖက် သဘောတူလက်မှတ်ရေးထိုးနိုင်ခဲ့သည်။ ထိုအဖွဲ့များ၏ ပိုးလမ်းမသစ်စီမံကိန်း အပေါ်ထားသည့် စေတနာနှင့် မြန်မာတရုတ် သဘောတူညီချက်သည် ထပ်တူကျသွားသည့် ရလဒ်များသည် ငြိမ်းချမ်းရေးဖြစ်စဉ်ပေါ်သို့ သက်ရောက်လိမ့်မည်။ 

KIA နှင့် ‘၀’ တို့သည် မြန်မာနိုင်ငံအတွင်း အင်အားအကြီးဆုံးသော လက်နက်ကိုင်တပ်ဖွဲ့များဖြစ်သည်။ ထိုအဖွဲ့ များသည် NCA တွင်း မရောက်သေးသည်မှာ ငြိမ်းချမ်းရေးအတွက် စိုးရိမ်စရာ မဟုတ်ပေဘူးလား။

စိုးရိမ်စရာရှိသလို အားတက်စရာလည်း ရှိသည်။

KIA သည် ၁၇ နှစ်ကြာ အပစ်အခတ်ရပ်စဲခဲ့သော အဖွဲ့ဖြစ်သည်။ ၂၀၁၁ တွင်မှ အပစ်အခတ်များ ပြန်လည်ဖြစ်ပွားခဲ့ခြင်း ဖြစ်သည်။ အပစ်အခတ်ရပ်ဖူးသော အဖွဲ့ ဖြစ်သဖြင့် အချိန်မရွေးအပစ်အခတ် ရပ်သွားနိုင်သည်ဟု အကောင်းဘက်မှ မျှော်နိုင်သည်။ ‘၀’ ဒေသသည် ငြိမ်းချမ်းသည်မှာ ကြာပြီ။ ‘၀’ ဒေသသည် စီးပွားရေးကောင်းမွန်သဖြင့် ငြိမ်းချမ်းခြင်း၏ အရသာကို ခံစားနေရသည်။ အပစ်အခတ်များ ပြန်ဖြစ်လျှင် လူများများပေါ် မှီခိုရသော စီးပွားရေးများ ‘၀’ဒေသတွင် ရပ်တန့်ကုန်မည်။

‘၀’ သည် NCA သို့ ဝင်ကောင်း ဝင်နိုင်သည်ဟု ငြိမ်းချမ်းရေးနှင့် နီးစပ်သော အသိုင်းအဝိုင်းမှ သိရသည်။ KIA နှင့်လည်း အခန့်သင့်လျှင် ရကောင်းရသွားနိုင်သည်။ ထိုနှစ်ဖွဲ့နှင့်သာရလျှင် ထိုနှစ်ဖွဲ့ ဩဇာညောင်းသော AA ၊ TNLA ၊ နှင့် MNDAA တို့နှင့်ပါ ရသွားနိုင်သည်။ မိုင်းလားအဖွဲ့သည် လက်မှတ်ထိုးချင်ပုံရသော်လည်း သူနှင့် အနီးကပ်အင်အားကြီး ‘၀’ အထိုးစောင့်နေရသည့်အသွင် ဖြစ်သည်။

ပျက် မပျက်

KNU ပြန်လာမည်ဖြစ်သည့် အတွက် သိပ်မစိုးရိမ်ဟု ငြိမ်းချမ်းရေး ဖြစ်စဉ်တွင် ထဲထဲဝင်ဝင်ရှိသူအချို့က ဆိုသည်။ RCSS ကိုမူ စိုးရိမ်ကြသည်။

တပ်မတော်ကာကွယ်ရေးဦးစီးချုပ်က နေပြည်တော် ထိပ်သီးဆွေးနွေးပွဲတွင် RCSS ကို လူသိရှင်ကြား သတိပေးခဲ့သည်။

“NCA စာချုပ်ကို သဘောတူလက်မှတ်ရေးထိုးထားပြီး နိုင်ငံရေး၊ လက်နက်အင်အား၊ လူအင်အားတည်ဆောင်မှု၊ သတ်မှတ်ပေးထားတဲ့ နယ်မြေထက် အဆများစွာကျော်လွန်ပြီး နယ်မြေ တည်ဆောက်မှုတွေ ပြုလုပ်နေလို့ အခြားတိုင်းရင်းသားလက်နက်ကိုင်အဖွဲ့တွေနဲ့ ပဋိပက္ခများ ဖြစ်ပွားလျက်ရှိတာကို တွေ့ရပါတယ်။ NCA ကို တလွဲအသုံးမချဖို့ ပြောလိုပါတယ်။ တလွဲအသုံးချရင် တိုင်းရင်းသားပြည်သူလူထုရဲ့ အသက်၊ အိုးအိမ်စည်းစိမ်ကို အကာအကွယ်ပေးဖို့ တာဝန်ရှိတဲ့ တပ်မတော်အနေနဲ့ လက်ပိုက် ကြည့်နေနိုင်မှာ မဟုတ်ကြောင်း အသိပေးလိုပါတယ်”ဟု တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်က နေပြည်တော်ထိပ်သီးအစည်းအဝေး မိန့်ခွန်းတွင် ထည့်သွင်းပြောကြားခဲ့သည်။

အဆိုပါကိစ္စမှာ နေ့လယ်ထမင်းစားပွဲတွင် ပြေလည်သွားသည်ဟု ကြားရပြီး နေ့လယ်စာစားပွဲ ဓာတ်ပုံများတွင်လည်း ဒုဗိုလ်ချုပ်ကြီးရွက်စစ်နှင့် ကာကွယ်ရေးဦးစီးချုပ်တို့ တပြုံးပြုံးနှင့် တွေ့ရသည်။

KNU ခေါင်းဆောင်ပိုင်းကိုမူ တပ်မတော်ခေါင်းဆောင်များက လေးစားပုံရသည်။ အထူးသဖြင့် KNU ဥက္ကဋ္ဌ ဖဒိုမူတူးဆေးဖောကို တပ်မတော်ကာကွယ် ရေးဦးစီးချုပ်က လေးစားသည်။ နေပြည်တော် ထိပ်သီးဆွေးနွေးပွဲတွင်လည်း ကြီး သုံးကြီး ဆွေးနွေးပွဲဆိုကာ တပ်မတော်ကာကွယ်ရေးဦးစီးချုပ်၊ ဒေါ်အောင်ဆန်းစုကြည်နှင့် ဖဒိုမူတူးဆေးဖော၊ ဖဒိုကွယ်ထူးဝင်းတို့ ဆွေးနွေးခဲ့ကြသည်။

“ဒီနေ့ နိုင်ငံရေးဆွေးနွေးပွဲအဆင့်ဆင့်မှာ ရင်ဆိုင်ကြုံတွေ့နေရတဲ့ အဓိကတစ်ဆို့မှုဖြစ်တဲ့ ကိုယ်ပိုင်ပြဋ္ဌာန်းခွင့်နဲ့ ခွဲမထွက်ရဆိုတဲ့ အမြင်အပေါ်မှာ ကျွန်တော် တို့ တိုင်းရင်းသားလက်နက်ကိုင်တော်လှန်ရေးအင်အားစုများ၊ အစိုးရနဲ့ တပ်မတော်တို့ကြားမှာ အမြင်ကွာဟချက်များ ရှိနေပါတယ်”ဟု KNU ဥက္ကဋ္ဌ ဗိုလ်ချုပ်ကြီး ဖဒိုမူတူးဆေးဖောက နေပြည်တော် ထိပ်သီးဆွေးနွေးပွဲ အဖွင့်မိန့်ခွန်းတွင် ထည့်သွင်းပြောကြားခဲ့သည်။

ထိုနှစ်ဖွဲ့၏ ကြေညာချက်များတွင်လည်း NCA မှ ထွက်မည်ဟု ရေးမထား။ တင်းတင်းမာမာ လေသံလည်း မထွက်။ ‘အလွတ်သဘော’ ဆွေးနွေးသွားမည်ဟု နှစ်ဖွဲ့လုံး၏ ကြေညာချက်တွင် ပါဝင်နေသည်။ တစ်ဖက်မှ ကြည့်ပြန်လျှင် လက်ရှိ NCA မူဘောင်ထဲမှ ထွက်မည်ဟု မကြေညာသော်လည်း ဆွေးနွေးမှု အဆင်မပြေပါက ထွက်ချင်လည်း ထွက်နိုင်သည့် သဘောသက်ရောက်နေသည်။

အချိန်က စကားပြောမည်။ သက်ဆိုင်ရာအဖွဲ့ခေါင်းဆောင်များ၏ ရေရှည်အမြင်က စကားပြောမည်။

တပ်နှင့် အစိုးရ တစ်သားတည်းဖြစ်မဖြစ်

တပ်နှင့် အစိုးရ တစ်သားတည်းမရှိသည့်အတွက် ငြိမ်းချမ်းရေးတွင် မလိုအပ်ဘဲ ကြန့်ကြာရခြင်းဟု ငြိမ်းချမ်းရေး လေ့လာသူအချို့က ထင်မြင်ကြသည်။ သို့သော် တပ်နှင့် အစိုးရ တစ်သားတည်း ရှိခဲ့သည့် တော်လှန်ရေးကောင်စီခေတ်တွင်လည်းကောင်း၊ တပ်နှင့် အစိုးရ နီးကပ်သည့် မြန်မာ့ဆိုရှယ်လစ်လမ်းစဉ် ပါတီခေတ်တွင်လည်းကောင်း၊ တပ်နှင့် အစိုးရ အတူတူဖြစ်သည့် တပ်မတော်အစိုးရခေတ်တွင် လည်းကောင်း၊ တပ်နှင့် အစိုးရနီးစပ်သည့် ဦးသိန်းစိန်အစိုးရခေတ်တွင် လည်းကောင်း ငြိမ်းချမ်းရေး အပြီးတိုင် မရခဲ့။ ခေတ်အလိုက် သေနတ်သံကျယ်လာခြင်း၊ တိုးသွားခြင်းတို့သာ ရှိသည်။ ထို့ကြောင့် တပ်နှင့် အစိုးရ တစ်သား တည်းရှိ၊ မရှိသည် ငြိမ်းချမ်းရေးကို အဆုံးအဖြတ်မပေးနိုင်။

ငြိမ်းချမ်းရေးတွင် အစိုးရ၊ တပ်မတော်နှင့် လက်နက်ကိုင်အဖွဲ့များဟု သုံးဦးသုံးဖလှယ်ရှိရာ အတွေ့အကြုံ အများဆုံးမှာ တပ်မတော်နှင့် လက်နက်ကိုင်အဖွဲ့များပင် ဖြစ်သည်။ တပ်မတော်နှင့် လက်နက်ကိုင်အဖွဲ့များသည် တိုက်လာသည်မှာ နှစ်ပရိစ္ဆေဒကြာပြီဖြစ်သဖြင့် တစ်ယောက်အကြောင်း တစ်ယောက် သိကြသည်။ ငြိမ်းချမ်းရေးဖြစ်စဉ် အောင်မြင်ဖို့ဆိုလျှင် အစိုးရသည် ငြိမ်းချမ်းရေးအကြောင်း ကောင်းကောင်းသိရန်လိုသည်။ အစိုးရကိုယ်စားလှယ်များသည် ငြိမ်းချမ်းရေးကို နောကျေနေရန် လိုအပ်သည်။ 

တစ်ဖက်က ကြည့်ပြန်လျှင် မြန်မာ့ငြိမ်းချမ်းရေးတွင် တပ်မတော်နှင့် အစိုးရသည်သာ အရေးကြီးသော Player မဟုတ်ပါ။ ပြည်ပ Player များသည်လည်း အရေးကြီးသောနေရာမှ ပါဝင်သည်။

တရုတ်

ငြိမ်းချမ်းရေးတွင် တရုတ်၏ ဩဇာသည် အစဉ်အလာအရ ကြီးမားခဲ့ကာ ယခုထက်တိုင်လည်း ကြီးမားနေဆဲ ဖြစ်သည်။ တရုတ်နယ်စပ်အခြေစိုက်အဖွဲ့များသည် လက်မှတ်ရေးထိုးရန် ကျန်နေပြီး ထိုင်းနယ်စပ် အခြေစိုက်အဖွဲ့များ လက်မှတ်ထိုးကြသည်ဟု ငြိမ်းချမ်းရေးတွင် ပါဝင်သူများ အလွယ်မှတ်သားလေ့ရှိသည်။ တရုတ်သည် သူ့နယ်စပ်များ ငြိမ်းချမ်းစေလိုသည်။ တရုတ်၏ မဟာဗျူဟာ ရည်မှန်းချက်မှာ Belt and Road Initiative – BRI ခေါ် ခေတ်သစ် ကုန်းရေပိုးလမ်းမကြီးစီမံကိန်းများ မြန်မာပြည်တွင် ဖြစ်မြောက်ရေး ဖြစ်သည်။ ကျောက်ဖြူနှင့် ယူနန်ပြည်နယ်သို့ ပေါက်သော ရထားလမ်း၊ ကားလမ်း၊ ရေနံပိုက်လိုင်းများ လုံခြုံရေးသည် သူ၏ ပထမဦးစားပေး ဖြစ်သည့်အတွက် ထိုလမ်းကြောင်းတစ်လျှောက် ငြိမ်းချမ်းသွားနိုင်သည်။

၂၀၂၀

ငြိမ်းချမ်းရေးတွင် ၂၀၂၀ သည် အရေးပါသည့် နောက်ထပ် မှတ်တိုင် တစ်တိုင်ဖြစ်လာမည်။ အစိုးရတိုင်းသည် အမွေထားခဲ့ချင်သည်။ ဦးသိန်းစိန်အစိုးရသည် သက်တမ်းကုန်ခါနီးမှ ငြိမ်းချမ်းရေးစာချုပ် ချုပ်နိုင်ခဲ့သည်။ ဒေါ်အောင်ဆန်းစုကြည် အစိုးရသည် ငြိမ်းချမ်းရေး ဦးစားပေးဖြင့် အစိုးရဖြစ်လာသည်။ အစိုးရနှင့် တပ်မတော် ရင်ကြားစေ့ရေးတွင် အခက်အခဲများ ရှိနေသည်ဟု ပြောသော်ငြားလည်း ၂၀၂၀ တွင် ငြိမ်းချမ်းရေးရမည်ဟု နေပြည်တော်ထိပ်သီးဆွေးနွေးပွဲတွင် ကာကွယ်ရေးဦးစီးချုပ်က ကတိဆန်ဆန် ပြောကြားခဲ့သည်။ ထိုအချိန်ဇယားသည် NLD အစိုးရ၏ အချိန်ဇယားနှင့်လည်း ကိုက်နေသည်။

အစိုးရ၊ တပ်မတော်၊ လက်နက်ကိုင်အဖွဲ့များဟု သုံးဦးသုံးဖလှယ် ရှိသည့်အနက် အစိုးရခေါင်းဆောင်ပိုင်းသည် ယခု နိုင်ငံရေးစနစ်အရ ငါးနှစ်တစ်ကြိမ်လဲသော်လည်း တပ်မတော်နှင့် လက်နက်ကိုင်အဖွဲ့များမှာမူ ငါးနှစ်ထက် ပိုနေနိုင်သည်။ လက်နက်ကိုင်အဖွဲ့များမှာမူ ခေါင်းဆောင်ပိုင်း အသက်ကန့်သတ်ချက်ပင် မရှိပေ။ ထို့ကြောင့် အချိန်ဖိအားသည် အစိုးရပေါ်တွင် ပိုပြီး ရှိနေသယောင်ယောင်။

အခြားတစ်ဖက်မှ ကြည့်ပြန်လျှင် မြန်မာအစိုးရများတွင် ပြည်သူ့အကြိုက် အစိုးရနှင့် အာဏာလက်ထဲရသည့် အစိုးရထပ်တူကျသည်မှာ ရှားရှားပါးပါး ယခုအချိန်သာ ရှိသည့်အတွက် အခွင့်အလမ်းကောင်းဟုလည်း ဆိုနိုင်သည်။ ယခုသာ ငြိမ်းချမ်းရေးသဘောတူညီချက်များရလျှင် ပြည်သူများ၏ ထောက်ခံချက်ပါ တစ်ခါတည်း ရသွားနိုင်သည်။

ငြိမ်းချမ်းရေး နောက်ပြန်လျှော၊ မလျှော ပြောရန်စောသေးသည်။ ဦးသိန်းစိန် လက်ထက် NCA မထိုးမီအချိန်တွင် အခက်အခဲကြီးကြီးမားမားများကို ကျော်ဖြတ်ခဲ့ရသည့် သာဓကလည်း ရှိသည်။ ငြိမ်းချမ်းရေးသည် နိမ့်လိုက်မြင့်လိုက်နှင့် စိတ်ရှည်ရှည်သွားကြရသည်ကို ကမ္ဘာအရပ်ရပ်ရှိ ငြိမ်းချမ်းရေးဆွေးနွေးပွဲများတွင်လည်း မြင်ကြရသည်။

လောလောဆယ်တွင်မူ လက်ရှိအစိုးရအဖွဲ့ခေါင်းဆောင် ဒေါ်အောင်ဆန်းစုကြည်၊ ငြိမ်းချမ်းရေးကို ဦးထိပ်ထားသည့် ဒေါ်အောင်ဆန်းစုကြည်၏ ဖခင် ဗိုလ်ချုပ်အောင်ဆန်းတို့ ပြောခဲ့သည့် နာမည်ကျော် စကားတစ်ခွန်းသည် မြန်မာ့ငြိမ်းချမ်းရေးအတွက် အသင့်တော်ဆုံး ဖြစ်ပေလိမ့်မည်။

“အကောင်းဆုံးကို မျှော်လင့်ပြီး အဆိုးဆုံးအတွက် ပြင်ဆင်ထားရမယ်”။      ။

The Voice

You may also like...

Leave a Reply

Your email address will not be published. Required fields are marked *