အရှေ့မျှော် အထိနာ မြန်မာ့ခရီးသွားဈေးကွက်

မှေးမှိန်ခဲ့သော မြန်မာ့ခရီးသွားဈေးကွက် ပြန်လည်တောက်ပစေမည့် အစီအစဉ်စတင်ခဲ့သည်မှာ တစ်လကျော်ကြာမြင့်သွားပြီဖြစ်သည်။

ရခိုင်ပြည်နယ်အရေးကြောင့် အနောက်နိုင်ငံက ခရီးသွားများ မြန်မာနိုင်ငံကို ရှောင်ဖယ်နေကြချိန် မြန်မာအစိုးရက အရှေ့တိုင်းနိုင်ငံသုံးခုဖြစ်သည့် ဂျပန်၊ တောင်ကိုးရီးယားနှင့် တရုတ်တို့ကို ဗီဇာဖြေလျှော့၍ ခရီးသွားများကို ဆွဲဆောင်ခဲ့သည်။ ယင်းသည်မြန်မာ့ခရီးသွားဈေးကွက် ပြန်လည်ဦးမော့လာနိုင်မည်လော။

ရခိုင်ပြည်နယ်အရေးကြောင့် အနောက်ကမ္ဘာခြမ်းတွင် ထင်ကျန်နေဆဲ မြန်မာနိုင်ငံ၏ပုံရိပ်ဆိုးသည် မြန်မာ့ခရီးသွားလုပ်ငန်းကို မည်မျှခြိမ်းခြောက်နေဦးမည်နည်း။

ထင်ကျန်ဆဲ ပုံရိပ်ဆိုး

ရခိုင်ပြည်နယ်အရေးအပေါ် ကမ္ဘာ့မီဒီယာကြီးများ၏ ပုံဖော်ရေးသားချက်များသည် မြန်မာ့ခရီးသွားဈေးကွက်ကို ထိခိုက်စေကြောင်း ပြည်တွင်းခရီးသွားလုပ်ငန်းရှင်များက ကောက်ချက်ချကြသည်။

လက်ရှိ မြန်မာနိုင်ငံသို့ ခရီးသွားဝင်ရောက်မှုကျဆင်းခြင်းမှာလည်း အဆိုပါသတင်းဖော်ပြချက်များနှင့် ဆက်စပ်သည်။

၂၀၁၇ ခုနှစ် ARSA အကြမ်းဖက် အဖွဲ့တိုက်ခိုက်မှုနောက်ပိုင်း မြန်မာလုံခြုံ ရေးတပ်ဖွဲ့ဝင်များ ရခိုင်ပြည်နယ်အရေး ကိုင်တွယ်ရာတွင် ဘင်္ဂါလီလူမျိုးများအပေါ် လူ့အခွင့်အရေးချိုးဖောက်မှုများနှင့် လူမျိုးတုံး ရှင်းလင်းမှုများကျူးလွန်ခဲ့ကြောင်း ကုလသမဂ္ဂနှင့် ဥရောပသမဂ္ဂနိုင်ငံများက စွပ်စွဲခဲ့သည်။

ယင်းသတင်းများကိုလည်း ကမ္ဘာ့မီဒီယာကြီးများက အစဉ်တစိုက်ဖော်ပြခဲ့ကြသည်။ ယင်းသတင်းဖတ်ရှုသည့် အနောက်နိုင်ငံမှ ခရီးသွားများသည် မြန်မာနိုင်ငံသို့ လာရောက်လည်ပတ်ရန် လက်ရှောင်လာကြသည်။

“(ရခိုင်ပြည်နယ်အရေးကြောင့် အနောက်နိုင်ငံတွေက) မြန်မာနိုင်ငံကို မသွားတော့နဲ့လို့ ပြောကြတာမဟုတ်ဘူး။ မြန်မာနိုင်ငံကိုသွားရင် Ethical (ကျင့်ဝတ်ဆိုင်ရာခရီးသွားလုပ်ငန်း) ဖြစ်လား၊ မဖြစ်လားဆိုတာမျိုး ခရီးသွားတွေက Public အချင်းချင်း ပြောကြဆိုကြတဲ့ သဘောပေါ့” ဟု မြန်မာနိုင်ငံခရီးသွားဈေးကွက်မြှင့်တင်ရေးအသင်း ဥက္ကဋ္ဌ ဒေါ်မေမြတ်မွန်ဝင်းက ပြောကြားသည်။

မြန်မာနိုင်ငံခရီးသွားဈေးကွက်မြှင့်တင်ရေးအသင်းမှာ ပုဂ္ဂလိကခရီးသွားလုပ်ငန်းရှင်များ ဖွဲ့စည်းထားသည့် အသင်းအဖွဲ့တစ်ခုဖြစ်သည်။

ကျင့်ဝတ်ဆိုင်ရာ ခရီးသွားလုပ်ငန်းဆိုသည်မှာ သွားရောက်လည်ပတ်သည့် ခရီးစဉ်ဒေသများတွင် ဒေသဆိုင်ရာ လှုမှုအသိုင်းအဝိုင်းနှင့် သဘာဝပတ်ဝန်းကျင်အပေါ်အကျိုးပြုသောလုပ်ငန်းဖြစ်သည်။ အနောက်ခရီးသွားများသည် ကျင့်ဝတ်ဆိုင်ရာ ခရီးသွားလုပ်ငန်းကို တန်ဖိုးထားသည်။

မြန်မာနိုင်ငံကို လူ့အခွင့်အရေးရှုထောင့်အရ မလည်ပတ်သင့်သောနေရာအဖြစ် ပုံဖော်နေကြခြင်းကြောင့် အနောက်နိုင်ငံများက ခရီးသွားများ ခရီးစဉ်ရွေးချယ်ရာတွင် မြန်မာနိုင်ငံကို ရှောင်ဖယ်လာကြကြောင်း ခရီးသွားလုပ်ငန်းရှင်များက ထင်မြင်ချက်ပေးကြသည်။

၂၀၁၇ ခုနှစ် ရခိုင်ပြည်နယ်အရေး ဖြစ်ပေါ်ပြီးနောက် ဥရောပသမဂ္ဂ၊ အမေရိကန်ပြည်ထောင်စုနှင့် အနောက်အုပ်စုနိုင်ငံများသည် ကြိုတင်စာရင်းသွင်းထားသော မြန်မာနိုင်ငံခရီးစဉ်များကို ဖျက်သိမ်းခဲ့ကြောင်း ပြည်တွင်းခရီးသွားလုပ်ငန်းများထံမှ သိရသည်။

၂၀၁၈ ခုနှစ် ခရီးသွားရာသီတွင်လည်း အနောက်နိုင်ငံခရီးသွားဝင်ရောက်မှု ဆက်လက်ကျဆင်းနေဆဲဖြစ်သည်။ ဟိုတယ်နှင့် ခရီးသွားလာရေးဝန်ကြီးဌာနက ထုတ်ပြန်သည့် နောက်ဆုံးစာရင်းများအရ ၂၀၁၈ ခုနှစ် ဇန်နဝါရီလမှ စက်တင်ဘာလအထိ မြောက်အမေရိကမှ ခရီးသည် ဝင်ရောက်မှု ၁၄ ရာခိုင်နှုန်း၊ လူဦးရေအားဖြင့် ကိုးထောင်ကျော်၊ ဥရောပမှ ၂၆ ရာခိုင်နှုန်း လူဦးရေအားဖြင့် ၄၃,၀၀၀ ကျော် လျော့နည်းခဲ့သည်။

ယင်းမှာ ၂၀၁၇ နှင့် ၂၀၁၈ ခုနှစ် ကာလတူအချိန်ကို နှိုင်းယှဉ်ထားခြင်းဖြစ်သည်။ အဆိုပါ ၂ နှစ်စလုံးသည် အနောက်နိုင်ငံခရီးသွားများ ဝင်ရောက်မှု ကျဆင်းသည့် နှစ်ကာလများလည်း ဖြစ်သည်။ စာရင်းဇယားများအရ ခရီးသွားဝင်ရောက်မှုအလျော့ဆုံးမှာ ဥရောပနိုင်ငံများဖြစ်သည်။

အမေရိကန်ပြည်ထောင်စု၊ ဥရောပနိုင်ငံများမှ ခရီးသွားများမှာ အရည်အသွေးရှိသော ခရီးသွားများဖြစ်ပြီး ရက်ရှည်ကြာနေထိုင်ကာ နေရာစုံသွားရောက်လည်ပတ်ကြသည်။ ၎င်းတို့သည် ငွေကြေးပိုမိုသုံးစွဲကြသဖြင့် ခရီးသွားလုပ်ငန်းနှင့် ဆက်စပ်သည့် စားသောက်ဆိုင်၊ ဟိုတယ်၊ လေကြောင်းလိုင်းများ ပိုမိုအလုပ်ဖြစ်သည်။

ထို့ကြောင့် နိုင်ငံ့ပုံရိပ်ကိုမြှင့်တင်၍ အနောက်ခရီးသွားများကို ပြန်လည်ဆွဲဆောင်ရန်ဆောင်ရွက်နေကြောင်း ဒေါ်မေမြတ်မွန်ဝင်းက ပြောဆိုသည်။

“ကျွန်မတို့ဘက်ကနေ မြန်မာပြည်ကို ခရီးသွားခြင်းသည် Ethical ဖြစ်တဲ့ လုပ်ရပ်ဖြစ်တယ်ဆိုတာကို Blogger တွေ၊ Influencer တွေကို ဆက်သွယ်ပြီးတော့ Blog တွေမှာ ရေးခိုင်းတာတို့၊ ရေးဖို့အတွက် ပံ့ပိုးပေးတာတို့ လုပ်ပါတယ်။ အခုနောက်ပိုင်းလည်း Blog တွေမှာ ပြန်ရေးကြတယ်” ဟု ၎င်းက ရှင်းပြသည်။

သို့သော် ရခိုင်ပြည်နယ်အရေးသည် မြန်မာ့ခရီးသွားလုပ်ငန်းကဏ္ဍမှာသာမက အခြားကဏ္ဍများတွင်လည်း သက်ရောက်မှု အနည်း၊ အများရှိခြင်းကြောင့် စနစ်တကျ ဆောင်ရွက်ရမည်ဖြစ်ကြောင်း ၎င်းက ဆိုသည်။

မြန်မာနိုင်ငံသို့ အနောက်နိုင်ငံ ခရီးသွားဝင်ရောက်မှု ကျဆင်းနေသော်လည်း အာရှခရီးသွားဝင်ရောက်မှု တိုးတက်လာသဖြင့် စုစုပေါင်းခရီးသည်ဝင်ရောက်မှုမှာ မကျဆင်းပေ။ ၂၀၁၇ ခုနှစ် စက်တင်ဘာလအထိ ခရီးသွား ၂ ဒသမ ၅သန်းကျော် (၂,၅၂၂,၁၆၀) ဦးဝင်ရောက်ခဲ့ပြီး ၂၀၁၈ ကာလတူတွင်လည်း ၂ ဒသမ ၅သန်း (၂,၅၂၂,၉၈၄) ဦးဝင်ရောက်ခဲ့သည်။

စုစုပေါင်းခရီးသွား သုည ဒသမ ၀၃ ရာခိုင်နှုန်း တိုးတက်သွားသေးသည်။

အရှေ့မျှော် ခရီးသွားဈေးကွက်

ပြီးခဲ့သည့် အောက်တိုဘာ ၁ ရက်မှ စတင်ပြီး ဂျပန်၊ တောင်ကိုးရီးယား တရုတ်နိုင်ငံကိုယ်ပိုင်အုပ်ချုပ်ခွင့်ဒေသနှစ်ခုဖြစ်သော မကာအိုနှင့် ဟောင်ကောင်တို့ကို ဗီဇာကင်းလွတ်ခွင့်ပြုလိုက်သည်။ တရုတ်နိုင်ငံ အခြားပြည်နယ်မှ ခရီးသွားများကို ဆိုက်ရောက်ဗီဇာခွင့်ပြုခြင်းဖြစ်သည်။

အရှေ့မျှော်ခရီးသွားဈေးကွက် မြှင့်တင်ရေးသည် မည်မျှခရီးပေါက်မည်နည်း။ မြန်မာနိုင်ငံသို့ ဝင်ရောက်သော ခရီးသွား ၇၀ ရာခိုင်နှုန်းသည် အာရှနိုင်ငံများမှ ဖြစ်သည်။

ဗီဇာဖြေလျှော့မှုကြောင့် အာရှခရီးသွားများပိုမိုဝင်ရောက်လာဖွယ်ရှိပြီး အစိုးရက ရည်မှန်းသော ခရီးသွားအရေအတွက် ပြည့်မီနိုင်လိမ့်မည်ဖြစ်ကြောင်း ဟိုတယ်နှင့် ခရီးသွားလာရေးဝန်ကြီးဌာန ဒုတိယညွှန်ကြားရေးမှူးချုပ် ဦးမြင့်ထွေး က ပြောကြားသည်။

“ဗီဇာဖြေလျှော့မှုစနစ်တွေအရဆိုရင် ရည်မှန်းထားတဲ့ အရေအတွက်တွေဖြစ်နိုင်အောင် ကြိုးစားရမှာပေါ့” ဟု ၎င်းက ဆိုသည်။

၂၀၁၈ ခုနှစ်အတွင်း ပြည်ပခရီးသွား ၄ ဒသမ ၅ သန်း ဝင်ရောက်ရန် ရည်မှန်းထားသည်။ ဟိုတယ်နှင့်ခရီးသွားလာရေး မဟာဗျူဟာစီမံကိန်းအရ ၂၀၂၀ ပြည့်နှစ်တွင် ပြည်ပခရီးသွား ခုနစ်သန်းကျော်ဝင်ရောက်ရန် ရည်မှန်းထားသည်။

လက်ရှိတွင် တရုတ်လေကြောင်းလိုင်းတစ်ခုဖြစ်သော 9 Ari သည် ရန်ကုန်မြို့နှင့် တရုတ်နိုင်ငံ ကွမ်ကျိုးမြို့ကြား တိုက်ရိုက်ပျံသန်းပေးမည့် ခရီးစဉ်ကို အောက်တိုဘာလ ၂၈ ရက်တွင်စတင်ခဲ့သည်။

ကွမ်ကျိုး-မန္တလေး တိုက်ရိုက်ခရီးစဉ်ကိုလည်း 9 Ari က ပျံသန်းမည်ဖြစ်ပြီး စီးပွားရေးလုပ်ငန်းရှင်များ၊ နှစ်နိုင်ငံအလည်အပတ်သွားရောက်မည့် ခရီးသွားများအတွက် လွယ်ကူချောမွေ့စွာ သွားလာနိုင်မည်ဖြစ်သည်။ အဆိုပါလေကြောင်းလိုင်းပျံသန်းခြင်းသည် တရုတ်ခရီးသွားများ တိုးတက်ခြင်းသင်္ကေတလည်းဖြစ်သည်။

ယင်းအပြင် နိုဝင်ဘာလ ၁၃ ရက်နေ့ ကလည်း ရန်ကုန်နှင့် တရုတ်နိုင်ငံ ရှေး ဟောင်းမြို့တော်တစ်ခုဖြစ်သည့် ရှီးအန်းမြို့သို့ Sichuan Airlines က တစ်ပတ်လျှင် သုံးကြိမ်နှုန်းဖြင့် စတင်ပြေးဆွဲသည်။

“အဓိကကတော့ လေယာဉ်တွေ ပိုဆင်းလာတယ်။ ကွမ်ကျိုး-မန္တလေး-ရန်ကုန် တိုက်ရိုက်လေကြောင်းလိုင်းတွေ ဆင်းလာတယ်ဆိုတော့ (ခရီးသွားတွေ) တက်လာမှာပေါ့။ နောက်ထပ်လည်း လေကြောင်းလိုင်းတွေ တိုးလာဖို့ရှိတယ်။ တရုတ်ကတော့ ပိုတက်လာမယ်။ ဂျပန်နဲ့ ကိုးရီးယားကတော့ ချက်ချင်းကြီးတက်ဖို့ မလွယ်လောက်ဘူး” ဟု Diethelm Travel Myanmar ၏ အုပ်ချုပ်မှုဒါရိုက်တာ ဦးဖြိုးဝေရာဇာက ပြောဆိုသည်။

အီတလီနိုင်ငံအခြစိုက် Neos လေကြောင်းလိုင်းကလည်း မီလန်-ရန်ကုန် တိုက်ရိုက်လေကြောင်းခရီးစဉ်ကို အောက်တိုဘာ ၃၁ ရက်တွင်စတင်ပျံသန်းသည်။ Neos လေကြောင်းလိုင်းသည် ဥရောပခရီးသွားများကို ပို့ဆောင်ပေးခြင်းဖြစ်သည်။

ဥရောပနိုင်ငံများအနက် ဗြိတိန်နိုင်ငံမှလွဲ၍ ပြင်သစ်၊ ဂျာမနီနှင့် ဆွစ်ဇာလန် ခရီးသွားများ ပြန်လည်ဝင်ရောက်လာပြီဖြစ်ကြောင်း ဦးဖြိုးဝေရာဇာက ပြောကြားသည်။ သို့သော်လည်း ယခုနှစ်တွင် အာရှခရီးသွားများကိုသာ အဓိကမျှော်ရဦးမည် ဖြစ်သည်။

စာရင်းများအရ တရုတ်ခရီးသွားဝင်ရောက်မှုသည် ၂၀၁၇ ခုနှစ် ဇန်နဝါရီမှ စက်တင်ဘာအထိနှင့် ၂၀၁၈ ခုနှစ် ကာလတူတို့ကို နှိုင်းယှဉ်လျှင် ၃၃ ရာခိုင်နှုန်း (လူဦးရေအားဖြင့် ငါးသောင်းခန့်) မြင့်တက်လာသည်။ ဂျပန်နှင့် တောင်ကိုးရီးယားနိုင်ငံတို့ကမူ အပြောင်းအလဲ မရှိသေးပေ။

မည်သို့ဆိုစေ အောင်တိုဘာလမှစတင်ပြီး မြန်မာခရီးသွားမြင့်မားရာသီဖြစ်ခြင်းကြောင့် လာမည့်လများအတွင်း ခရီးသွားများ ပိုမိုဝင်ရောက်မည်ဟုမျှော်လင့်ထားကြောင်း မြန်မာနိုင်ငံခရီးသွားလုပ်ငန်းရှင်များအသင်း ဒုတိယ ဥက္ကဋ္ဌ ဦးမင်းသိန်းက ပြောကြားသည်။

ရခိုင်အရေးကြောင့် ကျဆင်းနေသည့် ခရီးသွားဝင်ရောက်မှုလည်း ယခုနှစ်တွင် ပြန်လည်ဦးမော့မည်ဟု ၎င်းက ယုံကြည်သည်။

“ဒီနှစ်ကတော့ ကျွန်တော့်အထင်တော့ ပြန်ပြီးတော့ကောင်းလာမယ်လို့ထင်ပါတယ်။ ဘာဖြစ်လို့လဲဆိုတော့ ဥရောပဘက်က မလာနိုင်ရင်တောင်မှ အာရှဘက်က တရုတ်ခရီးသွားတွေ၊ ဟောင်ကောင်၊ မကာအို၊ ဂျပန်၊ ကိုးရီး ယားခရီးသွားတွေဘက်က ပိုလာမယ်လို့ မျှော်လင့်ထားတယ်” ဟု ၎င်းက မှတ်ချက်ပေးသည်။

ရိုလာကိုစတာ ခရီးလမ်း

မြန်မာနိုင်ငံ၏ နှစ်စဉ်ခရီးသွားဝင်ရောက်မှုသည် ရိုရာကိုစတာခရီးလမ်းနှင့် ဆင်တူသည်။

အတက်အကျ၊ အနိမ့်အမြင့်များ ခြင်းကြောင့် ဖြစ်သည်။ ၁၉၆၂-၁၉၈၈ ခုနှစ် ဦးနေဝင်း ဦးဆောင်သော အစိုးရလက်ထက် အစောပိုင်းနှစ်များတွင် ပြည်ပခရီးသွားဝင်ရောက်မှုကို လုံးဝပိတ်ပင်ခဲ့သည်။ နောက်ပိုင်းတွင်မူ (နေထိုင်ခွင့် သီတင်းတစ်ပတ်) အကန့်အသတ်ဖြင့် ခွင့်ပြုခဲ့သည်။

၁၉၈၈-၂၀၁၁ ခုနှစ်မှ တပ်မတော်အစိုးရလက်ထက်တွင် နိုင်ငံတကာခရီးသွားများကို ဝင်ရောက်ခွင့်ပြုခဲ့သော်လည်း နိုင်ငံရေးအခြေအနေများ၊ အနောက်နိုင်ငံများ၏ စီးပွားရေးဒဏ်ခတ်ပိတ်ဆို့မှုများကြောင့် ခရီးသွားများအတွက် စိန်ခေါ်မှုအခက်အခဲများစွာ ရှိခဲ့သည်။

သမ္မတ ဦးသိန်းစိန်အစိုးရလက်ထက်တွင် နိုင်ငံရေး၊ စီးပွားရေးပြုပြင်ပြောင်းလဲမှုများ ပြုလုပ်ခဲ့ပြီးနောက် ခရီးသွားလုပ်ငန်းမှာ တမုဟုတ်ချင်း တိုးတက်လာသည်။ ၂၀၁၁ ခုနှစ်တွင် မြန်မာနိုင်ငံသို့ ပြည်ပခရီးသွားဝင်ရောက်မှု ရှစ်သိန်းဝန်းကျင်သာရှိသော်လည်း ၂၀၁၇ ခုနှစ်တွင် ၄ ဒသမ ၇ သိန်းသို့ ရောက်ရှိခဲ့သည်။

အမျိုးသားဒီမိုကရေစီအဖွဲ့ချုပ် အစိုးရလက်ထက်တွင် ၂၀၁၆ ခုနှစ်တွင် ခရီးသွား ၂ ဒသမ ၆ သန်းသို့ ကျဆင်းခဲ့ပြီး ၂၀၁၇ ခုနှစ်တွင် ၃ ဒသမ ၄ သန်းသို့ ပြန်လည်မြင့်တက်လာသည်။

မြန်မာနိုင်ငံတွင် လည်ပတ်ရန်ကောင်းမွန်သော ခရီးစဉ်ဒေသများစွာရှိသော်လည်း ပြည်ပခရီးသွားများကို ဆွဲဆောင်နိုင်မှုအားနည်းနေဆဲဖြစ်ကြောင်း ခရီးသွားလုပ်ငန်းရှင်များက ထောက်ပြကြသည်။

အိမ်းနီးချင်း ထိုင်းနိုင်ငံ၏ ပြည်ပခရီးသွားဝင်ရောက်မှုသည် နှစ်စဉ်တိုးတက်နေပြီး ၂၀၁၇ ခုနှစ်တွင် ပြည်ပ ခရီးသွား ၃၅ သန်းခန့် ဝင်ရောက်ခဲ့သည်။ မြန်မာနိုင်ငံသည် လာမည့် ၂၀၂၀ ပြည့်နှစ်တွင် ခရီးသွားခုနစ်သန်းဝင်ရန် မျှော်မှန်းထားရာ ထိုင်းနိုင်ငံနှင့် နှိုင်းယှဉ်လျှင် များစွာလျော့နည်းဦးမည် ဖြစ်သည်။

လက်ရှိတွင် အာရှနိုင်ငံများကို ဗီဇာဖြေလျှော့မှုပေးလိုက်သော်လည်း ပြည်ပလှည်ခရီးသွားများ အဓိကလည်ပတ်သော ရွှေတိဂုံဘုရားနှင့် ပုဂံဒေသတို့တွင် ပြည်ပခရီးသွားများ ဝင်ရောက်မှုလျော့နည်းနေဆဲဖြစ်သည်။

၂၀၁၇ ခုနှစ် အောက်တိုဘာလတွင် ရွှေတိဂုံဘုရားသို့ ခရီးသွား ၁၈၁၉ ဦး ဝင်ရောက်ခဲ့သော်လည်း ၂၀၁၈ ခုနှစ် အောက်တိုဘာတွင် ၁၇၂၅ ဦး ဝင်ရောက်ခဲ့သည်။ စုစုပေါင်း ၉၄ ဦး လျော့နည်းသွားသည်။

နိုဝင်ဘာ ခရီးသွားမြင့်မားရာသီတွင် ပုဂံခရီးသွားဇုန်သို့ ပြည်ပခရီးသွားဝင်ရောက်မှုမှာလည်း ကျဆင်းနေသည်။ ယခင်နှစ် နိုဝင်ဘာလက ပုဂံဒေသသို့ တစ်ရက်လျှင် ပြည်ပခရီးသွား ၁၃၀၀ ခန့်ဝင်သော်လည်း ယခုနှစ်တွင် ခရီးသွား ၁၀၀၀ ဝန်းကျင်သာဝင်ကြောင်း ဟိုတယ်နှင့် ခရီးသွားလာရေးဝန်ကြီးဌာန (ပုဂံဌာနခွဲ) ထံမှ သိရသည်။

ပြည်ပခရီးသွားများအတွက် ရောင်းချသော အမှတ်တရပစ္စည်းအရောင်းဆိုင်များ၊ စားသောက်ဆိုင်များတွင် ပြီးခဲ့သည့်ခရီးသွားရာသီများကဲ့သို့ ခရီးသည်များစည်ကားမှုမရှိကြောင်း ဧည့်လမ်းညွှန်တစ်ဦးကဆိုသည်။

တောင်ကြီးတန်ဆောင်တိုင် မီးပုံးပျံပွဲတော်ကြောင့် နိုင်ငံခြားခရီးသွားများ စိတ်ဝင်စားသည့် တောင်ကြီး၊ အင်းလေးဒေသတွင်လည်း ခရီးသွားဝင်ရောက်မှု သိသိသာသာလျော့ကျနေကြောင်း ခရီးသွားလုပ်ငန်းအသိုင်းအဝိုင်းထံမှသိရသည်။

၂၀၁၇ ခုနှစ် နိုဝင်ဘာလတွင် ခရီးသွားလုပ်ငန်းကုမ္ပဏီတစ်ခုလျှင် ပြည်ပခရီးသွား ၄၀၀၊ ၅၀၀ ခန့် ဝင်ရောက်ခဲ့သော်လည်း ယခုနှစ်တွင် တစ်ရာကျော်သာ ကြိုတင်စာရင်းပေးထားကြကြောင်း မြန်မာနိုင်ငံခရီးသွားလုပ်ငန်းရှင်များအသင်း (ရှမ်း/တောင်ဇုန်) ဥက္ကဋ္ဌ ဦးဇော်ဌေးအောင်က ဆိုသည်။

ရခိုင်ပြည်နယ်အရေးကြောင့် အနောက်နိုင်ငံခရီးသွားများ ဆက်လက်ကျဆင်းနေမည်ဆိုလျှင် မြန်မာ့ခရီးသွားအနာဂတ်သည် ပိုမိုမှေးမှိန်သွားဖွယ်ရှိသည်။ သို့သော် စိတ်ပျက်နေရုံနှင့် မပြီးပေ။ ဒေသတွင်းနိုင်ငံများနှင့်ယှဉ်၍ ဈေးကွက်ဝေစု ကြိုးစားရယူရမည်ဖြစ်ကြောင်း ဦးဖြိုးဝေရာဇာက ဆိုသည်။

လက်ရှိတွင် ခရီးသွားလုပ်ငန်းကျဆင်းနေသည်ဟုဆိုသော်လည်း အာရှခရီးသွားများကို ဗီဇာဖြေလျှော့လိုက်ခြင်းကြောင့် ခရီးသွားကဏ္ဍအပေါင်းလက္ခဏာလည်းဖြစ်သည်။

ခရီးသွားလုပ်ငန်းရှင်များအနေနှင့် ဝင်ရောက်လာသောခရီးသွားများကို ကုန်ကျစရိတ်နှင့် ညီမျှကောင်းမွန်သော ဝန်ဆောင်မှု၊ ခရီးစဉ်များတွင် ကျေနပ်ပျော်ရွှင်မည့်ဝန်ဆောင်မှုများ ဖြည့်ဆည်းပေးလျှင် ရေရှည်တွင် ပြန်လည်တိုးတက်လာမည်ဟု ၎င်းက ယုံကြည်သည်။

ယင်းနှင့် ပတ်သက်၍ ၎င်းက ယခု ကဲ့သို့ ဆိုသည်။

“ရေရှည်ကို Sustainable ဖြစ်အောင်လုပ်မှာဆိုတော့ တစ်နှစ်၊ နှစ်နှစ်တော့ အောင့်အီးပြီးတော့လုပ်ရမှာပါပဲ။ အခုနှစ်အတွက်တော့ ဧည့်သည်နည်းသွားတယ်။ နည်းသွားတဲ့အတွက် ရပ်လိုက်လို့ မရဘူး” 

 

နိုင်လင်းအောင်

You may also like...

Leave a Reply

Your email address will not be published. Required fields are marked *