ကားဟောင်းကားသစ် လွန်ဆွဲပွဲ

အဟောင်းနှင့် အသစ်ကြား လွန်ဆွဲပွဲများက ကမ္ဘာအနှံ့အပြားတွင် ပြင်းထန်လျက်ရှိသည်။

မြန်မာ့ကားဈေးကွက်တွင်လည်း ထိုနည်းတူပင် ဖြစ်သည်။

ကားအဟောင်း ဈေးကွက်နှင့် ကားအသစ်ဈေးကွက်မှာ လွန်ဆွဲလျက်ရှိသည်။ လွန်ခဲ့သည့် ၂ နှစ်ခန့်ကမူ မြန်မာ့ကားဈေးကွက်တွင် Brand New ကားများ၏အခန်းကဏ္ဍမှာ မထင်မရှား ဝိုးတဝါးပင် ရှိနေခဲ့သည်။

ယခုကား ထိုသို့ မဟုတ်တော့ပေ။ ရန်ကုန်ကားဈေးကွက်ကို Brand New ကားများက ကြီးစိုးစပြုလာသည်။ ထို့ကြောင့်ပင် ကားဟောင်း အရောင်းသမားများ၊ တစ်ပတ်ရစ်ကားတင်သွင်းသူများမှာ အခက်ကြုံလျက်ရှိနေပြီ ဖြစ်သည်။

လာမည့် ၂၀၁၉ ခုနှစ်တွင် မြန်မာ့ ကားဈေးကွက်ကို မည်သည့်ကားများက လွှမ်းမိုးလာမည်နည်း။ ကားဟောင်းလား၊ Brand New လားဆိုသည်က စိတ်ဝင်စားဖွယ် ဖြစ်သည်။

အလဲထိုးခံ တစ်ပတ်ရစ်

ပြီးခဲ့သည့် ၂၀၁၇ ခုနှစ်ခန့်မှစ၍ ၂၀၁၈ ခုနှစ်အတွက် မော်တော်ယာဉ် တင်သွင်းမှုမူဝါဒကို ထုတ်ပြန်ရာတွင် ဘယ်မောင်းများကိုသာ တင်သွင်းရန် ဆုံးဖြတ်ခဲ့ကြသည်။ ထို့ကြောင့် ၂၀၁၈ ခုနှစ် ဇန်နဝါရီလ ၁ ရက်မှစ၍ မော်တော်ယာဉ်တင်သွင်းရာတွင် ဘယ်မောင်းများသာ တင်သွင်းခဲ့ကြသည်။

ဘယ်မောင်းများသည် ဂျပန်တစ်ပတ်ရစ်ဈေးကွက်ကို အလဲထိုးခဲ့သည်။ ဂျပန်တစ်ပတ်ရစ်ကား တင်သွင်းမှုမှာ လျော့ကျခဲ့ရသည်။

ထို့ပြင် ၂၀၁၈ မော်တော်ယာဉ်မူဝါဒတွင် မော်ဒယ်လ်နှစ်သတ်မှတ်ချက်ကို မြှင့်ထားခဲ့သောကြောင့်လည်း ဂျပန်ကားတစ်ပတ်ရစ်ဈေးကွက်မှာ အထိနာခဲ့ရကြောင်း တစ်ပတ်ရစ်မော်တော်ယာဉ်ဝယ်ရောင်းလုပ်ကိုင်သူ ဦးအောင်သန်းဝင်းက ရှင်းပြသည်။

“ဖြစ်စေချင်တာကတော့ ဘယ်မောင်း၊ ညာမောင်း ကြိုက်တာသွင်းပါစေပေါ့ဗျာ။ မော်ဒယ်လ်သတ်မှတ်ချက်ကတော့ ထားပါတော့”ဟု ၎င်းက သူ့ဆန္ဒကို ဖွင့်ဟသည်။

ထိုစဉ်ကမူ ဘယ်မောင်းများကို ဂျပန်မှမဟုတ်ဘဲ ဥရောပသို့ ခြေဆန့်ဝယ်ယူကာ ပြည်တွင်းသို့ သွင်းရန် ကြံစည်ခဲ့ဖူးသူများလည်းရှိသည်။ ဂျပန်နိုင်ငံမှ ဥရောပသို့ တင်ပို့သော ဘယ်မောင်းကားများမှာလည်း တစ်ပတ်ရစ်ဆိုပါက ဥရောပမှ မြန်မာသို့ ပြန်လည်တင်ပို့ရမည်ဖြစ်ရာ သင်္ဘောခနှင့် CIF (ဆိပ်ကမ်းအရောက် စည်းကျပ် တန်ဖိုး) မြင့်မားလျက်ရှိသည်။ ထို့ကြောင့် ထင်သလောက် မလွယ်ခဲ့ပေ။

တစ်ပတ်ရစ်ကားတင်သွင်းသူများသာမက တစ်ပတ်ရစ်ကားအရောင်းစင်တာများလည်း ဘယ်မောင်းမူဝါဒ၏ ဒဏ်ကို ခံစားခဲ့ရကြောင်း KL Seven ကားအရောင်းစင်တာမှ အုပ်ချုပ်မှုဒါရိုက်တာ ကိုကြည်သာဟန်က ဆိုသည်။

“ရပ်တန့်လုနီးပါးဖြစ်နေတာက ကားအရောင်းစင်တာတွေပါ။ ယခင်နှစ်တွေက တင်သွင်းခဲ့တဲ့ ကားတွေတောင် ကျွန်တော့်ဆီမှာ ရှိသေးတယ်။ ၂၀၁၂ မော်ဒယ်လ်လေးတွေ။ မရောင်းရသေးဘူး။ နှစ်ပေါက်နေပြီ” ဟု ၎င်းက ဆိုသည်။

သွင်းကုန်လျှော့ချရေး စတေးခံ

အစိုးရ၏မော်တော်ယာဉ်မူဝါဒသည် သွင်းကုန်လျှော့ချရေးနှင့် ပြည်တွင်း၌ တစ်စိတ်တစ်ပိုင်း တပ်ဆင်ထုတ်လုပ်သည့် SKD လုပ်ငန်းများကို အားပေးရန်ရည်ရွယ်သည်ဟု မော်တော်ယာဉ်တင်သွင်းခြင်းနှင့် သက်ဆိုင်သော လုပ်ငန်းများကြီးကြပ်ရေးကော်မတီအတွင်းရေးမှူး ဦးရန်နိုင်ထွန်းက The Voice Journal  သို့ ပြောကြားသည်။

ဘယ်မောင်းများသည် နိုင်ငံတကာ စံသတ်မှတ်ချက်အရ ညာမောင်းများထက် အန္တရာယ်ပိုကင်းစေသည်ဟု သတ်မှတ်ထားကြရာ လာမည့် ၂၀၁၉ ခုနှစ်အတွက် မော်တော်ယာဉ်မူဝါဒကို ချမှတ်ရာတွင်လည်း ဘယ်မောင်း၊ မော်ဒယ်လ်နှစ် သတ်မှတ်ချက်မြင့်သော ကားများကိုသာ တင်သွင်းခွင့်ပြုခဲ့ပြန်သည်။

၂၀၁၉ မော်တော်ယာဉ်မူဝါဒတွင်မူ လူစီးမော်တော်ယာဉ်များကို ယာဉ်အိုယာဉ်ဟောင်းလဲလှယ်ခြင်းစနစ်ဖြင့် တင်သွင်းမည်ဆိုပါက အနည်းဆုံး ၂၀၁၆ ခုနှစ်ထုတ်၊ လူပုဂ္ဂိုလ်တစ်ဦးချင်းစနစ်ဖြင့် တင်သွင်းရမည်ဆိုပါက အနည်းဆုံး ၂၀၁၇ ခုနှစ်ထုတ်ဖြစ်ရန် လိုအပ်သည်။

ကုန်တင်ယာဉ်နှင့် ခရီးသည်တင်ယာဉ်များကိုမူ ယာဉ်အိုယာဉ်မောင်းစနစ်ဖြင့် တင်သွင်းသည် ဖြစ်စေ၊ လူပုဂ္ဂိုလ် တစ်ဦးချင်းစနစ်ဖြင့် တင်သွင်းသည်ဖြစ်စေ အနည်းဆုံး ၂၀၁၅ ခုနှစ်ထုတ် ဖြစ်ရန် လိုအပ်သည်။

အထက်ပါအချက်များကို ကြည့်လျှင် ရောက်ရှိခုနှစ်နှင့် ကွာဟချက်သိပ်မရှိသည့် မော်တော်ယာဉ်များကို တင်သွင်းရန်မူဝါဒက သတ်မှတ်ထားခြင်းဖြစ်သည်။

၂၀၁၈ ခုနှစ် မော်တော်ယာဉ်မူဝါဒတွင်လည်း ထိုကဲ့သို့ပင် သတ်မှတ်ခဲ့ခြင်းကြောင့် မော်တော်ယာဉ်တင်သွင်းမှုမှာ လျော့ကျခဲ့သည်။

“တင်သွင်းမှုကတော့ အခုနှစ်ပိုင်းမှာလည်းပဲ ကျနေတဲ့ သဘောရှိတယ်”ဟု မြန်မာနိုင်ငံ မော်တော်ယာဉ်တင်သွင်းထုတ်လုပ်ရောင်းချသူများအသင်း ဒုတိယဥက္ကဋ္ဌ ဦးရန်မျိုးအောင်က ဆိုသည်။

မြေတောင်မြှောက်ခံရသည့် SKD

၂၀၁၈ နှင့် ၂၀၁၉ မော်တော်ယာဉ် တင်သွင်းခွင့်မူဝါဒသည် ပြည်တွင်း၌ တစ်စိတ်တစ်ပိုင်း တပ်ဆင်ထုတ်လုပ်သည့်  SKD (Semi Knocked Down) လုပ်ငန်းများအတွက် အခွင့်အလမ်း ပိုသာစေသည်ဟု မြန်မာ့မော်တော်ယာဉ်ထုတ်လုပ်ရေးနှင့် ဖြန့်ဖြူးရောင်းချရေးလုပ်ငန်းရှင်များအသင်း ဥက္ကဋ္ဌဒေါက်တာစိုးထွန်းက မှတ်ချက်ပြုသည်။

လက်ရှိတွင် မြန်မာနိုင်ငံရင်းနှီးမြှုပ်နှံမှုကော်မရှင်၏ စာရင်းများအရ ဆိုပါက ပြည်တွင်း၌ SKD စနစ်ဖြင့် တပ်ဆင်ထုတ်လုပ်သည့် ကုမ္ပဏီအရေအတွက်မှာ ကိုးခုရှိသည်ဟု ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန ညွှန်ကြားရေးမှူး ဦးစိုးမြင့်အောင်က ဆိုသည်။

“ဟုတ်ပါတယ်။ အကုန်လုံး SKD  ချည်းပါပဲ။ တချို့ကလည်း ဘတ်စ်ကားထုတ်ဖို့ လာမေးကြတာ ရှိပါတယ်။ တချို့ကလည်း ခရီးသည်တင်ယာဉ်တို့၊ ကုန်ကားတို့ ဒီမှာလာထုတ်ကြဖို့ စိတ်ဝင်တစားလာမေးကြတာ ရှိပါတယ်”ဟု ၎င်းက ဆိုသည်။

ထို့ကြောင့် SKD သည် နိုင်ငံအတွက် ဦးစားပေးဖြစ်လာသည်။ ထို့ကြောင့် Brand New ကားများ၏ ဈေးကွက်မှာ ပိုမိုကောင်းမွန်လာကြောင်း ဒေါက်တာစိုးထွန်းက ဆိုသည်။

SKD စနစ်ဖြင့် တပ်ဆင်ထုတ်လုပ်သည့်ကားများတွင် ဆူဇူကီး၊ နစ်ဆန်း၊ ဖို့ဒ်တို့က ပြည်တွင်း၌ နာမည်ရလျက်ရှိသည်။

“ဆူဇူကီးရဲ့ ရောင်းအားကတော့ တစ်နှစ် တစ်နှစ်ဆိုတာထက် လစဉ်ကိုတောင် သူ့ရောင်းအားက တိုးလာတဲ့ သဘောရှိတယ်။ လစဉ်ကတော့ ရောင်းအားက အစီးရေထောင်ချီတော့ ရှိတော့ပေါ့” ဟု KL Seven ကားအရောင်းစင်တာမှ အုပ်ချုပ်မှုဒါရိုက်တာကိုကြည်သာဟန်က ဆိုသည်။

ကားသစ်များ၏ အားသာချက်

ခေတ်ပြောင်းလာသည်နှင့်အမျှ စားသုံးသူများ၏ အကြိုက်မှာလည်း ပြောင်းလဲလျက်ရှိသည်။ ယခင်ကမူ ပြည်တွင်း၌ မရှိမဖြစ်သောကြောင့် ဂျပန် တစ်ပတ်ရစ်ကားများကိုသာ သုံးစွဲနေခဲ့ရသည်။ တစ်ပတ်ရစ်ဈေးကွက်နှင့်အတူ ဘုရင့်နောင်ကားပစ္စည်းအဟောင်း ဈေးကွက်မှာလည်း တွင်ကျယ်ခဲ့သည်။ ယခုအခါ မူဝါဒအပြောင်းအလဲတွင် ကားသစ်များကို သုံးစွဲခွင့်ရလာကြသည်။ အဟောင်းနှင့်အသစ်တို့တွင် အသစ်သည် လူတို့၏သည်းခြေကြိုက်ဖြစ်သည်မှာ ဓမ္မတာပင် ဖြစ်သည်။

ထို့ပြင် မော်တော်ယာဉ်ထုတ်လုပ်သည့် ကုမ္ပဏီများကလည်း စားသုံးသူကို နည်းမျိုးစုံဖြင့် ဆွဲဆောင်လျက်ရှိပြန်သည်။ လစဉ်နီးပါးအမည်မျိုးစုံဖြင့် ပြုလုပ်လျက်ရှိသည့် မော်တော်ယာဉ်အရောင်းပြပွဲများက သက်သေပင်ဖြစ်သည်။

“ပွဲအတွင်းမှာတင် ကားအသစ်အစီးရေရာနဲ့ချီပြီး ရောင်းချခဲ့ရပါတယ်”ဟု ကားပြပွဲများကို ပြုလုပ်လေ့ရှိသည့် CarsDB (Rebbiz Co., Ltd.)  ကုမ္ပဏီ Chief Operation Officer  ဦးဝေဖြိုးကျော်က ဆိုသည်။

တစ်ဖက်တွင်လည်း ကားသစ်များတွင် အားသာချက်များ အမှန်တကယ် ရှိနေပြန်သည်။ Brand New ကားသစ် ဝယ်ယူမှုအတွက် ကနဦးပေးသွင်းငွေမှာလည်း ကားတန်ဖိုး၏ ၂၀ ရာခိုင်နှုန်းမှသည် ၃၀ ရာခိုင်နှုန်းအထိသာ ပေးသွင်းရခြင်း၊ ဇီးရိုးကီလိုမှ စတင်မောင်းနှင်နိုင်ခြင်း၊ အာမခံသုံးနှစ်မှ ငါးနှစ်အထိ ရရှိနိုင်ခြင်း၊ အသစ်နှင့် အဟောင်းကြား ဈေးနှုန်းကွာဟချက်ကျဉ်းမြောင်းလာခြင်းတို့သည်လည်း အပါအဝင်ဖြစ်သည်။ အရစ်ကျစနစ်ဖြင့် ဝယ်ယူနိုင်ခြင်းကလည်း ကားသစ်များအတွက် ဆွဲဆောင်မှုတစ်မျိုးပင် ဖြစ်သည်။

“အားအသာဆုံးကတော့ ဘဏ်တွေကနေ သုံးနှစ်၊ ငါးနှစ်အရစ်ကျစနစ်နဲ့ ဝယ်နိုင်တယ်။ အခုနောက်ဆုံးဆို ခုနစ်နှစ်အထိ ဖြစ်လာတာရှိတယ်။ ဒါတွေက အားသာချက်ပေါ့။ Used ကားတွေကတော့ ဒါမျိုး အခွင့်အလမ်း မရဘူးဗျ”ဟု ကိုကြည်သာဟန်က ဆိုသည်။

အရစ်ကျဝယ်ယူမှုအတွက် အတိုးနှုန်းမှာလည်း ဘဏ်ပေါ်လိုက်၍ ကွာခြားမှုရှိသော်လည်း တစ်နှစ် ၁၃ ရာခိုင်နှုန်းထက် မပိုပေ။ အဆိုပါနှုန်းထားသည် ဘဏ်တိုးနှုန်းပင်ဖြစ်ပြီး အချို့သော ချေးငွေအမျိုးအစားများစွာ ထက်သက်သာသည့် နှုန်းထားတစ်ရပ် ဖြစ်သည်။

ထိုထက်ပို၍ထင်သာမြင်သာရှိသည့် အားသာချက်မှာ Brand New ကားများသည် ရန်ကုန်လိုင်စင်ရရှိခြင်းပင် ဖြစ်သည်။ ဤသို့သော အကြောင်းတရားများကြောင့်ပင် ၂၀၁၉ ခုနှစ်အတွက် Brand New နှင့် တစ်ပတ်ရစ်တိုက်ပွဲ၏ အဖြေကို ကိုကြည်သာဟန်က ယခုလို ဆိုသည်။

“ပြည်ပက တင်သွင်းတဲ့ ကားဈေးကွက်ကတော့ အတော်လေးအေးစက်သွားပြီလို့ ပြောလို့ရတယ်။ ရာခိုင်နှုန်းအားဖြင့်တော့ Brand New ကားဈေးကွက်က ၂၀၁၈ ထက် ၂၀၁၉ မှာ ပိုပြီးလွှမ်းမိုးဦးမှာပါပဲ”။     

ရဲနိုင်ဦး

You may also like...

Leave a Reply

Your email address will not be published. Required fields are marked *