စတုတ္ထမြောက် စက်မှုတော်လှန်ရေးနှင့် ခေါင်းဆောင်မှုကွက်လပ်

မည်သည့်တော်လှန်ရေးတွင်မဆို လူကိုအခြေခံပြီး တော်လှန်ပြောင်းလဲရသည်။ ယနေ့တွင် စက်မှုတော်လှန်ရေး စတုတ္ထလှိုင်းဖြစ်သည့် ဒစ်ဂျစ်တယ်လှိုင်းသည် တစ်ကမ္ဘာလုံးရှိ နယ်ပယ်မျိုးစုံ၊ ဒေသမျိုးစုံကို ရိုက်ခတ်လျက်ရှိရာ ထိုလှိုင်းနှင့်အညီ မြန်မာနိုင်ငံတော်လှန်ပြောင်းလဲရန်၊ မြန်မာ့လူသားတို့ကို တော်လှန်ပြောင်းလဲရန်အတွက် ပညာရေးနယ်ပယ်သည် ဒစ်ဂျစ်တယ်လှိုင်းနှင့် ချိတ်ဆက်ရမည်။ မချိတ်ဆက်နိုင်လျှင် မြန်မာသည် ကမ္ဘာတွင် နောက်တစ်ကြိမ် ကျန်ရစ်တော့မည့်အခြေအနေနှင့် ရင်ဆိုင်နေရသည်။

၂၀၁၇ခုနှစ်က Microsoft ၏ အာရှဌာနက ပြုလုပ်သည့် စစ်တမ်း Microsoft Asia Digital Transformation Study အရ အာရှပစိဖိတ်ဒေသအတွင်းရှိ ပညာရေးနယ်ပယ်မှ ခေါင်းဆောင်များသည် စတုတ္ထစက်မှုတော်လှန်ရေးကို အမီလိုက်ရန် အလောတကြီးဖြစ်နေကြသည်။ သူတို့၏အဖွဲ့အစည်း၊ သူတို့၏တက္ကသိုလ်သည် အနာဂတ်တွင် ကြီးထွားနိုင်ရန် ဒစ်ဂျစ်တယ်အဖွဲ့အစည်းအဖြစ် အသွင်ပြောင်းရမည်ဟု ၈၇ ရာခိုင်နှုန်းက သဘောပေါက်သော်လည်း သူတို့လက်ထဲတွင် ဒစ်ဂျစ်တယ်မဟာဗျူဟာ အဆင်သင့်ဖြစ်သည်ဟု ယုံကြည်သူမှာ ၂၃ ရာခိုင်နှုန်းသာရှိသည်။ သဘောက ဒစ်ဂျစ်တယ်ပြောင်းဖို့ အများစုက သဘောပေါက်ကြသော်လည်း အဆင်သင့်မဖြစ်ကြ။ မြန်မာနိုင်ငံတွင်ရော ပညာရေးပိုင်းတွင် ဒစ်ဂျစ်တယ်ပြောင်းရန် မည်မျှသဘောပေါက်ကြပြီလဲ၊ မည်မျှအဆင်သင့်ဖြစ်ပြီလဲ။

အိမ်နီးချင်းထိုင်း၊ အာဆီယံသားချင်းဖြစ်သည့် မလေးရှား၊ အင်ဒိုနီးရှားတို့သည် စတုတ္ထမြောက်စက်မှုတော်လှန်ရေးတွင် သူတို့နိုင်ငံများ အမီလိုက်နိုင်အောင် ဒစ်ဂျစ်တယ်ပညာရေးအတွက် သဲကြီးမဲကြီး ကြိုးစားပြင်ဆင်နေသည်။ စင်ကာပူမှာမူ ဆိုဖွယ်ရာမရှိ။ ထိုင်းနှင့် အင်ဒိုနီးရှားတို့သည် မြန်မာနှင့်ဆင်တူသော အခြေအနေများရှိသည့်အတွက် မြန်မာ့ဒစ်ဂျစ်တယ်ပညာရေးအတွက် လေ့လာသင့်သောနိုင်ငံများဖြစ်သည်။

စတုတ္ထစက်မှုတော်လှန်ရေးကို အမီလိုက်ရာတွင် အာရှပစိဖိတ်ဒေသတွင်းရှိ ပညာရေးအဖွဲ့အစည်းများ ကြုံတွေ့နေရသော အခက်အခဲငါးရပ်မှာ ဆိုင်ဘာတိုက်ခိုက်မှုများနှင့် လုံခြုံရေး၊ အဖွဲ့အစည်းဆိုင်ရာ ခေါင်းဆောင်မှုကင်းမဲ့ခြင်း၊ ဒစ်ဂျစ်တယ်အရည်အသွေးရှိသည့် လုပ်သားစုကင်းမဲ့ခြင်း၊ မိမိပိုင်ဒေတာများ သူတပါးလက်ရောက်မည်စိုးရိမ်ခြင်း၊ မသေချာမရေရာသော စီးပွားရေးပတ်ဝန်းကျင်တို့ဖြစ်သည်ဟု Microsoft  ကဆိုသည်။ မြန်မာပြည်တွင်ရော အဆိုပါအခက်အခဲများ ကြုံတွေ့နေရသည်လား။

စတုတ္ထမြောက် စက်မှုတော်လှန်ရေးကို အမီလိုက်ရန် မြန်မာနိုင်ငံတွင် အဓိကကွက်လပ် ဖြစ်နေသည်မှာ ပညာတော်လှန်ရေးခေါင်းဆောင်မှုဟု The Voice Weekly က မြင်သည်။ ခေါင်းဆောင်မှုသာ အောင်မြင်လျှင် ကျန်သည့်လိုအပ်ချက်များကို ဖြေရှင်းနိုင်မည်။ 

 

အယ်ဒီတာ
၂၂.၁၁.၂၀၁၈

You may also like...

Leave a Reply

Your email address will not be published. Required fields are marked *