နိုင်ငံခြားဖြစ်အရက် ပြန်လည်ရောင်းချခွင့်ပြုသည်ဟူသော သတင်း မမှန်ဟု စီးပွား/ကူးသန်းဆို

ဓာတ်ပုံ - မိုးကျော်လွင်

ရန်ကုန်၊ နိုဝင်ဘာ၂၃

နိုင်ငံခြားဖြစ်အရက်များ ပြန်လည်ရောင်းချခွင့်ပြုသည်ဟူသော သတင်းမမှန်ကန်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန (ရန်ကုန်)ညွှန်ကြားရေးမှူး ဦးမြင့်ချိုက ပြောကြားသည်။ ပြီးခဲ့သည့် အောက်တိုဘာလဆန်းမှ စတင်၍ ရန်ကုန်တိုင်းဒေသကြီးအတွင်း နိုင်ငံခြားအရက်များ မရောင်းချရန် ပိတ်ပင်ထားခဲ့ရာမှ လက်ရှိတွင် ယာယီပြန်လည်ခွင့်ပြုလိုက်ကြောင်း ပြည်တွင်းသတင်းဌာနတစ်ခုက ရေးသားထားခြင်းအပေါ် ၎င်းက ပြောဆိုသည်။

နိုင်ငံခြားအရက်များသည် နိုင်ငံတော်က တရားဝင်တားမြစ်ထားသည့် ကုန်ပစ္စည်းဖြစ်သဖြင့် ပြည်ပနိုင်ငံများမှ တင်သွင်းခွင့်မရှိသကဲ့သို့ ဖြန့်ဖြူးရောင်းချခွင့်လည်းမရှိကြောင်း ၎င်းက ပြောကြားသည်။

“နိုင်ငံခြားအရက်တွေကို နိုင်ငံတော်အနေနဲ့ကကို တားမြစ်ကုန်အနေနဲ့ သတ်မှတ်ထားတာ။ အရက်၊ စီးကရက် ဘီယာပေါ့။ တင်သွင်းခွင့်မှ မရှိတာ။ အဲဒီ ဆိုင်မှာ ဘယ်လိုလုပ်ရောင်းမလဲ။ ဒါကို တရားဝင်ခွင့်ပြုမယ်ဆိုရင်တော့ တရားဝင်အမိန့်ကို ထုတ်ပြန်ဖို့လိုတာပေါ့။ ဒါကို နိုင်ငံတော်က ညွှန်ကြားထားတာ ဘာမှမရှိသေးဘူး”ဟု ၎င်းက ဆိုသည်။

စားသုံးသူရေးရာဦးစီးဌာနသည် နိုင်ငံခြားအရက်များအပါအဝင် တားမြစ်ကုန်ပစ္စည်းများနှင့်ပတ်သက်၍ ဈေးကွက် ကွင်းဆင်းစစ်ဆေးခြင်း၊ အများပြည်သူသတင်းပေးတိုင်းကြားချက်အရ စစ်ဆေးခြင်းများ ပုံမှန်ဆောင်ရွက်နေကြောင်း ၎င်းက ဆိုသည်။

အရက်နှင့် ဘီယာတင်သွင်းခွင့်ကို ပြည်တွင်းသို့လာရောက်သော နိုင်ငံခြားသားများအားရောင်းချရန်အတွက် Duty-Free Shop (အကောင်ခွန်လွတ်ဆိုင်)နှင့် ဟိုတယ်များကိုသာ ဟိုတယ်နှင့် ခရီးသွားလာရေးဝန်ကြီးဌာန ထောက်ခံချက်ဖြင့် တင်သွင်းရောင်းချခွင့်ပြုထားပြီး ဈေးကွက်အတွင်းရောင်းချရန် ခွင့်မပြုထားကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနထံမှ သိရသည်။

ဈေးကွက်ထဲရှိ နိုင်ငံခြားအရက်များသည် မှောင်ခိုလမ်းကြောင်းမှ တရားမဝင်တင်သွင်းသည့်အရက်များဖြစ်ပြီး ယင်းအရက်ကို FL12 ယစ်မျိုးလိုင်စင် (အရက် လက်လီ၊ လက်ကားရောင်းခွင့်ရှိပြီး ဆိုင်ဥပစာ၌ သောက်သုံးခွင့်မရှိသော အရက်အရောင်းဆိုင်) များတွင် ရောင်းချနေခြင်းကြောင့် မရောင်းချရန် အောက်တိုဘာလဆန်းအတွင်း အစိုးရက သတိပေးခဲ့သည်။

အရက်ကို တရားဝင်တင်သွင်းခွင့်ပြုရန် ညှိနှိုင်းမှုများ ပြုလုပ်နေသော်လည်း လက်ရှိအချိန်ထိ တစ်စုံတစ်ရာညွှန်ကြားချက် မထွက်ပေါ်လာသေးကြောင်း စီးပွား ရေးနှင့် ကူးသန်းရောင်းဝယ်ရေးဝန်ကြီး ဌာနထံမှ သိရသည်။

You may also like...

Leave a Reply

Your email address will not be published. Required fields are marked *