မြန်မာသို့ ဒုက္ခသည်များပြန်လာရေး အခြေအနေများ ဖန်တီးရန်လိုအပ်ချက်များကို UNHCR ထုတ်ပြန်

ရန်ကုန်၊ နိုဝင်ဘာ၂၃

မြန်မာနိုင်ငံသို့ ဒုက္ခသည်များပြန်လာရေးအတွက် အထောက်အကူပြု မည့်အခြေအနေများဖန်တီးရန် လိုအပ်သည့်အချက်များကို ကုလသမဂ္ဂဒုက္ခသည်များဆိုင်ရာမဟာမင်းကြီးရုံး (UNHCR) က နိုဝင်ဘာလ ၂၃ ရက်နေ့တွင် ထုတ်ပြန်လိုက်သည်။

အခြေအနေများဖန်တီးရန် တာဝန်ယူခြင်းသည် မြန်မာနိုင်ငံသို့ ဒုက္ခသည်များ မိမိဆန္ဒအလျောက်ပြန်လာနေထိုင်ရန် အထောက်အကူပြုသည်ဟု ထုတ်ပြန်ချက်တွင် ဖော်ပြသည်။ အဆိုပါအခြေအနေများ ဖန်တီးရန်နှင့် ဒုက္ခသည်များ နေရပ်စွန့်ခွာထွက်ပြေးရခြင်း အခြေခံအကြောင်းရင်းကို ကိုဖီအာနန်ကော်မရှင်၏ အကြံပြုချက်များနှင့်အညီ ကြိုးစားလုပ်ဆောင်ရန် UNHCR က မြန်မာသို့ တောင်းဆိုသည်။

ဒုက္ခသည်များ မိမိဆန္ဒအလျောက် နေရပ်ပြန်လာရန် မြန်မာအစိုးရ၏ အားထည့်လုပ်ဆောင်မှုနှင့် ပြန်လာမည့် သူများကို လက်ခံရန်စတင်လုပ်ဆောင်ခြင်းကို UNHCR က ကြိုဆိုသည်။ ယင်းအချက်သည် လွတ်လပ်စွာသွားလာခွင့်၊ ဝန်ဆောင်မှုများ ရယူပိုင်ဆိုင်ခွင့်၊ အသက်မွေးဝမ်းကျောင်းအခွင့်အလမ်းများ အာမခံချက်ပေးနိုင်သည့် တိုးတက်မှုများကို အခိုင်အမာပြသရာတွင် အရေးကြီးလိမ့်မည်ဟု ထုတ်ပြန်ချက်တွင် ဖော်ပြသည်။

ယင်းလုပ်ဆောင်မှုများသည် ဒုက္ခသည်များ ၎င်းတို့နေရပ်သို့ ပြန်လာနိုင်ရန်လုံလောက်သည့် အပြောင်းအလဲများဖြစ်နေကြောင်း ဒုက္ခသည်များကို ယုံကြည်မှုရစေနိုင်မည်ဟုလည်း ဖော်ပြသည်။

ထို့အပြင်ဒုက္ခသည်များ၏ မူလနေရပ်နှင့် ပြန်လည်နေထိုင်ဖွယ်ရှိသည့်နေရာများသို့ UNHCR နှင့် UNDP ဝင်ရောက်ခွင့်အတွက် အာမခံချက်ရှိရန် မြန်မာနှင့် အဆိုပါအဖွဲ့နှစ်ခုကြား ၂၀၁၈ ဇွန်လက လက်မှတ်ထိုးသဘောတူထားသည့်အချက်များနှင့် ကိုက်ညီရန်လိုအပ်သည်ဟု ထုတ်ပြန်ချက်တွင် ဖော်ပြပါရှိသည်။

ဒုက္ခသည်များ မိမိဆန္ဒအလျောက်နှင့် ဂုဏ်သိက္ခာရှိစွာ ပြန်လာနိုင်သော အခြေအနေများ ဖော်ဆောင်နေသည့် မြန်မာအစိုးရ၏ အားထုတ်မှုများကို နိုင်ငံတကာမှ အကူအညီပေးရန်လည်း UNHCR က တိုက်တွန်းသည်။

၂၀၁၈ ခုနှစ် နိုဝင်ဘာလ ၁၁ ရက် ထုတ်ပြန်ခဲ့သည့် UNHCR မဟာမင်းကြီး၏ ထုတ်ပြန်ချက်တွင် မြန်မာသို့ ဒုက္ခသည်များကိုယ်တိုင် လာရောက်လေ့လာရန်ခွင့်ပြုရန် အလေးထားဖော်ပြခဲ့သည်။

ယင်းသည် ဒုက္ခသည်များအား ရခိုင်ပြည်နယ်အခြေအနေများကို ၎င်းတို့ ကိုယ်တိုင်လွတ်လပ်စွာလေ့လာခွင့်ရစေခဲ့ပြီး အဆိုပါ သတင်းအချက်အလက်များကိုလည်း ဘင်္ဂလားဒေ့ရ်ှရှိ အခြားဒုက္ခသည်များကို တစ်ဆင့်ပြန်လည်သတင်းစကား ပါးနိုင်သည်ဟု ထုတ်ပြန်ချက်တွင် ရေးသားထားသည်။

သင့်တင့်လျောက်ပတ်သော အနာဂတ်ကာလတွင် ဒုက္ခသည်များနှင့် ရခိုင်ပြည်နယ်အတွင်းမှ လူမှုအသိုက်အဝန်း အားလုံးအတွက် ရေရှည်တည်တံ့မည့် ဖြေရှင်းချက်ကို ပါဝင်သူအားလုံးနှင့် ဆက်လက်ပူးပေါင်းလုပ်ဆောင်သွားရန် ပြင်ဆင်ထားသည်ဟုလည်း UNHCR က ထုတ်ပြန်သည်။

ရခိုင်ပြည်နယ်အတွင်း ပဋိပက္ခ စတင်ဖြစ်စဉ်ကပင် ဘင်္ဂါလီဒုက္ခသည်များ မြန်မာနိုင်ငံရှိ ၎င်းတို့နေရပ်သို့ မိမိဆန္ဒ အလျောက်ပြန်နိုင်ရေးအတွက် ဘင်္ဂလားဒေ့ရ်ှက မြန်မာအစိုးရ၊ နိုင်ငံတကာအသိုင်းအဝိုင်းတို့နှင့် အပြုသဘောဆောင် ဆွေးနွေးညှိနှိုင်းခဲ့သည်ဟု ထုတ်ပြန်ချက်တွင် ဖော်ပြထားသည်။

ဘင်္ဂါလီဒုက္ခသည်တစ်သန်းခန့်ကို ဆက်လက်နေထိုင်ခွင့်ပေးထားသည့် ဘင်္ဂလားဒေ့ရ်ှအစိုးရကို UNHCR က အသိအမှတ်ပြုထားသည်။

You may also like...

Leave a Reply

Your email address will not be published. Required fields are marked *