စင်ကာ 4G အိမ်ရှေ့စံ ဘယ်သူလဲ

The Independent

တစ်ချိန်ချိန်တွင် မြန်မာနိုင်ငံကျော်တက်လိုသည့် စင်ကာပူမြို့နိုင်ငံတွင်  ဝန်ကြီးချုပ်လီရှန်လွန်းနေရာဆက်ခံမည့်  အိမ်ရှေ့စံတင်မြှောက်လိုက်ပါပြီ။ မြန်မာတို့နှင့် ရောယှက်ပတ်သက်နေသည့် စင်ကာပူ၊ မြန်မာနိုင်ငံသားအများအပြား ပညာသင်အလုပ်လုပ်နေထိုင်ကြသည့် စင်ကာပူ၏ အိမ်ရှေ့စံကား လက်ရှိဘဏ္ဍာရေးဝန်ကြီး Heng Swee Keat ဖြစ်သည်။ သူသည် လီရှန်လွန်းအနားယူပါက စင်ကာပူတည်ထောင်ပြီးသည့်နောက် စတုတ္ထမျိုးဆက်ဝန်ကြီးချုပ် ဖြစ်မည်။

4G ဝန်ကြီးချုပ်ဟု တင်စားကြသည်။ 4G (4th Generation) စတုတ္ထမျိုးဆက်။ တယ်လီဖုန်း 4G  မဟုတ်ပါ။

ပါတီ၏ ပထမလက်ထောက် အထွေထွေအတွင်းရေးမှူးချုပ်အဖြစ်  လက်ရှိ ဘဏ္ဍာရေးဝန်ကြီး ၅၇ နှစ်အရွယ်  Heng Swee Keat ကို ခန့်အပ်ကြောင်း  နိုဝင်ဘာ၂၃ ရက်နေ့က အာဏာရ  PAP ပါတီသတင်းစာရှင်းလင်းပွဲနှင့်အတူ ထုတ်ပြန်ကြေညာသည်။ ယင်းရာထူးသည် ဝန်ကြီးချုပ်များ အစဉ်အဆက်ရယူခဲ့သည့်နေရာ  ဖြစ်သည်။

လီကွမ်ယုသည် စင်ကာပူတွင်  ပထမဆုံးဝန်ကြီးချုပ်။ လီကွမ်ယုနောက်တွင် ဂိုချောက်တောင် ဝန်ကြီးချုပ် ဖြစ်လာသည်။ ဂိုချောက်တောင်အပြီးတွင် လက်ရှိဝန်ကြီးချုပ် လီရှန်လွန်းတက်လာသည်။ ဝန်ကြီးချုပ် လီရှန်လွန်းသည် ၆၆ နှစ်ရှိပြီ ဖြစ်ပြီး ၂၀၀၄ ခုနှစ်ကတည်းက ဝန်ကြီးချုပ် ဖြစ်သည်။

စင်ကာပူ နိုင်ငံရေးစနစ်သည် ထူးဆန်းသည်။ ရွေးကောက်ပွဲပုံမှန်ရှိသော်လည်း တစ်ပါတီတည်းက အုပ်ချုပ်သည်။  ၁၉၆၅ လွတ်လပ်ရေးရပြီးနောက်ပိုင်းကတည်းက လက်ရှိအာဏာရပါတီ PAP  သာ တောက်လျှောက် ရွေးကောက်ပွဲ နိုင်သည်။ ထိုပါတီသည် စင်ကာပူကို ဖွံ့ဖြိုးဆဲ ချို့ချို့ငဲ့ငဲ့နိုင်ငံအဖြစ်မှ မာမာချာချာ ဖွံ့ဖြိုးပြီးနိုင်ငံအဖြစ် ဆွဲခေါ်နိုင်သည့်အတွက် ပြည်သူထောက်ခံမှုမူ မြင့်မားသည်။

တစ်ပါတီတည်းအုပ်ချုပ်သောကြောင့် စင်ကာပူ ထိပ်ဆုံးခေါင်းဆောင်မှုအလွှဲအပြောင်းသည် ရွေးကောက်ပွဲနည်းနှင့် မဟုတ်ဘဲ ပါတီတွင်းလွှဲပြောင်းမှုနှင့် သွားသည်။ ခေါင်းဆောင်သစ်ကို ပါတီက ရွေးရာတွင် အချင်းချင်းပြန်ရွေးသော  စနစ်ကို ကျင့်သုံးလေ့ရှိသည်။ လက်ရှိ ဝန်ကြီးချုပ်က ဘေးထွက်ထိုင်နေပြီး ကျန်သူများက အချင်းချင်းထဲမှ ခေါင်းဆောင်ခြေစွမ်းရှိသူကို ပြန်ရွေးကြသည်။ ထို့ကြောင့် ဝန်ကြီးချုပ်လောင်းလျာရွေးရာတွင် လက်ရှိဝန်ကြီးချုပ်၏ သဘောဆန္ဒသည် အရေးကြီးသော်လည်း လုပ်ဖော်ကိုင်ဖက်များ၏ သဘောထားပေါ်လည်း များစွာတည်သည်။ သူနှင့်တွဲလုပ်ဖူးသူများ၏ ထောက်ခံချက်မရလျှင် ဝန်ကြီးချုပ်ဖြစ်လာဖို့ မလွယ်ပါ။

ဝန်ကြီးငယ်များသည် သူတို့၏ ခေါင်းဆောင်ကိုရွေးရန် လွန်ခဲ့သောလများအတွင်း တိုင်ပင်နေကြကြောင်း  ဝန်ကြီးချုပ် လီရှန်လွန်းက PAP ပါတီ၏  Facebook စာမျက်နှာတွင် လွန်ခဲ့သော လက ရေးသားသည်။

စင်ကာပူ၏ ခေါင်းဆောင်မှုသည် ခေါင်းဆောင်တစ်ဦးတည်းပေါ်ထက် အဖွဲ့လိုက်ခေါင်းဆောင်မှုဖြင့် သွားသည်။  လီကွမ်ယုသည် စင်ကာပူတည်ထောင်သူ ဖခင်ကြီးဟု အလွန်လေးစားခံရသော်လည်း အခြားသူများနှင့်အတူ အဖွဲ့လိုက်ဦးဆောင်သည်။ ယခုလည်း Mr Heng နှင့် အတူ ပူးတွဲခေါင်းဆောင်မည့်သူများ ထွက်ပေါ်လာသည်။

အသက် ၄၉ နှစ်ရှိ ကုန်သွယ်ရေးနှင့် စက်မှုဝန်ကြီး Chan Chu Sing သည်  ဒုလက်ထောက် အထွေထွေ အတွင်းရေးမှူးချုပ် ဖြစ်လာမည်။ ၅၉ နှစ်ရွယ် ကျန်းမာရေး ဝန်ကြီး Gam Kim Yong သည် ပါတီဥက္ကဋ္ဌအဖြစ် အရွေးခံရသည်။ စင်ကာပူ၏  တတိယမြောက်ခေါင်းဆောင်မှု အပြောင်းအလဲနီးကပ်လာသည်နှင့်အမျှ ခေါင်းဆောင်အဖွဲ့တွင် ထိုဝန်ကြီးနှစ်ဦးသည်လည်း အခရာ ဖြစ်သည်။ ပါတီအထွေထွေအတွင်းရေးမှူးချုပ်ရာထူးကို ဝန်ကြီးချုပ်လီရှန်လွန်းက ဆက်ယူထားသည်။ ကျန်းမာရေးပြဿနာအချို့ ရင်ဆိုင်နေရသော လီရှန်လွန်းသည်  အသက် ၇၀ ပြည့်ချိန် ၂၀၂၂ ခုနှစ် ဖေဖော်ဝါရီ တွင် အနားယူလိုကြောင်း ထုတ်ပြောထားသည်။ ထို့ကြောင့် အိမ်ရှေ့စံ Mr.Heng နှင့်တကွ သူ့လက်တွဲဖော်များအတွက်  စာမေးပွဲကာလ သုံးနှစ်ဖြစ်သည်။ သုံးနှစ် အတွင်း သူသည် ခေါင်းဆောင်မှုကို ပြသရမည်။ ရွေးကောက်ပွဲ နောက်နှစ်ကျင်းပဖွယ် ရှိသည်။ ရွေးကောက်ပွဲရလဒ်ကောင်း ထွက်အောင် လုပ်ရမည်။ ပြည်သူလူထု  ယုံကြည်အောင် စွမ်းဆောင်ရမည်။

Mr Heng သည် နိုင်ငံရေးသမားမဟုတ်ဘဲ အစိုးရဝန်ထမ်းဘ၀မှ တစ်ဆင့်ပြီး တစ်ဆင့် တက်လာသူဖြစ်သည်။ ရဲအဖွဲ့တွင် အစိုးရဝန်ထမ်းဘ၀ စသည်။

စင်ကာပူဗဟိုဘဏ် Monetary Authority of Singapore MAS ၏ အုပ်ချုပ်မှုဒါရိုက်တာအဖြစ် ၂၀၀၅ မှ  ၂၀၁၁ အထိ တာဝန်ယူခဲ့သည်။ နိုင်ငံရေးလောကသို့ ၂၀၁၁ တွင် ဝင်ရောက်ခဲ့ပြီး ရွေးကောက်တင်မြှောက်ခံရသည်။ ရွေးကောက်ပွဲ ပြီးပြီးချင်း သူ့ကို လီရှန်လွန်းက ကျန်းမာရေးဝန်ကြီးအဖြစ် တာဝန်ပေးသည်။ ၂၀၁၅တွင် ဘဏ္ဍာရေးဝန်ကြီး ဖြစ်လာသည်။ ဝန်ကြီးချုပ် လီရှန်လွန်း၏ ဖခင်၊ စင်ကာပူတည်ထောင်သူ လီကွမ်ယု၏ Principal Private Secretary PPS အဖြစ် ၁၉၉၇ မှ ၂၀၀၀ ခုနှစ်အတွင်း လုပ်ကိုင်ခဲ့သေးသည်။

အစိုးရအဖွဲ့တွင်း ခပ်မြန်မြန်တက်လာသော Mr Heng ၏ နိုင်ငံရေးအလုပ်အကိုင်သည် ၂၀၁၆ မေတွင် အစိုးရအဖွဲ့ အစည်းအဝေးကျင်းပစဉ် ဦးနှောက်တွင်း သွေးယိုစီးမှု ဖြစ်ပွားခဲ့ခြင်းကြောင့် တုံ့ဆိုင်းခဲ့သော်လည်း အမြန် ပြန်နာလန်ထလာသည်။

သေးသလောက် အဆိပ်ပြင်းသော  စင်ကာပူသည် စတုတ္ထမြောက်မျိုးဆက်ခေါင်းဆောင်ကို ရွေးချယ်လိုက်ပါပြီ။  အိမ်ရှေ့စံ၏ လက်ရုံးရည် နှလုံးရည်တို့ကို လာမည့် သုံးနှစ်တွင် စင်ကာပူသားတို့ သာမက မြန်မာတို့ကပါ တစေ့တစောင်း အကဲခတ်နေပါလိမ့်မည်။       

ဝိဇ္ဇာ

You may also like...

Leave a Reply

Your email address will not be published. Required fields are marked *