ဘဏ်ခွဲများစွာ ဖွင့်လှစ်ထားနိုင်ခြင်းသည် ပြည်ပဘဏ်များနှင့် ယှဉ်ပြိုင်ရာ၌ ပြည်တွင်းဘဏ်များ၏ အားသာချက်ဟုဆို

ရန်ကုန်၊ နိုဝင်ဘာ ၂၃

ပြည်တွင်းဘဏ်များက နေရာဒေသများစွာတွင် ဘဏ်ခွဲများစွာဖွင့်လှစ် ထားနိုင်ခြင်းသည် ပြည်ပဘဏ်များနှင့် ယှဉ်ပြိုင်ရချိန်တွင် အားသာချက်များ ဖြစ်လာမည်ဟု ဗဟိုဘဏ်အငြိမ်းစားဒုတိယဥက္ကဋ္ဌဦးသန်းလွင်က The Voice Journal သို့ ပြောကြားသည်။

ပြည်တွင်းဘဏ်များသည် ငွေပင် ငွေရင်း၊ ဘဏ္ဍာရေးဆိုင်ရာနည်းပညာနှင့် ဝန်ထမ်းကျွမ်းကျင်မှု အစရှိသည်တို့တွင် နှစ်ပေါင်းများစွာ နောက်ကျနေသောကြောင့် ပြည်ပဘဏ်များနှင့် မယှဉ်ပြိုင်နိုင်ကြောင်း ၎င်းက ဆိုသည်။

“အဲဒါက Retail Banking မှာ ဘဏ်ခွဲတွေ များများဖွင့်ရင် သူတို့ကို ကျော်သွားနိုင်တယ်။ သူတို့ အန်ကယ်လ်တို့ကို မမီနိုင်ဘူး။ ဆိုပါစို့ ဗဟိုဘဏ်က နေမင်း (နိုင်ငံခြားဘဏ်)တို့ကို ဘဏ်ခွဲတွေ ဖွင့်ချင်သလောက် ဖွင့်ကွာဆိုရင်တောင် သူတို့က ဒီက အထာတွေ မသိသေးဘူး”ဟု ဦးသန်းလွင်က ဆိုသည်။

ဥပမာအားဖြင့် ကမ္ဘောဇဘဏ်သည် မြေကွက်များ ဈေးပေါစဉ်ကတည်းပင် ဝယ်ယူထားခဲ့ပြီးနောက် ဘဏ်ခွဲများစွာ ဖွင့်လှစ်ထားခဲ့ပြီး နိုင်ငံခြားဘဏ်များ ဝင်ရောက်လာချိန်တွင် မြေဈေးများကြီးမြင့်ခြင်း၊ အဆောက်အအုံဆောက်လုပ်ရန် အချိန်ယူရမည်ဖြစ်ခြင်းနှင့် အခြားသော ရေမီးလိုအပ်ချက်များလည်း ဖြည့်ဆည်းရန် အချိန်ယူရမည်ဟု ၎င်းက ဆိုသည်။

ထိုပြင် ဘဏ်ခွဲများစွာ ဖွင့်လှစ်ထားနိုင်ခြင်းကြောင့် ကိုကာကိုလာကဲ့သို့ နိုင်ငံ တစ်ဝန်းဖြန့်ချိသည့် အချိုရည်ကုမ္ပဏီက ၎င်းတို့ လုပ်ငန်းအတွက်ငွေကြေးများ လွှဲပြောင်းရာတွင် ဘဏ်ခွဲများစွာဖွင့်လှစ်ထားနိုင်ခဲ့သည့် ကမ္ဘောဇဘဏ်ကိုပင် အားကိုးခဲ့ရကြောင်း ၎င်းက ရှင်းပြသည်။

“အန်ကယ်လ်တို့ Strategy ကဘာလဲဆိုရင် ဘဏ်ခွဲတွေ အများကြီးဖွင့်ခြင်းအားဖြင့် တစ်ချိန်ကျရင် နိုင်ငံခြားဘဏ်တွေ ဝင်လာလို့ရှိရင် အားသာချက်က ဘာပဲပြောပြော သူတို့ကို (ဘဏ်ခွဲတွေ ဖွင့်ထားတာကို) အားကိုးရမှာ”ဟု ဦးသန်းလွင်က ဆိုသည်။

ဦးသန်းလွင်သည် ဘဏ်ခွဲပေါင်း ၅၀၀ ကျော် ဖွင့်လှစ်ထားနိုင်သည့် ကမ္ဘောဇဘဏ်၏ အကြီးတန်းအကြံပေးလည်း ဖြစ်သည်။

နိုင်ငံခြားဘဏ်ဘဏ်ခွဲများကို ပြည်တွင်း စီးပွားရေးလုပ်ငန်းများအတွက် ဘဏ်လုပ်ငန်းဝန်ဆောင်မှုဆောင်ရွက်ရန် ခွင့်ပြုကြောင်း ဗဟိုဘဏ်က နိုဝင်ဘာ ၈ ရက်တွင် ညွှန်ကြားချက်တစ်ရပ်ထုတ်ပြန်ခဲ့သည်။

ယင်းသို့ ပြုလုပ်ရခြင်းသည် ပြည်တွင်းစီးပွားရေးလုပ်ငန်းများ ဘဏ္ဍာငွေရရှိနိုင်မည့် အခွင့်အရေး (Access to Finance) အတွက် ရည်ရွယ်ပြီး နိုင်ငံခြားဘဏ်များကို မည်သည့်ချေးငွေဖြည့်ဆည်းမှု (Any Financing) ကို မဆိုဆောင်ရွက်ခြင်းနှင့် အခြားဘဏ်လုပ်ငန်းဝန်ဆောင်မှုများ (Other Banking Service) ဆောင်ရွက်ခြင်းတို့ကို ခွင့်ပြုကြောင်း အဆိုပါညွှန်ကြားချက်တွင် ဖော်ပြထားသည်။

လက်ရှိအချိန်၌ မြန်မာနိုင်ငံတွင် နိုင်ငံပိုင်ဘဏ် ဘဏ်လေးခု၊ ပုဂ္ဂလိက ဘဏ် ၂၇ခု နှင့် နိုင်ငံခြားဘဏ် ဘဏ်ခွဲ ၁၃ ခု လုပ်ကိုင်လျက်ရှိသည်။

You may also like...

Leave a Reply

Your email address will not be published. Required fields are marked *