မြန်မာတိုင်း ဖတ်သင့်တဲ့စာအုပ်

ဝက်တွေကို ဇာတ်လိုက်တင်ထားတဲ့ ဒီစာအုပ်ဟာ လူတွေ ဖတ်သင့်တဲ့ စာအုပ်တွေထဲမှာ ထိပ်ဆုံးကပဲ။ ဘာ့ကြောင့်လဲဆိုတော့ ဝက်တွေကို ပြောသလိုလိုနဲ့ လူတွေ အကြောင်းကို  ကွက်ကွက်ကွင်းကွင်း မြင်လာအောင် ရေးပြထားတဲ့ စာအုပ်ဖြစ်လို့ပဲ။ လူတွေထဲမှာမှ မြန်မာတွေက ပိုဖတ်သင့်တယ်။ ဘာလို့လဲ။ နှစ်ချက်ရှိတယ်။ နံပါတ်တစ် အချက်။ စာရေးသူ George Orwell က မြန်မာပြည်မှာ နေထိုင်အမှုထမ်းခဲ့တယ်။ နံပါတ်နှစ်အချက်။ Orwell ဟာ အာဏာရှင်စရိုက်ကို  အကောင်းဆုံးရေးသားဖော်ပြသွားခဲ့သူတစ်ဦး ဖြစ်တယ်။ မြန်မာနိုင်ငံက အာဏာရှင်စနစ်အောက်မှာ အချိန်အတန်ကြာ နေခဲ့ဖူးတယ်။

စိုက်ပျိုးမွေးမြူရေးခြံ Manor Farm က ကြက်၊  ဘဲ၊ နွား၊မြင်း၊ ဝက်စတဲ့ တိရစ္ဆာန်တွေက ခြံရှင် Jones ကို စုရုံးမောင်းထုတ်လိုက်ပြီး Animal Farm  အဖြစ် ပြောင်းလိုက်ကြတယ်။ ဦးဆောင်သူတွေက ဉာဏ်အကောင်းဆုံးဖြစ်တဲ့ ဝက်တွေ။ ခြေနှစ်ချောင်းဖြစ်တဲ့ လူတွေက သူတို့ကို  ကုပ်သွေးစုပ်ကြတယ်လို့ စိတ်နာနေတဲ့ တိရစ္ဆာန်တွေဟာ ‘Four legs good, two legs bad’ ‘ ခြေလေးချောင်းဆို ကောင်း။ ခြေနှစ်ချောင်းဆို ဆိုး။}  ဆိုတဲ့ ကြွေးကြော်သံနဲ့  သူတို့ခြံကို တည်ဆောက်ကြတယ်။ လူတွေက သူတို့ကို ဖိနှိပ်အုပ်စိုးခဲ့ကြတဲ့အတွက် သူတို့ခြံမှာ အားလုံးသာတူညီမျှ ဖြစ်ရမယ်ဆိုပြီး ‘All animals are equal.’ လို့ အားလုံးသဘောတူ ဥပဒေပြဋ္ဌာန်းလိုက်တယ်။ ဒါပေမဲ့ ဒါဟာ ခဏပဲ  ကြာလိုက်တယ်။ တဖြည်းဖြည်းနဲ့ အာဏာလုပွဲတွေ ဖြစ်လာပြီး နောက်ဆုံးမှာ ဝက်တွေက လူတွေနေရာကို အစားထိုးဝင် ယူလိုက်ကြတယ်။ ‘All animals are equal.’ လို့ ဥပဒေ ပြဋ္ဌာန်းထားရာကနေ ‘All animals are equal but some are more equal than others.’  ‘ တိရစ္ဆာန်တွေ အားလုံးဟာ တန်းတူရည်တူပဲ။ ဒါပေမဲ့ တချို့က တခြား တိရစ္ဆာန်တွေထက် ပိုသာတူညီမျှဖြစ်တယ်။’ လို့ ပြောင်းသွားတယ်။ အားလုံးအတူတူဖြစ်အောင် လူတန်းစားမကွဲပြားအောင် ဒိုးတူပေါင်ဖက်တိုက်ရာကနေ အာဏာလည်းရရော လူတန်းစား ပြန်ကွဲပြားသွားတာကို လှလှပပ ပြောလိုက် တဲ့စာသားပါ။ အခွင့်ရတိုင်း ဒီစာသားကို ကျွန်တော် ကိုးကားမိပါတယ်။

ဇာတ်လိုက်ဝက်တွေဟာ ဆိုဗီယက်ခေါင်းဆောင်တွေ ကို ရည်ညွှန်းရေးထားတယ်ဆိုတာ အလွယ်တကူ မြင်နိုင်တယ်။ ဒီ Animal Farm ဟာ ရုရှားတော်လှန်ရေးကို  George Orwell ရဲ့ ဘာသာပြန်ချက်ပဲ။ ဒါပေမဲ့ စာအုပ်ဟာ ရုရှားတော်လှန်ရေးနဲ့တင် ရပ်မသွားဘူး။ အာဏာနဲ့ ထိတွေ့ရင်၊ အာဏာလက်ထဲရောက်ရင် လူပျက်စီးတတ်တယ်ဆိုတဲ့ ‘Power corrupts’ သဘောကို ပြတယ်။ တော်လှန်ရေးကို ဦးဆောင်တော်လှန်သူတွေဟာ အာဏာရပြီးတဲ့အခါ ကိုယ့်ကိုယ်ကိုယ် မထိန်းနိုင်ရင်၊ သူတို့ကို ထိန်းမယ့် အထိန်းအကွပ် မရှိရင် အဆုံးမှာ သူတို့တော်လှန်ခဲ့သူတွေနဲ့ ပြန်တူသွားတယ်။ သူတို့ ပစ်ပယ်ခဲ့တာတွေကို သူတို့မက်မောလာကြတယ်၊ သူတို့ မောင်းထုတ်ခဲ့သူတွေနဲ့ လည်ပင်းပြန်ဖက်ကြတယ်။ Animal Farm စကားနဲ့ ပြောရရင် လူနေရာမှာ  ဝက်ရောက်လာတာကလွဲလို့ ကျန်တာတူတူပဲ။

George Orwell ဒီစာအုပ်စရေးချိန် ၁၉၄၃ ဟာ  ဒုတိယကမ္ဘာစစ်ကြီး ဖြစ်ပွားနေဆဲကာလ။ ဆိုဗီယက် ပြည်ထောင်စုဟာ ဗြိတိန်အပါအဝင် အနောက်နိုင်ငံတွေမှာ ရေပန်းစားနေချိန်ဖြစ်တဲ့အတွက် ထုတ်ဝေသူ မနည်းရှာလိုက်ရတယ်။ မဟာမိတ် ဆိုဗီယက်ကို တိုက်ခိုက်သလိုဖြစ်မှာ စိုးတာကြောင့် လက်ရှောင်ကြတာလည်း ပါတယ်။ စစ်ကြီးပြီးစ ၁၉၄၅ ဩဂုတ်မှ ထုတ်ဝေနိုင်ခဲ့တယ်။ ဒီစာအုပ်ဟာ  Orwell ကို လူသိများစေတဲ့ ပထမဦးဆုံးစာအုပ်ဖြစ်တယ်။  အမေရိကန်ပြည်ထောင်စုမှာ စတင်ထုတ်ဝေတဲ့ ၁၉၄၆က စပြီး လေးနှစ်အတွင်း အုပ်ရေ ခြောက်သိန်းလောက် ရောင်းရတယ်။

Orwell ဟာ မြန်မာနိုင်ငံ ကသာ၊ မေမြို့ (ပြင်ဦးလွင်)၊  မော်လမြိုင် စတဲ့ နေရာအနှံ့အပြားမှာ ၁၉၂၀ ကျော်နှစ်တွေမှာ  သွားလာလှုပ်ရှားခဲ့တယ်။ ခုလို ကမ္ဘာကျော်စာအုပ်တွေကို  ရေးသားရာမှာ သူ့ရဲ့ မြန်မာပြည်အတွေ့အကြုံတွေက တစ်နည်းတစ်ဖုံပါဝင်ခဲ့မှာ သေချာတယ်။

ကမ္ဘာ့နိုင်ငံရေးမှာရော စာပေလောကမှာပါ အချိုးအကွေ့ကို ဖန်တီးတဲ့စာအုပ်ဖြစ်တယ်။ ဒီစာအုပ်နဲ့ ၁၉၈၄  စာအုပ်နှစ်အုပ်ထွက်အပြီးမှာ အာဏာရှင်စနစ်၊ အာဏာရမက်တွေ၊ အာဏာရှင်စရိုက်တွေကို Orwellian လို့ သူ့ နာမည်တပ်သုံးနှုန်းလောက်အောင် George Orwell ဟာ ဩဇာတိက္ကမကြီးခဲ့တယ်။

ဒီစာအုပ်ကို ကျွန်တော်ဖတ်တာ အကြိမ်ပေါင်းမနည်းတော့ဘူး။ ခုလည်း ထပ်ဖတ်နေရပြန်ပြီ။ ဖတ်တိုင်းလည်း  စဉ်းစားခန်းဝင်ရတယ်။ ခုဖတ်နေတော့လည်း စဉ်းစားနေရပြန်တယ်။ စာအုပ်က ပါးသလောက် စာအုပ်က ပေးတဲ့ အသိက  နက်နဲတယ်။ စိတ်ဓာတ်ကျစရာဖြစ်ပေမယ့် ဖတ်လိုက် ပြုံးလိုက် ဖြစ်နေရတာဟာလည်း ထူးခြားပါတယ်။ ‘Do you know what would happen if we pigs failed in our duty, Jones would come back! Yes, Jones would come back!’ ‘ငါတို့ဝက်တွေ လုပ်နေတာတွေသာ မအောင်မြင်ရင် ဘာဖြစ်မလဲ မင်းတို့  သိကြရဲ့လား။ ခြံရှင်ဂျုံး ပြန်လာလိမ့်မယ်ကွ။ ဂျုံး ပြန်လာလိမ့်မယ်။’ လို့ ဝါဒဖြန့်ချိရေးဝက် Squealer က ကျန်တဲ့ တိရစ္ဆာန်တွေကို ခြောက်တဲ့နေရာတွေကတော့ အပြုံးရဆုံး ပါပဲ။

ဝက်ကနေ လူအဖြစ် ပြောင်းသွားတဲ့ ဝက်တွေဟာ  လူဆိုးတွေ၊ အာဏာမက်မောသူတွေလို့ အလွယ်တကူစွပ်စွဲ နိုင်ပေမယ့် အာဏာရရချင်း သူတို့ဟာ ဆိုးဝါးသွားတာ မဟုတ်ဘူး။ တဖြည်းဖြည်းချင်း တစ်ဆင့်ချင်း စာအုပ်ထဲမှာ  ပြောင်းလဲသွားတာပါ။ အထိန်းအကွပ်သာမရှိရင် ဘယ်သူမဆို ဝက်ကနေ လူဖြစ်သွားနိုင်တယ်လို့ သတိထားလိုက်မိတယ်။

မြန်မာတိုင်း ဖတ်သင့်တဲ့ စာအုပ်ဖြစ်တယ်။ မြန်မာဘာသာပြန်ထားတာတွေလည်း ရှိတယ်။

ဇေယျသူ      

You may also like...

Leave a Reply

Your email address will not be published. Required fields are marked *