ခေါင်းဆောင်များနှင့် အကဲဆတ်ချိန်

ယနေ့ မြန်မာ့နိုင်ငံရေးသည် ‘အကဲဆတ်’ ချိန်ရောက်နေသဖြင့် အရေးကြီးသော Player များ၊ Institution များကို ဦးဆောင်သူများအနေဖြင့် ကိုယ်၊ နှုတ်၊ နှလုံး သုံးပါးလုံး ထိန်းထိန်းသိမ်းသိမ်းဆောင်ရွက်မှသာ နိုင်ငံပြုပြင်ပြောင်းလဲရေးဖြစ်စဉ် ဆက်သွားနိုင်မည်ဖြစ်သည်။

ဒီမိုကရေစီနည်းဖြင့် ရွေးကောက်တင်မြှောက်သော အစိုးရတက်သည်မှာ သက်တမ်းထက်ဝက်ကျိုးပြီဖြစ်ပြီး နောင်လာမည့် ရွေးကောက်ပွဲအနိုင်ရရန် စိတ်ဇောကပ်နေပြီ။ ငြိမ်းချမ်းရေးဦးစားပေးဖြင့် တက်လာသော်လည်း မှန်းသလောက်မပေါက်သဖြင့် သက်ဆိုင်ရာအဖွဲ့အစည်းများသည် စိတ်အလိုမကျဘဲ ငြိမ်းချမ်းရေးဖြစ်စဉ်ကို ပြန်လည်အကဲဖြတ်နေကြသည်။ ယခင်နှစ်က စခဲ့သော ရခိုင်အရေးသည် သတင်းမီဒီယာ၊ ပြည်ထောင်စုအစိုးရ၊ ရခိုင်ပြည်နယ်အစိုးရ၊ တပ်မတော်၊ တိုင်းရင်းသားလက်နက်ကိုင်၊ နိုင်ငံရေးပါတီစသော Institution တို့အပါအဝင် မြန်မာ့စီးပွားရေး၊ နိုင်ငံရေးကို ဝါးမျိုလောင်မြိုက်နေသည်။ စီးပွားရေးသည် မျှော်မှန်းသလောက် မတိုးတက်သဖြင့် သာမန်ပြည်သူများ၊ စီးပွားရေးလုပ်ငန်းရှင်များ စိုးရိမ်နေကြသည်။ လွတ်လပ်စွာပြောရေးဆိုခွင့် အပါအဝင် ဒီမိုကရေစီရပိုင်ခွင့်များ မျှော်မှန်းသလောက်မရဟုဆိုကာ အရပ်ဘက်လူအဖွဲ့အစည်းများ၊ မီဒီယာများနှင့် အစိုးရအကြား အငြင်းပွားမှုများ ရှိနေသည်။ နဂိုကတည်းကရှိခဲ့သောအနာဟောင်းများ၊ ကျက်လုလုအနာဟောင်းများသည် ထိုပယောဂများကြောင့် သွေးစိမ်းရှင်ရှင် ပြန်ပန်းထွက်မည့်အခြေသို့ ဆိုက်လာသည်။

မြန်မာနိုင်ငံကဲ့သို့ နိုင်ငံတည်ဆောက်ရေး ပြဿနာမျိုးစုံကို တစ်နိုင်ငံတည်းတွင် တွေ့ကြုံနေရသည့် နိုင်ငံများ များများစားစား မရှိလှပါ။ ပြည်ပဧရာမဖိအား၊ ပြည်တွင်းအကွဲအပြဲတို့ ကြုံနေရသည့် နိုင်ငံများလည်း များများစားစား မရှိပါ။ အမျိုးသားရင်ကြားစေ့ရေး၊ နိုင်ငံဖွံ့ဖြိုးရေးနှင့် ပြည်ပဖိအားကို ကြံ့ကြံ့ခံရေးတို့ကို တစ်ပြိုင်နက်တည်း ဆောင်ရွက်နေရသည်မှာ ရှေ့မှပြောင်းလဲသွားသည့် နောင်တော်နိုင်ငံများကြုံတွေ့ခဲ့ရသည့် ‘အကဲဆတ်ချိန်’ ထက်ပင် အန္တရာယ်များသည်။

‘အကဲဆတ်ချိန်’ တွင် တင်းမာမှုများ ကြီးစိုးလာသည့်အတွက် အကူးအပြောင်းကာလကို ဖြစ်ပေါ်စေခဲ့သည့် ‘အလယ်အလတ်သမားများ’ နောက်ရောက်ပြီး ‘သဘောထားတင်းမာသူများ’ သည် သက်ဆိုင်ရာအဖွဲ့အစည်းအသီးသီးတွင် ရှေ့ရောက်လာတတ်သည်။ Generational Change ခေါ် မျိုးဆက်လိုက်အပြောင်းအလဲလည်း ကြုံရမည်။ သက်ဆိုင်ရာ လူ့အသိုင်းအဝိုင်းများတွင်လည်း သဘောထားတင်းမာသူများ၏ သဘောထားတို့က ပျံ့နှံ့လွှမ်းမိုးလာတတ်ကြသည်။ အဖွဲ့အစည်းတစ်ရပ်တွင် သဘောထားတင်းမာသူများ ရှေ့ရောက်လာလျှင် ယင်းနှင့်ပြိုင်ဘက် သို့မဟုတ် ဆွေးနွေးဖက်အဖွဲ့အစည်းတွင်လည်း သဘောထားတင်းမာသူများ ရှေ့ရောက်လာကြသည့်အတွက် အဆိုးကျော့သံသရာလည်ကာ အဖွဲ့အစည်းအသီးသီးတွင် သဘောထားတင်းမာသူများကြီးစိုးသွားကာ ပေါက်ကွဲလောင်ကျွမ်းနိုင်ပေသည်။

မြန်မာ့အရေးတွင် အခရာကျသည့် အစိုးရ၊ တပ်မတော်၊ မီဒီယာ၊ ပါတီ၊ လက်နက်ကိုင်အဖွဲ့များ စသည့် Institution အဖွဲ့အစည်းအသီးသီး၏ ခေါင်းဆောင်များသည် ‘အကဲဆတ်ချိန်’ ကို ပြည်သူလူထုမျက်နှာတစ်ခုတည်းသာကြည့်ပြီး ဖြတ်ကျော်ကြပါဟု The Voice Journal က မေတ္တာရပ်ခံပါသည်။

အယ်ဒီတာ
၂၇.၁၁.၂၀၁၈

You may also like...

Leave a Reply

Your email address will not be published. Required fields are marked *