တစ်ပတ်တာ လွှတ်တော်အနှစ်ချုပ်

၂၀၁၅ ခုနှစ် ရွေးကောက်ပွဲအပြီးတွင် ပေါ်ပေါက်လာသည့် ဒုတိယအကြိမ် ပြည်ထောင်စုလွှတ်တော်သက်တမ်းတွင် ယခုဆိုလျှင် ပုံမှန်အစည်းအဝေး ဆယ်ကြိမ်တိုင်လာခဲ့ပြီဖြစ်သည်။ ဆယ်ကြိမ်မြောက်ပုံမှန် အစည်းအဝေးကို ဆက်လက်၍ နိုဝင်ဘာလ ၂၆ ရက်နေ့မှ ၃၀ ရက်နေ့အထိ ကျင်းပခဲ့သည်။ ယခုတစ်ပတ် ငါးရက်တာအတွင်း ပြည်ထောင်စုလွှတ်တော်၊ ပြည်သူ့လွှတ်တော်နှင့် အမျိုးသားလွှတ်တော်တို့က ပြုလုပ်ခဲ့သည့် အစည်းအဝေးများထဲမှ ကောင်းနိုးရာရာသတင်းများကို ကောက်နုတ်ဖော်ပြခြင်းဖြစ်သည်။

ရန်ကုန်စီမံကိန်းများအတွက် ယူရိုသန်း ၇၀ ချေးရန် သမ္မတတင်ပြမှု လွှတ်တော်ဆိုင်းငံ့

ရန်ကုန်တိုင်းဒေသကြီးအတွင်း စီမံကိန်းလုပ်ငန်းများ ဆောင်ရွက် ရန်အတွက် ပြင်သစ်ဖွံ့ဖြိုးတိုးတက်ရေးအေဂျင်စီထံမှ ယူရို သန်း ၇၀ ချေးယူရန်ကိစ္စကို လွှတ်တော်က ခေတ္တဆိုင်းငံ့လိုက်သည်။

နိုဝင်ဘာလ ၂၆ ရက်နေ့တွင် အဆိုပါချေးငွေနှင့်ပတ်သက်၍ စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်းက လွှတ်တော်သို့ ပြန်လည်ရှင်းလင်းတင်ပြခဲ့သော်လည်း လွှတ်တော်အနေနှင့် ယင်းကိစ္စကို ထပ်မံစိစစ်လေ့လာနိုင်ရန်လိုအပ်နေသဖြင့် သဘောတူ၊ မတူကို မဆုံးဖြတ်သေးဘဲ ဆိုင်းငံ့လိုက်ခြင်းဖြစ်သည်။

ယင်းချေးငွေတို့ကို ရန်ကုန်တိုင်းဒေသကြီးအတွင်း သယ်ယူပို့ဆောင်ရေး၊ မြစ်ကမ်းပါးတစ်လျှောက် ဖွံ့ဖြိုးရေးနှင့် မြို့ပြယဉ်ကျေးမှု အမွေအနှစ်များ ထိန်းသိမ်းစောင့်ရှောက်ရေး မဟာဗျူဟာစီမံကိန်းတွင် သုံးစွဲမည်ဖြစ်သည်။

ရန်ကုန်ယာဉ်ကြောကျပ်မှု နည်းမျိုးစုံဖြေရှင်း

နေ့စဉ် ယာဉ်ကြောကျပ်တည်းမှုကို ရင်ဆိုင်နေရသည့် ရန်ကုန်မြို့တော်၏ပြဿနာကို နည်းမျိုးစုံနှင့် ဖြေရှင်းလျက်ရှိသည်ဟု ပို့ဆောင် ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီး ဦးကျော်လင်းက ဆိုသည်။

လမ်းမျက်နှာပြင်များ ပိုမိုကောင်းမွန်အောင်နှင့် ကျယ်ပြောလာစေရန် ဆောင်ရွက်ခြင်း၊ ရေစီးရေလာကောင်းမွန်စေရေး လုပ်ဆောင်ခြင်း တို့အပါအဝင် ခေတ်မီသည့်မီးပွိုင့်စနစ်များ တပ်ဆင်ခြင်း၊ ကုန်တင်ယာဉ်များကို အချိန်နှင့် လမ်းကြောင်းကန့်သတ်ခြင်း၊ လူသွားလာမှုနှင့် လမ်းဖြတ်ကူးမှုများ၊ စက်ဘီးများအတွက် သီးခြားလမ်းများ စီစဉ်ခြင်း စသည်တို့အပြင်  ရန်ကုန်ဘတ်စ်ကားဝန်ဆောင်မှု (YBS) စနစ်သို့ ပြောင်းလဲလိုက်ခြင်းသည်လည်း ယာဉ်ကြောကျပ်တည်းမှုကို တစ်နည်းအားဖြင့် ဖြေလျှော့ပေးရန် လုပ်ဆောင်ခြင်းဖြစ်သည်ဟု ၎င်းက ဆိုသည်။

ယာဉ်ကြောကျပ်တည်းမှုသည် ယာဉ်များ အဆမတန်တိုးများလာခြင်းသည် အကြောင်းရင်းတစ်ချက်ဖြစ်ပြီး ယခင် ၂၀၁၀ ပြည့်နှစ် မတိုင်မီက မှတ်ပုံတင်ယာဉ် တစ်သိန်းခွဲကျော်ရှိခဲ့ရာမှ ၂၀၁၁ ခုနှစ် မော်တော်ယာဉ်တင်သွင်းမှု မူဝါဒများပြောင်းလိုက်ရာ တစ်နိုင်ငံလုံးတွင် ယာဉ်စီးရေ ယခင်ထက် ဆယ်ဆ (ဆယ်သိန်းခွဲကျော်) များလာသည်ဟု ဝန်ကြီးက ဆိုသည်။

အဆိုပါပမာဏတွင် ထက်ဝက်က ရန်ကုန်မှတ်ပုံတင်ဖြင့် စီးနင်းအသုံးပြုမှုဖြစ်ပြီး ယာဉ်စီးရေ ငါးသိန်းသုံးသောင်းဝန်းကျင်ရှိသည်ဟု ဆိုသည်။

ယာဉ်ကြောကျပ်တည်းမှုများသည် ယာဉ်နှင့်လမ်း မမျှတမှု၊ လမ်းပျက်စီးမှု၊ စည်းကမ်းမဲ့ မောင်းနှင်၊ ရပ်နားမှု၊ စည်းကမ်းမဲ့ ဈေးရောင်းချမှု၊ လမ်းဖြတ်ကူးမှု၊ မီးပွိုင့်စနစ်များ ချို့တဲ့မှုတို့ကြောင့် ဖြစ်သည်ဟုလည်း ဒုတိယဝန်ကြီးက ဖြေဆိုသွားသည်။

ဓာတ်မလိုက်စေသည့် လျှပ်ကာဓာတ်ကြိုး ရန်ကုန်တွင် မိုင်သုံးရာကျော် တပ်ဆင်

ရန်ကုန်တိုင်းဒေသကြီးအတွင်းတွင် လူသွားလူလာများပြားသည့် ဈေးများ၊ ကျောင်းများ၊ ဆေးရုံများ၊ ဘူတာများ၊ ကားဂိတ်များ စသည့် အရပ်ဒေသများတွင် နှစ်ကာလကြာရှည်စွာ တည်ဆောက်ထားခဲ့သည့် လျှပ်ကာမပါသည့် ဓာတ်ကြိုးများကို လျှပ်ကာပါသော ဓာတ်ကြိုး များနှင့် လဲလှယ်ခြင်း၊ ၄၀၀ ဗို့ ရိုးရိုးကြေးကြိုးများအစား လျှပ်ကာပါသည့် ABC Cable များဖြင့် လဲလှယ်ခြင်း၊ ရှုပ်ထွေး Service များ ရှင်းလင်းခြင်းလုပ်ငန်းများကို ကြိုးပမ်းဆောင်ရွက်လျက်ရှိသည်ဟု အဆိုပါဝန်ကြီးဌာန ပြည်ထောင်စု ဒုတိယဝန်ကြီးက ဆိုသည်။

လျှပ်ကာမပါသည့် ဓာတ်ကြိုးအဟောင်းများအစား ပြတ်ကျလျှင်လည်း အလွယ်တကူဓာတ်မလိုက်စေသည့် လျှပ်ကာပါဓာတ်ကြိုးသစ် စုစုပေါင်း ၃၁၅ မိုင်ကျော်ကို ရန်ကုန်တိုင်းဒေသကြီးတွင်လည်းကောင်း၊ မိုင်လေးဆယ်ကျော်ကို မန္တလေးတိုင်းဒေသကြီးတွင်လည်းကောင်း လဲလှယ်ထားပြီးဖြစ်သည်ဟု ဒုတိယဝန်ကြီး ဒေါက်တာထွန်းနိုင်က ဆိုသည်။

အစားထိုးလဲလှယ်နိုင်ခြင်း မရှိသေးသည့်နေရာများတွင် လျှပ်ထိန်းကြိုးများ၊ ပုခက်ကြိုးများတပ်ဆင်ခြင်း၊ ဓာတ်အားလိုင်း ကြိုးချင်းထိန်း Linking Rope များတပ်ဆင်ခြင်း၊ မြေဓာတ်ချကြိုးများ တပ်ဆင်ခြင်းများကိုလည်း မြို့နယ်များအလိုက် ဆောင်ရွက်လျက်ရှိသည်ဟု ဒုတိယဝန်ကြီးက ဆိုသည်။

ယင်းအပြင် ရန်ကုန်တိုင်းဒေသကြီးအတွင်း လျှပ်စစ်အန္တရာယ်ကင်းရှင်းရေးအတွက် ဟောင်းနွမ်းဆွေးမြည့်နေသည့် ၄၀၀ ဗို့ ဓာတ်အား လိုင်းကြိုးနေရာများတွင် ထပ်မံ၍ မိုင် ၅၀၀ ခန့် လဲလှယ်နိုင်ရန် လိုအပ်သည့်ပစ္စည်းများ ဝယ်ယူနိုင်ရေး တင်ဒါခေါ်ယူထားပြီး ပစ္စည်းများ ရောက်ရှိလာပါက ၂၀၁၈-၁၉ ဘဏ္ဍာရေးနှစ်အတွင်း အမြန်လဲလှယ်နိုင်ရေးအတွက် စီစဉ်သွားမည်ဟု ၎င်းက ပြောဆိုခဲ့သည်။

သီးနှံနှင့် ကျွဲ၊ နွား အာမခံကိစ္စ စမ်းသပ်ဆဲ

သီးနှံအာမခံနှင့် ကျွဲ၊ နွား အာမခံနှင့်ပတ်သက်၍ စမ်းသပ်ဆဲဖြစ် သည်ဟု စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဒုတိယ ဝန်ကြီး ဦးအောင်ထူးက နိုဝင်ဘာလ ၂၈ ရက်နေ့က ပြုလုပ်သည့် ပြည်သူ့လွှတ်တော်အစည်းအဝေးတွင် ပြောဆိုသည်။

သို့သော် အဆိုပါကိစ္စသည် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနက ကိုင်တွယ်ဆောင်ရွက်နေခြင်းသာဖြစ်ပြီး စီး/ကူး ဒုဝန်ကြီးက လွှတ်တော်မေးခွန်းတစ်ရပ်နှင့်ပတ်သက်၍ ဆက်စပ်ဖြေဆိုသွားခြင်း ဖြစ်သည်။

တောင်သူလယ်သမားများ နစ်နာဆုံးရှုံးမှုများမှ ကာကွယ်ရန်ဖြစ်သည့် သီးနှံအာမခံနှင့် ကျွဲ၊ နွားအာမခံကိစ္စကို စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနက စတင်စမ်းသပ်ဆောင်ရွက်လျက်ရှိပြီး မကြာမီအချိန်တွင် တောင်သူလယ်သမားများသို့ ရှင်းပြနိုင်မည့်အနေအထားမျိုးဖြစ်အောင် စီစဉ်ဆောင်ရွက်လျက်ရှိနေသည်ဟု ဆိုသည်။

အစိုးရအနေနှင့် လယ်ယာထွက်ကုန်အသင်းအဖွဲ့များဖြစ်ကြသော မြန်မာနိုင်ငံ ဆန်စပါးအသင်းချုပ်၊ မြန်မာနိုင်ငံ ပဲမျိုးစုံနှင့် နှမ်းကုန်သည် များအသင်း၊ မြန်မာနိုင်ငံ သစ်သီးဝလံပန်းမန်အသင်းတို့နှင့် မပြတ်တွေ့ဆုံ၍ လိုအပ်သည့်အကူအညီများ ဖြည့်ဆည်းခြင်း၊ ကုန်သွယ်မှုနှင့် ရင်းနှီးမြှုပ်နှံမှုများ အားပေးခြင်း၊ လုပ်ငန်းရှင်များက တင်ပြလာသည့်အခက်အခဲများကို သက်ဆိုင်ရာဝန်ကြီးဌာနများနှင့် ပေါင်းစပ်ညှိနှိုင်း ဖြေရှင်းပေးလျက်ရှိကြောင်းလည်း ထည့်သွင်းဖြေဆိုခဲ့သည်။

ဆန်ကို အင်ဒိုနှင့် ဖိလစ်ပိုင်၊ ပဲကို နီပေါသို့ ဈေးကွက်ချဲ့နိုင်ခြေရှိဟုဆို

မြန်မာနိုင်ငံ၏ လယ်ယာထွက်ကုန်သီးနှံများ ပြည်ပသို့ ပိုမိုတင်ပို့ရေးနှင့်ပတ်သက်၍ မကြာမီအချိန်များအတွင်း ဆန်ကို အင်ဒိုနီးရှားနိုင်ငံနှင့် ဖိလစ်ပိုင်နိုင်ငံတို့သို့လည်းကောင်း၊ ပဲကို နီပေါနိုင်ငံသို့လည်းကောင်း ဈေးကွက်ချဲ့ထွင်တင်ပို့နိုင်ခြေများ ရှိနေသည်ဟု စီးပွားရေးနှင့် ကူးသန်းရောင်းဝယ်ရေး ဒုတိယဝန်ကြီး ဦးအောင်ထူးက ဆိုသည်။

လယ်ယာထွက်ကုန်ပစ္စည်းများ ပြည်ပသို့တင်ပို့ရာတွင် ခိုင်မာသည့် ဈေးကွက်ရရှိရေးအတွက် အမျိုးသားပို့ကုန်မဟာဗျူဟာအစီအစဉ်ကို ရေးဆွဲချမှတ်အကောင်အထည်ဖော်လျက်ရှိပြီး လယ်ယာထွက်ကုန်ဖြစ်သည့် ဆန်၊ ပဲအမျိုးမျိုး၊ ဆီထွက်သီးနှံ၊ နှမ်း၊ ရော်ဘာ၊ ရေထွက် ပစ္စည်းတို့ကို ဦးစားပေးဆောင်ရွက်လျက်ရှိပြီး ဆန်တင်ပို့နိုင်ရေး ကြိုးပမ်းဆောင်ရွက်ရာတွင် မကြာမီ ဖိလစ်ပိုင်နိုင်ငံနှင့် အင်ဒိုနီးရှားနိုင်ငံဈေးကွက်တို့ကို ဆန်တိုးချဲ့တင်ပို့နိုင်မည့် အခြေအနေရှိနေသည်ဟု ၎င်းက ဆိုသည်။

ယင်းအပြင် ပြီးခဲ့သည့်နှစ်က အိန္ဒိယက မဝယ်ယူခြင်းကြောင့် ဈေးကွက်ပျက်ခဲ့သည့် ပဲနှင့်ပတ်သက်၍လည်း ဈေးကွက်သစ်များကို ရှာဖွေလျက်ရှိပြီး ပဲကို အိန္ဒိယနိုင်ငံက ပြန်လည်ဝယ်ယူရန်ကိုလည်း ဆွေးနွေးထားပြီးဖြစ်သလို ဈေးကွက်ခိုင်မာစေရေးအတွက် အစိုးရချင်း စာချုပ်ချုပ်သွားမည်ဖြစ်သလို တရုတ်နိုင်ငံနှင့် အခြားနိုင်ငံများသို့လည်း ရောင်းချနိုင်ရန် ဆောင်ရွက်လျက်ရှိသည်ဟု ဆိုသည်။

ဝန်ကြီးဌာနအနေနှင့် မကြာခင်တွင် နီပေါနိုင်ငံ၌ပြုလုပ်မည့် ကုန်စည်ပြပွဲသို့ သွားရောက်၍ နီပေါဈေးကွက်ကို ထိုးဖောက်နိုင်ရန်အတွက် ကြိုးပမ်းဆောင်ရွက်လျက်သည်ဟု ဝန်ကြီးက ပြောဆိုသည်။

အမျိုးသမီးများအပေါ် အကြမ်းဖက်မှုများမှ ကာကွယ်သည့်ဥပဒေ ၂၀၁၉ ထဲတွင် ပြဋ္ဌာန်းနိုင်ရန်ကြိုးပမ်း

အမျိုးသမီးများအပေါ် အကြမ်းဖက်မှု တားဆီးကာကွယ်ရေးဥပဒေကို လာမည့် ၂၀၁၉ ခုနှစ်ထဲတွင် ပြဋ္ဌာန်းနိုင်ရေးအတွက် ဆက်စပ်ဌာနများ၊ အဖွဲ့အစည်းများနှင့် ညှိနှိုင်းပူးပေါင်း၍ ကြိုးပမ်းဆောင်ရွက်လျက်ရှိကြောင်း လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယဝန်ကြီး ဦးစိုးအောင်က ပြောကြားသည်။

နိုဝင်ဘာလ ၂၇ ရက်နေ့က ပြုလုပ်သည့် အမျိုးသားလွှတ်တော်အစည်းအဝေးတွင် ပြောဆိုခဲ့ခြင်းဖြစ်သည်။

လက်ရှိတွင် အဆိုပါဥပဒေကြမ်းကို ရေးဆွဲထားပြီး ပြည်ထောင်စုရှေ့နေချုပ်ရုံး၏ သဘောထားအကြံပြုချက်ရရှိရေးအတွက် ထပ်မံပေးပို့ ညှိနှိုင်းထားသည်ဟု ၎င်းကဆိုသည်။

၁၈ နှစ်မပြည့်မှ လက်ထပ်နိုင်ခွင့် ပြည်သူ့လွှတ်တော်ပယ်ဖျက်

အသက် (၁၈) နှစ်ပြည့်ပြီးမှ ထိမ်းမြားလက်ထပ်ရန် ပြဋ္ဌာန်းထားသည့် အချက်တစ်ချက်ကို ပြည်သူ့လွှတ်တော်က နိုဝင်ဘာလ ၂၈ ရက်နေ့က ပြုလုပ်သည့်အစည်းအဝေးတွင် ပယ်ဖျက်လိုက်သည်။

အဆိုပါပြဋ္ဌာန်းချက်သည် ကလေးသူငယ်ဆိုင်ရာဥပဒေတွင် ပါဝင်ပြီး အခြားတည်ဆဲဥပဒေ၊ ဓလေ့ထုံးတမ်းဥပဒေများနှင့် လိုက်လျော ညီထွေမရှိခြင်းကြောင့် ပယ်ဖျက်ရန်သင့်သည်ဟု ဥပဒေကြမ်းကော်မတီက သုံးသပ်ခဲ့ပြီး လွှတ်တော်ကလည်း အဆိုပါပယ်ဖျက်လိုမှုကို အတည်ပြုပေးလိုက်သည်။

မြန်မာနိုင်ငံတွင် လူမျိုးအလိုက်၊ ကိုးကွယ်ရာဘာသာအလိုက် ဓလေ့ထုံးတမ်းများနှင့် ဥပဒေများရှိနေပြီး ယခင်ဥပဒေတွင်ပါရှိသည့် အသက် ၁၈ နှစ်ပြည့်မှ လက်ထပ်နိုင်မည်ဆိုသည့် ပြဋ္ဌာန်းချက်ရှိနေခြင်းကြောင့် ဥပဒေချင်းပဋိပက္ခဖြစ်နိုင်သဖြင့် ပယ်ဖျက်ရသည်ဟု ပြည်သူ့လွှတ်တော်ဥပဒေကြမ်းကော်မတီ၊ အတွင်းရေးမှူး ဦးကျော်စိုးလင်းက ဆိုသည်။

ယင်းသို့ပယ်ဖျက်ခြင်းအတွက် ရှုပ်ထွေးမှုများနှင့် ဆန့်ကျင်ဝေဖန်မှုများလည်း ပြည်သူများနှင့် အမျိုးသမီးရေးရာလှုပ်ရှားသူများအကြား ပေါ်ပေါက်နေသည်။ 

You may also like...

Leave a Reply

Your email address will not be published. Required fields are marked *