ဒဂုံဆိပ်ကမ်းမြို့နယ်အတွင်းရှိ စမတ်ကတ် မရှိသည့် ကျူးကျော်တဲများ ရှင်းလင်းမည်

ရန်ကုန်၊ နိုဝင်ဘာ ၃၀

ဒဂုံမြို့သစ် (ဆိပ်ကမ်း) မြို့နယ်အတွင်းရှိသည့် စမတ်ကတ်မရှိသည့် ကျူးကျော်တဲများကို ရှင်းလင်းရန် မြို့နယ်အထွေထွေအုပ်ချုပ်ရေးဦးစီးဌာနက အကြောင်းကြားစာ ထုတ်ပြန်ထားကြောင်း ယင်းမြို့နယ် မဲဆန္ဒနယ် ရန်ကုန်တိုင်းလွှတ်တော်ကိုယ်စားလှယ် ဒေါက်တာဖြူဖြူခိုင်က ဆိုသည်။

ကျူးကျော်တဲများကို တစ်တဲကျူး တစ်တဲဖျက် စနစ်ကျင့်သုံးကာ သက်ဆိုင်ရာဌာနတို့နှင့်ပူးပေါင်း၍ ရှင်းလင်းရန် စီစဉ်ထားကြောင်း မြို့နယ်အထွေထွေ  အုပ်ချုပ်ရေးဦးစီးဌာနက အစည်းအဝေးကျင်းပ၍ ပြောကြားထားသည်ဟု ၎င်းက ဆိုသည်။

ရန်ကုန်တိုင်းဝန်ကြီးချုပ် ဦးဖြိုးမင်းသိန်းက “ဘူဒိုဇာအစိုးရမဖြစ်ချင်ဘူး” ဟု  ပြောကြားခဲ့ပြီးနောက် ရန်ကုန်တွင် နေထိုင်သည့် ကျူးကျော်များကို စာရင်းကောက်ကာ စမတ်ကတ်များ ထုတ်ပေးခဲ့သည်။

ကျူးကျော်များနေထိုင်ရန် အိမ်ရာများနှင့် အလုပ်အကိုင်များပါ ဖန်တီးပေးမည်ဖြစ်ကြောင်းလည်း ဝန်ကြီးချုပ် ဦးဖြိုးမင်းသိန်းက တရားဝင်ပြောကြားခဲ့သည်။

မြို့နယ်အထွေထွေ အုပ်ချုပ်ရေးဦးစီးဌာနက အစည်းအဝေးများတွင် ကျူးကျော်များရှင်းလင်းရန် ပြောကြားသော်လည်း မြေပြင်ထိထိရောက်ရောက် ရှင်းလင်းနိုင်ခြင်း မရှိသည့်အတွက်  ဒဂုံမြို့သစ်(ဆိပ်ကမ်း)မြို့နယ်တွင် ကျူးကျော်တဲများ နှစ်ဆကျော် တိုးပွားလျက်ရှိကြောင်း ဒေါက်တာဖြူဖြူခိုင်က ဝေဖန်သည်။

“ကျူးတွေက ညဘက်ဆောက်တယ်။ မနက်ဆို ဘွားကနဲ ပေါ်လာတာ ပေါ်လာတဲ့ ဒီကျူးအင်အားကို အုပ်ချုပ်ရေးမှူးက မလုပ်နိုင်ဘူးဓ ဟု ၎င်းက မြေပြင်အခြေအနေကို ရှင်းပြသည်။

ကျူးကျော်နေထိုင်သူချင်းအတူတူတွင် စမတ်ကတ်ရှိသည့် ကျူးကျော်များက ပြည်သူပိုင်နေရာများတွင် တရားဝင်နေထိုင်ခွင့်ရသည့် ပုံစံဖြစ်နေကာ စမတ်ကတ်မရှိသည့် ကျူးကျော်ကိုသာ ရှင်းလင်းခြင်းကိုလည်း ပြန်လည်သုံးသပ်သင့်သည်ဟု ဒေါ်ဖြူဖြူခိုင်က ဝေဖန်သည်။

ရန်ကုန်တိုင်းဒေသကြီးတစ်ခုလုံးတွင် ကျူးကျော်အိမ်ထောင်စုပေါင်း ၁၁၀,၀၀၀ ကျော်ရှိပြီး လူဦးရေမှာ ၄၄၀,၀၀၀  ကျော်ရှိကြောင်း ရန်ကုန်တိုင်းအစိုးရက  တိုင်းလွှတ်တော်တွင် ပြောကြားထားသည်။

You may also like...

Leave a Reply

Your email address will not be published. Required fields are marked *