ထူးခြား ထင်ရှားသူများ ၂၀၁၈

နယ်ပယ်အသီးသီးတွင် လူ့အဖွဲ့အစည်းတစ်ခု၏ အရွေ့ သို့မဟုတ် ပုံကြမ်းကောက်ကြောင်းကို ပုံဖော်ဖန်တီးနေသူများရှိသည်။ နှစ်တစ်နှစ် ကုန်ဆုံးသွားတိုင်း ပုံပေါ်လာသည့် ကောက်ကြောင်း၏ ရင်းမြစ်ကို လိုက်ကြည့်သည့်အခါ လက်ရာရှင်များကို တွေ့မြင်ကြရသည်။
အရပ်သားစစ်စစ်တို့ အများဆုံးပါဝင်သည့် လက်ရှိ အစိုးရသက်တမ်း သုံးနှစ်ပြည့်မြောက်တော့မည့် ၂၀၁၈ခုနှစ်အတွင်း နိုင်ငံရေး၊ စီးပွားရေး၊ လူမှုရေးနယ် အဓိကနယ်ပယ်သုံးရပ်တွင် ခြေပေါ်ခဲ့သော ကစားသမား၏ ကောက်ကြောင်းကိုလည်း The Voice Journal က ပုံဖော်ကြည့်မိသည်။

ကောက်ကြောင်းပုံဖြစ်သည့်အတွက် အသေးစိတ်၊ အနုစိတ်လက်ရာ မဟုတ်ဘဲ ကာယကံရှင်၏စရိုက်နှင့် အခြေခံသဘော၊ သဘာဝကို အကြမ်းဖျင်းတို့ထိထားခြင်းသာဖြစ်သည်။ ထိုသို့ပုံဖော်ရာတွင် မီဒီယာမျိုးစုံတွင် ကာယကံရှင်များကိုယ်တိုင် ပြောဆို၊ လှုပ်ရှား၊ သရုပ်ပြခဲ့သည်များကို အခြေခံထားသည်။

ပုံဖော်ဖြစ်ခြင်းမှာ မြန်မာလူ့အဖွဲ့အစည်း ဖွံ့ဖြိုးတိုးတက်ရေး၊ ငြိမ်းချမ်းရေး၊ ဒီမိုကရေစီရေခံမြေခံများ တည်ဆောက်ရေးတို့ကို တစ်ဖက်တစ်လမ်းက အကူအပံ့ဖြစ်စေရေးအတွက် အသိအမှတ်ပြု တွန်းအားပေးရန် ရည်ရွယ်သည်။

သို့သော် လွတ်လပ်၍ အမှီအခိုကင်းသော ပုဂ္ဂလိကသတင်းမီဒီယာတစ်ခု၏ ဝေဖန်ဆန်းစစ်ပိုင်းခြားသော အမြင်ရှိသူ သတင်းစာဆရာများ၏ လက်ရာဖြစ်သည့်အတွက် အချို့အတွက် အတန်ငယ် စပ်ကောင်းစပ်နိုင်သည်။ ပရိသတ်နှင့် ကာယကံရှင်တို့၏ အကြိုက်၊ အမြင်နှင့် ကွဲလွဲကောင်း၊ ကွဲလွဲနိုင်သည်။

များစွာ သေချာသည်မှာ ယခုနှစ်တွင်သာမက ကုန်ခဲ့သည့် အနှစ် နှစ်ဆယ်လုံးလုံး Living Color မဂ္ဂဇင်းနှင့် The Voice Journal တို့က ရွေးချယ်ဖော်ပြခဲ့သော တစ်နည်းအားဖြင့် ကောက်ကြောင်းခြစ် ပုံဖော်ခဲ့သော ထူးခြားထင်ရှားသူများ သို့မဟုတ် လူ့အဖွဲ့အစည်း၏ အဓိကဇာတ်ရုပ်များအပေါ်တွင် ချစ်ခြင်း၊ မုန်းခြင်း ခံစားချက်များ အတတ်နိုင်ဆုံး ကင်းရှင်းကြောင်းပင် ဖြစ်သည်။

စာမျက်နှာပေါ်တွင် သီးသန့် ဖော်ပြနိုင်ခြင်းမရှိသော်ငြား နယ်ပယ်အသီးသီးတွင် မြန်မာလူ့အဖွဲ့အစည်းကို ပို၍တောက်ပ၊ မြင့်မားလာစေရန်၊ ဖွံ့ဖြိုးစည်ပင်လာစေရန်၊ အေးချမ်း၊ တည်ငြိမ်လာစေရန်၊ ကြွယ်ဝချမ်းသာလာ စေရန်၊ ရင့်ကျက်သဘောထားကြီးလာစေရန် တတ်နိုင်သည့်နေရာမှ ကိုယ်ကျိုးမငဲ့ စွမ်းဆောင်ကြိုးပမ်းနေသူများကိုလည်း ကိုယ်စားပြုကြောင်း အထူးဖော်ပြလိုသည်။ 

 

အယ်ဒီတာ(၆-၁၂-၂၀၁၈)

You may also like...

Leave a Reply

Your email address will not be published. Required fields are marked *