ဦးဖြိုးမင်းသိန်း

ဓာတ်ပုံ - မြင့်မိုးညို

ရန်ကုန်တိုင်း၏ ဝန်ကြီးချုပ်ဖြစ်သော်လည်း ရန်ကုန်သာမကနိုင်ငံတစ်ဝန်းက အာရုံစိုက်ခံရသူဖြစ်ပြီး မီဒီယာနှင့် လွှတ်တော်ကပါ မျက်ခြည်မပြတ်စောင့်ကြည့်နေရသူလည်းဖြစ်သူ ဦးဖြိုးမင်းသိန်းကို ၂၀၁၈ ခုနှစ်အတွက် နိုင်ငံရေးနယ်ပယ်၏ ထူးခြားထင်ရှားသူအဖြစ် ရွေးချယ်လိုက်ပါသည်။

စိတ်အားထက်သန်ခြင်းနှင့် အလုပ်လုပ်လိုစိတ်ရှိခြင်းကြောင့် ထင်ရှားသော ရန်ကုန်ဝန်ကြီးချုပ်သည် ၎င်း အကောင်အထည်ဖော်မည့် စီမံကိန်းများနှင့်ပတ်သက်၍ ၂၀၁၈ ခုနှစ်တွင်လည်း အငြင်းပွားမှုများစွာ ဖြစ်ပေါ်ခဲ့သည်။

တရုတ်ကုမ္ပဏီနှင့် လုပ်ဆောင်မည့် ရန်ကုန်မြို့သစ်စီမံကိန်း၊  Eco Green City စီမံကိန်း၊ Eleven Media အမှု၊ စာရင်းစစ်ချုပ် အစီရင်ခံစာစသည့် ကိစ္စတို့သည် ရန်ကုန်ဝန်ကြီးချုပ်ဦးဖြိုးမင်းသိန်းနှင့်  ပတ်သက်၍ ၂၀၁၈ ခုနှစ်အတွင်း ထင်ရှားသော အငြင်းပွားဖွယ်ကိစ္စရပ်များ ဖြစ်သည်။

၂၀၁၈ ခုနှစ် ဧပြီလအတွင်း ဖြစ်ပေါ်ခဲ့သော ထိန်ပင်အမှိုက်ပုံ မီးလောင်မှုကြောင့် အနီးနားရပ်ကွက်မှ လူများမီးခိုးမွှန်၍ ဆေးရုံရောက် ရသည်အထိ အုတ်အော်သောင်းတင်းဖြစ်နေချိန်တွင် မီးလောင်ရာသို့ ဝန်ကြီးချုပ်အရောက် နောက်ကျသောကြောင့် ဝေဖန်ခံခဲ့ရသေးသည်။ ဤဖြစ်ရပ်မတိုင်မီကမူ ဝန်ကြီးချုပ်သည် ရန်ကုန်တိုင်း၏ အိမ်ထောင်ဦးစီး ဖြစ်ကြောင်း ကိုယ့်ကိုယ်ကိုယ် ညွှန်းဆိုခဲ့သည်။

ရန်ကုန်မြို့သစ်စီမံကိန်းကိုပြည်သူလူထုထံသို့ တင်ပြရာတွင် ‘အစိုးရက စီးပွားရေးလုပ်သင့်သလော’ ဟူ၍ မေးခွန်းထုတ်ခံခဲ့ရသည်။ ရန်ကုန်မြို့သစ်စီမံကိန်းနည်းတူပင် Eco Green City စီမံကိန်းသည်လည်း ကန့်ကွက်မှုများ ဖြစ်ပေါ်ခဲ့သေးသည်။

ထို့ပြင် စာရင်းစစ်ချုပ်အစီရင်ခံစာပါ ကျောင်းကားကိစ္စနှင့် အခြားသော နိုင်ငံ့ဘဏ္ဍာနစ်နာမှုများအတွက်လည်း လွှတ်တော်တွင် မေးခွန်းထုတ်ခံရသည်။ ဝန်ကြီးချုပ် ဦးဆောင်သော ရန်ကုန်တိုင်းအစိုးရသည်  Weekly Eleven ဂျာနယ်ပါဆောင်းပါးကြောင့် သတင်းစာဆရာသုံးဦး ကို တရားစွဲဆိုခဲ့ပြီးနောက် ပြင်းထန်သော ဝေဖန်ကန့်ကွက်မှုများ ထွက်ပေါ်လာခဲ့သည်။ ပြည်ထောင်စုအစိုးရအဖွဲ့ရုံးက သတင်းမီဒီယာကောင်စီမှတစ်ဆင့် ကြေညာချက်ထုတ်ပြန်ခဲ့ပြီးနောက် အဆိုပါကိစ္စကို သတင်းမီဒီယာကောင်စီထံသို့ တိုင်ကြားခဲ့သည်။

မည်သို့ဆိုစေ ရန်ကုန်တိုင်းဝန်ကြီးချုပ်သည် ၂၀၁၈ ခုနှစ်အတွင်း အခြားသော တိုင်းနှင့် ပြည်နယ်ဝန်ကြီးချုပ်များထက် တက်ကြွခြင်း၊ ဝန်ကြီးချုပ်တစ်ဦး၏ တာဝန်နှင့် လုပ်ပိုင်ခွင့်ထက် ကျော်လွန်နေကြောင်း ဝေဖန်မှုများ၊ တိုင်ကြားမှုများ၊ ကန့်ကွက်မှုများ အကြိမ်ကြိမ်ရင်ဆိုင်နေရသည့်အပြင် ဝန်ကြီးချုပ်လုပ်ဆောင်မည့် စီမံကိန်းများသည် အငြင်းပွားဖွယ်ရာများဖြင့် ဝေဖန်ထောက်ပြမှုများရှိနေလင့်ကစား အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ မမှိတ်မသုံအားထားရသော ဝန်ကြီးချုပ်တစ်ယောက်အဖြစ် ရှိနေပုံရသောကြောင့် ယခုနှစ်အတွင်း နိုင်ငံရေးနယ်ပယ်၏ ထူးခြားထင်ရှားသူတစ်ဦးအဖြစ် ရွေးချယ်ဖော်ပြလိုက်ရခြင်း ဖြစ်ပါသည်။

You may also like...

Leave a Reply

Your email address will not be published. Required fields are marked *