ဗိုလ်ချုပ်မှူးကြီး မင်းအောင်လှိုင်

ဓာတ်ပုံ - မိုးကျော်လွင်

၂၀၂၀ခုနှစ်တွင် ငြိမ်းချမ်းရေးလုပ်ငန်းများ ပြီးပြတ်အောင်လုပ်မည်ဟု တပ်မတော်အနေနှင့် သန္နိဋ္ဌာန်ချထားကြောင်း ပြောဆိုထားသော်လည်း ကမ္ဘာကျော် Facebook လူမှုကွန်ရက်ပေါ်ရှိ အကောင့်ဖယ်ရှားခံရသောကြောင့် ထပ်မံဖွင့်ထားသည့် ရုရှားလူမှုကွန်ရက် VK မှလည်း နှစ်ကြိမ်တိုင် ဖယ်ရှားခံရသူ ဗိုလ်ချုပ်မှူးကြီးမင်းအောင်လှိုင်ကို ယခုနှစ်အတွင်း စစ်ရေးလောက၏ ထူးခြားထင်ရှားသူအဖြစ် ရွေးချယ်လိုက်ပါသည်။

အနှစ် ခုနစ်ဆယ်ကျော်လာပြီဖြစ်သော ပြည်တွင်းစစ်နှင့်အတူ မငြိမ်းချမ်းနိုင်သေးသော နိုင်ငံတွင် နိုင်ငံတော်အာဏာကို အချိန်ကြာမြင့်စွာ ဆုပ်ကိုင်ထားခဲ့သည့် တပ်မတော်တစ်ရပ်၏ ဆိုးမွေ၊ ကောင်းမွေများကို ဆက်ခံထားရသူ ခေါင်းဆောင်တစ်ဦးဖြစ်သည့် အားလျော်စွာ လက်ရှိ ငြိမ်းချမ်းမှုတည်ဆောက်ရေးလုပ်ငန်းစဉ်များတွင် အဓိကကျသည့် နေရာတွင် ရှိနေသူဖြစ်သည်။

ငြိမ်းချမ်းမှုတည်ဆောက်ရေးဆိုင်ရာဆွေးနွေးပွဲများတွင် တပ်မတော် ကာကွယ်ရေးဦးစီးချုပ်အနေနှင့် ပြောဆိုသော မိန့်ခွန်းများသည် တပ်မတော်ခေါင်းဆောင်တစ်ဦးအဖြစ် သာမက တပ်မတော်နှင့် သက်ဆိုင်ပတ်သက်ခဲ့သူ၊ ပတ်သက်နေသူအများစု၏ သဘောထားဟုလည်း တပ်မတော်အပေါ် အတိတ်မှ အရိပ်များဖြင့် ရှုမြင်နေဆဲ မြန်မာပြည်သူအများစုက မှတ်ယူထားကြသည်။ တပ်မတော်ကိုယ်တိုင် ထိုအရိပ်များမှ မည်မျှ လွတ်ကင်းနိုင်သနည်းဆိုခြင်းမှာမူ ယနေ့ တပ်မတော်ခေါင်းဆောင်၏ မိန့်ခွန်းများ၊ တပ်မတော်၏ လက်တွေ့လုပ်ဆောင်မှုများက သက်သေပြလျက် ရှိသည်။

ယခုနှစ်အတွင်း ကျင်းပခဲ့သည့် ပြည်ထောင်စုအဆင့် ငြိမ်းချမ်ရေးထိပ်သီးဆွေးနွေးပွဲများ၊ ညီလာခံများတွင် ဗိုလ်ချုပ်မှူးကြီးမင်းအောင်လှိုင်၏ ပြောဆိုဆွေးနွေးချက်များမှာ ဆွေးနွေးဖက် တိုင်းရင်းသားလက်နက်ကိုင်များနှင့် လေ့လာစောင့်ကြည့်သူများပါ ဒွိဟဖြစ်စရာများ ရှိခဲ့သည်။

သို့သော် အခြားတစ်ဖက်တွင်လည်း တပ်မတော်ဦးစီးချုပ်၏ ပြောဆိုမှုများမှာ တပ်မတော်က မူလကတည်းက ရပ်ခံထားခဲ့သော ဒို့တာဝန်အရေးသုံးပါး၊ တစ်ခုတည်းသောပြည်ထောင်စုတပ်မတော်၊ ဖွဲ့စည်းပုံအခြေခံဥပဒေကို ကာကွယ်စောင့်ရှောက်ရေးဆိုသော မူများနှင့် NCA ခေါ် အပစ်ရပ်စဲရေးဆိုင်ရာသဘောတူညီချက်များအပေါ် အခြေခံထားသည်ဟု ဆိုထားသည်။

ယခုနှစ်အတွင်း ကျင်းပခဲ့သော ငြိမ်းချမ်းရေးထိပ်သီးဆွေးနွေးပွဲများတွင်လည်း တပ်မတော်ဦးစီးချုပ်ကိုယ်တိုင် တက်ရောက်ခဲ့သည်။ ထို့အပြင် နိုင်ငံတော်အတိုင်ပင်ခံနှင့်လည်း သီးခြားအလွတ်သဘော နှစ်ဦးတည်း မကြာခဏတွေ့ဆုံကြောင်း၊ နိုင်ငံတော်သမ္မတပါဝင်သည့် အကြိမ်နှင့် မပါဝင်သည့်အကြိမ်များလည်း ရှိကြောင်း၊ သတင်းမထုတ်ပြန်ခြင်းသာဖြစ်ကြောင်း နိုင်ငံတော်သမ္မတရုံးပြောခွင့်ရပုဂ္ဂိုလ် ဦးဇော်ဌေးက ပြောဆိုထားသည်။

နိုင်ငံခြားသား ပညာရှင်များဖြင့် ဖွဲ့စည်းခဲ့သော မောင်တောဒေသလူ့အခွင့်အရေးချိုးဖောက်မှုများ စုံစမ်းစစ်ဆေးမည့် လွတ်လပ်သော စုံစမ်းစစ်ဆေးရေးကော်မရှင်ကို လွှတ်တော်တွင် တပ်မတော်သား ကိုယ်စားလှယ်များက ကန့်ကွက်ခဲ့သော်လည်း ယင်းကော်မရှင်နှင့် ဗိုလ်ချုပ်မှူးကြီး မင်းအောင်လှိုင်တို့ နေပြည်တော်တွင် တွေ့ဆုံစဉ် ကော်မရှင်အား ကူညီမည်ဖြစ်ကြောင်း ပြောဆိုခဲ့သည်။

ဗိုလ်ချုပ်မှူးကြီးမင်းအောင်လှိုင်၏ လူမှုကွန်ရက်အကောင့်ကို ဖယ်ရှားရာတွင် ဘာသာရေး၊ လူမျိုးရေး တင်းမာမှုများ မြင့်တက်လာစေရန် မလိုလားအပ်သော အသုံးပြုမှုများရှိနေသောကြောင့်ဟု Facebook တာဝန်ရှိသူများဘက်မှ အကြောင်းပြထားသည်။ အခြားတစ်ဖက်တွင်လည်း နိုင်ငံအနှံ့မြို့ကြီးအချို့တွင် အစွန်းရောက် အမျိုးသားရေးဝါဒီတစ်ဦးအဖြစ် ကင်ပွန်းတပ်ခံရသူ ဦးဝီရသူပါအဝင် ရဟန်းပုဂ္ဂိုလ်အချို့၊ အမျိုးသားရေးလှုပ်ရှားသူများ နာမည်ပေးထားသူ လူပုဂ္ဂိုလ်အချို့နှင့် စစ်မှုထမ်းဟောင်းများ ဦးဆောင်ခဲ့သော တပ်မတော်ထောက်ခံပွဲများ ကျင်းပခဲ့သည်ကို တွေ့ရသည်။ ယင်းသို့ ချီတက်ရာတွင် ဦးဝီရသူနှင့် ရဟန်းပုဂ္ဂိုလ်အချို့ကိုယ်တိုင် ဗိုလ်ချုပ်မှူးကြီးမင်းအောင်လှိုင် ဓာတ်ပုံကို ကိုင်ဆောင်ကာ ရှေ့ဆုံးမှ ချီတက်ခဲ့ကြသည်။

ထိုတပ်မတော်ထောက်ခံပွဲများသည် တပ်မတော်နှင့် ပြည်သူ တစ်သားတည်းရှိသည်ဆိုသည့် ပြယုဂ်ဖြစ်ကြောင်း၊ ပြည်ပနိုင်ငံနှင့် အဖွဲ့အစည်းအချို့သည် မြန်မာနိုင်ငံ၏ အချုပ်အခြာအာဏာကို မျက်ကွယ်ပြုပြီး ပြည်တွင်းရေးကို ဝင်ရောက်စွက်ဖက်နေကြောင်း၊ မျိုးချစ်စိတ်ထက်သန်သည့် ပြည်သူများက အချုပ်အခြာအာဏာထိပါးမှုကို ဆန့်ကျင်ပြီး တပ်မတော်ထောက်ခံပွဲများ ကျင်းပကြခြင်း ဖြစ်ကြောင်းလည်း ဗိုလ်ချုပ်မှူးကြီး မင်းအောင်လှိုင်က မြန်မာနိုင်ငံ စစ်မှုထမ်းဟောင်းများအဖွဲ့ညီလာခံမိန့်ခွန်းတွင် ထည့်သွင်းပြောကြားသွားခဲ့သည်။

အစွန်းရောက်သည်ဟု ကင်ပွန်းတပ်ဝေဖန်ခံနေရသူ ရဟန်း၊ လူပုဂ္ဂိုလ်အချို့ အင်အားစု အုပ်စုအချို့နှင့် နီးကပ်သော ဆက်ဆံရေးရှိနေကြောင်း ရှုမြင်ခံရခြင်း၊ ငြိမ်းချမ်းရေးဆွေးနွေးပွဲများတွင် တင်းမာပြတ်သားသော ရပ်ခံမှု၊ မှတ်ချက်ပေးမှုများရှိနေသော်ငြား တိကျရေရာသော ငြိမ်းချမ်းရေး ကတိကဝတ်ပြုခြင်း၊ အရပ်သားအစိုးရမတိုင်ခင်ကပင် ရှိနေခဲ့သည့် တပ်မတော်၏ သဘောထားရပ်တည်ချက်ကို ယနေ့အချိန်အထိ ကိုင်စွဲထားခြင်းတို့ကြောင့် ယခုနှစ်အတွင်း စစ်ရေး နယ်ပယ်၏ ထူးခြားထင်ရှားသူအဖြစ် ရွေးချယ်လိုက်ရခြင်းဖြစ်ပါသည်။

You may also like...

Leave a Reply

Your email address will not be published. Required fields are marked *