ဦးအောင်ကြည်

ဓာတ်ပုံ - မိုးကျော်လွင်

နေအိမ်အကျယ်ချုပ်ဘ၀တွင် ရှိနေခဲ့သော ဒေါ်အောင်ဆန်းစုကြည်နှင့် တပ်မတော်အစိုးရအကြား ဆက်ဆံရေးတာဝန်ခံအဖြစ် လည်းကောင်း၊အလုပ်သမားဝန်ကြီးနှင့် ပြန်ကြားရေးဝန်ကြီးအဖြစ်လည်းကောင်း တာဝန်ထမ်းဆောင်ခဲ့သူ၊ ၂၀၁၇ ခုနှစ်နှစ်ကုန်ပိုင်းတွင် နိုင်ငံတော်သမ္မတက ပြန်လည်ဖွဲ့စည်းလိုက်သည့် မြန်မာနိုင်ငံအဂတိလိုက်စားမှု တိုက်ဖျက်ရေးကော်မရှင်၏ ဥက္ကဋ္ဌ ဖြစ်လာခဲ့သူ၊ တပ်မတော်တွင် ဗိုလ်ချုပ်အဆင့်အထိ တာဝန်ထမ်းခဲ့ဖူးသူ ဦးအောင်ကြည်ကို ယခုနှစ်နိုင်ငံရေး နယ်ပယ်၏ ထူးခြားထင်ရှားသူတစ်ဦးအဖြစ် ရွေးချယ်လိုက်ပါသည်။

နိုင်ငံတော်၏ ပြုပြင်ပြောင်းလဲရေးလုပ်ငန်းစဉ်များတွင် အရေးကြီးသည့် အခန်းကဏ္ဍတစ်ခုသည် အဂတိလိုက်စားမှုပြဿနာကို ကိုင်တွယ်နိုင်ရေးဖြစ်သည်။

၂၀၁၈ ခုနှစ်အတွင်း အဆိုပါကော်မရှင်ကို ဦးအောင်ကြည် ဥက္ကဋ္ဌအဖြစ် တာဝန်ယူပြီးနောက် အရှိန်ရလာကာ ပြည်သူလူထု၏ အာရုံစိုက်မှုကိုလည်း ခံခဲ့ရသည်။ တစ်ချိန်တည်းမှာပင် ကော်မရှင်ဥက္ကဋ္ဌဦးအောင်ကြည်၏ ပုံရိပ်သည်လည်း မြင့်တက်လာခဲ့သည်။

မည်သည့်အဂတိလိုက်စားမှုကိုမျှ လက်မခံ၊ သေးသည် ဖြစ်စေ၊ ကြီးသည် ဖြစ်စေ အရေးယူမည်ဟု ၎င်းက ပြောဆိုခဲ့သလို ‘ငါးကြီးကြီး ကြော်ပြမည်’ ဆိုသည့် သူ၏ပြောဆိုမှုသည် ယခုနှစ်အတွင်း အထူးရေပန်းစားခဲ့သည်။

ဟာသသရုပ်ဆောင်အောင်ရဲထွေးအမှုနှင့် ပတ်သက်၍ တိုင်းဒေသကြီးဥပဒေချုပ်အပါအဝင် ဥပဒေအရာရှိလေးဦးနှင့် ခရိုင်တရားသူကြီးတစ်ဦး၊ ရဲအရာရှိတစ်ဦးတို့ကို အဂတိလိုက်စားမှုဖြင့် အရေးယူနိုင်ခဲ့ခြင်းက ဦးအောင်ကြည်ကို ပို၍ အသိအမှတ်ပြုစေခဲ့သည်။

အဂတိလိုက်စားမှု တိုက်ဖျက်ရေးနှင့်ပတ်သက်၍ လာအိုအပါအဝင် ဒေသတွင်းနိုင်ငံနှင့် ချိတ်ဆက်လုပ်ဆောင်ခြင်း၊ ကုလသမဂ္ဂနှင့် ပူးပေါင်း ဆောင်ရွက်ခြင်းတို့ကိုလည်း ယခုနှစ်အတွင်း စတင်နိုင်ခဲ့သည်ကို တွေ့ရသည်။

အလုပ်သမားဝန်ကြီးဌာန ပြည်ထောင်စုဝန်ကြီးအဖြစ် တာဝန်ယူ ခဲ့စဉ်က အလုပ်ရှင် အလုပ်သမားဥပဒေကို အောင်မြင်စွာရေးဆွဲပြဋ္ဌာန်း နိုင်ရန်ဦးဆောင်ခဲ့သူဖြစ်သည့် အားလျော်စွာ ယခင်က များစွာပျော့ပျောင်းလွန်းလှသည်ဟု ဝေဖန်ခံနေရသည့် အဂတိလိုက်စားမှုတိုက်ဖျက်ရေး ဥပဒေကိုလည်း ပြင်ဆင်နိုင်ခဲ့သည်။ အဂတိလိုက်စားမှုကို လက်ပူးလက်ကြပ်မိခြင်း၊ အထောက်အထားခိုင်လုံခြင်းရှိမှသာ အရေးယူနိုင်သည့် အခြေအနေမှ ကျော်စောသတင်းပြေးသူတို့ကိုပါ ခေါ်ယူစစ်ဆေးနိုင်ရန် ဥပဒေသစ်တွင် ပါဝင်လာခြင်းဖြစ်သည်။

ထို့အပြင် အဂတိလိုက်စားမှု တိုက်ဖျက်ရေးကော်မရှင်သည် ဖွဲ့စည်းခါစက ဗဟိုအဆင့်အဖွဲ့သာရှိနေခဲ့ရာမှ နိုင်ငံတစ်ဝန်းတွင် တိုင်းဒေသကြီးနှင့် ပြည်နယ်အဖွဲ့ ခွဲများ ဖွဲ့စည်းရန်လည်း တိုးချဲ့ဆောင်ရွက်နိုင်ခဲ့သည်။

အာဏာရှင်စနစ်နှင့် ဆင်းရဲမွဲတေမှုတို့က ဖန်တီးမွေးဖွားပေးခဲ့သော အဂတိလိုက်စားမှုပြဿနာသည် မြန်မာလူ့အဖွဲ့အစည်းတွင် အမြစ်တွယ် လှိုက်စားကာ ပြည်သူလူထုအပေါ် ဖိစီးနှိပ်စက်နေလင့်ကစား အဂတိလှိုက်စားမှုတိုက်ဖျက်ရေးကော်မရှင်ဥက္ကဋ္ဌ အသစ်ပြောင်းလဲခန့်အပ်လိုက်ပြီးနောက် ကော်မရှင်၏စွမ်းဆောင်မှုများက ပြည်သူတို့၏ မျှော်လင့်ချက်တစ်ဖန် ပြည်လည် ရှင်သန်လာစေသောကြောင့် ယင်း ကော်မရှင်ဥက္ကဋ္ဌဦးအောင်ကြည်ကို ယခုနှစ်အတွင်း ထူးခြားထင်ရှားသူတစ်ဦးအဖြစ် ရွေးချယ်လိုက်ရခြင်းဖြစ်ပါသည်။

You may also like...

Leave a Reply

Your email address will not be published. Required fields are marked *