သမ္မတ ဦးဝင်းမြင့်

ဥပဒေသမား၊ အတိုက်အခံ နိုင်ငံရေးသမားအဖြစ် တောက်လျှောက်ရှိနေခဲ့ရာမှ ၂၀၁၂ ကြားဖြတ်ရွေးကောက်ပွဲအပြီးတွင် ရန်ကုန်တိုင်းဒေသကြီး တာမွေမြို့နယ်ကိုယ်စားပြု အမျိုးသားဒီမိုကရေစီအဖွဲ့ချုပ် (NLD) ပါတီကိုယ်စားပြု လွှတ်တော်ကိုယ်စားလှယ်အဖြစ်ဖြင့် ပြည်သူ့ လွှတ်တော်အတွင်းသို့ ရောက်ရှိခဲ့သူ၊ ၂၀၁၅ ရွေးကောက်ပွဲနိုင်ရရှိသည့်အခါ ပြည်သူ့လွှတ်တော်ဥက္ကဋ္ဌ၊ ပြည်ထောင်စုလွှတ်တော် နာယကဖြစ်လာသူ ဦးဝင်းမြင့်ကို ယခုနှစ်အတွင်း နိုင်ငံရေးနယ်ပယ်၏ ထူးခြားထင်ရှားသူတစ်ဦးအဖြစ် ရွေးချယ်လိုက်ပါသည်။

လွှတ်တော်ဥက္ကဋ္ဌဘ၀တွင် ရွေးကောက်ခံ အရပ်သားကိုယ်စားလှယ်ဖြစ်စေ၊ တပ်မတော်သားကိုယ်စားလှယ်ဖြစ်စေ၊ အခြားပါတီမှဖြစ်စေ၊ မိမိပါတီမှဖြစ်စေ ကိုယ်စားလှယ်များ၏ အနေအထိုင်၊ အပြောအဆို ဆင်ခြင်ရေးနှင့် လွှတ်တော်ရေးရာ လုပ်ထုံးလုပ်နည်းများ၊ ဥပဒေများ ကျွမ်းကျင်ကျေညက်ရေးတို့နှင့်ပတ်သက်၍ မကြာခဏ သတိပေး၊ ဆူငေါက်ခဲ့သူဖြစ်သည်။ အထူးသဖြင့် စည်းကမ်းကြီးမားသူ၊ တင်းကြပ်ပြတ်သားစွာ ကိုင်တွယ်သူအဖြစ် နာမည်ကျော်သည်။

ယခု ၂၀၁၈ ခုနှစ်အတွင်း ဦးဝင်းမြင့်အတွက် အကြီးမားဆုံးသော အပြောင်းအလဲတစ်ခုကို ကြုံခဲ့ရပြီး ယင်းကပင် ယခုနှစ်အတွက် ထင်ရှား ကျော်ကြားသူများစာရင်းတွင် ခြွင်းချက်မရှိ ပါဝင်လာစေခြင်းလည်း ဖြစ်သည်။ ယင်းကား နိုင်ငံတော်သမ္မတအဖြစ် ရွေးကောက်တင်မြှောက်ခံရခြင်းဖြစ်ပြီး သိသာထင်ရှားသည့် လုပ်ဆောင်ချက်အချို့ကို သူ့ လက်ထက်တွင် ပေါ်ပေါက်ခဲ့သည်။

မတ်လတတိယပတ်တွင် နိုင်ငံတော်သမ္မတရာထူးမှ အနားယူခဲ့သည့် ဦးထင်ကျော်နေရာတွင် ဦးဝင်းမြင့်ကို ပါတီက သမ္မတအဖြစ် အမည်စာရင်းတင်သွင်းခံရပြီးနောက် ပါတီတွင် ၎င်းသည် ဒေါ်အောင်ဆန်းစုကြည်ပြီးလျှင် အာဏာအရှိဆုံး ဒုတိယဥက္ကဋ္ဌတစ်ဦးလည်း ဖြစ်လာခဲ့သည်။ ဒေါ်အောင်ဆန်းစုကြည်၏နေရာကို ဆက်ခံမည့်သူအဖြစ်လည်း သတင်းပြေးနေသူဖြစ်သည်။

ဧပြီလဆန်းတွင် သမ္မတဖြစ်လာပြီးနောက် အစိုးရအဖွဲ့ကို ပြုပြင်ပြောင်းလဲခဲ့ပြီး ဝေဖန်မှုများစွာ ရင်ဆိုင်နေရသည့် စီမံကိန်းနှင့် ဘဏ္ဍာရေး ဝန်ကြီးကိုလည်း အပြောင်းအလဲလုပ်ခဲ့သည်။ အမြင်မသင့်လျော်လောက်အောင်ပင် ဆိုးရွားယိမ်းယိုင်နေသည့် တရားရေးမဏ္ဍိုင်ကိုလည်း အလေးထား၍ ကိုင်တွယ်ခဲ့သလို ယခင်အစိုးရအဆက်ဆက် မထိ၊ မတို့ဘဲ ပစ်ထားခဲ့သလိုရှိခဲ့ပြီး မြန်မာ့လူ့ဘောင်အတွင်း တစ်နိုင်ငံလုံးအတိုင်းအတာဖြင့် ခြိမ်းခြောက်လျက်ရှိသည့် မူးယစ်ဆေးဝါးပြဿနာကို ဖြေရှင်းရန် အားထုတ်ခြင်းတို့သည် ဦးဝင်းမြင့်၏ ထင်ရှားသည့် လုပ်ဆောင်ချက်များဖြစ်သည်။ ဟာသသရုပ်ဆောင် အောင်ရဲထွေးအမှုကို ပြန်လည်စစ်ဆေးစေရန် ကြားဝင်သတိပေးခဲ့ခြင်း၊ မူးယစ်ဆေးဝါး ရောင်းဝယ်ဖောက်ကားမှုသတင်းသိရှိသူ မည်သူမဆို သမ္မတရုံးသို့ တိုက်ရိုက်သတင်းပေးတိုင်ကြားနိုင်ရန် ဌာနတစ်ခု ဖွင့်လှစ်နိုင်ခြင်းတို့သည်လည်း ယခုနှစ်အတွင်း ပြည်သူအများစု အားပေးထောက်ခံမှုရရှိခဲ့သည့် ဦးဝင်းမြင့်၏ စွမ်းဆောင်မှုများ ဖြစ်သည်။

ယင်းအပြင် အဂတိလိုက်စားမှု၊ မြေယာပြဿနာတို့နှင့်ပတ်သက်၍လည်း ဦးဝင်းမြင့်သည် အလေးထားကြောင်း ပြသခဲ့သလို ဝန်ထမ်း လစာတိုးခြင်း၊ အနိမ့်ဆုံးလုပ်အားခတိုးမြှင့်ပေးခြင်း၊ တောင်သူလယ်သမားများအတွက် စိုက်ပျိုးစရိတ်ချေးငွေတိုးမြှင့်ပေးခြင်း စသည်တို့ကိုလည်း လုပ်ဆောင်နိုင်ခဲ့သည်။

ရွေးကောက်ပွဲ ကတိကဝတ်များ ဖြည့်ဆည်းပေးမှုတွင် အားနည်းချက်များစွာ ရှိနေခြင်း၊ အမှားအယွင်းများရှိနေသည့်အပြင် စွမ်းဆောင် ရည်ပိုင်းတွင် အများစိတ်ကျေနပ်မှုမရရှိသည့် တိုင်းဒေသကြီးဝန်ကြီးချုပ်အချို့၊ ပြည်ထောင်စုဝန်ကြီးအချို့အား ၎င်းတို့ထက် ပိုခေတ်မီ၊ ပိုတော်၊ ပိုငယ်ရွယ်၊ ပိုဖျတ်လက်သွက်လက်သော လူလတ်၊ လူငယ်များဖြင့် အစားထိုးခန့်ထားရန် ဝိုင်းဝန်းဝေဖန်ထောက်ပြ အကြံပြုမှုများကို လျစ်လျူရှုထားခြင်းတို့ကြောင့် လက်ရှိအစိုးရအပေါ် ပညာတတ်မဲဆန္ဒရှင်အများစုက စိတ်ပျက်စပြုလာချိန်တွင် သမ္မတဦးဝင်းမြင့်၏ ပြုပြင်ပြောင်းလဲရေး လုပ်ဆောင်မှုများက အာဏာရပါတီနှင့် အစိုးရ၏ဂုဏ်သိက္ခာကို အတိုင်းအတာတစ်ခုအထိ အထောက်အပံ့ဖြစ်စေခဲ့သောကြောင့် ယခုနှစ်အတွင်း နိုင်ငံရေးနယ်ပယ်ရှိ အုပ်ချုပ်ရေးကဏ္ဍ ကိုယ်စားပြု ထူးခြားထင်ရှားသူတစ်ဦးအဖြစ် ရွေးချယ်လိုက်ရခြင်းဖြစ်ပါသည်။

You may also like...

Leave a Reply

Your email address will not be published. Required fields are marked *