သံမဏိနှင်းဆီ ဒေါ်အောင်ဆန်းစုကြည်

ရှစ်လေးလုံး အရေးတော်ပုံကို အကြမ်းဖက်ဖြိုခွင်းခြင်းအပါအဝင် နိုင်ငံသားများကို တင်းကျပ်ကျပ်စွာဖိနှိပ်အုပ်ချုပ်ခဲ့သော စစ်အစိုးရအပေါ် ချမှတ်ပိတ်ပင်ခဲ့သော ပိတ်ဆို့မှုများ၊ ဝေဖန်ပြစ်တင်မှုများထက်ပင် ပိုကြီးမားနေသည်ဟု မှတ်ချက်ပြုနေသည့် နိုင်ငံတကာ ဖိအားများရော ပြည်တွင်းရှိ သဘောထားတင်းမာသူအုပ်စုများ၏ ဖိအားများကိုပါ ကြံ့ကြံ့ခံရင်ဆိုင်ကာ မိမိယုံကြည်ရာလမ်းပေါ်တွင် တစ်စိုက်မတ်မတ် လျှောက်လှမ်းနေသူ နိုင်ငံတော်အတိုင်ပင်ခံ ဒေါ်အောင်ဆန်းစုကြည်ကို ယခုနှစ် နိုင်ငံရေးနယ်ပယ်၏ အငြင်းပွားဖွယ်မရှိ ထူးခြားထင်ရှားသူ တစ်ဦးအဖြစ် ရွေးချယ်လိုက်ပါသည်။

ရခိုင်ဒေသတွင် လူ့အခွင့်အရေးဖောက်ဖျက်မှုများ ကျူးလွန်ခဲ့သည့် တပ်မတော်အပေါ် တားမြစ်၊ ဝေဖန်မှုမရှိခြင်း သို့မဟုတ် အကာအကွယ်ပေးထားသကဲ့သို့ ဖြစ်နေခြင်းကြောင့် နိုင်ငံတကာအသိုင်းအဝိုင်းက ပုဂ္ဂိုလ်ရေးဆန်သည့် ပြစ်တင်ဝေဖန်မှုများစွာ ရင်ဆိုင်ရခြင်း၊ လူ့အခွင့်အရေးဆိုင်ရာ ပေးအပ်ချီးမြှင့်ထားသော ဆုများစွာ ပြန်လည်ရုပ်သိမ်းခံရခြင်း၊ နိုင်ငံတကာဆွေးနွေးပွဲများ တက်ရောက်သည့်အခါတိုင်း နိုင်ငံအချို့မှ အစိုးရအကြီးအကဲအချို့၏ ပြစ်တင်ဝေဖန်မှု၊ သတင်းမီဒီယာအချို့၏ အပြစ်တင်သံမကင်းသည့် မေးခွန်းထုတ်မှုများကို မကြောက်မရွံ့၊ မတုန်မလှုပ် ရင်ဆိုင်ဖြေကြားနိုင်ခဲ့ခြင်း၊ ဆုတံဆိပ်များ ပေးအပ်ချီးမြှင့်ခံရခြင်းကို မမက်မောကြောင်း၊ ရုပ်သိမ်းခံရသည်ကိုလည်း ဂရုမထားကြောင်း ပြောဆိုမှုများမှာလည်း ဒေါ်အောင်ဆန်းစုကြည်၏ စိတ်ဓာတ်အင်အားကြီးမှုကို ဖော်ညွှန်းခဲ့သည်။

အထူးသဖြင့် ရခိုင်ဒေသပြဿနာနှင့် ချိတ်ဆက်နေသော အကြောင်းအရာမှန်သမျှ မြန်မာနိုင်ငံအပေါ် ပြစ်တင်ဝေဖန်ရာတွင် အကျယ်လောင်ဆုံးနှင့် အင်အားအကြီးဆုံး ဦးဆောင်လှုပ်ရှားနေသည့် အမေရိကန်ပြည်ထောင်စု၏ ဒုတိယသမ္မတ မိုက်ပန့်စ်နှင့် စင်ကာပူနိုင်ငံ တွင် တွေ့ဆုံစဉ် ရခိုင်ပြဿနာအပေါ် ဖိအားပေးမှုပါဝင်သည့် တိုက်တွန်းပြောဆိုမှုအပေါ် ကိုယ့်နိုင်ငံအကြောင်းကို အခြားသူများထက် ပိုနားလည်ကြောင်း၊ ဒုတိယသမ္မတသည်လည်း ထိုသို့ပင်ဖြစ်လိမ့်မည်ဟု ထင်ကြောင်း၊ လူတိုင်းတွင် မတူကွဲပြားသည့်အမြင်များ ရှိနိုင်ကြောင်း၊ မြန်မာနိုင်ငံအပေါ်ရှုမြင်နေသည့် သဘောထားအမြင်များကို ပြောင်းလဲသင့်ကြောင်း၊ တစ်ဦးနှင့်တစ်ဦး ပိုနားလည်ရန်သာ ကြိုးစားသင့်ကြောင်း တုံ့ပြန်ပြောဆိုခဲ့ခြင်းမှာ ထင်ရှားသည်။

အခြားတစ်ဖက်တွင်မူ ဒေါ်ဆောင်ဆန်းစုကြည်၏ သတင်းမီဒီယာလောကအပေါ် ထားရှိသည့် သဘောထား သို့မဟုတ် သိမြင်နားလည်မှု နှင့်ပတ်သက်၍ ဝိဝါဒကွဲပြားဖွယ်ရာများလည်း ရှိခဲ့သည်။ ဂျပန်သတင်းဌာန NHK နှင့် တွေ့ဆုံမေးမြန်းခန်းတစ်ခုတွင်လည်း ရိုက်တာသတင်းထောက်နှစ်ဦး ဖမ်းဆီးထောင်ချခံရခြင်းသည် လွတ်လပ်စွာ သတင်းရယူခွင့်ကို ကန့်သတ်ခြင်း၊ ဒီမိုကရေစီနည်းမကျခြင်းနှင့် ပတ်သက်သော မေးခွန်းကိုလည်း ယင်းသတင်းထောက်နှစ်ဦးမှာ ရခိုင်သတင်းရေးသား၍ အဖမ်းခံရခြင်းမဟုတ်ဘဲ ဥပဒေချိုးဖောက်ခြင်းကြောင့် အဖမ်းခံရခြင်းဖြစ်ကြောင်း ပြန်လည်ဖြေကြားမှုသည် ပြည်တွင်း၊ ပြည်ပသတင်းမီဒီယာလောကကို အထူးအံ့ဩမင်တက်သွားစေခဲ့သည်။

ထို့အပြင် သမ္မတရှေ့မှောက်တွင် ကျမ်းသစ္စာကျိန်ဆိုခဲ့သော သတင်းမီဒီယာကောင်စီဝင်များအား ဂုဏ်ပြုညစာစားပွဲတွင် မီဒီယာသမားများ အခြေခံသည့် ပလက်ဖောင်း သို့မဟုတ် သုံးစွဲသည့် ယာဉ်တစ်ခုသာဖြစ်သည့် ဆိုရှယ်မီဒီယာ Social Media  နှင့် Mainstream Media ပင်မမီဒီယာ နှစ်ခုအကြား ကွာခြားချက်၊ သတင်းရယူခွင့် Access to Information နှင့် သတင်းအချက်အလက်သိပိုင်ခွင့် Rights to Know ခြားနားချက်တို့အပေါ် နားလည်သဘောပေါက်မှု လွဲချော်နေသော ဒေါ်အောင်ဆန်းစုကြည်၏ မေးခွန်းများနှင့်ပတ် သက်၍လည်း သတင်းမီဒီယာလောကအတွင်း ပွဲဆူသွားစေခဲ့သည်။

ရုပ်ရှင်သည် လူသားများအပေါ် ဩဇာလွှမ်းနိုင်မှု ကြီးမားကြောင်း မှတ်ချက်စကားကို ယခုနှစ်အတွင်း ကျင်းပသည့် ၂၀၁၆ခုနှစ်အတွက် မြန်မာ့ရုပ်ရှင်ထူးချွန်ဆုပေးအပ်ချီးမြှင့်ပွဲသို့ ကိုယ်တိုင်တက်ရောက်၍ မိန့်ခွန်းပြောရာတွင် ထည့်သွင်းပြောဆိုခဲ့ပြီး ၂၀၁၅ ရွေးကောက်ပွဲ မဲဆွယ်ရာတွင် အထောက်အကူပြုခဲ့သည့် ရုပ်ရှင်လောကသားများနှင့် ပို၍ ရင်းရင်းနှီးနှီး အထိအတွေ့၊ အဆက်အဆံများခဲ့သည်။

စွမ်းဆောင်ရည်ပိုင်းဆိုင်ရာ အငြင်းပွားဖွယ် ကိစ္စရပ်များရှိနေသော တိုင်းဒေသကြီး အစိုးရအဖွဲ့ ဝန်ကြီးချုပ်အချို့၊ ပြည်ထောင်စုဝန်ကြီးအချို့နှင့်ပတ်သက်၍ ဒေသခံပြည်သူနှင့် နိုင်ငံအကျိုးထက် ပုဂ္ဂိုလ်ရေး ငဲ့ညှာ၊ ထောက်ထား၊ အရေးပေးမှု များလွန်းသည်ဟု ဝေဖန်ပြောဆိုမှုများ၊ ပုဂ္ဂလိကသတင်းမီဒီယာလောကနှင့် အဆင်မပြေသည့် သွင်ပြင်လက္ခဏာများ၊ ခေါင်းမာ၊ တဇွတ်ထိုးနိုင်သူ၊ ချုပ်ကိုင်သူ၊ ဒီမိုကရေစီအာဏာရှင်အဖြစ် ကင်ပွန်းတပ်မှုများ ရှိနေလင့်ကစား အာဏာလက်လွှတ်ထားသည့် သဘောထားတင်းမာသူတို့ စနစ်တကျ ဖွဲ့စည်းထားသည့် အုပ်စုအမျိုးမျိုး၏ ပြည်တွင်းဖိအားများ၊ အရည်အချင်းလိုအပ်ချက်ရှိနေသော အစိုးရအဖွဲ့ကိုယ်စား အရာရာတာဝန်ယူ၊ တာဝန်ခံနေရခြင်းများ၊ အကာအကွယ်ပေးနေမှန်းမသိဘဲ အရေးမပါသည့် ပုဂ္ဂိုလ်ရေးစရိုက်လက္ခဏာများကို အထအနကောက်၍ နောက်ကွယ်မှ လက်သီးပုန်းထိုးမှုများ၊ ရခိုင်ဒေသအပေါ်အခြေခံသည့် နိုင်ငံတကာဖိအားများ၊ ပုဂ္ဂိုလ်ရေးဆန်လွန်းသည့် သဘောထားသေးသေး ဆုတံဆိပ်ရုပ်သိမ်းမှုများ စသည့်အခက်အခဲ၊ အကျပ်အတည်း၊ စိန်ခေါ်မှုပေါင်းများစွာကို အန်တုရင်ဆိုင်နေနိုင် သောကြောင့် ယခုနှစ်အတွင်း နိုင်ငံရေးလောက၏ ထူးခြားထင်ရှားသူအဖြစ် ရွေးချယ်လိုက်ရခြင်းဖြစ်ပါသည်။

You may also like...

Leave a Reply

Your email address will not be published. Required fields are marked *