ပင်စင်လစာများတိုးရန် စီစဉ်

နေပြည်တော်၊ ဒီဇင်ဘာ ၇

နိုင်ငံ့တာဝန်များကို ထမ်းဆောင်ပြီးနောက် ပင်စင်လစာရယူနေကြသော ဝန်ထမ်းဟောင်းများအတွက် ပင်စင်လစာ  တိုးရန် စီစဉ်သုံးသပ်နေပြီး ၂၀၁၉ ခုနှစ်အတွင်း ပင်စင်လစာတိုးနိုင်မည်ဟု မျှော်လင့်ထားကြောင်း စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်းက မီဒီယာများကို ပြောကြားသည်။

“ပင်စင်ဝန်ထမ်းလစာကို တိုးဖို့အတွက် ဘယ်လိုနည်းနဲ့ တိုးရင်ကောင်းမလဲဆိုပြီး သုံးသပ်နေတယ်။ ပေးနိုင်မယ့် ခံနိုင်ရည်အပေါ်မှာ သုံးသပ်ပြီးရင်တော့ အဖြေထွက်လာမှာပေါ့။ နှစ်နဲ့ ချီပြီးတော့  မကြာပါဘူး။ သိပ်မကြာအောင်တော့  လုပ်နေတယ်။ ၂၀၁၉ ထဲမှာ ဖြစ်နိုင်ပါတယ်” ဟု ၎င်းက ဆိုသည်။

ဒီဇင်ဘာလ ၇ ရက်နေ့တွင် ကျင်းပသော အမျိုးသားလွှတ်တော်အစည်းအဝေး သို့ရောက်ရှိလာသည့် ဒုတိယဝန်ကြီးက အထက်ပါအတိုင်း ပြောကြားခြင်းဖြစ်သည်။

အစည်းအဝေးတွင် စစ်ကိုင်းတိုင်းဒေသကြီး မဲဆန္ဒနယ်အမှတ် (၅) မှ ဦးရဲထွဋ်က အစိုးရရာထူးအဆင့်ဆင့်တွင် တာဝန်ထမ်းဆောင်ခဲ့ကြသော အငြိမ်းစားဝန်ထမ်းများ၏ ပင်စင်လစာများကို မည်သည့်အချိန်တွင် အငြိမ်းစားယူခဲ့သည် ဖြစ်စေ ရာထူးအဆင့်နှင့် လုပ်သက်တူညီပါက တူညီစွာခံစားခွင့်ပြုနိုင်ရန် အစီအစဉ် ရှိ မရှိ မေးမြန်းခဲ့ခြင်းဖြစ်ပြီး ဝန်ကြီးဌာန အနေနှင့် နိုင်ငံ၏ဘဏ္ဍာရေးအခြေအနေ၊ အငြိမ်းစားဝန်ထမ်းအင်အား၊ လစဉ်ကျခံသုံးစွဲလျက်ရှိသည့် ပင်စင်လစာနှင့် ဆုကြေးစရိတ် အပါအဝင် ငွေကြေးဖောင်းပွမှုနှုန်းများကို သုံးသပ်ဆောင်ရွက်ရမည်ဖြစ်ကြောင်း ဒုဝန်ကြီးက ရှင်းပြသည်။

ပင်စင်လစာများသည် လစာနှင့် လုပ်သက်အပါအဝင် ရာထူးဖြင့် တွက်ချက်ရရှိထားသော်လည်း လစာငွေနည်းပါးသည့်အချိန်က ဝန်ထမ်းနှင့် လစာငွေတိုးပြီးမှရရှိသည့် ပင်စင်လစာမတူညီသောကြောင့် ယခင်ဝန်ထမ်းဟောင်းများကို ပင်စင်လစာ တိုးပေးသင့်ကြောင်း ဦးရဲထွဋ်က လွှတ်တော်တွင် ပြောကြားသည်။

အငြိမ်းစားများ၏ ပင်စင်လစာကို ၂၀၁၈ ခုနှစ် ဧပြီလတွင် တိုးမြှင့်ခဲ့သည့် နိုင်ငံ့ဝန်ထမ်းလစာနှင့် အခြေခံ၍ တိုးမြှင့်ပေးမည်ဆိုပါက ကျပ် ၂၃၀ ဘီလီယံ ထပ်မံသုံးစွဲရမည်ဖြစ်ကြောင်း၊ လက်ရှိ ယခုနှစ် ဩဂုတ်လ ၃၁ ရက်အထိ ပင်စင်စား အငြိမ်းစားဦးရေမှာ ၈၁၂,၉၆၆ ဦးရှိပြီး နှစ်စဉ်ပင်စင်စားအင်အား ၃၅,၀၀၀ ခန့် တိုးတက်နေကြောင်း ဒုတိယဝန်ကြီးက ရှင်းပြသည်။

မှတ်တမ်းများအရ နှစ်စဉ်ပင်စင်စားဝန်ထမ်း ၄၀,၀၀၀ ကျော် တိုးလာပြီး ၅၀၀၀ ခန့် လျော့နည်းနေသည်ကို တွေ့ရှိနေရကြောင်း ၎င်းက ဆိုသည်။         

You may also like...

Leave a Reply

Your email address will not be published. Required fields are marked *